ल़ेह-पेन 19 - ह्योल्मोपावल एफिसस क्याहसाला 1 अपोल्लोस कोरिन्थी क्याहसाला येहकेंमु पावल ग्या़ माहङबुराङ कोरा क्याहप्ती एफिसस क्याहसाला लेप्सीन। एफिसस क्याहसाला लेप्सीम्बाराङ पावलगी चो़वो येशूला यिह-छ्य़े पेहकेन्गी लाहला स्याहप्च्यीया़ला थ़ूसीन। 2 ओहले पावलगी “च्यि ख्या फे़बेया़गी चो़वो येशूला यिह-छ्य़े पेहती नाम्पार-ताहक्पा थु ज्योर्पा?” म़ेदी टी़हसीन। ओहले खुङ फे़बेया़गी, “नाम्पार-ताहक्पा थु येहबा माएँदीनी ङ्यिहगी थे़दीॱआङ म़ेह” म़ेदी मासीन। 3 ओहले पावलगी खुङया़ला, “ओ़हठी यिहन्सीमाना ख्यागी काहन्डुमु छ्याप्स्यीकी बप्तिस्मा लेहम्बा ले?” म़ेदी टी़हसीन ओहजेला खुङया़गी, “यूहन्नागी लोप्क्योगी बप्तिस्मा लेहन्ग्यो यिहन” म़ेदी ल़ेहन क्याहप्सीन। 4 ओहले पावलगी मासीन, “यूहन्नागी लोप्क्योगी बप्तिस्मादी सेमगी स्या़बा पेहती तिहक्पागी ल़ेह पाङज्येला यिहम्बा। खो तिङले फेप नाङगेन्दीलाती यिह-छ्य़े पेहतोङ म़ेदी यूहन्नागी मिहया़ला स्येको येहकें।” 5 दि ताम थ़े फान्ज्यो खुङगी चो़वो येशूगी छेनला बप्तिस्मा लेहन्सीन। 6 ओहले पावलगी राहङगी लाहक्पा खुङ थो़ला ज़्या़एँमु नाम्पार-ताहक्पा थु खुङ थो़ला ज़्य़ू फेप्सीन। ओ़ह तिङले खुङया़गी लेहमेन लेहमेन क्यिहपागी तामया़ मासीन ओहले लुहङदेनया़ माज्ये छ़ूसीन। 7 खुङ मेहन्दा च्यिङ्यी़जे येहकें। 8 ओहले पावल दावा सुम थु यहूदीया़की छो़खाङला काहल्दी मा़हन्ज्यीबा पेहती मिहया़ला लोप्च्युङ तेर्सीन। ओहले खोगी किन्ज्योगी क्याहल्सीगी तेहन्दाला प्रा साल्दी खुङया़ला यिह-छ्य़े पेह च्य़ूज्येला ला़ खाजे स्युक पेहसीन। 9 यिहॱनाङ, रेहरेगी सेम सान्दी पेहती चो़वो येशूगी सुङदेन माहङ्यीहन, पावलगी लोप्च्युङ तेर्केमु तोहरोङ मिह थाम्ज्यीगी दिनला थार-लाहमगी तेहन्दाला स्ये़हन्डील पेहसीन। ओ़ह सोङगोराङ पावल खुङया़गी छो़बा खाङबाला डोज्ये क्युर्सीन ओहले चो़वो येशूला यिह-छ्य़े पेहकेन्गी स्याहप्च्यीया़ला राहङ ङ्याम्बुराङ ख्येर्ती काहल्सीन। ओ़ह तिङले पावलगी टुरान्नस लोप्टाला ङ्यिहमा-टाहङमाराङ मिहया़ ङ्याम्बु थू़दी थार्पागी तेहन्दाला स्येपा तुहर्सीन। 