कलस्सी 4 - ह्योल्मो1 ए ताहक्पुया़, राहङ योक्पु-यो़मुया़ला ङ्येम्बा-ङ्य़ेहरी माहबेबा पेहती ठिमला ते़बे छ्याप्स्यी या़हबु पेहतोङ। ख्यागीॱआङ स्यिहङगामला राहङगी ताहक्पु ज़्य़ू नाङदी येह माएँ टेहम्बा माहच्येह। लेहमेन लोप्तामया़ 2 ख्या जेम्बु पेहती थुज्यी-छ्ये़ फुल्दी सोल्वाङ ताप्तेॱराङ तेहतोङ। 3 ङाहगी या़हबु लेहङगु स्येक्यो सोङबेॱराङ ङाह चोन-खाङला छ्यिक्यो यिहम्बा। ता़ह मास्यीकागी तिहङ-रिहङबुकी स्याहल स्येच्येला ओहले मिहरोकी या़हबु लेहङगु प्रा-साल्ज्येला किन्ज्योगी ङ्यिहला कोह च्यी़ खा फे़ नाङज्यु म़ेदी सोल्वाङ ताप तेर। 4 ङाहगी काह-ठि पेहती प्रा साल कोहएँ यिहम्बा ओ़हठीॱराङ पेहती ङाहगी प्रा साल ख़ूज्यु म़ेदी ङाहगी तेहन्दाला ख्यागी सोल्वाङ ताप तेर। 5 यिह मे़हछ्येएँ मिहया़ ङ्याम्बु डोलु-तेहलु पेहकेमु रिहक्स्यी छ्यिम्बु तेन्दी पेहतोङ। ख्यागी ज़्योरक्योगी लोहङ च्यी़ॱआङ तोर मा़हच्यु। 6 छागी प्रे़ह तेरक्यो ल़ेहमुराङ ख्यागी ताम मालु नाहम्माॱनाङ या़हबु दाङ ङ्येम्बु ओहङज्यु। ख्यागी मिह थाम्ज्यीला काह-ठि पेहती ल़ेहन क्याहप कोहएँ यिहम्बा, ओ़ह ख्याला क्यी़ह ओहङज्यु। ज्युक्स्योलगी टास्यी-देले 7 ङाहगी तेहन्दाला रेबेॱराङ तामया़ ङाहती च्याहम्बु नो़ह तुखिकसगी ख्याया़ला स्येच्ये येह। खोॱआङ यिह-छ्य़ेबु दाङ ओहराङ ल़ेहमुराङ चो़वोला स्याहप्तो स्युहएँगी योक्पु यिहम्बा। 8 ङाहगी खोला ख्यासाला च्यिबे ताङज्ये पेहक्यो मासीमाना ख्यागी ङ्यिहगी तेहन्दाला क्यी़ह ज्योर्च्यु ओहले खोगी ख्याला आ़र क्ये च्य़ू ख़ूज्यु म़ेदी यिहम्बा। 9 ओहले ख्या नाहङदीॱराङ नो़ह ओनेसिमसॱआङ खो ङ्याम्बु ओहङगेॱराङ येह। खोॱआङ ओहराङगी यिह छ्य़ेबा दाङ च्याहम्बु नो़ह यिहम्बा। दि ग्या़गी लेहङगु थाम्ज्यी खुङगी ख्याया़ला स्येच्ये येह। 10 ङाह ङ्याम्बुराङ चोन-खाङला येहकेन अरिस्तार्खसगी ख्याया़ला टास्यी-देले ताङदी येह। बारनाबासकी नो़ह मर्कूसगीॱआङ ख्याला टास्यी-देले ताङदे येह। (खोगी तेहन्दाला ङाहगी ख्याया़ला तोहङलेराङ मा सिहन्दी येह, खो ओहङसीमाना खोला फेप स्यी़हदोङ।) 11 युस्तस माएँ येशूगीॱआङ ख्याया़ला टास्यी-देले ताङदे येह। किन्ज्योगी क्याहल्सी छ्यिम्बु ज़ोज्येला इस्राएलीया़ नाहङला ङाह ङ्याम्बुराङ ल़ेह पेहकेनया़ दि नो़ह मेहन्दा सुम च्यी़राङ यिहन। तेहम्बाराङ दि नो़हया़गी ङाहला ज्यिबुराङ आ़र क्ये च्य़ूदी येह। 12 ख्या नाहङदीॱराङ नो़ह मास्यीका येशूगी योक्पु इपाफ्रासगीॱआङ ख्याया़ला टास्यी-देले ताङदे येह। खोगी नाहम्माॱनाङ ख्याला सोल्वाङला टेहम्बा साल्दी ख्या किन्ज्योला सान्दी डो ख़ूज्यु, यिह-छ्य़ेला च्यिप्क्यो ओहङ ख़ूज्यु ओहले काया़ ची़ ख़ूज्यु म़ेदी कादुप च्येती सोल्वाङ ताप्को येह। 13 ङाह खोगी तेहन्दाला पाङबु तेर्के च्यिबेमाना खोगी ख्याया़गी तेहन्दाला ओहले लाउडिकिया दाङ हिरापोलिसदी मिहया़गी तेहन्दाला ज्यिबुराङ कादुप च्येती येहबा। 14 ओहराङगी च्याहम्बु रो़ह आम्ज्यी लूका दाङ डेमासगीॱआङ ख्याया़ला टास्यी-देले ताङदे येह। 15 लाउडिकिया क्याहसाकी आदा-नो़ह दाङ आज्यी-नुहमुया़ ओहले नुम्फास दाङ मोहगी खाङबाला छोक्पा पेह ओहङगेन्गी थाम्ज्यी यिह-छ्य़ेबाया़ला ङाहती टास्यी-देले मे तेर। 16 ख्याया़गी पाहरक्यीला दि यिहगी टा़ह सिहन फान्ज्यो लाउडिकियागी छेन्छोकलाॱआङ दि यिहगी टा़ह च्य़ूदोङ, ओहले लाउडिकियागी यिहगीॱआङ ख्यागी टा़हदोङ। 17 “ख्येगी चो़वो लाहमले ज़्योरक्योगी स्याहप्तो स्युहएँगी ल़ेह ता़ह छाङबु पेह” म़ेदी अर्खिप्पसला म़े तेर। 18 ङाह पावल, दि टास्यी-देलेती राहङ लाहक्पागीॱराङ प्रुहएँॱराङ येह। ङाह चोन-खाङला छ्यिती येह माएँ ताम ख्यागी टेहम्बा माहच्येह। ख्या थाम्ज्यी ङ्याम्बु किन्ज्योगी काटीन ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.