ल़ेह-पेन 26 - ह्योल्मो1 ओहले अग्रिपासगी पावलला मासीन, “ख्ये राहङगी तेहन्दाला ताम मा ख़ूएँ।” ओहजेला पावलगी राहङगी लाहक्पा क्या़दी राहङला थार च्य़ूज्येला दि ल़ेहमु पेहती ताम माज्ये छू़सीन– 2 “हे क्याहल्बु अग्रिपास, यहूदीया़गी ङाहला केन्ग्योगी तामया़गी तेहन्दाला ङाह तिहरीङ राहङगी दिनला ङाह राहङला थार च्य़ूज्येला ताम मा ङ्युङग्यो सोङबे राहङगी राहङलाराङ सोदी छ्यिम्बु ऩेसीन। 3 राहङला यहूदीया़गी डोलु-तेहलु, पे-ठिम दाङ तामया़ स्याङगेन्गी तेहन्दाला या़हबु पेहती थुयी़ येहकें सोङबे ङाह ङाहराङला तोहरोङॱआङ सोदी छ्यिम्बु ने़उ येहबा। ओ़ह सोङबे ता़ह राहङगी ङाहगी ताम ना़स्यीङ छ्यिम्बु जेती सेन नाङदोङ लाह म़ेदी स्युहसीन। 4 ङाह राहङगी क्याहल-खापला, ओहले यरूशलेम क्याहसाला राहङगी क्यिहपाया़गी पाहरक्यीलाराङ छारक्यो यिहम्बा। ओ़ह सोङबे यहूदीया़गी ङाहला पेहजा यिहन्ज्युराङ या़हबु पेहती ङोह स्ये़उ येहबा। 5 ङाह तोहङले छ्य़े-ठिम छान्दी पेहती लोप्केन फरिसी छो़बागी मिह यिहन्गे। ओ़ह छ्य़े-ठिमलाॱराङ ची़दी ङाहगी मिहजी ताङगो येहकें। दि ताम माज्येराङ मानानी खुङ खुङराङगीॱआङ मा ख़ूएँ। 6 ओहले किन्ज्योगी ओहराङगी चावाया़ ङ्याम्बु ज़्या़ नाङग्योकी ताहम्ज्याला रेहवा पेहक्यो सोङगोराङ ङाह ताहन्दा राहङया़गी दिनला दि ल़ेहमु पेहती लाहङदी तेह के़हदी येहबा। 7 ङ्यिहगी क्यिहपा च्यिङ्यी़गीॱराङ दि रेहवा पेहक्योगी से़हया़ ज्योर ख़ूज्यु म़ेदी ङ्यिहन-नुहपराङ सेम च्यी़ पेहती छ्येपा फुल्गो येहकें, ओहले दि रेहवागी तेहन्दालाराङ ए क्याहल्बु लाह, यहूदीया़गी ङाहला फातुर च़ूक्यो यिहम्बा म़ेदी मासीन। 8 किन्ज्योगी स्यिक्यो मिहला सोम्बो ज़ो थुप्के माएँ तामला ख्या फ़ेबेॱया च्यिबे यिह मे़हछ्येगे? 9 यिहन्ज्येनी, ङाहगीॱआङ ला़ खाजेबा नासरतगी येशूला टाह पेह कोहएँ म़ेदी सेम क्ये़दी येहकें। 10 यरूशलेमला ओ़ह ल़ेहमुराङ टाह पेहसीन। ङाहगी पूजाहारी छ्यिम्बुया़ले ओङ ज्योर्ती किन्ज्योला यिह-छ्य़े पेहकेन्गी माहङबुराङ टाहङबु पुह पोहमोया़ला चोन-खाङला लू़सीन ओहले खुङया़ला सेच्येॱलाङ रो़ह पेहसीन। 11 ङाह यहूदीया़की छो़खाङया़ला काहल्दी चो़वो येशूला यिह-छ्य़े पेहकेन्गी मिहया़ला ला़ खाजेबा तुहक्पु तेर्ती खुङया़ला चो़वो येशू ङो़ले तेहपा लो़ह च्य़ूज्ये म़ेदी माहङबुराङ तुहक्पु तेर्सीन। ङाह खुङ ङ्याम्बु स्यिहताङगी मेहॱराङ पाहर्ती येहकें ओ़ह सोङबे ङाह लेहमेन लुहङबागी क्याहसाया़ला काहल्दीॱआङ खुङया़ला तुहक्पु तेर्च्ये छ़ूसीन। काहन्डुमु पेहती यिह-छ्य़े पेहपा माएँगी तेहन्दाला ( ल़ेह ९:१९ ; २२:६-१६ ) 12 दि ल़ेहमु पेहती पूजाहारी छ्यिम्बुया़ लाहमले ओङ दाङ का नाङग्योकी यिहगी ज्योर्ती ङाह दमस्कस क्याहसाला डोएँॱराङ येहकें। 