गलाती 5 - ह्योल्मोमास्यीकागी ओहराङला राहङवाङ नाङदी येहबा 1 राहङवाङगी तेहन्दाला मास्यीकागी ओहराङला राहङवाङ जे नाङग्यो येह। ओ़ह सोङबे ख्या राहङवाङ मिहया़ यिहम्बा ओहले ख्यागी राहङगी राहङवाङला या़हबु पेहती सी़दे ज़्या़दोङ। येहपाराङ छ्य़े-ठिमगी चो़ला ज्युल्दी तेहती योक्पु पेहच्ये माहछोल! 2 ङाह पावलगीॱराङ ख्याला माएँ, ख्याया़गी स्या-ताक पेह च्यू़सीनमाना मास्यीका लाहमले ख्याया़ला च्यिॱआङ खेप्साङ ओहङज्ये म़ेह। 3 यिहम्बा, स्या-ताक पेहॱराङ कोहएँ माएँया़ला ङाहगी ठो़ पेहती माउ येह, ख्यागी स्या-ताक पेह फान्ज्यो नि ख्यागी छ्य़े-ठिमकी थाम्ज्यी काया़ ची़ॱराङ कोहएँ। 4 छ्य़े-ठिम ची़दे किन्ज्योकी दिनला च्यिॱआङ क्येन म़ेहबाकी मिह डोज्ये छोल्गेया़ ख्या मास्यीका ङ्याम्बु खा फे़-सिहन्दी येह। किन्ज्योकी काटीन लाहमले ख्या ज्यिबुराङ था़-रिहङबु काहल्दी येह। 5 च्यिबेमाना किन्ज्योकी थुगीॱराङ ङ्यिहला यिह-छ्य़े लाहमले किन्ज्योकी दिनला च्यिॱआङ क्येन म़ेहबाकी मिह ज़ो नाङगे रे़हवाकी लाहम कू़हदे तेहच्येला रो़हराम जे नाङगे यिहम्बा। 6 स्या-ताक पेहॱनाङ, मेहबेॱनाङ मास्यीका येशूला तेहपा पेहकें मिहया़की पाहरक्यीला सुॱआङ ख्येपार मेहयोहङगे। यिहॱनाङ कोहकेन्की स़ेह नि च्यिमी च्यी़राङ येह ओह– चेवा लाहमले ल़ेह पेहकेन तेहपा यिहम्बा। 7 यिहन्ज्ये नि ख्या छ्योङज्येनी या़हबुॱराङ छ्योङ तेहक्यो येहकें। सुगी ख्याला तेहन्दामकी ताम ङ्यिहन्ज्येला का़बा? 8 ख्याया़ला क़े क्याहप नाङगे किन्ज्योगी दि ओहम्गेन्की ल़ेहया़ जे नाङग्यो मिहन। 9 सिपाज्यी खमिर लू़दे चाम्बा च्योप्सीमाना खोगी थाम्ज्यीराङ चाम्बाला फोर च्य़ूगे। 10 ख्याया़गी ङाहगी लोप्क्योकी लोप्च्युङया़ म़ेदी लेहमेनॱराङ लोप्च्युङया़ ची़दे डोज्ये म़ेह म़ेदी ङाह चो़वो ङ्याम्बु तेहपा पेहको येह। ख्याया़ला गो़ ली़दे लेहमेनॱराङ लाहम चोक्पा तेन्गेया़ला सु यिहॱनाङ किन्ज्योगी ङ्य़ेहबा काल नाङज्ये येह। 11 आदा-नो़ह दाङ आज्यी-नुहमुया़, ताहन्दाॱआङ ङाहगी स्या-ताककी तेहन्दाला लोप्केॱराङ येहसीमानानी ङाहला मिहया़गी च्यिबे तुहक्पु तेर्केॱराङ येहबा ले? दि केच्या तेहम्बाराङ यिहन्सीमानानी मास्यीकागी क्याहङस्यीङ लाहमले थार्पा ज्योर्के माएँ ताम ङाहगी मिहया़ला स्येकेमु सुगीॱआङ टाह पेहच्ये म़ेहबा येहकें। 12 ख्याला गो़ कोर च्य़ूगेनया़गीनी स्या-ताक च्यी़राङ च्यिबे पेहच्ये लेह, रेबेॱराङ प्रा़हना ओहङज्ये येहकें। 13 आदा-नो़ह दाङ आज्यी-नुहमुया़, ख्यानी राहङवाङगी तेहन्दाला क़े क्याहप्क्यो यिहम्बा। यिहॱनाङ दि राहङवाङला तिहक्पाकी ल़ेहया़की तेहन्दाला चाल माहती। यिहॱनाङ चेवा पेहती च्यी़गी च्यी़ला या़हबु स्याहप्तो स्यी़हदोङ। 14 च्यिबेमाना थाम्ज्यी छ्य़े-ठिम, च्यिमी च्यी़राङ सुङला छाङबु काहल्दी येह, “ख्येगी राहङ ख्यिम्जीला राहङला ल़ेहमुराङ चेवा पेहतोङ।” 