गलाती 1 - ह्योल्मो1 ङाह ल़ेह-पेन पावलगी दि यिहगी प्रुहएँॱराङ येहबा। मिहया़ दाङ मिहगी ओङ लाहमले मिहम्बा, यिहॱनाङ येशू मास्यीका दाङ मिहरोला टोहङग्योलेगी सोम्बो ज़ो नाङगे किन्ज्यो याहपगीॱराङ ङाहला ल़ेह-पेन ज़ो नाङग्यो यिहम्बा। 2 ङाह ङ्याम्बु येहकेन्की थाम्ज्यी आदा-नो़ह दाङ आज्यी-नुहमुया़ लाहमले ङाहगी गलातीकी छेन्छोकला दि यिहगी प्रुहएँॱराङ येहबा। 3 ओहराङगी किन्ज्यो याहप दाङ चो़वो येशू मास्यीकागी ख्याला काटीन दाङ स्य़िहदे नाङज्यु। 4 दि तिहक्पाराङ तिहक्पागी काहङग्यो जाम्बुलीङलेगी ओहराङला थार च्य़ूज्येला येशू मास्यीकाकी ओहराङगी किन्ज्यो याहपकी थुला ठुङग्यो ल़ेहमुराङ जेती ओहराङगी पेहक्योगी तिहक्पागी तेहन्दाला राहङगी कुसोॱराङ च्यिहम्बा ताङ नाङसीन। 5 किन्ज्योला नाहम्स्यी किन्दुॱराङ क्याहल्स्यो-क्याहल्स्यो ओहङज्यु। आमेन। लेहमेन का़हन्दीॱआङ या़हबु लेहङगु म़ेह 6 मास्यीकाकी काटीन लाहमले ख्याला क़े क्याहप नाङग्यो येहकें यिहॱनाङ ख्यागी देजे ग्यो़बाराङ किन्ज्योला क्युर्ती लेहमेनॱराङ या़हबु लेहङगु ङो़ले सेम ताङग्यो थे़गेमु ङाहनी ह्अॱराङ ल़ेहउ दु! 7 माज्येराङ माना लेहमेन या़हबु लेहङगु येहॱराङ म़ेह, यिहॱनाङ लाहला दि ल़ेहमु मिहया़ॱआङ येहबा, खुङया़गी मास्यीकाकी या़हबु लेहङगुला ख्याक्ताङ ख्योक्तोङ जे़दी ख्याया़ला स्येच्ये छोल्गु दु। 8 का़हलेॱआङ ङ्यिहगी स्ये़क्योकी या़हबु लेहङगु म़ेदी फिर्च्या लेहमेनॱराङ स्ये़कु दु मासीमाना खुङला मे़मु सू़हज्यु ओ़ह स्यिहङगामकी स्याहप्च्यी यिहॱना़ यिहन ओ़ह ङ्यिह नाहङदीॱराङ यिहॱना़ यिहन। 9 ङाहगी दि केच्याया़ तोहङलेॱआङ माक्यो येहकें ओहले ताहन्दाॱआङ माएँराङ येह, ख्याया़गी का़हन्दी या़हबु लेहङगु ची़क्यो येहबा, ओ़हगी फिर्च्या लेहमेन सुज्यीगी ख्याया़ला ख्येप्टा क्याहप्सीमाना, खोला मे़मु सू़हज्यु। 10 ङाहगी मिहया़ला क़ेहनाङ लाहङ च्य़ूज्ये छोल्ग्यो यिहनॱराङ मिहन ङाहगीनी किन्ज्योकी थु गा काहसो डो च्य़ूज्ये छोल्ग्यो यिहम्बा। का़हलेॱआङ ङाहगी तोहरोङॱआङ मिहया़ला क़ेहनाङ लाहङ च्य़ूज्ये छोल्ग्यो यिहन्सीन मानानी ङाह मास्यीकाकी लाबु डोज्ये म़ेहबा येहकें। पावल काह-ठि पेहती ल़ेह-पेन काहल्बा 11 आदा-नो़ह दाङ आज्यी-नुहमुया़ ख्यागी दि तामया़ ङोह स्य़े ख़ूज्यु म़ेदी ङाह माएँ, ङाहगी स्ये़क्योकी या़हबु लेहङगुया़ मिहया़ ङो़ले ओहङग्यो मिहम्बा। 