ल़ेह-पेन 21 - ह्योल्मोपावल यरूशलेमला काहल्ग्यो 1 ओहले एफिसस छेन्छोककी गोबाया़ ङ्याम्बु कोहङबा स्यी़हदी ङ्यिह छ्यु-टुहला जा़दी थेका सिरेराङ कोस माएँ छोलिङ थु लेप्सीन, ओहले नाहङबार च्युङ रोडस छोलिङला लेप्सीन। रोडसला लेप्ती ओहलेगी छ्यु-टुह जा़दी पटारा क्याहसाला लेप्सीन। 2 ओहले ङ्यिहगी ओ़हला फोनिके लुहङबाला डोएँगी छ्यु-टुह च्यी़ च्य़ेह सिहन्सीन ओहले ओ़ह छ्यु-टुहलाॱराङ जा़दी काहल्सीन। 3 ओहले ङ्यिह साइप्रस छोलिङगी ल्हो ङो़ले पेहसीम्बाराङ सिरिया क्याहल-खापला लेप्सीन। टुरोस क्याहसाला लेप्ती छ्यु-टुह खुर्पुया़ पाप्च्येला क़ूहसीन, ओहले ङ्यिहॱआङ फाप्सीन। 4 ओहले ओ़हला तेहकेन्गी चो़वो येशूगी स्याहप्च्यीया़ला ङ्यिह थु काहल्सीन ओहले ङ्यिह खुङ ङ्याम्बु साता च्यी़ तेहसीन। ओहले नाम्पार-ताहक्पा थु लाहमले रिहक्स्यी ज्योर्ती खुङगी पावलला यरूशलेमला माहन्डो म़ेदी उर्चु पेहसीन। 5 यिहॱनाङ साता च्यी़चे तेह फान्ज्यो खुङया़ ङ्याम्बु कोहङबा स्यी़हदी काहल्सीन। चो़वोला यिह-छ्य़े पेहकेन्गी ओ़ह ग्या़गी आदा-नो़ह थाम्ज्यी, आज्यी-नुहमु दाङ पेहजाया़गीॱआङ ङ्यिहला क्याहसा फि थु क्याल्ज्येला ओहङसीन। ङ्यिह थाम्ज्यीगी छो-क्याहम्जोकी सुहरला पी़मु च़ूदी सोल्वाङ ताप्सीन। 6 ओ़ह तिङले ङ्यिह कोहङबा स्यी़हदी छ्यु-टुहला जा़सीन, ओहले खुङया़दी खाङबाला लो़ह काहल्सीन। 7 ओहले ङ्यिह टुरोस क्याहसाले छ्यु-टुहला जा़दी टोलेमाइस क्याहसाला लेप्सीन। ओहले ङ्यिह चो़वो येशूला यिह-छ्य़े पेहकेन्गी ओ़ह ग्या़गी आदा-नो़हया़ला थुज्येला काहल्सीन ओहले ङ्यिहमा च्यी़ खुङ ङ्याम्बुराङ तेहसीन। 8 ओहले नाहङबार च्युङ खुङ ङ्याम्बु खा फ़ेदी कैसरिया क्याहसाला काहल्सीन। कैसरिया क्याहसाला लेप्सीम्बाराङ चो़वो येशूगी या़हबु लेहङगु स्येती डोएँगी फिलिपकी खाङबाला काहल्दी स्याहक्पु तोबाज्यी खो ङ्याम्बुराङ तेहसीन। खोदी यरूशलेमगी छो़बाया़ला रो़ह पेहच्येला दाम्ग्योगी मेहन्दा तिहन नाहङले मेहन्दा च्यी़ यिहन्गे। 9 खोदी पा़हमा माहबेबाकी पोहमो ज़्यि येहकें, ओहले खुङ ज्य़िगागीॱराङ लुहङदेन स्येकेन्गी काबाप थोप्ती येहकें। 10 ङ्यिह ओ़हला स्याहक्पु तोबाज्यी तेहकेमु यहूदीया लुहङबाले अगाबस माएँ लुहङतेम्बा च्यी़ ङ्यिहसाला ओहङसीन। 