गलाती 4 - ह्योल्मो1 ङाहगी माज्ये छोल्ग्योकी ताम दि ल़ेहमु यिहम्बा, फास्यी ज्योर्केन्गी पुह ताहन्दा पेहजाॱराङ येहसीमाना खोगी ताहन्दाॱराङ राहङ आबाकी फास्यीया़ ज्योर मी़हखुएँ। खो राहङ आबाकी थाम्ज्यी क्युहकी ताहक्पु यिहम्बा। यिहन्दी सुङनाङ ताहन्दा खो योक्पु म़ेदी च्यिॱआङ ख्येपार म़ेह। 2 आबागी खोला फास्यीगी ताहक्पु ज़ो कोहएँ म़े ज़्या़क्योगी ती़हजी माहलेप थु खोला चि लेहङगेन दाङ चारा पेहकेन मिहया़गी चो़ला खो ओहङगेन। 3 मास्यीका फेप नाङगे म़ेदी तोहङले ओहराङॱआङ ओ़ह ल़ेहमुराङ येहकें ओहले जाम्बुलीङला ओङ छ्य़ेगे नाम्स्यीया़गी ओङ चो़ला ज्युल्दी तेहती येहकें। 4 यिहॱनाङ ता़ह किन्ज्योकी ती़हजी लेप फान्ज्यो किन्ज्योगी राहङकी स़ेबुला ताङ नाङसीन। मिहरो पी़हमी-पेहजा लाहमले ठुङ नाङसीन ओहले छ्य़े-ठिम लाहमलेॱराङ ठुङ नाङसीन। 5 छ्य़े-ठिमकी ओङ चो़ला येहकें मिहया़ला ओ़ह ङो़ले खा फ़ेदी किन्ज्योकी छार्क्यीन ज़ो नाङज्येलाॱराङ मिहरोगी मास्यीकाला ताङ नाङग्यो यिहम्बा। 6 ओहराङ किन्ज्योदीॱराङ छार्क्यीन यिहम्बा म़ेदी तेन्ज्येला किन्ज्योगी राहङ स़ेबुकी थु ओहराङगी लोला ताङ नाङसीन। ओहले ओ़ह थुगीॱराङ ओहराङ लो लाहमले “ओ़ अब्बा, ओ़ याहप,” म़ेदी क़े क्याहप नाङगे यिहम्बा। 7 ओ़ह सोङबे, ता़ह यिहन्ज्यु ख्या योक्पु मिहम्बा, किन्ज्योकी छार्क्यीन यिहन। ओ़ह सोङबे छार्क्यीन यिहन म़ेदी मासीमानानी ख्या ता़ह यिहन्ज्यु फास्यी ज्योर्केन्की मिहया़ॱआङ काहल्सीन। 8 तोहङ तोहङले ख्याया़गी किन्ज्योला ङोह मे़हस्येएँमु ख्या ल्हाया़गी लाबु काहल्दी येहकें। ओ़ह ल्हाया़दी किन्ज्यो मिहम्बा। 9 यिहॱनाङ ता़हनी ख्यागी किन्ज्योला ङोह स्य़ेदी येहबा पे यिहॱना़: किन्ज्योगीॱराङ ख्याला ङोह ख्येन्दी येहबा ओ़ह सोङबे ख्या च्यिबे येहपाराङ ओङ म़ेहबा दाङ तेहन्दा म़ेहबा स्यिती काम्बु तामया़गी तिङदा तिङ डोएँ? ख्या येहपाराङ च्यिबे ओ़ह से़हया़गी योक्पु डोज्ये सेम्बा पेहकें? 10 ख्यागी नि ज्यिबुराङ चा़ छ्यिम्बु पेहती ङ्यिहमा, दावा, ती़हजी, दाङ लोहया़ गा ची़उ दुबा। 11 ख्यागी तेहन्दाला ङाहगी कादुप च्येती पेहक्योकी ल़ेहया़ स्यिती काम्बुला थोरो काहल्बा नि म़ेदी ङाहला ज्यिबुराङ तुहङाल लाहङगेॱराङ येहबा। 