ल़ेह-पेन 8 - ह्योल्मोकिन्ज्योला यिह-छ्य़े पेहक्यो मिहया़ला शाऊलगी तुहक्पु तेरक्यो 1 मिहया़गी स्तिफनासला दि ल़ेहमु पेहती तोह क्याहप्ती सेकेंमु शाऊलॱआङ ओ़ह मिहया़ ङ्याम्बु डी़दी येहकें। ओ़ह ङ्यिहमा यिहन्ज्यु यरूशलेमगी छेन्छोकला मिहया़गी छे म़ेहबा तुहक्पु तेर्च्ये छ़ूसीन। ओहजेला चो़वो छ्येवा येशूगी लेहमेन स्याहप्च्यीया़दी प्रे़हदी यहूदीया दाङ सामरियागी युहलया़ला काहल्दी काहने थेतेराङ टाहम्दे तेहसीन, यिहॱनाङ ल़ेह-पेनया़दी यरूशलेमलाराङ तेहसीन। 2 ओहले किन्ज्योला छ्य़ेसेम पेहकें मिहया़गी स्तिफनासकी फुङबुला ख्येर्ती फुक्पाला तो़हसीन, ओहले स्तिफनासला सेक्योगी तेहन्दाला खुङ ज्यिबुराङ ङ्याहङेन पेहसीन। 3 ओहजेला शाऊलगीदी छेन्छोकला तोङ च्य़ूज्ये म़ेदी खाङबा-खाङबाला स्य़ूहदी क्येप-ख्योवाया़ दाङ पी़हमी-पेहजाया़ला टिहती ख्येर्ती चोन-खाङला लू़-तेर्को येहकें। सामरिया साने़ला या़हबु लेहङगुगी तामया़ स्येक्यो 4 ओहजेला काहने थेतेराङ टाहम्दे काहल्ग्यो मिहया़गी छ्यो़ ज़्यिगालाॱराङ काहल्दी चो़वो छ्येवागी सुङया़ स्येच्ये छ़ूसीन। 5 ओहले फिलिपगीॱआङ सामरिया क्याहसाला काहल्दी थार्पा नाङगेन मास्यीकाकी तेहन्दाला सुङ ख्येप्टा तेर्सीन 6 ओहले फिलिपकी ताम थे़दी खोगी पेहक्योकी याहम्जेन छ्येवागी ल़ेहया़ थोङ फान्ज्यो मिहया़गी खोगी तामला ज्यिबुराङ चा़ पेहती ङ्यिहन्सीन। 7 च्यिबेमाना मिह माहङबुलेगी मेहचाङा नाम्स्यीया़ क़े तेन्दी काहल्सीन ओहले ज़ुबु कुहल मी़हखुएँ दाङ काङबा कुच्या मिहया़ माहङबुराङ टा़हसीन। 8 ओ़ह सोङबे सामरिया क्याहसाकी मिह थाम्ज्यी ज्यिबुराङ क़ेहनाङ पेहसीन। 9 ओ़ह सामरिया क्याहसाला सिमोन मिहन थो़क्यो मिह च्यी़ येहकें। ओहले खोगी तोहङ यिहन्ज्युराङ मिहया़ला राहङगी च्युहम्रुल तेन्दी ह्अ ल़ेह च्यू़उ येहकें। खो राहङगी राहङलाॱआङ चा़ छ्यिम्बु मिह यिहन म़ेदी ने़उ येहकें। 10 ओहले क्याहसाकी छ्यिम्बु छ्ये़मु मिह थाम्ज्यीगी खोला, “खो ङ्याम्बु किन्ज्योगी ओङ येहबा ओ़हदीला चा़ छ्यिम्बु ओङ माएँ” म़ेदी चा़ पेहको येहकें 11 च्यिबेमाना तोहङ यिहन्ज्युराङ मिहया़ला राहङगी च्युहम्रुल तेन्दी ह्अ ल़ेह च्य़ूक्यो सोङगोराङ मिह माहङबुगीराङ खोला चा़ पेहको येहकें। 12 यिहॱनाङ फिलिपगी खुङया़ला किन्ज्योगी क्याहल्सीगी तेहन्दाला प्रा साल्दी चो़वो छ्येवा येशूॱराङ थार्पा थोप च्य़ू नाङगेन मास्यीका यिहन म़ेदी या़हबु लेहङगु स्ये फान्ज्यो मिह माहङबुगीराङ फिलिपगी तामला यिह छ्य़ेसीन। ओहले क्येप-ख्योवा दाङ पी़हमी-पेहजाया़गी बप्तिस्मा लेहन्सीन। 13 ओहले सिमोनगीॱआङ यिह-छ्य़े पेहसीन ओहले खोगीॱआङ बप्तिस्मा लेहन्सीन। ओहले ओ़ह यिहन्ज्यु खो फिलिप ङ्याम्बु-ङ्याम्बु डोज्ये छ़ूसीन। फिलिपकी पेहकेन्गी याहम्जेम्बा ल़ेहया़ दाङ ताक्छेनया़ थोङदी खो ज्यिबुराङ ह्अ ल़ेहउ येहकें। 