11 ओहले खोगी पावलगी कारा स्यी़दी राहङगी लाहक्पा दाङ काङबा ताहम्दी मासीन, “किन्ज्योगी थुगी दिठी सुङ नाङगु दु, यरूशलेमला यहूदीया़की दि कारागी ताहक्पुला दि रोहवाॱराङ पेहती ताहम्ज्ये येह, ओहले लेहमेन क्यिहपागी मिहगी लाहक्पाला छ्यि च्य़ूज्ये येह!” 12 दि ताम थे़दी ङ्यिह दाङ ओ़ह ग्या़ला येहकेन्गी मिह थाम्ज्यीगी पावलला, “यरूशलेमला माहफेप” म़ेदी स्युहसीन। 13 ओहजेला पावलगी, “च्यिबे ख्यागी दि ल़ेहमु पेहती ङी़हदी ङाहगी सेम सुह क्याहप च्य़ूएँ? ङाह यरूशलेमला ताहम्ज्येज्यीराङ मिहम्बा, चो़वो येशूगी तेहन्दाला स्यि कोहॱनाङ स्यि ख़ूएँ” म़ेदी मासीन। 14 ओहले खोला का़ मा़हखुबा सोङबे “चो़वोगी थुला ठुङग्यो ल़ेहमुराङ तेहन्दा डुप्च्यु” म़ेदी ङ्यिह खाजुम पेहती तेहसीन। 15 ओ़ह तिङले ङ्यिह राहङ-राहङगी पेलाया़ ठाबे पेहती यरूशलेमला डोज्येला लाहम स्य़ूहसीन। 16 कैसरिया क्याहसागी लाहला स्याहप्च्यीया़ॱआङ ङ्यिह ङ्याम्बुराङ ओहङसीन। ओहले खुङगी ङ्यिहला मनासोन माएँ मिहगी खाङबाला क्याल तेर्सीन। खोदी साइप्रस छोलिङले ओहङग्यो येहकें। तोहङस्यो चो़वोला यिह-छ्य़े पेहकें मिहया़ नाहङला खोॱआङ च्यी़ यिहन्गे। पावलगी याकूबला थ़ूक्यो 17 ओहले ङ्यिह यरूशलेमला लेप्केमु ओ़ह ग्या़गी छेन्छोककी आदा-नो़हया़गी ङ्यिहया़ला ज्यिबुराङ चा़ पेहती फेप स्युहसीन। 18 ओहले नाहङबार च्युङ पावल ङ्यिह ङ्याम्बुराङ याकूबसाला काहल्सीन। ङ्यिह याकूबगी खाङबाला लेप्केमुनी ओ़हला थाम्ज्यी एल्डरया़ छो़दी तेहक्यो दुबा। 19 ओहले खुङ ङ्याम्बु थ़ू फान्ज्यो पावलगी, लेहमेन क्यिहपागी मिहया़गी पाहरक्यीला येशूगी या़हबु लेहङगु स्येकेमु किन्ज्योगी काहन्डुमु काहन्डुमु छ्या़लेया़ जे नाङबा म़ेदी ताम थाम्ज्यीराङ प्रा-साल्सीन। 20 दि तामया़ थे़सीम्बाराङ खुङगी किन्ज्योला थुज्यी-छ्ये़ फुल्सीन। ओहले खुङया़गी पावलला मासीन, “नो़ह, देला यहूदीया़ तोङरा तोङरागी चो़वो येशूला यिह-छ्य़े पेहती मोशागी नाङग्यो छ्य़े-ठिमॱलाङ ज्यिबुराङ छान्दी पेहती ची़उ येहबा। 21 ‘ता़ह यिहन्ज्यु मोशागी छ्य़े-ठिम ङ्यिहन मेहकोएँ ओहले पेहजाया़गी स्या-ताक पेह मेहकोएँ ओहले यहूदी ठिमया़ ची़ मेहकोहएँ’ म़ेदी ख्येगी लेहमेन क्यिहपाया़गी पाहरक्यीला तेहकेन्गी यहूदीया़ला लोप्को येहबा लो माएँ ताम खुङया़गी थ़े सिहन्दी येह। 22 ता़ह ओहराङ च्यि पेहच्ये? ताहन्दा ख्ये देला ओहङसीन म़ेदीनी खुङगी च्यि पेहतीॱआङ थे़गे यिहन। 23 ओ़ह सोङगोराङ ङ्यिहगी माएँगी ताम ङ्यिहन्दोङ। छ्येतेन ज़्या़गेया़ मेहन्दा ज़्यि ङ्यिह ङ्याम्बुराङ येह। 