कलस्सी 2 - ह्योल्मो1 ता़ह ख्याया़गी दि केच्या ह्अ कोहज्यु माएँ ङाहती सेम्बा येहबा, काह-ठि पेहती ख्याया़ दाङ लाउडिकियाला येहकेन्की मिहया़ ओहले ङाहला थोङॱराङ माहथोङबा मिह थाम्ज्यीगी तेहन्दाला ङाह कादुप च्येती ल़ेह पेहकें, 2 च्यिबेमाना दि लाहमले ख्या यिह-छ्य़ेला सान्दी डो ख़ूज्यु ओहले च्यी़गी च्यी़ला चेवा पेहती ख्या च्यी़राङ डो ख़ूज्यु। दि ल़ेहमु पेह फान्ज्यो किन्ज्योकी तिहङ-रिहङबुकी येहन्देन ङोह स्य़े ख़ूएँ दु म़ेदी ख्या राहङगी तेहम्बाराङ क्यी़ह ज्योर्च्ये येह। ओहले तिहङ-रिहङबुगी येहन्देनदी मास्यीका यिहम्बा। 3 मास्यीकालाॱराङ किन्ज्योकी थाम्ज्यीराङ येहन्देन दाङ रिहक्स्यीकी क्युह यिहप्ती येहबा। 4 ओ़ह सोङबे ङाह ख्याया़ला माएँ, तेहन्दाम ल़ेहमु थोङॱनाङ चिहन क्याहप्ती माक्यो तामया़गी ख्याला गो़ माहकोरज्यु। 5 ज़ुबुला ङाह ख्यालेगी था़-रिहङबु येहॱनाङ यिहलानी ङाह ख्या ङ्याम्बुराङ येह। ओहले ख्यागी राहङगी मिहजी दाङ मास्यीकाला ख्यागी तेहपा सान्दी थोङदी ङाहला ज्यिबुराङ क़ेहनाङ लाहङदी येहबा। मास्यीका ङ्याम्बु येहकेन्गी बोलो-छ्योलोगी मिहली 6 ओ़ह सोङबे काह-ठि पेहती ख्याया़गी मास्यीकाला लोक पेहपा, ओ़हठीॱराङ पेहती मिहरोला थु ङ्ये़एँगी मिहजी ताङदोङ। 7 मास्यीकाला चार्ङ्यी स्य़ूहदी याहरक्यी पेहती सोङ। ख्यागी राहङगी मिहजी मास्यीका थो़ला जे़दोङ ओहले ख्याला लोप्क्यो ल़ेहमु यिह-छ्य़ेला सान्दी पेहती मिहरोला थुज्यी-छ्ये़ फुल्दीॱराङ तेहतोङ। 8 टिहम्बु पेहती तेह, फेन्दोप म़ेहबागी रिहक्स्यी दाङ छलगी काहङग्यो नोम्साङया़गी मिताला माहछ्यीज्यु। दि ल़ेहमु केच्याया़ मास्यीका लाहमले ओहङग्यो मिहम्बा यिहॱनाङ दि मिहया़गी पे-ठिम दाङ जाम्बुलीङला ओङ छ्य़ेगेन ङ्येहम्बा नाम्स्यी लाहमले ओहङग्यो यिहम्बा। 9 च्यिबेमाना मास्यीकाकी कुसोला किन्ज्योगी थाम्ज्यी गीनया़ छाङबु जेती ज़्य़ू नाङदी येह। 10 मास्यीकाॱराङ थाम्ज्यी क्याहल्सी दाङ ओङकी गो़ छ्येस्यो यिहम्बा। मिह-रो़हलाॱराङ ख्याया़ती मिहली छाङबु काहल्दी येह। 11 ख्या मास्यीका ङ्याम्बु च्यी़राङ डी़क्यो सोङबे ख्यागी तेहन्दामकी स्या-ताक ज्योर्सीन। दि स्या-ताकती मिहगी ज़ुबुला क्याहप तेर्केन्गी स्या-ताक मिहम्बा, यिहॱनाङ दि मास्यीकागीॱराङ क्याहप नाङग्योकी स्या-ताक यिहम्बा। दि स्या-ताकगी मिहगी ज़ुबु लाहमले पेहकेन्गी तिहक्पाकी पेहताङया़ला पिती क्युर च्य़ूगे। 12 च्यिबेमाना बप्तिस्मा लेहन्गेमु ख्या मास्यीका ङ्याम्बुराङ साला पिहप्क्यो येहकें। टोहङग्योलेगी मास्यीकाला सोम्बो ज़्याङ च्य़ू नाङगे किन्ज्योकी ओङला ख्यागी तेहपा पेहक्यो सोङबे ख्या मास्यीका ङ्याम्बुराङ सोम्बो काहल्दी येह। 