14 सामरिया क्याहसाकी मिहया़गी किन्ज्योगी सुङ लोक पेहसीन दु माएँ थ़े फान्ज्यो यरूशलेमला येहकेन्गी ल़ेह-पेनया़गी पत्रुस दाङ यूहन्नाला खुङया़साला ताङसीन। 15 ओहले पत्रुस दाङ यूहन्ना सामरियाला लेप फान्ज्यो चो़वो छ्येवाला यिह-छ्य़े पेहक्यो मिहया़गी नाम्पार-ताहक्पा थु ज्योर्च्यु म़ेदी खुङया़गी तेहन्दाला सोल्वाङ ताप्सीन। 16 च्यिबेमाना ओहजे काहङला नाम्पार-ताहक्पा थु सु थोॱलाङ फेप माहनाङबा येहकें, खुङया़गी चो़वो छ्येवा येशूगी छेनला च्यी़राङ बप्तिस्मा ज़्योरक्यो येहकें। 17 पत्रुस दाङ यूहन्नागी राहङगी लाहक्पा खुङया़गी थो़ला ज़्या़गेमु खुङया़गी नाम्पार-ताहक्पा थु ज्योर्सीन। 18 ता़ह ल़ेह-पेनया़गी लाहक्पा ज़्या़गेमु मिहया़गी नाम्पार-ताहक्पा थु ज़्योरक्यो सिमोनगी थोङ फान्ज्यो पत्रुस दाङ यूहन्नाला टाङगा तेर्ते दि ल़ेहमु मासीन, 19 “ङाहॱलाङ दि ल़ेहमु ओङ नाङदोङ, ओहले ङाहगीॱआङ मिहया़गी थो़ला लाहक्पा ज़्या़गेमु खुङया़गी नाम्पार-ताहक्पा थु ज्योर्च्यु।” 20 ओहजेला पत्रुसगी मासीन, “ख्येगी टाङगा ख्ये ङ्याम्बुराङ तोङदी डोज्यु, च्यिबेमाना किन्ज्योगी काबाप टाङगागी ङ्योह ख़ूएँ म़ेदी ख्येगी साम्लु ताङसीन। 21 ख्येगी दि छ्या़ले पेह मिहङ्युहङ, दि छ्या़लेला येहना ख्येगी बो येहबा, येहना ओङ येहबा, च्यिबेमाना किन्ज्योगी दिनला ख्येती सेम या़हबु मिहन्दु। 22 ओ़ह सोङबे राहङगी ङ्येहन्सेम च्याङग्योगी तेहन्दाला सेमगी स्या़बा पेहती किन्ज्योला सोल्वाङ ताप्तोङ। ओहले गा ख्येती दि रोहवा खोक्पा नाहक्पुला किन्ज्योगी स्या़बा नाङडो। 23 च्यिबेमाना ङ्यिहगी ल़ेह पेहक्यो थोङदी ख्येगी सेम छी़उ दुबा, ओहले ख्येगी सेम तिहक्पाला छ्यिक्यो दुबा!” 24 ओहले सिमोनगी पत्रुस दाङ यूहन्नाला, “राहङ फ़ेबेगी सुङ नाङग्योगी दि स्याहल च्यिॱआङ ङाह थो़ला माहयोहङज्यु म़ेदी राहङ फे़बेया़गीराङ चो़वो छ्येवाला सोल्वाङ ताप नाङदोङ!” म़ेदी स्युहसीन। 25 राहङगी पाङबु दाङ किन्ज्योगी सुङ स्ये फान्ज्यो पत्रुस दाङ यूहन्ना यरूशलेम ङो़ले लो़ह काहल्सीन। ओहले लो़हदी ओहङगेमु खुङया़गी सामरिया साने़की युहलया़ला स्य़ूहदी या़हबु लेहङगुगी तामया़ स्येसीन। फिलिप दाङ इथियोपियागी मिह 26 ओ़ह तिङला स्यिहङगामकी स्याहप्च्यी च्यी़गी फिलिपला सुङ नाङसीन, “ख्ये लोहङ, ओहले यरूशलेमगी ल्हो ङो़ले गाजा क्याहसाला डोएँगी लाहमला सोङ। ओ़हला रिह काम्बुगी लाहम येहबा!” 27 ओहले खो लाहङदी काहल्सीन, ओहले खोगी इथियोपिया क्याहल-खापकी ङुहरुम मिह च्यी़ला थ़ूसीन, खोदी इथियोपिया क्याहल-खापगी क्याहल्मु कन्दाकीदी नोहरया़ ताएँ मिह छ्यिम्बु यिहन्गे। ओहले खोती यरूशलेमला काहल्दी किन्ज्योला छ्येपा फुल्दी खाङबाला लो़ह डोॱराङ येहकें। 