24 खुङया़गी छ्येतेन ज़्या़क्यो ती़हजी सिहन्सीन। ता़ह राहङ खुङला नोम फेप्ती छ्योखाङला फेप नाङदोङ ओहले राहङगीॱआङ खुङ ङ्याम्बुराङ ज़ुबु चाङमा डोएँगी छ्या़लेया़ जे नाङदोङ। ओहले डोसोङती राहङगीराङ च्याल नाङदोङ ओहले खुङया़ला कोह टा प्रा़हज्यु नाङदोङ। दि ल़ेहमु पेहती राहङगी छ्य़े-ठिम ङ्यिहन्ग्यो थोङदी राहङला केन्ग्योगी ङ्य़ेहबा तेहन्दाम मिहम्बा दुबा म़ेदी थाम्ज्यीगी क्यी़ह ज्योर्च्ये येह। 25 चो़वो येशूला यिह-छ्य़े पेहकेन लेहमेन क्यिहपागी मिहया़ला, ‘कुया़ला फुल्ग्योगी साहज्ये से़हया़ माहसाह, ठा़ मा़हथुङ, ज्यिङबा च्यिर्ती सेक्यो मार्च्येगी स्या माहसाह, ओहले छ्येउ-छ्येंमु माहबे’ म़ेदी ङ्यिहगी टे़ह क्याहप्ती यिहगी प्री़हदे ताङ सिहन्दी येह।” 26 ओहले नाहङबार च्युङ पावलगी ओ़ह मेहन्दा ज़्यि ख्येर्ती ज़ुबु चाङमा डोएँगी ल़ेहया़ पेहच्येला छ्योखाङला काहल्सीन। ओहले पावलगीॱआङ खुङ ङ्याम्बुराङ ज़ुबु चाङमा डोएँगी ल़ेहया़ पेहसीन। ओ़ह तिङले पावल राहङ चाङमा डोएँगी ल़ेहया़गी छ्येतेन तेहन्दा डुप्ती मार्च्ये ताङगेन्गी ङ्यिहमा नाहम यिहम्बा म़ेदी पूजाहारीला क्यी़ह ज्योर च्य़ूज्येला छ्योखाङ नाहङला स्य़ूहसीन। पावलला छ्योखाङ नाहङला ज़ुङग्यो 27 छ्येतेन ज़्या़क्योगी स्याहक्पु तिहन छाङज्ये पेहक्यो येहकें ओहजेला एशिया क्याहल-खाप छ्यिम्बुले ओहङग्योगी यहूदीया़गी पावलला छ्योखाङला थोङसीन। ओहले खुङगी मिह मिह-माहङला गो़ ली़दे पावलला ज़ुङ च्य़ूसीन। 28 ओहले खुङया़गी क़े तेन्दी मासीन, “थाम्ज्यी इस्राएली आदा-नो़हया़, दि मिह जु़ङज्येला रो़ह पेह स्यो! काहने थेतेराङ काहल्दी ओहराङला टाह पेहती ताम माएँ मिह दिराङ यिहम्बा। ओहले मोशागी छ्य़े-ठिम माहङ्यीहन, छ्योखाङला छ्येपा माहफुल म़ेदी लोप्केन मिह दिराङ यिहम्बा! ओहले तोहरोङॱआङ ग्रीक क्यिहपागी मिहया़ला छ्योखाङ नाहङला स्य़ूह च्य़ूदी दि नाम्पार-ताहक्पा ग्या़ला ची़बु जे ज़्या़सीन!” म़ेदी मासीन। 29 खुङगी एफिससले ओहङग्योगी ग्रीक क्यिहपागी मिह त्रोफिमसला पावल ङ्याम्बुराङ क्याहसाला थोङदी येहकें, ओहले पावलगी त्रोफिमसला छ्योखाङ नाहङला ख्येर्सीन माएँ साम्लु क्ये़दी येहकें। 30 ओहले दि ताम क्याहसाला ज्यिबुराङ लोहङटी काहल्सीन ओहले छ्यो़ ज़्यिलेराङ मिहया़ ओहङदी पावलला छ्योखाङ नाहङले टिहते फिला तेन्सीन ओहले छ्योखाङगी कोहया़ क्याहप्सीन। 