कलस्सी 1 - ह्योल्मो1 किन्ज्योकी थु लाहमले मास्यीका येशूकी ल़ेह-पेन ङाह पावल दाङ ओहराङगी नो़ह तिमोथीगी, 2 कलस्से क्याहसाला तेहकेन्गी किन्ज्योकी नाम्पार-ताहक्पा मिहया़ला दि यिहगी प्रुहएँॱराङ येहबा, खुङ मास्यीकाला यिह-छ्य़ेबु आदा-नो़ह दाङ आज्यी-नुहमुया़ यिहम्बा। ओहराङ किन्ज्यो याहपगी ख्याया़ला काटीन दाङ स्य़िहदे नाङज्यु। थुज्यी-छ्ये़गी सोल्वाङ 3 ख्याया़गी तेहन्दाला सोल्वाङ ताप्केमु ङ्यिह राहङगी चो़वो येशू मास्यीकाकी याहप किन्ज्योला नाहम-माना थुज्यी-छ्ये़ फुल्गो येह। 4 च्यिबेमाना मास्यीका येशूला येहकेन्गी ख्याया़गी तेहपा दाङ किन्ज्योकी नाम्पार-ताहक्पा मिहया़ थाम्ज्यीलाराङ ख्याया़गी पेहक्यो चेवागी तेहन्दाला ङ्यिहगी थे़दी येह। 5 ख्याया़गी तेहन्दाला स्यिहङगामला या़हबु पेहती ज़्या़क्यो रेहवागी पेहती ख्यागी दि ल़ेहमु यिह-छ्य़े दाङ चेवा पेहक्यो यिहम्बा। दिगी तेहन्दाला ख्याया़गी तोहङलेराङ तेहन्दामकी सुङ पे यिहॱनाङ या़हबु लेहङगु थ़े सिहन्दी येह। 6 दि या़हबु लेहङगु ख्या सालाॱआङ ओहङदी येह, ओहले तेहम्बाराङ मिहया़ला मेलाम ख्योङगेराङ जाम्बुलीङ काहङ्येॱराङ टाहम्दी डोॱराङ येहबा। ख्यागी किन्ज्योकी काटीनकी तेहन्दाला तेहन्दामकी ताम थे़क्यो दाङ ङोह स्य़ेक्यो ङ्यिहमा यिहन्ज्यु ता़ह या़हबु लेहङगुगी ख्याया़गी पाहरक्यीलाॱआङ ओ़हठीॱराङ पेहती छ्या़ले जे नाङगेराङ येहबा, 7 दि या़हबु लेहङगु ङ्यिह ङ्याम्बुराङ स्याहप्तो स्युहएँ च्याहम्बु नो़ह इपाफ्रासगी ख्याया़ला लोप्सीन। खो ङ्यिह ङ्याम्बुराङ ङ्यिहती छापला ख्याया़गी पाहरक्यीला मास्यीकाकी छ्या़ले पेहकेन यिह-छ्य़ेबु नो़ह यिहन। 8 ख्याया़ला नाम्पार-ताहक्पा थुगी नाङग्यो चेवाकी तेहन्दाला खोगीराङ ङ्यिहला स्य़ेक्यो यिहम्बा। 9 दि केच्या थ़े यिहन्ज्यु ङ्यिह ख्यागी तेहन्दाला किन्ज्यो ङ्याम्बु नाहम-माना सोल्वाङ ताप्ती ओहर-छ्य़े स्युहएँराङ येहबा। नाम्पार-ताहक्पा थुगी नाङगे थाम्ज्यीराङ येहन्देन दाङ ह्अ कोह ख़ूएँगी ओङ लाहमले ख्यागी किन्ज्योकी थु-सेम ङोह स्य़े ख़ूज्यु म़ेदी ङ्यिहगी सोल्वाङ ताप्को येहबा। 10 ओहले ख्याया़गी चो़वोला थु ङ्ये़एँगी मिहजी ताङदी नाहम-माना मिहरोला क़ेहनाङ लाहङ च्य़ू ख़ूज्यु ओहले थाम्ज्यी या़हबु ल़ेहया़ला सेदो या़ह च्य़ूगेनॱराङ किन्ज्योकी येहन्देनला याहरक्यी पेहती डो ख़ूज्यु। 