एफिसी 1 - ह्योल्मो1 किन्ज्योगी थु लाहमले मास्यीका येशूगी ल़ेह-पेन ङाह पावल लाहमले, मास्यीका येशूला यिह छ्य़ेक्यो एफिससला येहकेन्गी नाम्पार-ताहक्पा मिहया़ला दि यिहगी प्रुहएँॱराङ येहबा। 2 ओहराङगी किन्ज्यो याहप दाङ ओहराङ चो़वो येशू मास्यीकागी ख्याया़ला काटीन दाङ स्य़िहदे नाङज्यु। यिहक्तेन मेलाम 3 ओहराङगी चो़वो येशू मास्यीकाकी किन्ज्यो दाङ याहपला थुज्यी-छ्ये़! मिहरोगी येशू मास्यीका लाहमले ओहराङला स्यिहङगामकी ग्या़या़ला ना थाम्ज्यीगी यिहक्तेन मेलामया़ नाङदी येह। 4 किन्ज्योगी जाम्बुलीङ छ्या़ च्य़ू नाङगे म़ेदी तोहङलेराङ मास्यीका लाहमले ओहराङला मिहरोगी दिनला नाम्पार-ताहक्पा दाङ च्यिॱआङ क्येन म़ेहबा ओहङ ख़ूज्यु म़ेदी दाम नाङदी येहकें। 5 किन्ज्योगी ओहराङला चेवा जे-नाङदी मास्यीका लाहमले राहङदीराङ पुह-पोहमो ज़ो नाङज्येला मिहरोला या़हबु ऩेसीन ओ़ह सोङबे मिहरोगी ओहराङला तोहङलेराङ दाम नाङसीन। 6 ओहजे छ्यिम्बु काटीनगी तेहन्दाला ओहराङ किन्ज्योला थुज्यी-छ्ये़ फुल्दोङ। मिहरोगी राहङगी चेवा जे नाङग्योकी स़ेबु ओहराङला आहन्डाराङ फुल नाङसीन। 7 किन्ज्योगी काटीन था़ म़ेहबा येहकें सोङबे मास्यीकाकी ठा़ लाहमले ओहराङगी येशूला थार्पा ज्योर सिहन्दी येहबा ओहले ओहराङगी पेहक्यो तिहक्पाया़ थाम्ज्यीराङ ता़ह सिहन्दी येह। 8 दि ल़ेहमु जेती मिहरोगी थाम्ज्यीराङ रिहक्पा दाङ रिहक्स्यी ओहराङला बोल्बु जेती नाङसीन। 9 ता़ह किन्ज्योकी तिहङ-रिहङबुगी राहङगी ज़ोक्योकी च्याहम्दाया़ मिहरोगी ओहराङला मास्यीका लाहमले तेन नाङसीन। दि किन्ज्योकी राहङगी ज़ोक्योकी च्याहम्दा मिहरोगी थुला तोहङ यिहन्ज्युराङ ठुङग्यो येहकें ओहले दि राहङगी ज़ोक्योकी च्याहम्दा तेहन्दा डुप च्य़ू नाङज्येला मिहरोला या़हबु ऩेसीन। 10 किन्ज्योगी राहङगी ज़ोक्योकी च्याहम्दाया़ ठाबे ती़हजीला तेहन्दा डुप च्य़ू नाङज्ये येह। दि च्यि यिहम्बा मासीमाना स्यिहङगाम दाङ जाम्बुलीङला छ्या़ च्य़ू नाङग्योकी रेबेॱराङ से़हया़ मास्यीकाकी ओङ चो़ला नोम फेप नाङगेन्गी छ्या़ले यिहम्बा। 11 थाम्ज्यीराङ से़हया़ किन्ज्योगी राहङगी ज़ोक्योकी च्याहम्दा दाङ आप्ता च्येएँ लाहमले काहल्दी येह। किन्ज्योगी तोहङलेराङ आप्ता च्ये नाङग्योकी स्याहल लाहमले मिहरोगी थु-सेम जे-नाङदी ओहराङला मास्यीकाला दाम नाङसीन। 12 ओहराङ मास्यीकाला तोहङ यिहन्ज्युराङ रेहवा पेहकेनया़ला किन्ज्योगी राहङदी त़ेरा तेच्याकी तेहन्दाला दाम नाङसीन। 