ल़ेह-पेन 17 - ह्योल्मोथेसलोनिकी क्याहसाला 1 ओहले खुङ अम्फिपोलिस दाङ अपोल्लोनिया क्याहसाकी लाहमले पेहती थेसलोनिके क्याहसाला लेप्सीन। ओ़हला यहूदीया़की छो़खाङ येहकें। 2 ओहले पावल राहङगी ठिम ची़दे खुङ ङ्याम्बु ओ़ह यहूदीया़की छो़खाङला काहल्सीन, ओहले साता सुम थु सुङरापगी तामया़ लाहमले स्येपा तुहर्सीन। 3 मास्यीका येशूगी ज्यिबुराङ तुहक्पु खुर कोहच्ये येह ओहले येशू टोहङदे येहपाराङ सोम्बो ज़्याङ नाङ कोहज्ये येह ओहले ङाहगी ख्याला प्रा साल्ग्योगी येशूॱराङ ओ़ह थार्पा नाङगेन्गी मास्यीका यिहम्बा। 4 ओहले खुङया़ नाहङला रेहरे यहूदीया़की चो़वोला सेमले खाल्सीन ओहले किन्ज्योगी ज्यिक्पा पेहकेन ग्रीक क्यिहपागी मिह माहङबुराङगी ओहले मिहन छ्यिम्बु थोप्क्यो पी़हमी पेहजाया़गीॱआङ चो़वोला सेमले खाल्दे पावल दाङ सिलास ङ्याम्बु काहल्सीन। 5 ओहले यहूदीया़गी ठादो पेहती छोङ-ठोमगी चोक्पा मिहया़ला क़े क्याहप्ती क्याहसाला फेतार कोहतार ताङ च्य़ूसीन, ओहले यासोनगी खाङबाला च्योम्दी पावल दाङ सिलासला मिहया़गी दिनला ख्योङज्ये छोल्सीन। 6 खुङ ङ्यी़ला च्य़ेह माहसीहम्बा सुङबे खुङया़गी यासोन दाङ लेहमेन आदा-नो़हया़ला क्याहसाकी पोम्बोया़साला टिहते ख्योङदी दि ल़ेहमु मासीन “जाम्बुलीङला ठ़ूस्यी पेह च्य़ूएँगी मिहया़ ताहन्दा ओहराङगी क्याहसाॱलाङ ओहङदी येहबा म़ेदी मासीन। 7 दि यासोनगी खुङला राहङगी खाङबाला से़दी ज़्या़क्यो दुबा। खुङगी रोमी क्याहल्बु छ्यिम्बुकी का माहङ्यीहम्बा पेहती, येशू माएँ लेहमेन क्याहल्बु येहबा म़ेदी माउ दु” म़ेदी मासीन। 8 दि ताम थे़दी मिहया़ दाङ क्याहसाकी पोम्बोया़ का क्याहल्सीन। 9 तिङले पोम्बोया़गी यासोन दाङ खोगी रो़हया़ला डेन्डा च्याल च्य़ूदी ताङ चाहङसीन। बेरिया क्याहसाला 10 ओहले नाहम से़-लुहङ मे़हबाराङ चो़वो येशूला यिह-छ्य़े पेहकेन्गी आदा-नो़हया़गी पावल दाङ सिलासला बेरिया क्याहसाला ताङ चाहङसीन। ओहले खुङ ङ्यी़ बेरिया क्याहसाला लेप फान्ज्यो यहूदीया़की छो़खाङला काहल्सीन। 11 बेरिया क्याहसाकी यहूदीया़ थेसलोनिके क्याहसाकी यहूदीया़ म़ेदी डा-छ्याक्पु येहकें। खुङगी किन्ज्योगी लुहङया़ निङरु पेहती ङ्यिहन्सीन, ओहले पावलगी माक्योगी ताम सुङराप ङ्याम्बु डी़उ दु नि मी़हन्डी दु म़ेदी ङ्यिहमा-टाहङमाराङ सुङराप लोङदी ताउ येहकें। 12 ओहले यहूदी मिह माहङबुगीराङ चो़वो येशूला यिह-छ्य़े पेहसीन। ओहले ग्रीक क्यिहपागी क्येप-ख्योवा दाङ मिहन छ्यिम्बु थोप्क्यो पी़हमी पेहजाया़गीॱआङ चो़वो येशूला यिह-छ्य़े पेहसीन। 