13 ए क्याहल्बु, ङ्यिहमा फेचेला ङ्यिह दमस्कस क्याहसा ङो़ले डोॱराङ येहकें ओहजेला ङ्यिहमागी क्या-साङे म़ेदीॱआङ मी़राङ छ्यिप्कें थुकी क्या-साङे येहसेर ङ्यिह थो़ला क्याहप ओहङसीन। 14 ओहले ङ्यिह थाम्ज्यी साला रिहल्सीन, ओहजेला ङाहगी हिब्रू ताम ङो़ले दि ल़ेहमु सुङ-क़ेज्यी थ़ेसीन, ‘शाऊल, ए शाऊल, ख्ये ङाहला च्यिबे तुहक्पु तेर्के? ख्येगी ङाहला टाह पेहती च्यिॱआङ फेन मे़हथोएँ।’ 15 ओहले ङाहगी, ‘चो़वो, राहङ सु यिहम्बा लाह?’ म़ेदी टी़हसीन। ओहले चो़वोगी सुङ नाङसीन, ‘ङाह येशू यिहम्बा, ख्ये ङाहला तुहक्पु तेर्केॱराङ येह। 16 ता़ह ख्ये लोहङ, ङाह ख्येला ङाहगी स्याहप्तो स्य़ूहज्येला ओहले ङाहगी तेहन्दाला स्येके मिह ज़ोएँगी सेम्बा येहबा। ओ़ह सोङबे ङाह ख्ये येहकें ग्या़ला ओहङग्यो यिहन। ता़ह ख्येगी ङाहगी तेहन्दाला थोङग्योकी ताम दाङ ङाहगी ख्येला तिङला तेन्गेन्गी तामया़ॱआङ लेहमेन मिहया़ला स्ये कोहकें।’ 17 ‘ङाह ख्येला यहूदीया़ दाङ लेहमेन क्यिहपाया़गी पाहरक्यीला ताङगेराङ येह। ख्येला खुङया़ ङो़ले थार च्य़ूज्ये येह।’ 18 ‘ख्येगी खुङया़गी मी़ खा फ़ेदी खुङया़ला ना़-जुबेलेगी क्या-साङेला ओहले ती़ह गो-छ्येवागी ओङलेगी किन्ज्यो ङो़ले लोह च्य़ू कोहएँ ओहले खुङया़गी ङाहला तेहपा पेहच्ये येह ओहले खुङया़गी तिहक्पा ता़हज्ये येह ओहले खुङया़गी किन्ज्योगी दाम नाङग्योगी मिहया़गी छोक्पाला तेह ङ्युहङज्ये येह।’ 19 क्याहल्बु अग्रिपास, ओ़ह सोङबे ङाहगी स्यिहङगामले थोङग्योकी दि ज्याल्गाला ङाह माहङ्यीहम्बा पेहती तेहॱराङ मा़हखु। 20 ओहले ङाह तोहङले दमस्कस, यरूशलेम, यहूदीया साने़की युहल युहल दाङ लेहमेन क्यिहपागी साने़या़ला काहल्दी मिहया़ला, ‘सेमगी स्या़बा पेहती तिहक्पा पाङदी राहङगी सेम किन्ज्यो ङो़ले ग्युर्तोङ’ म़ेदी स्येसीन। ओहले ‘किन्ज्यो ङो़ले सेम ग्युरक्यो यिहम्बा म़ेदी दास्यी राहङगी पेहक्योगी ल़ेह ङो़ले तेन कोहकें’ म़ेदी लोप्सीन। 21 ओ़ह सोङगोराङ यहूदीया़गी ङाहला छ्योखाङला ज़ुङदी सेच्ये छोल्सीन। 