एफिसी 5 - ह्योल्मोक्या-साङेला मिहजी ताङगे 1 ओ़ह सोङबे ख्याया़ किन्ज्योकी च्याहम्बु छार्क्यीनया़ यिहन्गे सोङबे मिहरोकी पे त़ेदी ओ़ह ल़ेहमुराङ पेहतोङ। 2 ख्याया़गी मिहली चेवाकी काहङग्यो ओहङ कोहएँ। काह-ठि पेहती मास्यीकागीॱआङ ओहराङ ङ्याम्बु चेवा जे नाङबा, ओहले किन्ज्योकी तेहन्दाला टिहमा स्यिहम्बु खाएँगी डेल्बा दाङ मार्च्ये जेती राहङगी राहङला ओहराङगी तेहन्दाला फुल नाङसीन। 3 मास्यीकाकी नाम्पार-ताहक्पा मिहया़ काहल्ग्यो सोङबे ख्याया़गी पाहरक्यीला छ्येउ-छ्येंमु, नामे-नाजो मेहचाङा दाङ ह्अम्बाकी मिहनॱआङ फ्रे़ तेन्ज्ये मेहयोहङगे, दि ल़ेहमु तामया़ माज्येॱआङ मी़हसीहएँ यिहम्बा। 4 ङोहजाकी तामया़, उल्दुम्बाकी तामया़ ओहले फेन मेहथोएँकी स्या़ क्याहप्केन्गी तामया़ माहमा, दि पे मी़हसीहएँकी तामया़ यिहम्बा। यिहॱनाङ ओ़हगी छापला ख्येगी ल़ेह किन्ज्योला थुज्यी-छ्ये़ फुल्गेन्दी ओहङज्यु। 5 च्यिबेमाना दि केच्या ख्याया़ला क्यी़ह ओहङॱराङ कोहएँ– छ्येउ-छ्येंमु पेहकें मिह, मेहचाङा मिह, ओहले ह्अम्बा पेहकें मिह किन्ज्यो दाङ मास्यीकाकी क्याहल्सीला स्य़ूहज्येला ओङ ज्योर्च्ये म़ेह। ह्अम्बा पेहकेन्दीराङ कुया़ला छ्येपा फुल्ग्यो यिहम्बा। 6 सुज्यीगी ख्याया़ला चिहन क्याहप्ती गो़ कोर मा़हखुज्यु। दि ल़ेहमु केच्याया़गी पेहतीराङ मिहङ्यीहन्गे मिहया़गी थो़ला किन्ज्योकी थुयाल बाप्के। 7 ओ़ह सोङबे ओ़ह ल़ेहमु मिहया़ ङ्याम्बु च्यामॱराङ माहच्याम। 8 च्यिबेमाना लेहमा च्यी़ ख्याया़ ना़-जुबेला येहकें, यिहॱनाङ ता़ह ख्याया़ चो़वोकी पुह-पोहमो काहल्ग्यो सोङबे क्या-साङेला येहबा। ओ़ह सोङबे ख्याया़ क्या-साङेकी पुह पोहमोया़ ल़ेहमुराङ पेहती राहङगी डोलु-तेहलुया़ या़हबु पेहतोङ। 9 च्यिबेमाना क्या-साङेकी लाहमला डोएँ मिहया़गी नामे-नाजो ल़ेह या़हबुया़ पेहकें, खो टाहङदेन दाङ तेहन्दाम ओहङगे। 10 ओहले चो़वोला च्यि थु ङ्ये़गे ओ़ह लोप्च्ये छोल्दोङ। 11 ना़-जुबेगी लाहमला स्य़ूहदी फेनराङ मे़हथोएँगी ल़ेहया़ पेहकें मिहया़ ङ्याम्बु थिन्दे ल़ेह पेहॱराङ माहबे। यिहॱनाङ ओ़ह ल़ेह चोक्पा यिहन म़ेदी ख्येगी तेन तेर। 12 च्यिबेमाना खुङया़गी यिहप्ती पेहक्यो ल़ेहया़गी तेहन्दाला माज्येॱलाङ ङोह छाएँगी ताम यिहम्बा। 13 का़हन्दीॱआङ से़हज्यी क्या-साङेला ख्योङ-लुङ म़ेहबा ओ़ह से़हया़दी तेहन्दामकी ङ्य़ेहरीला छ्यिसाल-नाहङसाल पेहती थोङज्ये येह, ओ़हदी क्या-साङे यिहम्बा 14 ओ़ह सोङबे छ्य़ेला दि ल़ेहमु सुङ नाङदी येह, “ए ङ्यि लो़हदी तेहक्योया़ ङ्यि स़ेतोङ ओहले स्यिक्योया़लेगी लोहङ, ओहले मास्यीकागी ख्याया़ला येहसेर नाङज्ये येह।” 15 ओ़ह सोङबे काहन्डुमु डोलु-तेहलु पेह कोहएँ यिहम्बा, ओ़ह जेम्बु पेहतोङ, उल्दुम्बाकी मिह ल़ेहमु पेहती मिहम्बा, ख्येम्बा-ताहक्पु मिह ल़ेहमु पेहती डोलु-तेहलु पेहतोङ। 16 दि ती़हजी चोक्पा येहकें सोङबे ख्येगी ज़्योरक्यो थाम्ज्यीराङ लोहङया़ या़हबु पेहती पेहतोङ। 