गलाती 3 - ह्योल्मोछ्य़े-ठिम दाङ तेहपा 1 ए उल्दुम्बा गलातीया़, ख्याला सुगी मोह क्याहप्पा? ख्यागी मी़गी दिनलाराङ येशू मास्यीकाला क्याहङस्यीङला च्याङग्योकी ताम थिउ-निहउ पेहती प्रा साल्ग्यो येहकें। 2 ङाह ख्याला ताम च्यी़राङ टी़हगे ङाहला म़ेदोङ, ख्यागी नाम्पार-ताहक्पा थु, छ्य़े-ठिम ची़क्यो सोङबे ज्योर्पानी या़हबु लेहङगु ङ्यिहन्दी तेहपा पेह फान्ज्यो ज्योर्पा? 3 ख्या च्यिबे दि ल़ेहमु उल्दुम्बा काहल्ग्यो यिहम्बा? ख्यागी राहङगी मिहली किन्ज्योकी थु लाहमले छ़ूदी च्यि ताहन्दादी राहङ ज़ुबुकी स्युकगीॱराङ छाङबु पेहच्ये छोल्गे? 4 ख्यागी ओहजे तुहक्पु ना़क्योदी च्यि स्यिती काम्बुलाराङ ना़क्यो यिहम्बा ले? ङाहला रेहवा येहबा तेहम्बाराङ ओ़ह स्यिती काम्बु काहल्दी म़ेह। 5 किन्ज्योगी ख्याला नाम्पार-ताहक्पा थु नाङदी ख्यागी पाहरक्यीला याहम्जेन छ्येवागी छ्या़लेया़ जे नाङसीन। च्यि दि थाम्ज्यी ख्यागी छ्य़े-ठिम ची़क्यो सोङबे किन्ज्योगी जे नाङग्यो यिहम्बानी या़हबु लेहङगु ङ्यिहन्दी तेहपा पेहक्यो सोङबे यिहम्बा? 6 अब्राहामलाराङ त़ेदोङ, “खोगी किन्ज्योला यिह-छ्य़े पेहक्यो सोङबे किन्ज्योगी खोला मिह टाहङबु ज़ो नाङसीन।” 7 ओ़ह सोङबे ख्यागी दि ताम ह्अ के़हदोङ, सु सुगी किन्ज्योला तेहपा पेहकें, खुङया़ॱराङ अब्राहामकी छार्क्यीनया़ यिहम्बा। 8 किन्ज्योगी लेहमेन क्यिहपाकी मिहया़ला तेहपा लाहमलेॱराङ च्यिॱआङ क्येन म़ेहबाकी मिह ज़ो नाङज्ये येह माएँ ताम सुङरापगी तोहङ यिहन्ज्युराङ थोङदी अब्राहामला “ख्ये लाहमलेॱराङ थाम्ज्यी क्यिहपाकी मिहया़गी मेलाम ज्योर्च्ये येह” माएँ या़हबु लेहङगु प्रा साल्सीन। 9 अब्राहामगी किन्ज्योला तेहपा पेहतीराङ मेलाम ज्योर्सीन। ओ़ह ल़ेहमुराङ पेहती ख्यागीॱआङ तेहपा पेहती अब्राहाम ङ्याम्बुराङ मेलाम ज्योर सिहन्दी येह। 10 छ्य़े-ठिमकी ल़ेहया़ थो़ला यिह छ्य़ेगे मिह थाम्ज्यीला मे़मु सू़हदे येहबा, च्यिबेमाना छ्य़ेला दि ल़ेहमु प्री़हदे येहबा, “छ्य़े-ठिमला प्रुहक्योकी थाम्ज्यीराङ काया़ मी़हचीगे दाङ मिहङ्यीहन्गे मिह थाम्ज्यीला मे़मु सू़हज्ये येह।” 11 किन्ज्योगी ज़ी़लुला छ्य़े-ठिम लाहमले सु मिहज्यीॱआङ च्यिॱआङ क्येन म़ेहबा पेहती तेह मी़हखुएँ माएँ तामनी छ्यिसाल-नाहङसालॱराङ येह। च्यिबेमाना “च्यिॱआङ क्येन म़ेहबा मिह तेहपा लाहमलेॱराङ थार्च्ये येह।” 