12 आदा-नो़ह दाङ आज्यी-नुहमुया़, ङाह ख्याला ओहर-छ्य़े स्युह येहबा, ङाह ल़ेहमुराङ पेहती ख्याया़ॱआङ छ्य़े-ठिमलेगी राहङवाङ पेहती तेहतोङ च्यिबेमाना ङाहॱआङ ख्याया़ ल़ेहमु काहल्दी येह। ख्याया़गी ङाहला च्यिॱआङ ऩे क्याल्दी म़ेह। 13 ख्याया़ला क्यी़हराङ येह, थाम्ज्यी म़ेदी तोहङले ख्यासाला या़हबु लेहङगु स्येकेमु ङाह नेहपा येहकें। 14 ङाह नेहपा काहल्ग्योकी ती़हजी ओ़ह ख्याया़गी तेहन्दाला ङ्याहम्छे च्यी़ यिहन्गे, यिहॱनाङ ख्याया़गी ङाहला क्युक्टो माहबे, ङ्याप्च्यु माहबे यिहन्दी सुङनाङ ख्यागी ङाहला किन्ज्योकी स्यिहङगामकी स्याहप्च्यी च्यी़ला, मास्यीका येशूला ल़ेहमुराङ पेहती ची़नाङ पेहसीन। 15 ओ़ह ती़हजीला ख्या काहजे क़ेहनाङ येहकें, ताहन्दा ओ़ह ख्यागी क़ेहनाङया़ का़हला काहल्बा ले? का़हलेॱआङ ख़ूएँ यिहन्सीमानानी ख्याया़गी राहङगी मी़राङ तेन्दी यिहॱनाङ ङाहला तेर्च्ये येहकें म़ेदी ङाह दिगी पाङबु तेर ख़ूएँ। 16 ताहन्दा ङाहगी ख्याया़ला तेहन्दामकी ताम स्येकेमु च्यि ङाह ख्याया़ती टाह काहल्बा ले? 17 ख्याया़ला राहङ ङो़ले टिह-च्येला चिहन क्याहप्कें मिहया़गी ज्यिबुराङ च्योल्दो तेन्गु दु, यिहॱनाङ ओ़हनी सेम या़हबु थो़दीनी मिहन। ख्यागी ज्यिबुराङ क़ेहनाङ पेहती खुङया़गी तामया़ ङ्यिहन्ज्यु म़ेदी खुङगी ङ्यिह ङो़लेगी ख्याया़ला खा फ़ेज्ये छोल्गु दु। 18 या़हबु तामया़ला निङरु पेहकेन्दी ओ़ह ज्यिबुराङ या़हबु यिहम्बा, यिहॱनाङ ङाह ख्याया़गी पाहरक्यीला येहकेंमु च्यी़राङ ख्यागी निङरु पेहकेन्दीती ओ़ह या़हबु मिहम्बा। 19 ए ङाहगी पेहजाया़, मास्यीकाती ल़ेहमुराङ डोलु-तेहलुया़ ख्याया़गी मिहलीला माहथोङ थु पेहजा क्येएँ ती़हजीला आमागी काह-ठि पेहती सुह ना़गे ओ़ह ल़ेहमुराङ तुहक्पु ताहन्दा ङाहगी ना़गेॱराङ येहबा। 20 ताहन्दा ङाह ओ़हला येहकें यिहन्सीमानानी दि ल़ेहमु ठो़ तेन्दी ताम मा कोहच्ये म़ेहबा येहकें। यिहॱनाङ था़-रिहङबुलेगीनी ङाहगी च्यि पेह ख़ूज्ये ले? ता़ह ङाहनी ज्यिबुराङ थामा थोमे काहल्दी येह। हागार दाङ सारा 21 छ्य़े-ठिमकी ओङ चो़ला तेहच्ये छोल्गेया़गी ङाहला म़ेदोङ ले, च्यि ख्यागी तेहम्बाराङ छ्य़े-ठिमकी तेहन्दाला या़हबु पेहती ङोह स्य़ेदी येहबा ले? 