गलाती 2 - ह्योल्मोल़ेह-पेनया़गी पावलला लोक पेहक्यो 1 लो़ह च्युप्स्यी तिङले बारनाबास दाङ तीतसला राहङ ङ्याम्बुराङ ख्येर्ती ङाह येहपाराङ यरूशलेमला काहल्सीन। 2 किन्ज्योगी ङाहला ज्याल्गा नाङग्यो सोङबे ङाह यरूशलेमला काहल्सीन, ओहले ङाहगी ओ़ह ग्या़गी गोबाया़ला च्यी़राङ खाजुम्बाला क़े क्याहप्ती ङाहगी लेहमेन क्यिहपाकी मिहया़ला स्ये़क्योकी या़हबु लेहङगुॱराङ या़हबु पेहती प्रा साल्सीन। च्यिबेमाना ङाहगी पेह सिहन्ग्यो दाङ पेह तेहक्योकी ल़ेहया़ स्यिती काम्बुला थोरो डोनी म़ेदी ङाहला ज्यी़सु येहकें ओ़ह सोङबे ङाहगी ओ़ह ल़ेहमु पेहक्यो यिहम्बा। 3 यिहॱनाङ ङाह ङ्याम्बुराङ येहकेन्की रो़ह तीतस ग्रीक क्यिहपाकी मिह यिहन्देॱआङ खोला स्या-ताक पेह कोहएँ म़ेदी खुङया़गी उर्चु माहबे। 4 स्या-ताककी तेहन्दाला दि तामया़ थेन्सीन, च्यिबेमाना काहजे चिहन क्याहप्केन्गी नो़हया़ ओहराङकी छो़बाया़ नाहङला खाजुम्बाला स्य़ूहदी ओहराङला मास्यीकागी जेती यहूदी छ्य़े-ठिमलेगी टोहल च्य़ू नाङग्यो मिहलीकी तेहन्दाला च्यिवा च्येच्ये छ़ूसीन ओहले ओहराङला यहूदी छ्य़े-ठिमकी लाबु-लामुया़ ज़ोज्ये छोल्सीन। 5 यिहॱनाङ मास्यीका येशूकी या़हबु लेहङगुकी तेहन्दामया़ ख्याया़ ङ्याम्बु नाहम्स्यी किन्दु लिहच्यु म़ेदी ङ्यिह खुङया़गी दिनला याहम्बीज्यीॱआङ ज्युल्दी माहतेह। 6 खुङ काहजे मिहन थोप्क्यो मिह छ्यिम्बुया़ यिहॱनाङ ङाहला खुङगी तेहन्दाला च्यिॱआङ च्योल्दो म़ेह किन्ज्योगी मिहगी तोहङबा ज़ी़ मेहनाङगे। ओ़ह छ्यिम्बु मिहया़गी ङाहला च्यिॱआङ साम्बा टेहरिमया़ माहतेर। 7 ओ़हगी छापला खुङगी तोहरोङ किन्ज्योगी पत्रुसला यहूदीया़ला या़हबु लेहङगु स्येकेन्गी छ्या़ले चि क्याहप नाङग्यो ल़ेहमुराङ ङाहॱलाङ लेहमेन क्यिहपाकी मिहया़ला या़हबु लेहङगु स्येकेन्गी छ्या़ले चि क्याहप नाङग्यो गा थोङसीन। 8 पत्रुसला यहूदीया़की पाहरक्यीला या़हबु लेहङगु प्रा-साल्ज्येला ल़ेह-पेन ज़ो नाङगे किन्ज्योगीॱराङ ङाहॱलाङ लेहमेन क्यिहपाकी मिहया़गी पाहरक्यीला या़हबु लेहङगु स्येकेन्गी ल़ेह-पेन ज़ो नाङग्यो यिहम्बा। 9 याकूब, केफास दाङ यूहन्ना छेन्छोककी गो-छ्येवा गोबाया़ यिहन्गे ओहले खुङ फे़बेया़गी किन्ज्योगीॱराङ ङाहला काटीन नाङग्यो दु माएँ ताम ङोह स्य़े फान्ज्यो खुङ फे़बेया़गी बारनाबास दाङ ङाहला रो़ह म़ेदी ची़नाङ पेहसीन। ओहले ङ्यिह फे़बेया़दी लेहमेन क्यिहपाकी मिहया़की पाहरक्यीला ल़ेह पेहकें काहल्सीन ओहले खुङ फ़ेबेया़ती यहूदीया़की पाहरक्यीला ल़ेह पेहकें काहल्सीन। 10 ओहले खुङ फे़बेया़गी “प्राङबुया़ला रो़हराम पेहच्येला टेहम्बा साल्दोङ” म़ेदी सुङ नाङसीन। प्राङबुया़ला रो़हराम पेहच्येला ङाहॱलाङ ज्यिबुराङ सेम्बा येहकें। एन्टिओखियाला पावलगी पत्रुसला बार्ता लाङग्यो 11 यिहॱनाङ केफास एन्टिओखियाला ओहङ फान्ज्यो ङाहगी खोला मिह थाम्ज्यीगी दिनलाराङ बार्ता लाङसीन। च्यिबेमाना खोगी ल़ेह नोहर च्यू़क्यो येहकें। 