10 ओहले लोह ङ्यी़ थु ओ़हठी पेहतीराङ तेहसीन ओहले दि ल़ेहमु पेहती एशिया क्याहल-खाप छ्यिम्बुला तेहकेन्गी यहूदी दाङ ग्रीक क्यिहपागी मिह थाम्ज्यीगी चो़वोगी सुङ ङ्यिहन्सीन। 11 किन्ज्योगी पावल लाहमले याहम्जेन छ्येवागी छ्या़लेया़ जे नाङसीन। 12 देजे थुगी ल़ेहॱआङ पेहसीन मिहया़गी पावलगी ज़ुबुला रुमाल दाङ योल्क्याहप दे़दी नेहपाया़साला ख्येर्को येहकें। दि ल़ेहमु पेहती नेहपाया़ टा़हउ येहकें ओहले ङ्येहम्बा नाम्स्यीया़ थेन्दी डोउ येहकें। 13 ओहले ग्या़ ग्या़ला कोरा क्याहप्ती ङा़ क्याहप्केन यहूदीया़गीॱआङ चो़वो येशूगी छेन तेन्दी ङ्येहम्बा नाम्स्यीया़ तेन्ज्ये छोल्सीन। ओहले खुङया़गी ङ्येहम्बा नाम्स्यीला “पावलगी स्येक्यो येशूगी छेनला ङाह ख्येला थेन्दी सोङ” म़ेदी माउ येहकें। 14 ओ़ह ग्या़ला स्केवास मिहन थो़क्यो यहूदी पूजाहारी छ्यिम्बु च्यी़दी पुह तिहन येहकें खुङया़गी ओ़ह ल़ेहमुराङ ल़ेह पेहको येहकें। 15 ओहले ङ्यिहमा च्यी़ ङ्येहम्बा नाम्स्यीगी खुङया़ला मासीन, “ङाहगी येशू ङोह स्य़ेगे ओहले पावलॱलाङ ङोह स्य़ेगे यिहॱनाङ ख्याया़दी सु यिहम्बा?” म़ेदी टी़हसीन। 16 ओहले ओ़ह ङ्येहम्बा नाम्स्यी स्युहक्यो मिह खुङया़ थो़ला फिर छ्योङ ओहङसीन, ओहले खुङ थाम्ज्यीला राहङगी ताहमला ज़्या़दी खुङया़ला च्यार-ताप क्याहप्सीन ओहले खुङया़ च्येहन्डामु केरे पेहती ज़ुबु काहङ्येॱराङ नाहन्दीराङ नाहन्दी थो़दी ओ़ह ग्या़ले प्रे़हसीन। 17 दि ताम थे़दी एफिसस क्याहसाला तेहकेन्गी यहूदी दाङ ग्रीक क्यिहपागी मिह थाम्ज्यी ज्यी़सीन, ओहले खुङया़गी चो़वो येशूगी छेनला ज्यिबुराङ चा़ पेहसीन। 18 यिह-छ्य़े पेहक्योगी मिह माहङबुराङ ओहङदी खुङया़ राहङ-राहङगी पेहक्योगी ल़ेह ङ्येहम्बाया़ थाम्ज्यीराङ मिहया़गी दिनला स्या़बा डुप्सीन। 19 खुङया़ नाहङला सु सुगी ङेहन क्याहप्को येहकें खुङया़गी राहङ-राहङगी काबुमया़ रुहप पेहसीन ओहले मिह थाम्ज्यीगी दिनला सा़सीन। खुङया़गी ओ़ह सा़क्योगी काबुमगी रिहन चिदुङ पेहकेमु ङुलगी डापाल ॱठि ङाजे काहल्सीन। 20 दिठी पेहती चो़वोगी सुङ स्युक छ्यिम्बु पेहती टाहम्दी काहल्सीन। एफिसस क्याहसाला ठ़ूस्यी सिहङदा 21 ओहले पावलगी, “माकेडोनिया दाङ अखैया लुहङबाले पेहती यरूशलेमला डोएँ” म़ेदी थाक ताङसीन। ओहले, “यरूशलेमला काहल फान्ज्योनी ङाह रोम क्याहसाॱलाङ डोॱराङ कोहकें” म़ेदी मासीन। 