13 थेसलोनिके क्याहसाला येहकेन यहूदीया़गी, पावलगी बेरिया क्याहसाॱलाङ किन्ज्योगी लुहङया़ स्येकेराङ येहबा माएँ थे़गोराङ खुङया़ बेरिया क्याहसाला ओहङदी मिह मिह-माहङया़ला क्या़दी ठ़ूस्यी पेह च्य़ूसीन। 14 ओहजेला आदा-नो़हया़गी पावलला ग्यो़बा-ग्यो़बा छो-क्याहम्जोकी फार्केन देप ङो़ले ताङ चाहङसीन। यिहॱनाङ सिलास दाङ तिमोथीदी ओ़हलाराङ तेहसीन। 15 पावलला क्याल डोएँगी मिहया़गी खोला एथेन्स क्याहसा थु क्याल ज़्या़सीन। ओहले ओ़हला लेप्तीले पावलगी राहङला क्याल ओहङगेन्गी आदा-नो़हया़ला सिलास दाङ तिमोथीला ला़ खाजेबा ग्यो़बाराङ स्यो म़ेदी लेहङगु ताङ चाहङसीन। एथेन्स क्याहसाला 16 पावल एथेन्स क्याहसाला लेप्ती सिलास ताङ तिमोथीला कू़हदे तेहकेमु ओ़ह क्याहसाला कुॱराङ कुगी काहङग्यो थोङदी खोगी सेम ज्यिबुराङ नाहसीन। 17 ओ़ह सोङबे खो यहूदीया़की छो़खाङला काहल्दी यहूदीया़ दाङ किन्ज्योगी ज्यिक्पा पेहकेन्गी ग्रीक क्यिहपागी मिहया़ ङ्याम्बु येशूगी तेहन्दाला ताम मामा चेउ येहकें। ओ़ह ल़ेहमुराङ पेहती ङ्यिहमा-टाहङमाराङ क्याहसाकी छोङ-ठोमया़ला येहकेन्गी मिहया़ ङ्याम्बुॱआङ येशूकी तेहन्दाला स्येपा तुहर्को येहकें। 18 ओहले इपिक्युरी दाङ स्तोइकी ज्याल्गा थोङगेया़ नाहङगी लाहला मिहया़ॱआङ पावलसाला ओहङदी स्येपा तुहर्सीन। ओहजेला लाहलागी मासीन, “दि खाक्लेगी च्यि माएँ? ओहले लाहलागी मासीन, दि मिहगीनी ल्हा साम्बाया़गी तेहन्दाला गा स्येक्यो ल़ेहमु थोङगो दु।” पावलगी येशू दाङ येशू टोहङ नाङदी येहपाराङ सोम्बो ज़्याङ नाङग्योकी तेहन्दाला स्येक्यो सोङबे खुङगी दि ल़ेहमु मासीन। 19 ओहले खुङगी पावलला अरियोपागस माएँ मिह छो़सा ग्या़ला ख्येर्ती मासीन, “दि लोप्च्युङ साम्बागी तेहन्दाला ङ्यिहला प्रा साल नाङदोङ। 20 दि तामनी ङ्यिहला ज्यिबुराङ साम्बाज्यी ऩेसीन राहङ फे़बेया़गी सुङ नाङज्ये जेक्यो स्याहलगी तेहन्दा च्यि यिहम्बा, ङ्यिहला ह्अ कोह च्य़ू नाङदोङ म़ेदी मासीन।” 21 च्यिबेमाना एथेन्सगी मिहया़ दाङ ओ़हला तेहकेन्गी छ्यि-क्याहपा मिहगी मिहया़ साम्बा-साम्बा तामया़ च्यी़राङ म़ेदी, ङ्यिहन्दी ङ्यिहमा डो च्यु येहकें। 22 ओहले पावलगी अरियोपागस माएँ छो़बागी दिनला लाहङदी मासीन, “एथेन्स क्याहसाकी आदा-नो़हया़, राहङ फ़ेबेॱया ज्यिबुराङ ल्हाया़ला चा़ पेहकु दु। 23 कोरा क्याहप्ती डोडोपा काहङला राहङ फे़बेया़गी छ्येपा फुल्गे ग्या़ ङाहगी थोङसीन। ओहले ङाहगी दि ल़ेहमु मार्च्ये ताङगे ग्या़ च्यिॱआङ च्य़ेह सिहन्सीन ओ़हला ‘ङोह मे़हस्येएँगी किन्ज्योला’ म़ेदी प्री़ह ज़्या़क्यो दुबा। राहङ फे़बेया़गी ङोह मा़हस्येबा पेहती छ्येपा फुल नाङग्यो ओ़ह किन्ज्योगी तेहन्दालाराङ ङाहगी राहङ फे़बेया़ला तिहरीङ स्येकेराङ येह। 