12 दि या़हबु लेहङगुया़ ङाहगी मिहलेगी ज्योरक्योॱआङ मिहन, सु मिह च्यी़गी ङाहला लोप्क्योॱआङ मिहन। यिहॱनाङ दि येशू मास्यीका राहङगीराङ ङाहला तेन नाङग्यो यिहम्बा। 13 यहूदी छ्य़ेला येहकेंमु ङाहगी तोहङमाकी मिहलीकी तेहन्दाला ख्यागी थ़े सिहन्दी येहबा, ओहजे काहङला ङाहगी काह-ठि पेहती किन्ज्योकी छेन्छोकला ज्यी़ज्ये ल़ेहमु तुहक्पुया़ तेर्पा, ओहले तोङॱराङ च्य़ूज्ये छोल्बा। 14 ङ्यिहगी क्यिहपाला, यहूदी छ्य़े ची़गेया़ नाहङला ङाहगी स्यार-च्युङकी रो़हया़ म़ेदी ङाह माहङबुराङ तोहङले येहकें। ङाहती आख्ये मे़हमेया़गी पे-ठिमला ङाह स्यिङ्याल कोङ्याल पेहती ची़उ येहकें। 15 यिहॱनाङ, ङाह क्येएँ म़ेदी तोहङलेराङ ङाहला खा फे़ नाङगे, ओहले राहङगी काटीन लाहमले ङाहला क़े क्याहप नाङगे किन्ज्योला, 16 लेहमेन क्यिहपाया़गी पाहरक्यीला मिहरोकी तेहन्दाला स्येच्येला राहङगी स़ेबु ङाह थो़ला तेन नाङज्येला मिहरोला या़हबु ऩेसीन ओहजेला ङाहगी सु ङ्याम्बुॱआङ टी़हदाप माहबे। 17 ओहले ङाह म़ेदी तोहङगी ल़ेह-पेनया़ ङ्याम्बु टी़हदाप पेहच्येला ङाह यरूशलेमॱलाङ माहकाहल। यिहॱनाङ ङाह लाहम्साङराङ अरब क्याहल-खापला काहल्सीन, ओहले ओ़ह तिङले दमस्कसला लो़हदी ओहङसीन। 18 ओहले लोह सुम तिङले च्यी़राङ ङाह पत्रुसला थुज्येला यरूशलेमला काहल्सीन ओहले ङ्याम्बुराङ ओ़हला ङ्यिहमा च्ये़ङा तेहसीन। 19 यिहॱनाङ ओ़हला ङाहगी चो़वो छ्येवागी नो़ह याकूबला मिहम्बा लेहमेन ल़ेह-पेन सुॱलाङ माह-थु। 20 ङाहगी प्रुहक्योगी ताम तेहम्बा तेहन सुमॱराङ यिहन, ङाहगी किन्ज्योगी दिनला स्योप क्याहप्ती म़ेह। 21 ओ़ह तिङले ङाह सिरिया दाङ किलिकिया साने़ला फार काहल्सीन। 22 ओ़ह ती़हजी थु यहूदीया छेन्छोककी आदा-नो़ह दाङ आज्यी-नुहमुया़गी ङाहला थोङग्योॱराङ म़ेहबा येहकें। 23 खुङया़गी ङाहगी तेहन्दाला दि ल़ेहमु च्यी़राङ थे़क्यो येहकें, “तोहङले ओहराङला तुहक्पु तेर्के मिहगी का़हन्दी तेहपाकी तेहन्दाला तोङ च्य़ूज्ये छोल्ग्यो येहकें, ताहन्दा खोगी ओ़ह यिह-छ्य़ेकी तेहन्दालाराङ स्येकेराङ येहबा।” 24 खुङया़गी ङाहगी तेहन्दाकी पेहती किन्ज्योला त़ेरा फुल्सीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.