ल़ेह-पेन 28 - ह्योल्मोमाल्टा छोलिङला 1 दि ल़ेहमु पेहती ङ्यिह थार्ती छो-क्याहम्जोकी सुहरला लेप फान्ज्यो ओ़ह ग्या़गी मिहन माल्टा माउ दु म़ेदी ङ्यिहला क्यी़ह ज्योर्सीन। 2 ओ़ह ग्या़गी मिहया़ ज्यिबुराङ या़हबु दुबा। ओहजेला नाम क्याहप्च्ये पेहक्यो येहकें ओहले ज्यिबुराङ ख्या़बु येहकें सोङबे खुङया़गी मेह फी़दे ङ्यिहला मेह तू़हज्येला क़े क्याहप्सीन। 3 ओहले पावलगी फाङबा काहङ स्यिङ ख्योङदी मेहला लू़सीन ओहजेला मेह-टे़हगी पेहती प्रुहल च्यी़ थेन्दी पावलगी लाहक्पाला टिल ओहङसीन। 4 ओहले पावलगी लाहक्पाला प्रुहल टिहल्ग्यो थोङदी ओ़ह ग्या़गी मिहया़गी, “तेहम्बाराङ दि मिहनी, मिह सेकें मिहराङ ओहङ कोहकें। दि मिह छो-क्याहम्जोलेनी थार्ते ओहङसीन यिहॱनाङ ठिमलेनी थार मा़हखु।” 5 ओहले पावलगी लाहक्पा प्रू़एँमु प्रुहल मेह नाहङला ताहप्सीन, प्रुहलगी पावलला च्यिॱआङ ने माहक्याल। 6 ओहले मिहया़गी, “पावलला याहम्बी तिङले प्रुहलकी तू़हगी ज़ुबु टाङदी स्यिटो!” म़ेदी ते़ तेहसीन, यिहॱनाङ पावलला च्यिॱआङ माहकाहल। ओहले दि थोङदी खुङगी येहपाराङ लेहमेन नोम्साङ ताङदी, याहम्जेनज्यी ने़दी “खोनी ल्हा गा दुबा!” म़ेदी मासीन। 7 ओ़ह छोलिङकी पब्लियस मिहन थो़क्यो गोबागी खाङसा-स्यिहङसा ओ़ह ग्या़ पोह पोहलाराङ येहकें। पब्लियसकी ङ्यिहला खोगी खाङबाला फेप स्युहसीन। ओहले ङ्यिह खोगी खाङबाला डोम्बो पेहती स्याहक्पु सुम थु तेहसीन। 8 ओहजे काहङला पब्लियसकी आबाला छावा क्ये़दी मा़स्यी क्याहप्क्यो येहकें। ओहले पावल नेहपागी ङ्याहल-खाङला काहल्दी सोल्वाङ ताप्ती राहङगी लाहक्पा नेहपा थो़ला ज़्या़ फान्ज्यो नेहपा टा़हसीन। 9 दि ल़ेहमु पेहती टा़हक्यो क्यी़ह ज्योर फान्ज्यो ओ़ह छोलिङला नेहपा येहकें मिह थाम्ज्यी पावलसाला ओहङसीन ओहले पावलगी खुङ थाम्ज्यीला टा़ह च्य़ूसीन। 10 खुङया़गी ङ्यिहला ज्यिबुराङ चा़ पेहती माहङबुराङ क्ये़गाया़ तेर्सीन ओहले डोएँ ती़हजीला लाहमला कोहकेन्गी से़हया़ॱआङ ङ्यिहगी छ्यु-टुहला ल़ू तेर्सीन। माल्टाले रोम क्याहल-खापला 11 दावा सुम तिङले, ङ्यिह अलेक्जेन्ड्रियागी छ्यु-टुहला जा़दी काहल्सीन। ओ़ह छ्यु-टुहदी अलेक्जेन्ड्रिया क्याहसाले ओहङदी ख्या़बु दावा काहङॱराङ माल्टा छोलिङला कू़हदी तेहक्यो येहकें। छ्यु-टुहगी तोहङ ङो़ले जाउँले ल्हागी ह्रेमु क्याहप्क्यो येहकें। 12 ओहले ङ्यिह सुराकुसाई क्याहसाला लेप्ती ङ्यिहमा सुम ओ़हला तेहसीन। 