22 यिहॱनाङ, ताहन्दा थु किन्ज्योगी ङाहला रो़हराम जे नाङदेराङ येह। ओ़ह सोङगोराङ ङाह देला येहकेन्गी छ्यिम्बु छ्ये़मु थाम्ज्यीलाराङ किन्ज्योगी तेहन्दाला लाहङदी स्येकेराङ येह। लुहङतेम्बाया़ दाङ मोशागी ङे़स्यी स्य़ेदी नाङग्योकी लुहङ म़ेदी ल्हाक्पुनी ङाहगी लेहमेन च्यिॱआङ म़ेदी म़ेह। 23 थार्पा नाङगेन क्याहल्बु मास्यीकागी तुहक्पु खुर्ती टोहङ कोहच्ये येह, ओहले चो़वो टोहङग्योलेगी सोम्बो ज़्याङ नाङगेया़ नाहङले थाम्ज्यी म़ेदी तोहङस्यो ओहङज्ये येह ओहले चो़वोगी राहङगी क्या-साङेगी तेहन्दाला यहूदीया़ दाङ लेहमेन क्यिहपागी मिहया़ॱलाङ स्ये नाङज्ये येह, दि तामया़नी लुहङतेम्बाया़गीॱआङ सुङनाङ सिहन्दी येहकें।” 24 पावलगी माक्यो दि तामया़ थे़दी फेस्तसगी क़े तेन्दी मासीन, “पावल ख्ये ङ्योम्बा काहल्सीन दु, ख्येगी येहन्देनगी ख्येला ङ्योम्बा ज़ोसीन दु” म़ेदी मासीन। 25 ओहले पावलगी मासीन, “फेस्तस ला़ह, ङाह ङ्योम्बा काहल्ग्यो मिहन, ङाह ठाबेराङ येह ओहले ङाह तेहन्दामगी तामया़ च्यी़राङ माएँराङ येह। 26 दि ताम थाम्ज्यी क्याहल्बु अग्रिपासला थुयी़ येह, ओहले ङाह क्याहल्बुला दि तामया़ मा़हन्ज्यीबा पेहती मा ख़ूएँ। ओहले क्याहल्बुगी दि तामया़ या़हबु पेहती सेन नाङदी येह च्यिबेमाना दि तामया़ ग्या़ च्यी़ला काहल्ग्योगी ताम मिहन। 27 ए क्याहल्बु अग्रिपास, च्यि राहङगी लुहङतेम्बाया़ थो़ला यिह-छ्य़े जे नाङगे? यिहम्बा, राहङगी यिह-छ्य़े जे नाङगे माएँ ताम ङाहला क्यी़ह येह।” 28 ओहजेला अग्रिपासगी पावलला मासीन, “च्यि ख्ये ङाहला देजे ग्यो़बाराङ मास्यीकापा ज़ोज्ये छोल्गे?” 29 ओहले पावलगी मासीन, “ती़हजी ङ्ये़हमु येहॱनाङ माहङबु येहॱनाङ क्याहल्बु च्यी़लाॱराङ मिहम्बा ङाहगी ताम ङ्यिहन्गे मिह थाम्ज्यी ङाह ल़ेहमुराङ डो ख़ूज्यु म़ेदी ङाहगी किन्ज्यो ङ्याम्बु सोल्वाङ ताप्को येहबा यिहॱनाङ ङाहला ल़ेहमु च्याल्दागी ख्या फे़बे सुॱलाङ ताहम माहकोहज्यु।” 30 ओहजेला क्याहल्बु अग्रिपास, स्युहङ-पेन छ्यिम्बु फेस्तस, बरनिकी दाङ खुङ ङ्याम्बु ओहङग्योगी मिह थाम्ज्यी ह्अप-ह्ओप लाहङसीन। 31 ओहले खुङया़ फिला थेन्दी डोएँमु खुङ नाहङदुङ दि ल़ेहमु म़ेदी ताम मासीन, “दि मिहगी स्यिॱराङ कोहएँ ङ्य़ेहबा दाङ चोन-खाङला ल़ू कोहएँ थुगी ल़ेहनी च्यिॱआङ पेहती मिहन्दु” म़ेदी मासीन। 32 ओहले अग्रिपासगी फेस्तसला मासीन, “दि मिहगी रोमी क्याहल्बु छ्यिम्बुला थाल्मु माहन्च्यार्हपा यिहनानी ताङ तेरॱनाङ टी़हज्ये येहकें!” म़ेदी मासीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.