एफिसी 2 - ह्योल्मोमिहली साम्बा 1 तोहङले ख्याया़गी किन्ज्योकी काया़ माहङ्यीहम्बा सोङबे ओहले तिहक्पा च्यी़राङ तिहक्पा पेहक्यो सोङबे ख्याया़ किन्ज्योकी ज़ी़दाङला स्यि सिहन्ग्यो येहकें। 2 ओ़ह ती़हजीला ख्याया़ दि जाम्बुलीङकी छ्यालुला त़ेदी राहङगी डोलु-तेहलु पेहको येहकें ओहले नामला ओङ छ्य़ेगे ताहक्पुला ची़उ येहकें। किन्ज्योला मी़हचीगे मिहया़ला खोगीराङ ताहन्दा राहङगी ओङ चो़ला ज़्या़दी येहबा। 3 लेहमा च्यी़ ओहराङॱआङ खुङ ल़ेहमुराङ येहकें ओहले ओहराङ थाम्ज्यी राहङ ज़ुबु दाङ सेमगी लाङगे से़हया़ छाङबु पेहती राहङ तिहक्पाकी पेहताङला छ्यिती मिहजी ताङगो येहकें। राहङ पेहताङगी पेहती ओहराङॱआङ खुङ ल़ेहमुराङ किन्ज्योकी थुयालला छ्यिती येहकें। 4 यिहॱनाङ थुज्यी ज़ी़ नाङज्येला छ्युक्पु ज़्य़ू नाङगे किन्ज्योगी राहङगी चेवा छ्यिम्बु लाहमले ओहराङला माहङबुराङ चेवा जे नाङसीन। 5 ओ़ह सोङबे ओहराङ तिहक्पाला स्यि सिहन्ग्यो यिहॱनाङ मिहरोगी ओहराङला मास्यीका ङ्याम्बुराङ सोम्बो ज़ो नाङसीन– काटीन लाहमलेॱराङ ख्याया़गी थार्पा ज़्योरक्यो यिहम्बा। 6 ओहराङ मास्यीका येशूला येहकें सोङबे किन्ज्योगी मास्यीका ङ्याम्बुराङ ओहराङॱलाङ सोम्बो ज़ो नाङसीन, ओहले मिहरो ङ्याम्बुराङ स्यिहङगामकी ग्या़या़ला ओङ छ्य़ेज्येला ज़्या़ नाङसीन। 7 किन्ज्योगी दि थाम्ज्यी जे नाङग्योकी तेहन्दादी ओहराङ मास्यीकाला यिह-छ्य़े पेहक्यो मिहया़ला थुज्यी ज़ी़ नाङदी मिहरोगी था़ म़ेहबा काटीनकी क्युह ओहङगेन ङ्यिहमाया़ला नाहम-मानागी तेहन्दाला तेन नाङज्येला यिहम्बा। 8 किन्ज्योकी काटीनगी जेती ख्यागी मास्यीकाला यिह-छ्य़े पेहक्यो सोङबेॱराङ ख्याया़ला किन्ज्योगी थार च्य़ू नाङग्यो यिहम्बा। दि ख्या राहङदीराङ स्युककी पेहती मिहम्बा, दिनी किन्ज्योकी काबाप यिहम्बा। 9 ल़ेह पेहती माॱराङ मिहया़गी थार्पा ज़्योरक्यो मिहन, मिहन्सीमानानी खुङया़गी छ्य़ेन्दो तेन्ज्ये येहकें। 10 च्यिबेमाना ओहराङ या़हबु ल़ेहया़की तेहन्दाला मास्यीका येशूला ज़ो नाङग्योकी किन्ज्योकी छ्या़की छ्या़लेया़ यिहम्बा। ओहराङगी ओ़ह या़हबु ल़ेहया़ पेहच्यु सुङदीमाराङ किन्ज्योगी तोहङ यिहन्ज्युराङ ठाबे जे नाङग्यो येहकें। मास्यीकाला मिह थाम्ज्यी च्यी़राङ यिहन 11 लेहमा च्यी़ ख्याया़ काह-ठि येहकें ओ़ह टेहम्बा साल्दोङ। मिहगी लाहक्पा लाहमले स्या-ताक ज़्योरक्यो यहूदीया़गी ख्याला स्या-ताक माहबेबाकी मिह म़ेदी माउ येहकें। 