12 तेहपा छ्य़े-ठिम म़ेदी ज्यिबुराङ ख्येपार येहबा। यिहॱनाङ छ्य़ेला दि ल़ेहमु प्री़हदे येहबा, “छ्य़े-ठिम थाम्ज्यी ची़गे मिह ओ़ह लाहमलेॱराङ थार्च्ये येह।” 13 ओहराङगी छ्य़े-ठिम ची़ मा़हखुबा सोङबेॱराङ ओहराङ थो़ला फो़क्योकी थाम्ज्यीराङ मे़मुया़ मास्यीका राहङगीराङ खुर नाङदी छ्य़े-ठिमकी मे़मु लाहमले ओहराङला खा फे़ नाङसीन, च्यिबेमाना “क्याहङस्यीङला च्याङदी स्यिएँ थाम्ज्यीला मे़मु सू़हक्यो ओहङगे” म़ेदी प्री़हदे येहबा। 14 अब्राहामला नाङग्योकी मेलाम मास्यीका येशू लाहमले लेहमेन क्यिहपाकी मिहया़गी ज्योर ख़ूज्यु ओहले ओहराङगी तेहपा लाहमले किन्ज्योगी ज़्या़ नाङग्योकी ताहम्ज्या नाम्पार-ताहक्पा थु ज्योर ख़ूज्यु म़ेदीराङ मास्यीकागी ओहराङला थार च्य़ू नाङसीन। 15 आदा-नो़ह दाङ आज्यी-नुहमुया़ पे यिहॱना़: ओहराङ मिहगी तेहन्दालाराङ ताम माज्ये, मिह ङ्यी़गी लेहमा च्यी़ ताम च्यी़ला थिउ-निउ पेहती ताहम्ज्या ज़्या़ सिहन फान्ज्यो सुज्यीगीॱआङ ओ़हदीला च्ये मी़हखुएँ ओहले ओ़हला सिपाज्यीॱआङ पा़ह मी़हखुएँ ओहले सिपाज्यीॱआङ फ्री़ मी़हखुएँ। 16 तोहदामया़ अब्राहाम दाङ खोगी छार्क्यीनया़ला नाङग्यो येहकें। सुङरापगी “छार्क्यीनया़ला” म़ेदी सुङ मेहनाङगे, दिगीनी मिह माहङबुलाराङ माक्यो यिहन म़ेदी गा तेन्गे यिहम्बा। यिहॱनाङ सुङरापगी “ख्येगी छार्क्यीनला” म़ेदी सुङ नाङगे, दिगी मेहन्दा च्यी़लाज्यीॱराङ तेन्गे, ओ़ह मास्यीका यिहम्बा। 17 ङाहगी माज्ये छोल्ग्योकी ताम दि ल़ेहमु यिहम्बा, राहङगी ज़्या़ नाङग्यो तोहदामकी स्याहलला किन्ज्योगी थे़जी क्याहप नाङ सिहन्दी येह। यिहॱनाङ लोह ज्य़िप्क्या सुम-च्यु तिङले ओहङग्यो छ्य़े-ठिमगी ताहम्ज्याला च्ये मी़हखुएँ, का़हलेॱआङ छ्य़े-ठिमगी ताहम्ज्याला च्येक्यो येहसीमानानी किन्ज्योगी तोहदाम स्यिती काम्बुती डोज्ये येहकें। 18 च्यिबेमाना किन्ज्योगी तेर्के सुङदी ओहराङ ङ्याम्बु ज़्या़ नाङग्योकी तोहदाम का़हलेॱआङ छ्य़े-ठिम ची़दे गा ज्योर्के यिहन्सीमानानी ओ़हनी तोहदामॱराङ माहकाहल लेह। यिहॱनाङ किन्ज्योगी अब्राहामला तोहदाम लाहमलेॱराङ दि नाङसीन। 