एफिसी 6 - ह्योल्मोपुह-पोहमो दाङ आबा-आमाकी तेहन्दाला लोप्ताम 1 पुह पोहमोया़, चो़वोगी मिहया़ यिहन्गे सोङबे ख्या राहङ आबा-आमागी माक्यो तामया़ ङ्यिहन्दोङ, च्यिबेमाना दि या़हबु ताम यिहम्बा। 2 राहङ आबा-आमाला ची़नाङ पेहतोङ। 3 दि का ङ्यिहन्सीमाना ख्याया़लाॱराङ या़हबु ओहङज्ये येह ओहले जाम्बुलीङला ख्याती छ़े रिहङबु ओहङज्ये येह। 4 ए आबाया़, राहङ पुह पोहमोया़ला स्यिहताङ लाहङ मा़हच्यु, यिहॱनाङ खुङला चो़वोकी काया़ लोप्ती मिहरोगी लाहमला ठितोङ। योक्पु दाङ ताहक्पुया़ला लोप्ताम क्याहप नाङग्यो 5 ए योक्पु-यो़मुया़, ज्यी़सुगी दार्ती सेम तिहङ यिहन्ज्युराङ ख्यागी मास्यीकाला स्याहप्तो स्युहक्यो ल़ेहमुराङ दि जाम्बुलीङकी ख्यागी ताहक्पुया़गी माक्यो तामया़ ङ्यिहन्दोङ। 6 मिहया़ला क़ेहनाङ लाहङ च्य़ूगेया़ ल़ेहमु मिहगी मी़गी थोङदाङला च्यी़राङ ल़ेह या़हबु पेहकें मिहम्बा, यिहॱनाङ मास्यीकाकी योक्पुया़गी ल़ेहमु निङ थाक्पालेगीॱराङ किन्ज्योकी थु-सेम छाङबु पेहतोङ। 7 मिहया़की तेहन्दाला मिहम्बा, यिहॱनाङ चो़वोकी तेहन्दाला ल़ेहमुराङ पेहती क़ेहनाङगी स्याहप्तो स्यी़हदोङ। 8 योक्पु यिहॱना़ यिहन, मिहनॱनाङ मिहन या़हबु ल़ेह पेहकें मिह थाम्ज्यीला चो़वोगी च्याहगा नाङज्ये येह, दि ताम ख्याया़गी टेहम्बा ज़्यो़। 9 ए ताहक्पुया़, ओ़हठीॱराङ पेहती ख्याया़गीॱआङ राहङगी योक्पुया़ला या़हबु पेहतोङ, ओहले खुङया़ला ज्यी़-ङोर माहतेन च्यिबेमाना ख्या ङ्यिकाराङगी ताहक्पु स्यिहङगामला ज़्य़ू नाङदी येह, ओहले मिहरोगी सुॱलाङ ङ्येम्बा-ङ्य़ेहरी जे मेहनाङ। किन्ज्योकी छेन्ज्याया़ 10 ता़ह ज्युक्स्योलला, ख्या चो़वोला ओहले मिहरोगी ओङज्या छ्यिम्बुला स्युक छ्यिम्बु पेहती तेहतोङ। 11 ती़ह गो-छ्येवागी पेहकेन नामे नाजो चिहनया़ला दुल्ज्येला किन्ज्योगी नाङग्यो थाम्ज्यीराङ छेन्ज्याया़ राहङ ज़ुबुला क्येहन्दी तेह। 12 च्यिबेमाना ओहराङगी मिह ङ्याम्बु मा़ क्याहप्के मिहम्बा यिहॱनाङ स्यिहङगाम दाङ जाम्बुलीङकी पाहरक्यीला ल़ेह ङ्येहम्बा पेहकेन्गी नाम्स्यीया़, ठिम ताङगेन्की पोम्बोया़, ओङज्या छ्यिम्बु ज्योरक्योया़, ओहले दि ना़-जुबे जाम्बुलीङकी वाङज्या छ्यिम्बुया़ ङ्याम्बु यिहम्बा। 13 ओ़ह सोङबे ख्याया़गी किन्ज्योकी नाङग्यो थाम्ज्यी छेन्ज्याया़ केहन्दोङ, ओहले दि ल़ेहमु पेहती ख्याया़गी ङ्यिहमा चोक्पाला ओहराङगी टाह ती़ह गो-छ्येवा च्योम ओहङगेमु खोला का ख़ूज्ये येह ओहले ख्ये तिङ थुराङ मा़ क्याहप्ती लाहङदी तेह ख़ूज्ये येह। 