31 ओहले खुङया़गी पावलला सेच्ये छोल्ग्यो येहकें ओ़हजेलाराङ यरूशलेम क्याहसाला से-से तुप-तुप ओहङज्ये पेह दु माएँ ताम रोमी माक्पेन छ्यिम्बुगी थ़ेसीन 32 ओहले दि ताम थे़-लुहङ मे़हबाराङ खोगी माक्मीया़ दाङ माक्पेनया़ला ख्येर्ती छ्योङदी मिह मिह-माहङया़गी पाहरक्यीला काहल्सीन। खुङया़ ओहङग्यो थोङदी मिहया़गी पावलला तुहङज्ये क्युर्सीन। 33 ओहले माक्पेन छ्यिम्बुगी पावलला ज़ुङसीन ओहले च्याल्दा ङ्यी़गी ताहम च्य़ूसीन ओहले मिहया़ला, “दिगी च्यी़ पेहपा? दि मिह का़ह ग्या़दी यिहम्बा?” म़ेदी टी़हसीन। 34 ओहले मिह मिह-माहङया़गी, लाहलागी ताम च्यी़ माएँ, लाहलागी लेहमेन ताम च्यी़ माएँ, ओ़ह सोङगोराङ रोमी माक्पेन छ्यिम्बुगी ओ़ह ठुक्पागी तेहन्दा ङोह स्य़े मा़हखु। ओहले खोगी, “पावलला माक्मी तेहकेन्गी ग्या़ला ख्येर्ती ज़्या़दोङ” म़ेदी माक्मीया़ला कुल्सीन। 35 माक्मीया़गी पावलला ख्येर्ती डोएँमु मिह मिह-माहङया़ खुङया़गी तिङदा तिङ ओहङसीन। ओहले टे़बाले याहर डोज्ये पेहकेमुनी मिहया़गी पावलला सेच्ये म़ेदी च्योम ओहङसीन। ओ़ह सोङबे मिहया़गी लाहक्पाले थार च्य़ूज्येला माक्मीया़गी पावलला खुर्ती ख्येर्सीन। 36 मिह-माहङ क्याहप्ती तिङ ङ्यादी ओहङगेन मिहया़गी, “खोला सेॱराङ कोहएँ” म़ेदी क़े तेन्दीराङ तेहसीन। पावलगी राहङगी तेहन्दाला स्येक्यो 37 माक्मीया़ तेहके ग्या़ नाहङला स्य़ूहज्ये पेहकेमु पावलगी माक्पेन छ्यिम्बुला ग्रीक ताम लाहमले, “ङाहगी राहङला च्यिॱआङ ताम मा ख़ूएँ?” म़ेदी टी़हसीन। 38 ओहले माक्पेन छ्यिम्बुगी “ए! ख्येगीॱआङ ग्रीक ताम स्य़ेदी येहबा? च्यि ख्ये ओ़ह ल़ेह चोक्पा पेहकेन्गी च्याहक्पा तोङरा ज़्यि मिश्रीगी गोबा मिहम्बा ले?” म़ेदी टी़हसीन। 39 ओहले पावलगी, “मिहम्बा ला़ह, ङाहनी किलिकिया क्याहल-खापला येहकेन्गी मिह माहङबुगीराङ ङोह स्ये़एँगी टार्सस क्याहसाकी यहूदी यिहम्बा” म़ेदी मासीन। ओहले, “ङाहला दि मिहया़गी दिनला च्यिरा़ ताम मा च्य़ू नाङदोङ” म़ेदीमाॱराङ स्युहसीन। 40 ओहले माक्पेन छ्यिम्बुगी, “ओहङगे म़ेदोङ” म़े फान्ज्यो पावल टे़बाला लाहङदी मिह थाम्ज्यीलाराङ खाजुम तेहतोङ म़ेदी ला़हदाप पेहसीन। ओहले मिहया़ थाम्ज्यीराङ खाजुम तेह फान्ज्यो पावलगी हिब्रू तामला ताम माज्ये छू़सीन– |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.