13 ओहलेगी काहल्दी रेगियन क्याहसाला लेप्सीन। ओहले तिङमा ङ्यिहमुदी ल्हो ङो़लेगी ल्हा़बा ओहङग्यो सोङगोराङ ङ्यिह ङ्यिहमा ङ्यी़ला पुटिओली क्याहसाला लेप्सीन। 14 ओ़हला ङ्यिहगी चो़वो छ्येवा येशूला यिह-छ्य़े पेहकेन्गी आदा-नो़हया़ला थ़ूसीन। ओहले खुङया़गी ङ्यिहला साता च्यी़ तेहतोङ म़ेदी मासीन। ओहले ङ्यिह खुङया़ ङ्याम्बु साता च्यी़ तेहती रोम क्याहल-खापला काहल्सीन। 15 रोमला येहकेन्गी चो़वो येशूला यिह-छ्य़े पेहकेन्गी आदा-नो़हया़गी ङ्यिह ओहङगो येहबा माएँ थे़वाराङ, रेहरे अपियसगी छोङ-ठोम दाङ रेहरे पालीप-सुम माएँ ग्या़ थु ङ्यिहला थ़ू ओहङसीन। ओहले खुङला थोङदी पावलगी किन्ज्योला थुज्यी-छ्ये़ फुल्सीन, ओहले खोला सेमला आ़र क्येसीन। पावल रोम क्याहल-खापला 16 रोमला लेप फान्ज्यो पावलला राहङगी सेमला ने़जेबा खाङबा च्यी़ लेहन्दी तेहच्येला ओङ ज्योर्सीन। ओहले खोला सुङज्येला माक्मी च्यी़ॱआङ ज़्या़सीन। 17 ओहले ङ्यिहमा सुम तिङले पावलगी रोमला येहकेन्गी यहूदीया़की गोबाया़ला क़े क्याहप्सीन। ओहले खुङया़ जोम फान्ज्यो पावलगी मासीन, “आदा-नो़हया़, ङाहगी ओहराङगी क्यिहपा दाङ ओहराङगी चावाया़ यिहन्ज्यु ची़दे ओहङग्योगी पे-ठिमगी तेहन्दाला च्यिॱआङ ल़ेह चोक्पाया़ पेहती म़ेह। यिहॱनाङ यहूदी आदा-नो़हया़गी ङाहला यरूशलेमला ज़ुङदी रोमीया़गी लाहक्पाला चि क्याहप्सीन। 18 रोमीया़गी टी़हदाप पेह सिहन फान्ज्यो ङाहला ताङ चाहङज्ये छोल्सीन च्यिबेमाना खुङया़गी ङाह स्यिएँॱराङ कोहएँगी ङ्य़ेहबा च्यिॱआङ तेन मा़हखु। 19 यिहॱनाङ यहूदीया़गी ङाहला टाह पेहती ताङ मा़हच्युबा सोङबे ङाहगी कैसरला ह्ओर-छ्ये स्युह कोहसीन। यिहॱनाङ ङाह राहङगी यहूदी आदा-नो़हया़गी तेहन्दाला फातुर च़ू कोहकेन्गी च्यिॱआङ ताम म़ेह। 20 दि ताम प्रा साल्ज्ये दाङ राहङ फ़ेबेॱया ङ्याम्बु थुज्येला ङाहगी राहङ फे़बेया़ला देला क़े क्याहप्क्यो यिहम्बा। ङ्यिह इस्राएलीया़गी रेहवा पेहक्योगी थार्पा नाङगे क्याहल्बुगी तेहन्दालाराङ ङाह दि ल़ेहमु पेहती च्याल्दागी ताहम्ग्यो यिहन” म़ेदी मासीन। 21 ओहले दि ताम थे़दी खुङया़गी मासीन, “राहङगी तेहन्दाला ङ्यिहगी यहूदीया लुहङबाले च्यिॱआङ यिहगी ज्योर्ती म़ेह ओहले सुज्यीॱआङ आदा-नो़हया़ ओहङदी राहङगी तेहन्दाला टाह पेहती ओ़ह ल़ेहमु च्यिॱआङ चोक्पा तामया़नी म़ेदीॱआङ म़ेह ओहले थे़दीॱआङ म़ेह। 