एफिसी 4 - ह्योल्मोछेन्छोकया़ डी़दी तेह कोहएँगी तेहन्दाला 1 ओ़ह सोङबे, चो़वोकी तेहन्दाला चोन-खाङला छ्यिक्यो ङाह पावल, ख्याया़ला ओहर-छ्य़े स्युहउ येह, किन्ज्योगी ख्याया़ला च्यिगी तेहन्दाला क़े क्याहप नाङग्यो यिहम्बा ओ़हला ते़बे राहङगी डोलु-तेहलु या़हबु पेहती मिहजी ताङदोङ। 2 नाहम-माना ङ्येम्ज्युङ, स्यिहवा ओहले ना़स्यीङ छ्यिम्बु पेहती च्यी़गी च्यी़ला चेवा पेहतोङ। 3 नाम्पार-ताहक्पा थुगीॱराङ ख्याया़ला च्यी़राङ ज़ो नाङग्यो यिहन। ता़ह ख्याया़ च्यी़राङ डी़दी सेम लो तेहमु पेहती तेहतोङ। 4 ज़ुबु च्यिमे च्यी़राङ यिहन, ओहले थुॱआङ च्यिमे च्यी़राङ ज़्य़ू नाङदी येह, ख्याया़ला किन्ज्योगी क़े क्याहप नाङगेमु रेहवा च्यी़लाॱराङ क़े क्याहप नाङग्यो यिहम्बा। 5 च्यिमे च्यी़राङ चो़वो, च्यिमे च्यी़राङ यिह-छ्य़े, ओहले च्यिमे च्यी़राङ बप्तिस्मा, 6 मिह थाम्ज्यीगी किन्ज्यो दाङ याहप च्यिमे च्यी़राङ ज़्य़ू नाङदी येह। मिह-रो़हराङ थाम्ज्यीगी चो़वो यिहम्बा। छ्या़ले थाम्ज्यी जे नाङगेन्दीॱआङ मिह-रो़हराङ यिहम्बा ओहले मिहरो थाम्ज्यी ङ्याम्बु ज़्य़ू नाङदी येह। 7 यिहॱनाङ मास्यीकागी काबापकी छ़े क्याहप नाङग्योया़ला ते़बे ओहराङ मिह ऱेह-ऱेहला काटीन नाङदी येह। 8 ओ़ह सोङबे छ्य़ेला दि ल़ेहमु सुङ नाङदी येह: “मिहरो याहर स्यिहङगामला फेप नाङगेमु मिहरोगी माहङबुराङ कैदीया़लाॱआङ राहङ ङ्याम्बुराङ नोम फेप्सीन ओहले मिहया़ला काबाप नाङसीन।” 9 ता़ह दि “मिहरो याहर फेप नाङसीन” म़ेदी माक्योगी तेहन्दादी च्यि यिहम्बा ले? दिगी तेहन्दा तोहङस्यो मिहरो माहर फेप्ते जाम्बुलीङकी तिहङ रिहङबु ग्या़ला फेप नाङसीन म़ेदी माक्यो यिहम्बा। 10 मास्यीका माहर जाम्बुलीङला फेप नाङसीन ओहले थाम्ज्यी जाम्बुलीङला मिहरो राहङगीराङ छाङबु ज़ो नाङज्येला मिहरो स्यिहङगामया़ म़ेदीॱआङ थो़ला फेप नाङसीन। 11 ओहले मिहरोगी मिहया़ला– लाहलाला ल़ेह-पेनया़, लाहलाला लुहङतेम्बाया़, लाहलाला या़हबु लेहङगु स्येकेन्गी मिहया़, लाहलाला पास्टरया़ ओहले लाहलाला लोबेनया़की काबापया़ नाङसीन। 12 मास्यीकाकी नाम्पार-ताहक्पा मिह थाम्ज्यीला मिहरोकी छ्या़लेया़ पेह ख़ूएँ ज़ोज्येला ओहले मिहरोकी कुसो छेन्छोकला याहरक्यी ताङज्येला दाम नाङसीन। 13 दि काबापया़ लाहमले ओहराङ यिह छ्य़ेलुला डी़दी तेह ख़ूज्ये येह ओहले किन्ज्योकी स़ेबुकी रिहक्स्यीला ओहराङ याहरक्यी पेहती डो ख़ूएँ ओहले ङ्यिहमा च्यी़ ओहराङ छाङबु मिह डोज्ये येह ओहले मास्यीकाकी छाङबु छ़े क्याहप नाङग्योकी ग्या़ थु लेप ख़ूज्ये येह। 14 ओ़ह सोङबे ओहराङ पेहजाया़ ल़ेहमु ओहङज्ये मेहयोहङगे। चिहन क्याहप्के मिहया़की लोप्च्युङ दाङ छलगी ओहराङ छ्यु पाहलाप दाङ ल्हा़बागी फार छुर याप्क्योकी छ्यु-टुह ल़ेहमु ओहङज्ये म़ेह। 15 तोहरोङ चेवा लाहमले तेहन्दामकी ताम माएँराङ ना थाम्ज्यीला ओहराङ मिहरो थुराङ पे यिहॱनाङ मास्यीका थुराङ याहरक्यी पेहती डो कोहएँ, मिह-रो़हराङ गो़ छ्येस्यो यिहन। 