17 ओ़ह सोङबे ख्ये उल्दुम्बा पेहती माहतेह, यिहॱनाङ चो़वोकी थु-सेम च्यि यिहम्बा, ओ़हदी छोल्दोङ। 18 छ्याङगी ज़िदे राहङगी मिहली खाम्साङ-ङ्याहम्साङ पेहती माहताङ यिहॱनाङ नाम्पार-ताहक्पा थुगी काहङदोङ। 19 यिहॱनाङ च्यिगी च्यी़ ङ्याम्बु किन्ज्योकी छ्ये़-लु, त़ेरा तेच्या दाङ यिहक्तेन लुया़ लेहन्दोङ ओहले राहङदी निङ थाक्पा यिहन्ज्युराङ चो़वोकी तेहन्दाला लुया़ लेहन्गेनॱराङ त़ेरा तेच्या फुल्दोङ। 20 ओहराङ चो़वो येशू मास्यीकाकी छेनला किन्ज्यो याहपला ना थाम्ज्यी से़हया़ला नाहम्माॱनाङ थुज्यी-छ्ये़ फुल्दोङ। ख्योवा-पी़हमीकी तेहन्दाला लोप्ताम क्याहप नाङग्यो 21 मास्यीकाकी ज्यिक्पा खुर्ती च्यी़गी लेहमेनगी ओङ चो़ला तेहतोङ। 22 ए पी़हमी-पेहजाया़, ख्या चो़वोकी ओङ चो़ला तेहक्यो ल़ेहमुराङ राहङ-राहङगी ख्योवागी ओङ चो़ला तेहतोङ। 23 च्यिबेमाना छेन्छोक मास्यीकाकी कुसो ओहले मास्यीकाती छेन्छोकला थार्पा नाङगेन्गी उ यिहन्गे ल़ेहमुराङ पी़हमीगी गो़दी ख्योवा यिहम्बा। 24 ओ़ह सोङबे छेन्छोक मास्यीकाकी ओङ चो़ला तेहक्यो ल़ेहमु पी़हमीॱया़ङ थाम्ज्यीराङ से़हया़ला राहङ-राहङगी ख्योवागी ओङ चो़ला तेहच्यु। 25 क्येप-ख्योवाया़, मास्यीकागी राहङगी छेन्छोककी तेहन्दाला कुसो नाङदी चेवा जे नाङग्यो ल़ेहमुराङ राहङ-राहङगी पी़हमीया़ला चेवा पेहतोङ। 26 च्यिबेमाना मास्यीकागी छेन्छोकला नाम्पार-ताहक्पा ज़ो नाङज्येला राहङगी सुङ लाहमले ओहले छ्युगी ठु नाङदी चाङमा ज़ो नाङसीन। 27 ओहले मास्यीकागी छेन्छोकला क्या-साङे येहसेर ल़ेहमु जेती राहङगी दिनला ख्योङ ख़ूज्यु, ओहले ओ़ह छेन्छोक च्यिॱआङ मेम्बा म़ेहबा ओहङ कोहएँ, ङ्येर्माङ छ्या़क्यो ओहङज्ये मेहयोहङगे, ङ्य़ेहबा-छ्यू़बा म़ेहबा ओहङ कोहएँ, ओहले नाम्पार-ताहक्पा दाङ च्यिॱआङ क्येन माहफो़बा ओहङ कोहएँ। 28 ओ़हठीॱराङ पेहती ख्योवाया़गीॱआङ राहङ-राहङगी पी़हमीया़ला राहङदी ज़ुबुला ल़ेहमुराङ चेवा पेह कोहएँ। राहङ पी़हमीला चेवा पेहकेन्दीगी राहङलाराङ चेवा पेहकें। 29 च्यिबेमाना सुज्यीगीॱआङ नाहमॱआङ राहङ ज़ुबुला ङेन्ज्येन मेहबेकें, यिहॱनाङ खोगी राहङ ज़ुबुला या़हबु पेहती चारा पेहकें। ओ़हठीॱराङ जेती मास्यीकागी राहङ छेन्छोकला चारा जे नाङगे। 30 च्यिबेमाना ओहराङ मास्यीकाकी कुसोकी ओङबुया़ यिहम्बा। 31 छ्य़ेला दि ल़ेहमु सुङ नाङदी येह “ओ़ह सोङबे मिहगी राहङ आबा-आमाला क्युर ज़्या़दी राहङगी पी़हमी ङ्याम्बु डी़दी तेहकें, ओहले खुङ ङ्यी़ ज़ुबु च्यी़ डोज्ये येह।” 32 दि ज्यिबुराङ तिहङ-रिहङबुकी केच्या यिहम्बा यिहॱनाङ दि केच्या ङाहगी मास्यीका दाङ छेन्छोककी तेहन्दाला माक्यो यिहम्बा। 33 ता़ह च्यि यिहॱनाङ ख्या थाम्ज्यीगी राहङ-राहङगी पी़हमीया़ला राहङला ल़ेहमुराङ चेवा पेहतोङ, ओहले पी़हमीया़गीॱआङ राहङ ख्योवाया़ला ची़नाङ पेहच्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.