15 यिहॱनाङ ख्या च्यी़गी च्यी़ला आ़-ताप्के दाङ ङ्यिहप्के पेहसीन मानानी जेम्बु पेह, ख्या राहङ नाहङदुङ लाहमलेॱराङ तोहङदी डो माहकोह-च्यु। ङ्येहम्बा नाम्स्यी दाङ नाम्पार-ताहक्पा थुगी सेदो 16 यिहॱनाङ ङाह ख्याला माएँ, नाम्पार-ताहक्पा थु लाहमले राहङगी मिहजी ताङदोङ। दि ल़ेहमु पेहती ख्येगी ज़ुबुगी चोक्पा सेम्बा छाङबु पेहच्ये म़ेह 17 च्यिबेमाना ज़ुबुकी चोक्पा सेम्बागी नाम्पार-ताहक्पा थुला टाह पेहकें ओहले नाम्पार-ताहक्पा थुगी ज़ुबुकी चोक्पा सेम्बाला टाह जे नाङगे। दि ङ्यी़ राहङ नाहङदुङ टाह यिहम्बा ओहले ख्याया़गी पेहच्ये छोल्ग्योकी ताम ओहङ मी़हखुएँ। 18 यिहॱनाङ ता़ह ख्या नाम्पार-ताहक्पा थुगी तेन नाङग्योकी लाहमला डोलु-तेहलु पेहक्यो यिहन्सीमानानी ख्या ता़हनी छ्य़े-ठिमकी ओङ चो़ला ज्युल्दी म़ेह। 19 ओहराङ मिहगी पेहच्ये सेम क्येएँकी चोक्पा ल़ेहया़ दिया़राङ यिहम्बा दि सुगी माॱनाङ थोङ ख़ूएँ– तेहच्या, मेहचाङा, दाङ छारा ल़ेहया़ पेहकें, 20 कुया़ला छ्येपा फुल्गेन, ङ्येहन क्याहप्केन, मिहला टाह पेहकेन, ठुक्स्यी सिहङदा पेहकें, ठादो पेहकेन, स्यिहताङ ङाहर्क्याल पेहकें, राहङ च्यी़राङ गो़ थेन्ज्ये छोल्गे, मिहया़ला ठू़ च्य़ूएँ, छो़बा ज़ोएँ, 21 लेहमेन मिहया़ याहरक्यी काहल्ग्यो थोङगेमु सेम छी़गे, छ्याङसीवा, याम-थेर्पु लुया़ लेहन्दी छ्याम्गे, ज़िगे से़हया़ थुङदी छ्येउ-छ्येंमु पेहती खाम्साङ-ङ्याहम्साङ पेहकें ओहले लेहमेनॱआङ दि ल़ेहमुराङ तिहक्पागी ल़ेहया़ पेहकेन मिहया़ किन्ज्योगी क्याहल्सी नाहङला स्य़ूहज्येला ओङ ज्योर्च्ये म़ेह। दिगी तेहन्दाला ङाहगी तोहङलेॱआङ ख्याया़ला ठो़ पेहती माक्यो येहकें ओहले ताहन्दाॱआङ माएँराङ येहबा। 22 यिहॱनाङ नाम्पार-ताहक्पा थु लाहमले राहङगी डोलु-तेहलु पेहकें मिहया़गी मिहलीला दि ल़ेहमु सेदोया़ थोङगे यिहम्बा– मिहला चेवा पेहकें, सेम काहसो पेहकें, स्य़िहदेला तेहकें, ना़स्यीङ छ्यिम्बु पेहकें, निङज्यी पेहकें, या़हबु पेहकें, यिह-छ्य़ेबु, 23 स्यिहवा, राहङगी सेम टिहला ज़्या़गेन। दि ल़ेहमु तामया़ला टाह पेहकेन्की लेहमेन च्यिॱआङ छ्य़े-ठिमया़ म़ेह। 24 खुङया़, का़हन्दी मास्यीका येशूकी मिहया़ यिहम्बा, ओ़हया़गी तिहक्पा पेहच्ये सेम क्येएँगी राहङगी पेहताङया़ला ज़ुबुकी पेहच्ये छोल्गेन्की पेह मी़हसीहएँकी ल़ेहया़ दाङ सेम्बाया़ ङ्याम्बुराङ क्याहङस्यीङला च्याङ सिहन्दी येह। 25 का़हलेॱआङ ओहराङ नाम्पार-ताहक्पा थु लाहमलेॱराङ थार्के यिहन्सीमानानी ओहराङ नाम्पार-ताहक्पा थु लाहमले राहङगी डोलु-तेहलुया़ पेह कोहएँ। 26 ओहराङगी च्यी़गी च्यी़ला छ्य़ेन्दो तेन्गेन्की ल़ेहया़ पेहच्ये मेहयोहङगे, मिहला स्यिहताङ लाहङ च्य़ूज्ये मेहयोहङगे ओहले ठादो पेहच्ये मेहयोहङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.