11 किन्ज्योकी ज़िज्यिदगी ओङ लाहमले ओहङग्यो स्युक ज्योर्ती ख्या सान्दी डो ख़ूज्यु माएँ ङ्यिहती सोल्वाङ येहबा। ओ़हठी यिहन्सीमाना ख्यागी ना थाम्ज्यी क़ेहनाङ पेहती थिर पेहती ना़ ख़ूज्ये येह। 12 किन्ज्योगी क्या-साङे क्याहल्सीला मास्यीकाकी नाम्पार-ताहक्पा मिहया़गी ज्योर्केन्की से़हया़ ख्याया़लाॱआङ ज्योर ख़ूएँदी ज़ो नाङदी येह ओ़ह सोङबे दिगी तेहन्दाला किन्ज्योला नाहम-माना थुज्यी-छ्ये़ फुल्दोङ। 13 मिहरोगी ओहराङला ना़-जुबेकी क्याहल्सीलेगी खा फे़ नाङसीन, ओहले राहङगी चेवा जे नाङग्योकी स़ेबुकी क्याहल्सी नाहङला ओहराङला पो नाङसीन। 14 किन्ज्योगी राहङगी स़ेबु लाहमले ओहराङला थार्पा नाङसीन ओहले ओहराङगी तिहक्पाया़ कोहङदा नाङसीन। येशू मास्यीकाॱराङ गो-छ्येस्यो यिहम्बा 15 ओहराङ मी़गी थोङ मी़हखुएँ किन्ज्योकी ङ्य़ेहरीला थोङ ख़ूएँ जेती मास्यीका ज़्य़ू नाङदी येह। ना थाम्ज्यीराङ छ्या़क्यो से़हया़ नाहङला मास्यीका थाम्ज्यी म़ेदी छ्येस्यो यिहम्बा। 16 च्यिबेमाना स्यिहङगाम दाङ जाम्बुलीङला येहकेन रेबेॱराङ से़हया़ किन्ज्योगीॱराङ छ्या़ च्य़ू नाङसीन। मी़गी थोङ ख़ूएँ दाङ थोङ मी़हखुएँगी से़हया़, क्याहल्बु ज़्य़ू नाङगेन्गी ज्यू़-ठिया़, क्याहल्सीया़, ठिम ताङगेया़, ओङ छ्य़ेगेया़, दि थाम्ज्यीराङ से़हया़ किन्ज्योगी मास्यीका लाहमले ओहले मास्यीकाकी तेहन्दालाराङ छ्या़ च्य़ू नाङसीन। 17 थाम्ज्यीराङ से़हया़ म़ेदी तोहङले मिह-रो़हराङ ज़्य़ू नाङदी येहकें ओहले मिहरोगीॱराङ ना थाम्ज्यीला राहङ ङ्याम्बुराङ ज़ुङदी ज़्या़ नाङदी येहबा। 18 मास्यीकाला यिह-छ्य़े पेहकेंन छेन्छोकया़दी ज़ुबु यिहम्बा, ओहले ओ़ह ज़ुबुगी गो़दी मास्यीकाॱराङ यिहम्बा। ओ़ह छो़बाया़ला मिहली साम्बा नाङगेन्दीॱआङ मिह-रो़हराङ यिहम्बा। मिहरो थाम्ज्यीराङ से़हया़ला गो-छ्येस्यो थेन ख़ूज्यु म़ेदी स्यिक्योया़ नाहङले सोम्बो ज़्याङ नाङगेन्दी तोहङस्यो मिह-रो़हराङ यिहम्बा। 19 च्यिबेमाना किन्ज्यो राहङ ङ्याम्बु येहकेन्गी ना थाम्ज्यीकी छाङबु मास्यीकाला ज़्य़ू नाङज्येला मिहरोगी थु काहसो जे नाङसीन। 20 ओहले किन्ज्योगी स़ेबु लाहमले थाम्ज्यीराङ से़हया़ला येहपाराङ राहङदी ज़ो नाङसीन, ओहले क्याहङस्यीङला टोहङ नाङग्यो राहङ स़ेबुगी ठा़गी पेहती स्यिहङगाम दाङ जाम्बुलीङला येहकें ना थाम्ज्यीराङ से़हया़ला राहङ ङ्याम्बु थिन च्य़ू नाङसीन। 