12 याकूबगी ताङग्यो मिहया़ ओहङगे म़ेदी तोहङले खोगी लेहमेन क्यिहपाकी मिहया़ ङ्याम्बु तेहती साहउ येहकें। यिहॱनाङ खुङया़ ओहङ सिहन फान्ज्योनी खो लेहमेन क्यिहपाकी मिहया़ ङ्याम्बु खा फ़ेदी तेहसीन, च्यिबेमाना खो स्या-ताक पेह कोहएँ म़ेदी माएँ मिह बा़लया़ ङ्याम्बु ज्यी़दी येहकें। 13 ओहले लेहमेन यहूदीया़गीॱआङ पत्रुसती ल़ेहमुराङ यिहन्दो तेन्गेन्की ल़ेह पेहसीन। खुङया़दी दि ल़ेहमु यिहन्दो तेन्गेन्की ल़ेह थोङदी बारनाबासॱआङ खुङ ल़ेहमुराङ काहल्सीन। 14 खुङ या़हबु लेहङगुगी तेन्ग्योकी तेहन्दामकी लाहम क्यो़दी काहल्ग्यो थोङ फान्ज्यो ङाहगी मिह थाम्ज्यीगी दिनलाराङ केफासला मासीन, “राहङ यहूदी यिहन्दीॱआङ यहूदी ल़ेहमु जे माहनाङबा लेहमेन क्यिहपाकी मिहया़गी ल़ेहमु डोलु-तेहलु जे नाङगे मासीमाना, लेहमेन क्यिहपाकी मिहया़ला यहूदीगी ल़ेहमुराङ मिहजी ताङज्येला राहङगी च्यिबे उर्चु जे नाङगे ले?” 15 ओहराङ क्येक्योॱराङ यहूदी क्यिहपाला यिहम्बा, ओहले ओहराङ लेहमेन क्यिहपाकी मिहया़ ल़ेहमु तिहक्च्येम्बा म़ेह 16 यिहॱनाङ, दि केच्या ङ्यिहगी ङोह स्ये़सीन– येशू मास्यीकाला तेहपा पेहना मिहम्बा, छ्य़े-ठिम ची़देनी मिह किन्ज्योगी दिनला टाहङबु सी़ह मी़हखुएँ। ओ़ह सोङबे ओहराङ छ्य़े-ठिम लाहमले मिहम्बा यिहॱनाङ मास्यीका थो़ला पेहक्योकी यिह-छ्य़े लाहमले टाहङबु सी़ह ख़ूज्यु म़ेदीराङ ओहराङगीॱआङ ओहराङगी तेहपा मास्यीका येशू थो़ला ज़्या़क्यो यिहम्बा, च्यिबेमाना छ्य़े-ठिम लाहमले सुज्यीॱआङ टाहङबु सी़ह मी़हखुएँ। 17 यिहॱनाङ का़हलेॱआङ ओहराङ मास्यीकाला टाहङबु डोज्ये छोल्गे छोल्गेमुॱआङ ओहराङ तिहक्च्येम्बा च्य़ेह सिहन्सीमाना, च्यि मास्यीकागी ख्याया़ला तोहरोङ तिहक्पा पेह कोहएँ म़ेदी सुङ नाङगे ले? मिहम्बा, दि ल़ेहमुनी यिहनॱराङ मिहम्बा! 18 च्यिबेमाना राहङगीराङ रोम्दी रिल्ग्यो निङबा ठिमला येहपाराङ ङाह लाङदी ज़ोएँ म़ेदी मानानी ङाहगी ठिमला गोम्दी तिहक्पा पेहकें। 19 च्यिबेमाना किन्ज्योकी तेहन्दाला थार ख़ूज्यु म़ेदीराङ ङाह छ्य़े-ठिम लाहमले छ्य़े-ठिमकी तेहन्दाला मास्यीका ङ्याम्बुराङ क्याहङस्यीङला स्यि सिहन्दी येह। 20 ङाहगी निङबा मिहली मास्यीका ङ्याम्बुराङ क्याहङस्यीङला च्याङदी स्यिक्यो येह, ता़ह यिहन्ज्यु ङाह मिहम्बा ङाह नाहङला मास्यीका ज़्य़ू नाङदी येहबा। ताहन्दा ङाह ज़ुबुला थार्ती तेहक्योदी ङाहला माहङबुराङ चेवा जेती ङाहगी तेहन्दाला मिहजी नाङगे किन्ज्योगी स़ेबु थो़ला तेहपा पेहती थार्केराङ येहबा। 21 किन्ज्योकी काटीनला ङाह मा-लोक पेह मी़हखु, च्यिबेमाना छ्य़े-ठिम लाहमले टाहङबु सी़हगे यिहन्सीमानानी मास्यीका स्यिती काम्बुला टोहङ नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.