19 ओ़हठी यिहन्सीमानानी ता़ह छ्य़े-ठिम च्यिबे कोहसीन ले? तिहक्पा ङोह स्य़े ख़ूज्यु म़ेदी छ्य़े-ठिम नाङग्यो यिहम्बा ओ़ह सोङबे तोहदाम ज़्या़ नाङग्योकी अब्राहामकी छार्क्यीन माहफेप थु दि छ्य़े-ठिम कोहपु काहल्ग्यो यिहम्बा। छ्य़े-ठिम स्यिहङगामकी स्याहप्च्यीया़ लाहमले मोशागी मिहया़ला नाङसीन। 20 ताम लाहम्बा पेहच्येला मिह बा़ल ङ्यी़ कोहएँ, यिहॱनाङ किन्ज्योनी च्यिमे च्यी़राङ ज़्य़ू नाङदी येह। छ्य़े-ठिमकी ल़ेह 21 ओ़हठी यिहन्सीमानानी च्यि छ्य़े-ठिमगी किन्ज्योगी तोहदामला टाह पेहते येहबा ले? मिहम्बा, ओ़ह ल़ेहमु यिहनॱराङ मिहन। का़हलेॱआङ मिहला मिहली तेर ख़ूएँकी छ्य़े-ठिम नाङग्यो यिहन्सीमानानी तेहम्बाराङ छ्य़े-ठिमगीॱराङ मिहला किन्ज्योकी दिनला टाहङबु सी़ह च्य़ूज्ये येहकें। 22 सुङरापगी ओहराङला “जाम्बुलीङ रेबेॱराङ तिहक्पाकी ओङ चो़ला छ्यिती येहबा ओ़ह सोङबे ओहराङगी येशू मास्यीकाला तेहपा पेहती च्यी़राङ किन्ज्योकी तोहदामया़ यिह-छ्ये़ लाहमले ज्योर ख़ूएँ” म़ेदी सुङ नाङगे। 23 तेहपा ओहङगे म़ेदी तोहङले ओहराङ छ्य़े-ठिमकी ओङ चो़ला येहकें, ओहले छ्य़े-ठिमगी ओहराङला ज़ुङ ज़्या़दी येहकें। 24 तेहपा लाहमले ओहराङ टाहङबु सी़ह ख़ूज्यु म़ेदी छ्य़े-ठिमगी ओहराङला चारा पेहती मास्यीका थु ठिच्येला चि लेहन्ग्यो येहकें। 25 यिहॱनाङ ता़ह तेहपा ओहङग्यो सोङबे ता़ह ओहराङला छ्य़े-ठिमगी कुहर्ची पेह मेहकोहएँ। 26 च्यिबेमाना तेहपा लाहमले ख्या थाम्ज्यी मास्यीका येशूला किन्ज्योकी छार्क्यीन यिहम्बा। 27 च्यिबेमाना मास्यीकाकी छेनला बप्तिस्मा लेहन्ग्यो थाम्ज्यीगी काप्च्या साम्बा केहन्ग्यो ल़ेहमुराङ मास्यीकालाॱआङ केहन्दी येह। 28 ओ़ह सोङबे यहूदी मिह यिहॱना़ यिहन, लेहमेन क्यिहपागी मिह यिहॱना़ यिहन, योक्पु यिहॱना़ यिहन, सुज्यीदीॱआङ ओङ चो़ला ज्युल्दी माहतेहबाकी मिह यिहॱना़ यिहन, क्येप-ख्योवा यिहॱना़ यिहन, पी़हमी-पेहजा यिहॱना़ यिहन, येशू मास्यीकाला ख्या थाम्ज्यी च्यी़राङ यिहम्बा। 29 का़हलेॱआङ ख्या मास्यीकाती यिहम्बा मासीमानानी ख्या अब्राहामकी छार्क्यीन यिहम्बा, ओहले ख्या किन्ज्योगी तोहदाम ज़्या़ नाङग्योकी फास्यी ज्योर्के मिहया़ॱआङ यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.