कलस्सी 3 - ह्योल्मोनाम्पार-ताहक्पा मिहजी ताङगेन्गी लोप्च्युङया़ 1 का़हलेॱआङ ख्याया़ मास्यीका ङ्याम्बु सोम्बो लो़हक्यो यिहन्सीमाना ता़ह स्यिहङगामकी से़हया़ छोल्दोङ, ओ़हला मास्यीका किन्ज्योगी योबा छ्या़ ङो़ले ज़्य़ू नाङदी येह। 2 जाम्बुलीङगी से़हया़ला मिहम्बा यिहॱनाङ याहरकी से़हया़ला सेम ताङदोङ। 3 च्यिबेमाना ख्याया़ स्यि सिहन्दी येह, ओहले ख्यागी मिहजी किन्ज्योला मास्यीका ङ्याम्बुराङ पे़ह ज़्या़दी येह। 4 ख्यागी तेहन्दामगी मिहलीनी मास्यीकाॱराङ यिहम्बा ओहले मास्यीका जाम्बुलीङला लो़हदी फेप नाङगेमु मिह थाम्ज्यीगी मिहरोला थोङज्ये येह, ओ़ह ती़हजीला ख्याया़लाॱआङ मिहरोकी ज़िज्यिद ङ्याम्बुराङ ओहङग्यो थोङज्ये येह। निङबा दाङ साम्बा मिहली 5 ख्यागी दि तिहक्पा पेहकेन्गी सेम्बाया़ला सेतोङ पे यिहॱना़: छ्येउ-छ्येंमु, मेहचाङा, छारा ल़ेह पेहकेन्गी सेम्बा, चोक्पा नोम्साङ ताङगेन्गी तामया़ ओहले ह्अम्बा पेहकेन्दी कुला छ्येपा फुल्ग्यो यिहम्बा। 6 दि से़हया़गी पेहतीराङ किन्ज्योगी थुयाल मिहरोगी का मिहची़एँगी मिहया़ थो़ला बाप्च्ये येह। 7 ख्याया़गी मिहजीॱआङ लेहमा च्यी़ दि ल़ेहमुराङ येहकें ओहले दि ल़ेहया़ॱराङ पेहको येहकें। 8 यिहॱनाङ ता़ह ख्याया़गी स्यिहताङ दाङ टाहसेम पेहकें, ठादो पेहकें, ख्येर क्याहप्केन दाङ छारा ताम माएँया़ क्युर कोहएँ। 9 च्यी़गी च्यी़ला स्योप माहक्याहप, च्यिबेमाना ख्यागी राहङगी निङबा मिहली दाङ पेहताङया़ थाम्ज्यीराङ पाङ सिहन्दी येह। 10 ता़ह ख्यागी साम्बा पेहताङया़ लेहन्दी येह। ख्या ङ्यिहमा टाहङमा ख्याला ज़ो नाङगे किन्ज्यो ल़ेहमु पेहती डोएँमु ख्यागी मिहरोगी तेहन्दाला येहन्देन छाङबु ज्योर्च्ये येह। 11 ओ़ह सोङबे दि साम्बा मिहजीला ग्रीक दाङ यहूदी, स्या-ताक पेहक्यो दाङ स्या-ताक माहबेबा, यिहगी मे़हस्येगेन दाङ रिहदोङ क्यिलगी मिह, योक्पु पेहक्यो दाङ माहबेबाला च्यिॱआङ ख्येपार म़ेह, यिहॱनाङ मास्यीकाॱराङ ना थाम्ज्यी यिहम्बा, ओहले मिहरो थाम्ज्यी ङ्याम्बु ज़्य़ू नाङदी येह। 12 ख्याया़राङ किन्ज्योगी दाम नाङग्यो दाङ मिहरोगी चेवा जे नाङग्योकी नाम्पार-ताहक्पा मिहया़ यिहम्बा। ओ़ह सोङबे ख्यागी चेवा पेहकें, निङज्यी पेहकें, ङ्येम्ज्युङ पेहकें, स्यिहवा पेहकें दाङ ना़स्यीङ छ्यिम्बु पेहकेन्गी छ्याप्स्यीया़ला काप्च्या ल़ेहमुराङ केहन्दी राहङगी राहङला ज़ाप कोहएँ। 