28 ओहले खो राहङगी स्यिङता-खोर्लोला तेहती यशैया लुहङतेम्बागी प्रुहक्योगी छ्य़े टा़हगेॱराङ येहकें। 29 ओहजेला नाम्पार-ताहक्पा थुगी फिलिपला, “ख्ये सोङ ओहले स्यिङता-खोर्लो ङ्याम्बु-ङ्याम्बुराङ सोङ!” म़ेदी सुङसीन। 30 ओहले फिलिप छ्योङदी काहल्सीन। ओहले ओ़ह मिहगी यशैया लुहङतेम्बागी छ्य़े टा़हदी तेहक्यो थे़दी खोगी, “राहङगी टा़हदी ज़्य़ू नाङग्योकी छ्य़े ङोह ख्येन्गु दु?” म़ेदी टी़हसीन। 31 “सुज्यीगी ङाहला माहलोप थु ङाहगी काहन्डुमु पेहती ङोह स्य़े ख़ूज्ये ले?” म़ेदी खोगी ल़ेहन क्याहप्सीन। ओहले खोगी फिलिपला स्यिङता-खोर्लोला जा़दे राहङ ङ्याम्बुराङ तेहच्येला फेप स्युहसीन। 32 ओ़ह मिहगी टा़हदी तेहक्योगी सुङराप दि ल़ेहमु येहकें, “मिहरो सेच्येला ख्येरक्योकी ल़ूह स्ये़बु ल़ेहमु ज़्य़ू नाङदी येहकें, पाहल प्रा़हगेमु खाजुम पेहती तेहकेन्गी ल़ूह ल़ेहमुराङ मिहरोगी राहङगी स्याहल खा फे़ माहनाङ। 33 मिहरोला मिहया़गी स्ये़हन्डील पेहकेमु ता़ह सुगीॱआङ मिहरोला ठिम या़हबु ताङ माहतेर। मिहरोगी छार्क्यीनगी तेहन्दाला सुगी प्रा साल ख़ूज्ये? च्यिबेमाना मिहरोगी मिहलीनी दि जाम्बुलीङले तोर्ते काहल्सीन।” 34 ओहजेला ओ़ह ङुहरुम मिहगी फिलिपला मासीन, “निङज्यी जेती ङाहला सुङ नाङदोङ, लुहङतेम्बागी दि सुगी तेहन्दाला सुङ नाङग्यो यिहम्बा, खोराङगी तेहन्दालाराङ यिहम्बानी राहङसा सुज्यीगी तेहन्दाला यिहम्बा?” 35 ओहले फिलिपगी ओ़ह सुङराप लाहमलेॱराङ खोला येशूगी तेहन्दाला या़हबु लेहङगुगी ताम स्येसीन। 36 ओहले खुङ लाहमला डोडोपा काहङला छ्यु येहकेन ग्या़ च्यी़ला लेप्सीन। ओहले ओ़ह ङुहरुम मिहगी मासीन, “ज़ी़-नाङदोङ, देला छ्यु दुबा! ङाहला बप्तिस्मा लेहन्ज्येला च्यि से़हगी का़ ख़ूएँ ले?” 37 [ ओहले फिलिपगी मासीन, “सेम तिहङ यिहन्ज्युराङ यिह-छ्य़े जे नाङसीन माना राहङगी बप्तिस्मा ल़ेहन ख़ूएँ।” ओहजेला खोगी, “यिहम्बा, येशू मास्यीकाॱराङ किन्ज्योगी स़ेबु यिहन म़ेदी ङाह यिह-छ्य़े पेहके” म़ेदी ओ़ह मिहगी ल़ेहन क्याहप्सीन।] 38 ओहले खोगी स्यिङता-खोर्लोला क़ूह च्य़ूसीन ओहले खुङ ङ्यी़ फाप्ते छ्यु नाहङला स्य़ूहसीन ओहले फिलिपगी खोला बप्तिस्मा तेर्सीन। 39 छ्युले फिला थेन फान्ज्यो चो़वो छ्येवागी नाम्पार-ताहक्पा थुगी फिलिपला ज़ुङदी ख्येर नाङसीन, ओहले ओ़ह मिहगी फिलिपला येहपाराङ माहथोङ, ओहले खो ज्यिबुराङ क़ेहनाङ पेहती राहङगी लाहम स्य़ूहसीन। 40 फिलिप राहङगी राहङलाराङ अश्दोद माएँ क्याहसाला च्य़ेह सिहन्सीन, ओहले खोगी कैसरिया क्याहसाला माहलेप थु क्याहसा क्याहसाया़ला चो़वो छ्येवागी या़हबु लेहङगुगी ताम स्येती काहल्सीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.