22 यिहॱनाङ ङ्यिहला राहङगी ताम ङ्यिहन्ज्ये सेम्बा येहबा च्यिबेमाना राहङगी छो़बागी तेहन्दाला काहने थेतेराङ ताम लोहङटी पेहक्योदी ङ्यिहॱलाङ क्यी़ह येह” म़ेदी मासीन। 23 ओ़ह तिङले खुङया़गी पावलगी ताम ङ्यिहन्ज्येला छ्येतेन ज़्या़सीन। ओहले छ्येतेन ज़्या़क्योगी ङ्यिहमाला माहङबुराङ यहूदीया़ जोम्दी पावल तेहक्यो खाङबाला ओहङसीन। ओ़ह ङ्यिहमु पावलगी ङाटु यिहन्ज्यु से-रुप थु किन्ज्योगी क्याहल्सीगी तेहन्दाला लोप्च्युङ तेर्सीन। सुङरापला मोशा दाङ लुहङतेम्बाया़गी प्रुहक्योगी ताम म़ेदी पावलगी येशूगी तेहन्दाला प्रा साल्गेनॱराङ खुङया़ला यिह-छ्य़े च्य़ूज्ये छोल्सीन। 24 ओहले लाहला मिहया़दी खोगी ताम ह्अ के़हदी यिह-छ्य़े पेहसीन यिहॱनाङ काहजे मिहया़गीदी यिह-छ्य़े माहबे। 25 ओहले खुङराङ नाहङदोङराङ ताम मा़हन्डीबा पेहती ओहलेगी डोज्ये पेहसीन। ओहजेला पावलगी मासीन, “नाम्पार-ताहक्पा थुगी राहङ फे़बेया़गी चावाया़ला सुङ नाङग्योकी स्याहल तेहम्बा-तेहन्सुमॱराङ यिहम्बा च्यिबेमाना यशैया लुहङतेम्बा लाहमले किन्ज्योगी दि ल़ेहमु जेती स्याहल सुङ नाङसीन– 26 ओ़ह मिहया़साला काहल्दी म़ेदोङ, ‘ङ्यिहन्ज्येनी ख्याया़ ङ्यिहन्गे, यिहॱनाङ ह्अ मेहकोएँ, ताज्येनी ताएँ, यिहॱनाङ मेहथोङगे। 27 च्यिबेमाना ओ़ह मिहया़गी सेम ज्यिबुराङ सान्दी येह, खुङया़गी नाम्ज्यो थुक्पु काहल सिहन्दी येह ओहले खुङया़गी राहङगी मी़ चुम्दी येह! मिहन्सीमानानी खुङया़गी थोङज्ये येहकें, थे़ज्ये येहकें ओहले सेमगी ह्अ कोहज्ये येहकें। ओहले खुङया़गी राहङगी सेम ङाह ङो़ले लो़हज्ये येहकें ओहले ङाह खुङया़ला टा़ह च्य़ूज्ये येहकें’।” 28 ओहले पावलगी ताम था़ च्येती मासीन, “ओ़ह सुङगोराङ ता़ह ङाह राहङ फे़बेया़ला माएँ, किन्ज्योगी थार्पागी या़हबु लेहङगु मिहरोगी लेहमेन क्यिहपाया़ साला ताङ नाङदी येह ओहले खुङया़गी ङ्यिहन्ज्ये येह।” 29 [ओहले पावलगी देजे म़े फान्ज्यो खुङ नाहङदोङराङ स्येपा तुहर्ती ओहले ठ़ूस्यी पेहती काहल्सीन।] 30 ओहले पावल लोह ङ्यिह थु राहङगी टाङगा च्याल्दी तेहक्योगी खाङबाला तेहसीन। ओहले पावलगी राहङला थु ओहङगे मिह थाम्ज्यीला फेप स्युहउ येहकें। 31 ओहले खोगी सुॱलाङ मा़हन्ज्यीबा पेहती किन्ज्योगी क्याहल्सीगी तेहन्दाला खाम छ्यिम्बु पेहती प्रा साल्गो येहकें, ओहले चो़वो येशू मास्यीकागी तेहन्दाला लोप्को येहकें ओहले खोला सुज्यीगीॱआङ मे़हका येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.