22 ओ़ह तिङले पावलगी राहङला स्याहप्तो स्युहएँ तिमोथी दाङ इरास्तसला माकेडोनियाला ताङ चाहङसीन यिहॱनाङ खो राहङदी ङ्यिहमा तोबा थु एशिया क्याहल-खाप छ्यिम्बुलाॱराङ तेहसीन। 23 ओहजे काहङला पावलगी थार-लाहमगी तेहन्दाला स्येक्यो सोङगोराङ एफिसस क्याहसाला लोहङटी काहल्सीन। 24 डेमेत्रियस माएँ सेर ल़ेह पेहकें मिहगी अर्तेमीस ल्हागी ङुलगी फेमा-फेमा छ्योखाङया़ ज़ोउ येहकें। दि ल़ेह पेहती खो दाङ खोगी ज़्या़क्यो मिहया़गीॱआङ टाङगा माहङबुराङ ज़ोउ येहकें। 25 ओ़ह सोङगोराङ डेमेत्रियसगी राहङगी ल़ेह पेहकें मिहया़ दाङ खुङया़गी ल़ेहमुराङ ल़ेह पेहकेन लेहमेन मिहया़ॱलाङ जोम च्य़ूदी मासीन, “आदा-नो़हया़, ओहराङगी दि ल़ेहज्युलेगीराङ टाङगा ज़ोक्यो यिहम्बा, ओ़हदी ख्या फे़बेया़ला क्यी़ह येहॱराङ येहबा। 26 ओहले ओ़ह पावलगी च्यि माक्यो ख्या फे़बेया़गीॱआङ थे़देराङ येहबा। मिहगी लाहक्पागी ज़ोक्यो ल्हानी ल्हाॱराङ मिहम्बा म़ेदी लोप्कु दु, ओहले दि रोहवा पेहती खोगी एफिसस क्याहसा दाङ एशिया क्याहल-खाप छ्यिम्बुला तेहकेन्गी मिह थाम्ज्यीलाराङ नोङज्ये छोल्गु दु। 27 दि ओहराङगी छोङ च्यी़राङ मिहम्बा, अर्तेमीस ल्हागी छ्योखाङॱलाङ ङेन्ज्येन पेहक्यो डोज्ये येह, ओहले एशिया दाङ जाम्बुलीङगी मिह थाम्ज्यीगी चा़ पेहक्योगी अर्तेमीस ल्हाला छ्येपा फुल्गेन्दीॱआङ तोर्ती डोज्ये येह!” म़ेदी डेमेत्रियस सेरकी ल़ेह पेहकेन मिहगी मासीन। 28 दि ताम थे़दी छो़क्यो मिहया़ स्यिहताङगी ठा़ॱराङ खोल्दी, “एफिससला येहकेन्गी ल्हा अर्तेमीस छ्यिम्बु पेहती ज्यू़ज्यु!” म़ेदी क़े तेन्दी मासीन। 29 ओहले खुङगी क़ेगी क्याहसाला पा़हज्या छ्या़सीन ओहले क्याहसा काहङ्येॱराङ लोहङटी काहल्सीन। मिह मिह-माहङ क्याहप्ती ओहङसीन ओहले माकेडोनिया लुहङबाले ओहङग्यो पावलगी रो़ह ङ्यी़ गायस ताङ अरिस्तार्खसला ज़ुङदी टिहती क्याहसाकी मिह छो़सा ठोमला ख्येर्सीन। 30 ओहले पावल ओ़ह मिह मिह-माहङ नाहङला डोज्ये सेम पेहसीन यिहॱनाङ स्याहप्च्यीया़गी खोला डो मा़हच्यु। 31 एशिया क्याहल-खाप छ्यिम्बुला लाहला पावलगी स्युहङ-पेन छ्यिम्बु रो़हया़ येहकें। खुङया़गी पावलला ठोमला फेप माहनाङ म़ेदी लेहङगु ताङसीन। 