24 जाम्बुलीङ दाङ ओ़हला येहकेन्गी ना थाम्ज्यीराङ से़हया़ ज़ो नाङगे किन्ज्योॱराङ स्यिहङगाम दाङ जाम्बुलीङगी ताहक्पु यिहम्बा। किन्ज्यो मिहया़गी ज़ोक्योगी छ्योखाङया़ला ज़्य़ू मेहनाङगे। 25 किन्ज्योला मिहया़गी फुल्ग्यो से़हया़ च्यिॱआङ कोहपु म़ेह। तोहरोङ किन्ज्योगी गा मिहया़ला मिहली, सो दाङ कोहकेन्गी ना थाम्ज्यीराङ से़हया़ नाङगे। 26 जाम्बुलीङ काहङ्येॱराङ मिहया़ तेहच्यु म़ेदी किन्ज्योगी मिह च्यी़ लाहमले क्यिहपा थाम्ज्यीराङ ज़ो नाङसीन ओहले खुङया़ला जाम्बुलीङ काहङ्येॱराङ तेह च्य़ू नाङसीन। ओहले मिहया़ थार्ती तेहकेन्गी ती़हजी दाङ तेहकेन्गी ग्या़ किन्ज्योगी तोहङलेराङ ठाबे जे-नाङदी येह। 27 खुङया़गी किन्ज्योला छोल्ज्यु ओहले नोहम्दे किन्ज्योला ज्योर्च्यु म़ेदी किन्ज्योगी दि ल़ेहमु जे नाङसीन। यिहॱनाङ किन्ज्यो ओहराङ ङो़ले था़-रिहङबु ज़्य़ू नाङदी म़ेह। 28 च्यिबेमाना ओहराङ किन्ज्योगी छेनलाराङ थार्कें ओहले फार छुर पेहकें दि तामगी तेहन्दाला कवि च्यी़गीॱआङ दि ल़ेहमु म़ेदी येह ‘तेहम्बाराङ ओहराङ किन्ज्योगी छार्क्यीन यिहन।’ 29 ओहराङ किन्ज्योगी छार्क्यीन यिहन्गे सुङगोराङ, ओहराङगी किन्ज्योला मिहगी रिहक्पा दाङ खे़बागी ज़ोक्योगी तोह, सेर दाङ ङुलगी कु ल़ेहमु ने़ज्ये मेहयोहङगे। 30 काहल्ग्योगी ती़हजीला मिहया़गी क्यी़ह म़ेहबा पेहती पेहक्योगी ल़ेहया़ला किन्ज्योगी च्योल्दो जे माहनाङ। यिहॱनाङ ता़ह किन्ज्योगी थाम्ज्यीराङ मिहया़ला राहङ-राहङगी तिहक्पाया़ पाङज्यु म़ेदी का नाङदी येह। 31 च्यिबेमाना जाम्बुलीङगी थाम्ज्यीराङ मिहया़ला ठिम ताङगेन्गी ङ्यिहमा किन्ज्योगी ठाबे जे नाङ सिहन्दी येह ओहले ओ़ह ङ्यिहमु किन्ज्यो राहङगीराङ दाम नाङग्योकी मिह ङो़ले ठिम ताङ नाङज्ये येह। मिहरोला ठिम ताङ ङ्युहङगेन्गी ओङ येह माएँगी दास्यी मिह थाम्ज्यीला तेर्तोङ सुङदी किन्ज्योगी मिहरोला टोहङग्योलेगी सोम्बो ज़्याङ च्य़ू नाङसीन।” 32 स्यिक्यो ङो़ले मिह सोम्बो लाहङगे माएँ ताम थे़दी लाहलागी पावलला क़ेहमु क्याहप्ती स्ये़हन्डील पेहसीन। यिहॱनाङ लाहलागी “दि तामगी तेहन्दाला येहपाराङॱआङ तिङले ङ्यिहया़गी ङ्यिहन्ज्ये सेम येहबा” म़ेदी मासीन। 33 ओ़ह तिङले पावल खुङया़ ङ्याम्बु खा फ़ेदी काहल्सीन। 34 यिहॱनाङ लाहला मिहया़ पावल ङ्याम्बु च्याम्सीन, ओहले यिह छ्य़ेसीन। खुङया़ नाहङला अरियोपागस छो़बागी डियनुसियस, दामारिस मिहन थो़क्यो पी़हमी च्यी़ दाङ लेहमेनया़ॱआङ येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.