12 ओ़ह ती़हजीला ख्याया़ मास्यीका यिहन्ज्यु खा फ़ेदी तेहती येहकें। ख्याया़ किन्ज्योगी दाम नाङग्योकी क्यिहपा इस्राएलीया़ ङ्याम्बु डोलु तेहलुॱराङ म़ेहबा येहकें ओहले मिहरोगी ताहम्ज्या ज़्या़ नाङदी थि नाङग्यो ताहम्ज्याला ख्याया़ छ्यि-क्याहपा मिहया़ येहकें। ख्याया़ दि जाम्बुलीङला रेहवाराङ म़ेहबाकी मिहया़ ल़ेहमु येहकें ओहले ख्यागी किन्ज्योला ङोहॱराङ स्य़ेदी म़ेहबा येहकें। 13 यिहॱनाङ ओ़ह ती़हजीला ख्याया़ मास्यीका येशू यिहन्ज्यु था़-रिहङबु येहकें, ता़ह मिहरोगी राहङगी ठा़गी ख्याया़ला पोहला नोम फेप नाङदी येह। 14 च्यिबेमाना ओहराङला स्य़िहदे नाङगेन्दीनी मिह-रो़हराङ यिहन। मिहरोगी यहूदी दाङ लेहमेन क्यिहपाकी मिह ङ्यिकालाराङ च्यी़राङ ज़ो नाङदी येह, ओहले ओहराङला खा फे़ च्य़ूगे टाहकी चिक्पाला मिहरोगी रोम नाङदी येह। 15 मिहरोगी इस्राएली दाङ लेहमेन क्यिहपाकी मिहया़ला थि नाङज्येला ओहले मिहरो लाहमले क्यिहपा साम्बा च्यी़ ज़ो नाङज्येला मिहरोगी छ्य़े-ठिमकी काया़ ओहले पे-ठिमया़ला राहङ ज़ुबु लाहमले च्ये नाङदी येह। 16 ओहले मिहरोगी क्याहङस्यीङ लाहमले ओहराङ ङ्यी़ला ज़ुबु च्यी़ला किन्ज्यो ङ्याम्बु थु च्य़ू नाङसीन ओहले ओ़ह क्याहङस्यीङ लाहमलेॱराङ मिहरोगी टाहला तोङ च्य़ू नाङसीन। 17 मिहरो फेप नाङदी ख्ये था़-रिहङबु येहकेन लेहमेन क्यिहपा दाङ पोहला येहकेन यहूदीया़ला थिन च्य़ूएँकी या़हबु लेहङगु स्य़े नाङसीन, 18 च्यिबेमाना मिहरो लाहमलेॱराङ यहूदी दाङ लेहमेन क्यिहपा ओहराङ थाम्ज्यीगी च्यिमे च्यी़राङ नाम्पार-ताहक्पा थु ज्योर्ती याहप साला डो ख़ूएँ काहल्दी येह। 19 ओ़ह सोङबे ता़ह ख्याया़ छ्यि-क्याहपा मिह दाङ प्रे़हयार मिहम्बा, ता़ह ख्याया़ किन्ज्योगी दाम नाङग्योगी मिहया़ ङ्याम्बु छ्येटो काहल्दी येह ओहले ख्याया़ किन्ज्योकी ज़िम्गाङ च्यी़गी मिहया़ काहल्दी येह। 20 ओ़ह ज़िम्गाङदी ल़ेह-पेनया़ दाङ लुहङतेम्बाया़की ब्राम थो़ला छ्या़दी येहबा, ओ़ह ब्रामकी चा छ्येवा तोहदी मास्यीका येशू राहङराङ यिहम्बा। 21 खाङबा दोगेलाराङ मिहरोगीॱराङ ज़ुङदे ज़्या़ नाङदी येहबा ओहले मिहरोगी दि खाङबाला चो़वोकी छेनला फुल्ग्योकी नाम्पार-ताहक्पा छ्योखाङ च्यी़ ज़ो नाङज्ये येह। 22 ख्या मास्यीका ङ्याम्बु च्यी़राङ डी़दी ज़्याङगेनॱराङ पेहक्योकी ज़िम्गाङला नाम्पार-ताहक्पा थु लाहमले किन्ज्यो ओ़ह ज़िम्गाङला ज़्य़ू नाङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.