32 ओहजेला मिह छो़सा ग्या़ला ज्यिबुराङ लोहङटी छ्यिम्बु काहल्सीन। रेहरेगी ताम च्यी़ माएँ, रेहरेगी लेहमेन ताम म़ेदी क़े तेन्गे। यिहॱनाङ च्यिबे देजे माहङा मिहया़ जोम्ग्यो यिहम्बा माएँ ताम मिह माहङबुलाराङ क्यी़ह म़ेहबा येहकें। 33 ओहले यहूदीया़गी अलेक्जेन्डर माएँ मिहला मिह मिह-माहङगी दिनला लाहङदी ताम मा च्य़ूसीन। ओहले खोगी लाहक्पागी ला़हदाप पेहती थाम्ज्यीला खाजुम तेह च्य़ूसीन ओहले अलेक्जेन्डर खुङ ङो़ले छ्यो़ रुहप्ती खुङला थार च्य़ूज्येगी तेहन्दाला च्यिरा ताम माज्ये छोल्सीन। 34 मिह मिह-माहङया़गी, खोॱआङ यहूदी यिहम्बा दु म़ेदी ङोह स्य़े फान्ज्यो येहपाराङॱआङ क़े तेन्दी, “एफिससला ज्यू़एँगी अर्तेमीस ल्हा, छ्यिम्बु जेतीॱराङ ज्यू़ज्यु, अर्तेमीस ल्हा, छ्यिम्बु जेतीॱराङ ज्यू़ज्यु!” म़ेदी मिह मिह-माहङया़गी छ्युजी ङ्यिचे क़े तेन्दीराङ तेहसीन। 35 ओहले ज्युक्स्योलला क्याहसाकी स्युहङ-पेन च्यी़गी मिह मिह-माहङया़ला खाजुम तेह च्य़ू ख़ूसीन। ओहले खोगी मिहया़ला दि ल़ेहमु पेहती प्रा साल्दी मासीन, “एफिससकी आदा-नो़हया़, सेन नाङदोङ, एफिसस क्याहसाती ल्हा छ्यिम्बु अर्तेमीसकी छ्योखाङ दाङ नामले माहर ताहप्क्योगी खोगी कुगी सुङमा यिहम्बा माएँदी सुॱलाङ क्यी़ह म़ेहबा ले? 36 दि तामनी सुगीॱआङ मिहन म़ेदी मा मी़हखु। ओ़ह सोङगोराङ ख्या फ़ेबेॱया खाजुम पेहती तेहतोङ, च्यिॱआङ क्यी़ह-चोक्पा ल़ेहया़ पेहच्ये मेहयोहङगे। 37 ख्या फे़बेया़गी ज़ुङदी ख्योङग्योगी मिहगी ओहराङगी छ्योखाङ कुमेन क्याहप्ती म़ेह ओहले खुङया़गी ओहराङगी ल्हालाॱआङ स्ये़हन्डील पेहती म़ेह। 38 डेमेत्रियस दाङ खोगी ल़ेह पेहकें रो़हया़ला स्यिहताङ येहसीमाना खुङ ठिम ताङगे खाङबाला काहल्दी ताम मा ख़ूज्ये येह। 39 ओहले ख्या फे़बेया़ला ओ़ह म़ेदीॱआङ ल्हाक्पु ताम च्यिॱआङ मा कोहच्ये येहसीमाना मिहया़की छो़बा क़े क्याहप्ती ओ़ह तामला टे़ह क्याहप तेर ख़ूज्ये येह। 40 च्यिबेमाना तिहरीङ दि पेहक्योगी ठ़ूस्यी सिहङदागी ङ्य़ेहबा ङ्यिहया़ला फो़गे म़ेदी ज्यी़सु येहबा। च्यिबेमाना दि तेहन्दा म़ेहबागी ठ़ूस्यी सिहङदागी तामया़ ङ्यिह आप्ता च्ये मी़हखुएँ।” 41 देजे मा सिहन फान्ज्यो खोगी छो़बाला ताङ चाहङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.