13 च्यी़गी च्यी़ला ना़दोङ, च्यी़गी च्यी़ला टाह पेहती च्यिरा ल़ेह जोल्ग्यो येहसीनमाना च्यी़गी च्यी़ला स्या़बा तेर्तोङ। चो़वोगी ख्याला स्या़बा नाङग्यो ल़ेहमुराङ ख्यागीॱआङ मिहया़ला स्या़बा तेर्तोङ। 14 दि थाम्ज्यी म़ेदी माहङबु ख्यागी चेवाला लेहन्दोङ च्यिबेमाना चेवागीॱराङ ओहराङ थाम्ज्यीला च्यी़राङ जे़दी ताहम्दी ज़्या़गे। 15 मास्यीकागी नाङगेन स्य़िहदेगी ख्याया़गी सेमला ओङ छ्य़े नाङज्यु। तेहम्बाराङ, ख्या सेम लो तेहमु पेहती राहङगी मिहजी ताङज्येगी तेहन्दाला ज़ुबु च्यी़लाॱराङ क़े क्याहप नाङग्यो यिहम्बा। ख्याया़गी थुज्यी-छ्ये़ फुल्दोङ। 16 मास्यीकागी सुङदेनगी ख्यागी सेम बोलो-छ्योलो पेहती काहङज्यु। राहङ ङ्याम्बु का़ह येहकेन रिहक्पा-रिहक्स्यीगी च्यी़गी च्यी़ला लोप्तोङ ओहले टे़हरिम तेर। सेम तिहङ यिहन्ज्युराङ किन्ज्योगी छ्ये़-लुया़ लेहन्दोङ, त़ेरा तेच्या फुल्दोङ, यिहक्तेन लुया़ लेहन्दोङ ओहले मिहरोला थुज्यी-छ्ये़ फुल्दोङ। 17 ख्याया़गी च्यि पेहॱनाङ च्यि माॱनाङ ना थाम्ज्यी चो़वो मास्यीकागी छेनलाराङ पेहतोङ ओहले मिहरो लाहमलेॱराङ किन्ज्यो याहपला थुज्यी-छ्ये़ फुल्दोङ। मास्यीकापा खाङबा मे़हमेया़ला लोप्च्युङ 18 ए पी़हमीया़, राहङ ख्योवागी ओङ चो़ला तेहतोङ च्यिबेमाना दि चो़वोगी ज़ी़लुला या़हबु यिहम्बा। 19 ए ख्योवाया़, राहङ-राहङगी पी़हमीया़ला चेवा पेहतोङ ओहले खुङला चोक्पा माहबे। 20 ए पुह पोहमोया़, ख्यागी राहङ आबा-आमागी माक्यो तामया़ ङ्यिहन्दोङ। च्यिबेमाना दिगी चो़वोला थु काहसो ज़ोएँ। 21 ए आबाया़, राहङ पुह पोहमोया़ला स्यिहताङ लाहङ-माहच्यु, मिहन्सीमाना खुङया़गी सेम स्यिदी डोज्ये येह। 22 ए योक्पु-यो़मुया़, दि जाम्बुलीङगी ख्या ताहक्पुगी माक्यो तामया़ ङ्यिहन्दोङ। ताहक्पुला क़ेहनाङ लाहङ च्य़ूएँ छ्याप्स्यीगी मी़गी दिनला च्यी़राङ मिहम्बा यिहॱनाङ चो़वोगी ज्यिक्पा खुर्ती सेम टाहङबु पेहती ल़ेह पेहतोङ। 23 ख्यागी च्यि ल़ेह पेहॱनाङ सेम तिहङ यिहन्ज्युराङ पेहतोङ। मिहला मिहम्बा, यिहॱनाङ चो़वोलाॱराङ स्याहप्तो स्युहक्यो यिहन ने़दी पेहतोङ। 24 च्यिबेमाना ख्याला चो़वोगी ताहम्ज्या ज़्या़ नाङग्योकी च्याहगा नाङज्ये येह म़ेदी क्यी़ह येहबा। चो़वो मास्यीकाॱराङ ख्यागी ताहक्पु यिहम्बा। 25 सुगी ल़ेह चोक्पा पेहकें खोला ङ्य़ेहबा फो़ज्ये येह च्यिबेमाना किन्ज्योगी सुलाॱआङ ङ्येम्बा-ङ्य़ेहरी जे मेहनाङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.