21 ती़हजी च्यी़ला ख्या किन्ज्योलेगी था़-रिहङबु येहकें, सेम चोक्पा च्याङदी चोक्पाराङ ल़ेहया़ पेहक्यो सोङबे ख्या किन्ज्योकी टाह काहल्दी येहकें। 22 यिहॱनाङ ता़ह राहङगी दिनला ख्याया़ला नाम्पार-ताहक्पा, ङ्य़ेहबा-छ्यू़बा म़ेहबा दाङ च्यिॱआङ फातुर माहफो़बा पेहती तेन्ज्येला मास्यीकाकी कुसोगी स्यिवा लाहमले किन्ज्योगी राहङ ङ्याम्बु ख्याया़ला थिन च्य़ू नाङसीन। 23 तेहम्बाराङ ख्याया़ राहङगी तेहपाला सान्दी दाङ थिक-चि पेहती तेहतोङ। ख्याया़गी रेहवा पेहक्यो या़हबु लेहङगुला क्युरॱराङ माहक्युर। दि या़हबु लेहङगुॱराङ थाम्ज्यी लुहङबाकी मिहया़ला प्रा साल्दी येह। दि या़हबु लेहङगु स्येच्येलाॱराङ ङाह पावल योक्पु काहल्सीन। पावलगी छेन्छोकला स्याहप्तो स्युह नाङग्यो 24 ता़ह ख्याया़गी तेहन्दाला ङाहगी तुहक्पु खुर्केमु ङाह सेम काहसो पेहकें, ओहले मास्यीकाकी कुसो छेन्छोककी तेहन्दाला मिहरोदी खादी लिहक्यो तुहक्पुया़ ङाहती ज़ुबुला खुर्ते छाङबु पेहकें। 25 किन्ज्योगीॱराङ ङाहला छेन्छोकला स्याहप्तो स्युहएँकी मिह ज़ो नाङसीन ओहले ख्याया़गी तेहन्दालाराङ मिहरोकी लोप्च्युङया़ छाङबु पेहती स्येकेन्गी छ्या़ले ङाहला चि क्याहप नाङसीन। 26 दि लोप्च्युङ काल्बा-काल्बा दाङ आख्ये मे़हमेया़ यिहन्ज्यु सी़दे ज़्या़क्यो तिहङ-रिहङबुकी ताम ता़ह किन्ज्योगी मास्यीकाकी नाम्पार-ताहक्पा मिहया़ला दिगी तेहन्दा ह्अ कोह च्य़ू नाङदी येह। 27 खुङया़ला मिह थाम्ज्यीगी तेहन्दाला छ्यिम्बु तिहङ-रिहङबुगी तेहन्दा खा फे़ तेर्केन किन्ज्योकी राहङगी ज़ोक्योकी च्याहम्दा यिहम्बा। तिहङ-रिहङबुगी ताम दिराङ यिहम्बा, मास्यीका ख्या ङ्याम्बु ज़्य़ू नाङदी येहबा। दिगी तेहन्दा किन्ज्योगी ज़िज्यिदला ख्यागी बो ज्योर्च्ये येह। 28 मिह थाम्ज्यीला मास्यीकाला छाङबु जे़दी किन्ज्योगी दिनला तेन ख़ूज्यु म़ेदी ङ्यिह मिह ऱेह-ऱेहला ज्यी़-ङोर तेन्गेॱराङ ओहले मिह ऱेह-ऱेहला थाम्ज्यी रिहक्स्यीला लोप्केॱराङ मास्यीकाकी तेहन्दाला स्येकें। 29 मास्यीकागी नाङग्यो ङाह नाहङला छ्या़ले जे नाङगे वाङज्या छ्यिम्बुगीॱराङ ङाह सेम तिहङ यिहन्ज्युराङ कादुप च्येती दि ल़ेह पेहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.