13 ओ़ह ल़ेहमुराङ ख्याया़गीॱआङ तेहन्दामगी लेहङगु, पे यिहॱना़: राहङला थार्पा तेर्केन्गी या़हबु लेहङगु ङ्यिहन्दी मास्यीकाला सेमले खाल्सीन ओ़ह ती़हजीलाराङ मिहरोगी राहङगी ताहम्ज्या ज़्या़ नाङग्योकी नाम्पार-ताहक्पा थुगी पार क्याहप नाङसीन। 14 किन्ज्योगी ताहम्ज्या ज़्या़ नाङग्योकी ओङ माहन्ज्योर थु ओ़ह नाम्पार-ताहक्पा थुकी बे़ना यिहम्बा। ओहराङ किन्ज्योला त़ेरा तेच्या फुल्दोङ। थुज्यी-छ्ये़ दाङ सोल्वाङ 15 ओ़ह सोङबे चो़वो येशू थो़ला येहकेन ख्याया़गी तेहपा दाङ मास्यीकाकी नाम्पार-ताहक्पा मिहया़ थो़ला येहकेन ख्याया़की चेवाकी तेहन्दाला ङाहगी थ़ेसीन। 16 ओ़ह सोङबे ङाह सोल्वाङ ताप्कें टाहङमाराङ ख्याया़ला टेहम्बा साल्दी किन्ज्योला नाहम्माॱनाङ थुज्यी-छ्ये़ फुल्गे। 17 ओहराङ चो़वो येशू मास्यीकाकी किन्ज्यो, ज़िज्यिदकी याहपगी ख्याया़ला मिहरोगी तेहन्दाला येहन्देनला रिहक्स्यी दाङ ङोह स्य़े ख़ूएँगी थु नाङज्यु म़ेदी ङाह नाहम्माॱनाङ सोल्वाङ ताप्को येह। 18 ङाह दिगी तेहन्दालाॱआङ सोल्वाङ ताप्को येह, ख्याया़की सेमकी मी़ क्या-साङे डोज्यु, ओहले का़हन्दी रे़हवाकी तेहन्दाला मिहरोगी ख्याया़ला क़े क्याहप नाङग्यो यिहम्बा, ओहले मास्यीकाकी नाम्पार-ताहक्पा मिहया़ला मिहरोकी ज़िज्यिद क्युहगी ओङ च्यि यिहम्बा, ओ़ह ख्याया़गी ङोह स्य़े ख़ूज्यु। 19 ओहले ओहराङ यिह छ्य़ेगेया़गी तेहन्दाला मिहरोकी चा़ छ्यिम्बु ओङ च्यि यिहम्बा, ओ़ह ख्याया़गी ङोह स्य़े ख़ूज्यु म़ेदी ङाह सोल्वाङ ताप्के। 20 दि ओङ लाहमलेॱराङ मिहरोगी मास्यीकाला टोहङग्योलेगी सोम्बो ज़्याङ च्य़ू नाङसीन ओहले स्यिहङगामला राहङगी योबा ङो़ले ज़्या़ नाङसीन। 21 थाम्ज्यी ठिम ताङगेया़, ओङ छ्य़ेगेया़, वाङज्या दाङ क्याहल्सी, ओहले दि छेला च्यी़राङ मिहम्बा, यिहॱनाङ ओहङगेन्गी काल्बालाॱआङ काहजे मिहन थो़क्योया़ येहबा, ओ़ह थाम्ज्यी थो़ला मास्यीकागी ओङ छ्य़े नाङज्ये येह। 22 ओहले किन्ज्योगी थाम्ज्यीराङ से़हया़ मास्यीकाकी स्याहप चो़ला ज़्या़ नाङसीन, ओहले मिहरोला ना थाम्ज्यीराङ से़हया़ला छेन्छोकती गो-छ्येस्यो ज़ो नाङसीन। 23 ओ़ह छेन्छोकदी मास्यीकाकी कुसो यिहम्बा, दि कुसोला मास्यीकागी छाङबु ज़ो नाङदी येह ओहले ना थाम्ज्यीला मिहरोगीॱराङ छाङबु ज़ो नाङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.