16 मिहरोगी ओङ चो़ला थाम्ज्यी लेहमेन लेहमेन ओङबुया़ डी़दी तेहक्यो ओहङगे ओहले ज़ुबु थाम्ज्यीराङ ठाबे-ठाबे ग्या़या़ला थिती तेहक्यो येहबा। थाम्ज्यी ओङबुया़गी राहङ-राहङगी पेह कोहएँगी ल़ेहया़ पेहसीनमाना ज़ुबु रेबेॱराङ चेवाला याहरक्यी पेहती डोएँ। मास्यीकाला मिहली साम्बा 17 ओ़ह सोङबे ङाह चो़वोकी छेनला लोप्च्युङ तेर्केॱराङ माउ येह, ता़ह ख्याया़गी डोलु-तेहलुया़ लेहमेन क्यिहपाकी मिहया़ती ल़ेहमु माहयोहङज्यु। खुङया़गी नोम्साङनी च्यिॱआङ फेन थो़ज्ये म़ेह। 18 खुङया़गी नावा ना़-जुबे काहल्दी येह। खुङगी किन्ज्योला ङोह स्ये़ज्ये माहछोल्बा सोङबे खुङ किन्ज्योलेगी था़-रिहङबु काहल्दी येह। ओ़ह सोङबे खुङया़गी सेम सान्दी काहल्सीन ओहले ङोह मे़हस्येगे काहल्सीन। ओहले खुङया़गी नावा ना़-जुबेगी काहङदी येह। 19 खुङया़की ङोहजा तोर सिहन्दी येह, ओहले खुङ नामे नाजो मेहचाङा ल़ेहया़ पेहकेन्की ह्अम्बाला छ्यिती छारा काहल सिहन्दी येह। 20 यिहॱनाङ मास्यीकालानी ख्याया़गी दि ल़ेहमु पेहती ङोह स्य़ेदी म़ेह। 21 ख्याया़गी येशूकी लोप्च्युङ ङ्यिहन्दी मिहरोगी स्याहप्च्यी काहल्ग्यो सोङबे मिहरोगी तेहन्दामला ख्याया़गी लोप्सीन। 22 तोहङमाकी डोलु-तेहलुया़ पेहती राहङगी मिहजी ताङगे ख्याया़की निङबा मिहली क्युर्तोङ म़ेदी ख्याया़गी ह्अ केह सिहन्दी येह। ख्याया़ती चोक्पा-चोक्पा सेम्बाया़गी पेहती ओ़ह निङबा मिहली तोङदी डोॱराङ येहकें। 23 ख्याया़की नावा दाङ नाम्स्यी थाम्ज्यी साम्बा डोज्यु। 24 साम्बा मिहनी किन्ज्योगी ङ्य़ेहरीलाॱराङ छ्या़क्यो यिहम्बा ओहले दिगी किन्ज्योगी दिनला टाहङदेन दाङ नाम्पार-ताहक्पा दु म़ेदी तेहन्दामकी मिहली तेन्गे। दि साम्बा पेहताङलाॱराङ ख्याया़गी ची़दोङ। 25 ओ़ह सोङबे ता़ह स्योप क्याहप्केन्गी पेहताङया़ पाङदोङ। च्यी़गी च्यी़ला ताम थेका म़ेदोङ च्यिबेमाना ओहराङ थाम्ज्यी मास्यीकाकी च्यिमे च्यी़राङ कुसोकी ओङबुया़ यिहन। 26 ख्याला स्यिहताङ लाहङना, ओ़ह स्यिहताङगी पेहती तिहक्पादी माहबे। ङ्यिहमा डुप्के म़ेदी तोहङलेराङ स्यिहताङ स्यि च्य़ूदोङ। 27 ओहले ती़ह गो-छ्येवाला लोहङ माहतेर। 28 कुमेन क्याहप्केन्गी ता़ह यिहन्ज्यु कुमेन माह-क्याहप्च्यु खोगी टाहङबु पेहती राहङ लाहक्पागीॱराङ कादुप च्येती ल़ेह तुहक्पु पेहच्यु, ओहले खोगी कोम्बु काहल्ग्योया़ला तेर ख़ूज्ये येह। 29 ख्यागी खालेगी चोक्पा तामया़ माहथेन्ज्यु, यिहॱनाङ ती़हजीला ते़बे ठाबे दाङ मिहली याहरक्यी डो च्युएँगी या़हबु तामया़ च्यी़राङ माएँ पेहतोङ, दि लाहमले ङ्यिहन्गे मिह थाम्ज्यीला काटीन ज्योर्च्यु। 30 किन्ज्योकी नाम्पार-ताहक्पा थुला थु ङ्युङ मा़हच्यु, च्यिबेमाना ओ़ह नाम्पार-ताहक्पा थुगीॱराङ ख्याया़ला थार्पाकी ङ्यिहमागी तेहन्दाला पार क्याहप नाङदी येह। 31 रेबेॱराङ खोक्पा नाहक्पुया़, स्यिहताङ दाङ ङाहर्क्यालया़ पाङदोङ, मिहला खा चोक्पा ताङगेन्की पेहताङया़ पाङदोङ, मिह ताम च्येहकेन्की पेहताङया़ पाङदोङ, थाम्ज्यी नामे-नाजो ठादो पेहकेन्गी पेहताङया़ॱआङ ख्याया़गी पाङदोङ। 32 सेम ङ्येम्बु पेहती च्यी़गी च्यी़ला निङज्यी पेहतोङ। काह-ठि पेहती किन्ज्योगी मास्यीका लाहमले ख्याया़ला कोहङदा नाङबा, ओ़हठीॱराङ पेहती ख्याया़गीॱआङ च्यी़गी च्यी़ला कोहङदा तेर। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.