22 च्यिबेमाना छ्य़ेला दि ल़ेहमु प्री़हदी येहबा– अब्राहामदी पुह ङ्यी़ येहकें, च्यी़ यो़मु हागार ङो़दी ओहले लेहमेनदी, सुज्यीदीॱआङ यो़मु माहबेबागी सारा ङो़दी यिहन्गे। 23 यो़मु हागार ङो़गी पुहदी मिहगी राहङगी ज़ोक्योकी च्याहम्दा लाहमले क्येसीन, यिहॱनाङ सारा ङो़गी पुहदी किन्ज्योगी अब्राहाम ङ्याम्बु ज़्या़ नाङग्योकी ताहम्ज्या लाहमले क्येसीन। 24 दि पे-ला त़ेदी ओहराङगी च्यि ह्अ कोह ख़ूएँ मासीमाना, ओ़ह पी़हमी-पेहजा ङ्यी़ ना ङ्यी़गी ताहम्ज्याया़ यिहम्बा। पी़हमी च्यी़दी सीनै लाह लाहमले योक्पुकी तेहन्दाला पेहजा क्येएँदी हागार यिहम्बा। 25 हागार अरब क्याहल-खापकी सीनै लाह यिहम्बा, ओहले ताहङ-तिहरीङकी यरूशलेम ङ्याम्बु ओ़ह दुर ख़ूएँ। च्यिबेमाना राहङगी पेहजाया़ ङ्याम्बु मोहॱआङ छ्य़े-ठिमकी यो़मु काहल्दी येह। 26 यिहॱनाङ लेहमेन पी़हमी साराती स्यिहङगामला येहकेन्गी यरूशलेम यिहम्बा, मोह सुज्यीदीॱआङ यो़मु काहल्दी म़ेह, मोहॱराङ ओहराङकी आमा यिहम्बा। 27 च्यिबेमाना छ्य़ेला दि ल़ेहमु प्री़हदे येहबा, ए पेहजा मेहक्येएँगी आब्दाली पी़हमी, ख्ये काहसो पेहतोङ, ख्येगी सेम तिहङ यिहन्ज्युराङ क़ेहनाङ पेहती क़े तेन्दोङ च्यिबेमाना ख्योवा येहकेन्की पी़हमी म़ेदीनी ख्योवागी क्युरक्यो पी़हमीती गा पुह पोहमोया़ माहङबु येहबा। 28 ए आदा-नो़ह दाङ आज्यी-नुहमुया़, ता़ह इसहाक ल़ेहमुराङ ख्याया़ॱआङ किन्ज्योगी ज़्या़ नाङग्योकी ताहम्ज्याकी चावाया़ यिहम्बा। 29 यिहॱनाङ ओ़ह ती़हजीला काह-ठि पेहती मिहगी राहङगी ज़ोक्योकी च्याहम्दा लाहमले क्येक्योया़गी नाम्पार-ताहक्पा थु लाहमले क्य़ेक्योया़ला तुहक्पु तेर्को येहकें, ताहन्दाॱआङ ओ़हठीॱराङ येहबा। 30 यिहॱनाङ सुङरापगी च्यि सुङ नाङगे? “यो़मु दाङ मोहगी पुहला तेन चाहङदोङ, च्यिबेमाना यो़मुकी पुह सुज्यीदीॱआङ यो़मु माहबेबाकी पी़हमीकी पुह ङ्याम्बु फास्यी ज्योर्च्ये म़ेह।” 31 ओ़ह सोङबे आदा-नो़ह दाङ आज्यी-नुहमुया़, ओहराङ यो़मुकी चावाया़ मिहम्बा, यिहॱनाङ ओहराङनी सुज्यीदीॱआङ यो़मु माहबेबाकी आमाकी चावाया़ गा यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.