13 ती़हजी च्यी़ला ख्या स्यि सिहन्ग्यो येहकें च्यिबेमाना ख्या तिहक्च्येम्बा येहकें ओहले ख्या स्या-ताक माहबेबाकी लेहमेन क्यिहपाकी मिहया़ यिहन्गे, यिहॱनाङ किन्ज्योगी ओहराङदी थाम्ज्यीराङ तिहक्पाया़ कोहङदा नाङदी मिहरो ङ्याम्बुराङ सोम्बो ज़ो नाङसीन। 14 ओहले मिहरोगी ओहराङला ङ्य़ेहबा काल्ज्येला प्रुह नाङग्योकी थाम्ज्यी स्युगुया़ दाङ ठिमया़ला क्याहङस्यीङला च्याङदी च्ये नाङसीन। 15 ओहले ओ़ह क्याहङस्यीङला मास्यीकागी, नाम्स्यीला ओङ छ्य़ेएँगी स्युक छ्यिम्बु दाङ वाङज्या छ्यिम्बु थो़क्योया़ला फाम च्य़ू नाङदी ओ़ह थाम्ज्यी थो़ला क्याहल नाङसीन। ओहले मिहरोगी खुङया़ला मिह थाम्ज्यीगी थोङदाङला आब्रु तेन नाङसीन। 16 ओ़ह सोङबे साहएँ थुङगेन, छ्येपाया़, नाम्गाङ दाङ थाङ सोएँ ङ्यिहमा ची़गेन्गी तेहन्दाला सुज्यीगीॱआङ ख्याया़ला फातुर मा़हच्युज्यु। 17 दि थाम्ज्यी तिङला ओहङगे से़हया़गी टिहप्सा च्यी़राङ यिहम्बा, यिहॱनाङ ताहङमा तामदी मास्यीकाॱराङ यिहम्बा। 18 ङ्यिहगी ज्याल्गा थोङसीन म़ेदी ङ्येम्ज्युङ पेहचेनज्यी तेन्दी स्यिहङगामकी स्याहप्च्यीला छ्येपा फुल्गेनया़ॱआङ येहबा। ओहले खुङया़गी ख्याया़ला दि ल़ेहमु यिहनॱराङ मिहम्बागी तामया़ स्येती गो़ कोर च्य़ूदी ख्यागी ज्योर कोहएँगी च्याहगा तोर मा़हच्यु। दि ल़ेहमु मिहया़ तिहक्पागी सेम थो़दी तेहन्दाॱराङ म़ेहबाकी तामया़ला छ्य़ेन्दो तेन्दी तेहकें। 19 यिहॱनाङ खुङ मास्यीका ङ्याम्बु तेहच्ये क्युर्ती येह। मास्यीकाती ज़ुबुकी गो़ यिहम्बा। ओहले ज़ुबुला स्युक मास्यीकागी नाङगे। छी़ दाङ स्यागी ज़ुबुला ग्या़ च्यी़ला ताहम्दी ज़्या़गे। किन्ज्योगी ओङगी ओ़ह ज़ुबुला छार च्य़ू नाङगे। 20-21 ख्याया़नी मास्यीका ङ्याम्बुराङ स्यिक्यो सोङबे ता़ह दि जाम्बुलीङकी पे-ठिम यिहन्ज्यु टोहल सिहन्दी येह। ता़ह येहपाराङ ख्याया़ च्यिबे दि जाम्बुलीङगी मिहया़ ल़ेहमुराङ पेहती राहङगी मिहजी ताङगे? दिनी ल़ेहला च्य़ूज्ये मेहयोहङगे, दिनी साहज्ये मेहयोहङगे, दि दे़ज्ये मेहयोहङगे माएँ पे-ठिमया़ॱराङ ख्यागी च्यिबे ची़गे? 22 दि थाम्ज्यी ल़ेहया़ पेह पेहपा काहङला तोङदी डोएँ। दिनी मिहगी ज़ोक्योगी पे-ठिम दाङ लोप्च्युङ च्यी़राङ यिहम्बा। 23 दि पे-ठिमया़ लाहमले छ्य़े पेहकें, ङ्येम्ज्युङ पेहकें दाङ टुहबा क्याहप्ती तेहकेन मिहया़नी थोङदाङला ज्यिबुराङ ख्येम्बा-ताहक्पु ल़ेहमु थोङगे यिहॱनाङ राहङ ज़ुबुगी चोक्पा पेहताङया़ला ता़ला ज़्या़ज्येला दिगी च्यिॱआङ फेन मे़हथोएँ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.