14 ओ़ह सोङबे ता़ह ठाबे पेहती लाहङदी तेहतोङ। तेहन्दामला कारा ल़ेहमुराङ पेहती क्येपाला च्यिङदोङ, प्राहङगोला टाहङदेनकी ठाब केहन्दोङ। 15 स्य़िहदे तेर्केन्की या़हबु लेहङगुकी लेकाम केहन्दी ठाबे पेह। 16 तेहपाला थार च्य़ूगेन्दी ढाल यिहम्बा। ओ़हदीला नाहम्माॱनाङ राहङ ङ्याम्बु थो़दी ठाबे पेहती तेह। ओ़ह तिङले ती़हगी मेहकी दा-या़ला ख्यागी स़े ख़ूज्ये येह। 17 थार्पा तेर्केन्की स्याहमु केहन्दोङ, ओहले नाम्पार-ताहक्पा थुगी पादाङ थो़दोङ, दि किन्ज्योकी सुङ यिहम्बा। 18 किन्ज्योगी रो़हराम जे नाङज्यु म़ेदी ख्याया़गी नाहम्माॱनाङ सोल्वाङ ताप्तोङ। ती़हजी थाम्ज्यीला नाम्पार-ताहक्पा थुगी ओङ लाहमले सोल्वाङ ताप्तोङ। दि केच्या सेमला ज़्या़दी नाहम्माॱनाङ जेम्बु पेहती सोल्वाङ ताप्तेॱराङ तेहतोङ ओहले मास्यीकाकी थाम्ज्यीराङ नाम्पार-ताहक्पा मिहया़की तेहन्दालाॱआङ सोल्वाङ ताप्तोङ। 19 ङाहगी तेहन्दालाॱआङ सोल्वाङ ताप तेर। ङाहगी ताम माज्ये पेहकेमु किन्ज्योगी ङाहला मिहरोगी सुङ नाङज्यु, ओहले ङाहगी तिहङ-रिहङबुगी लेहङगु या़हबुया़ मा़हन्ज्यीबा पेहती स्य़े ख़ूज्यु। 20 दि या़हबु लेहङगुगी पेहतीराङ ङाह च्याल्दागी ताहम्ग्यो यिहॱनाङ ङाह मास्यीकाती राजदूत यिहम्बा। ङाहगी काह-ठि पेहती ताम मा कोहएँ यिहम्बा ओ़ह मा़हन्ज्यीबा पेहती मा ख़ूज्यु म़ेदी सोल्वाङ ताप तेर। ज्युक्स्योलगी तामया़ 21 ङाह काह-ठि येहबा ओहले ङाह च्यि पेहकेनॱराङ येहबा माएँ ताम ख्याया़लाॱआङ क्यी़ह ओहङज्यु म़ेदी ङाहगी च्याहम्बु नो़ह ओहले चो़वोला स्याहप्तो स्य़ूहज्येला ज्यिबुराङ यिह-छ्य़ेबु तुखिकसगी ङाहगी तेहन्दाला थाम्ज्यीराङ तामया़ ख्याया़ला स्येच्ये येह। 22 ङ्यिह काह-ठि दु माएँ ताम ख्याया़ला क्यी़ह ओहङज्यु ओहले ख्याती सेमला आ़र क्ये ख़ूज्यु माएँ नोम्साङ पेहती ङाहगी खोला ख्यासाला ताङग्यो यिहम्बा। 23 किन्ज्योला यिह-छ्य़े पेहक्योकी थाम्ज्यीराङ आदा-नो़ह दाङ आज्यी-नुहमुया़ला किन्ज्यो याहप दाङ चो़वो येशू मास्यीकागी स्य़िहदे, चेवा दाङ यिह-छ्य़े नाङज्यु। 24 ओहराङ चो़वो येशू मास्यीकाला नाहम्स्यी किन्दुॱराङ चेवा पेहकें मिह थाम्ज्यी ङ्याम्बु किन्ज्योगी काटीन ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.