ल़ेह-पेन 14 - ह्योल्मोआइकोनियन क्याहसाला 1 आइकोनियन साने़ला पावल दाङ बारनाबास यहूदीया़की छो़खाङला काहल्दी ज्यिबुराङ या़हबु पेहती लोप्च्युङ तेर्सीन, ओ़हजेलाराङ यहूदीया़ दाङ ग्रीक मिहया़गी चो़वो छ्येवा येशूला सेमले खाल्सीन। 2 यिहॱनाङ चो़वो छ्येवाला यिह मा़हछ्येबा यहूदीया़गीदी लेहमेन क्यिहपागी मिहया़ला ख्येर क्याहप्ती येशूला यिह-छ्य़े पेहकेन्गी आदा-नो़हया़ ङ्याम्बु ठ़ूस्यी पेह च्य़ूसीन। 3 यिहॱनाङ, पावल दाङ बारनाबास ङ्यिहमा तोबा थु ओ़हलाराङ तेहती चो़वो छ्येवाला सेम तिहङ यिहन्ज्यु म़ेहबा पेहती चो़वो छ्येवागी तेहन्दाला ज्यिबुराङ खाम छ्यिम्बु पेहती लोप्च्युङ तेर्सीन। ओहले चो़वो छ्येवागी खुङ लाहमले ताक्छेनया़ दाङ याहम्जेम्बागी छ्या़लेया़ जे-नाङदी राहङगी काटीनकी सुङगी पाङबु नाङसीन। 4 यिहॱनाङ ओ़ह क्याहसाकी मिहया़ ठ़ूस्यी पेहती लाहला यहूदीया़ ङ्याम्बु छ्यो़ रुहप्सीन लाहला ल़ेह-पेनया़ ङ्याम्बु छ्यो़ रुहप्सीन 5 ओहले यहूदीया़ दाङ लेहमेन क्यिहपागी मिहया़ खुङया़गी पोम्बोया़ ङ्याम्बु डी़दी पावल दाङ बारनाबासला तोह क्याहप्ती सेच्ये म़ेदी टे़ह क्याहप्सीन। 6 ओहले पावल दाङ बारनाबासगी दि ताम क्यी़ह ज्योर्ती लुकोनिया लुहङबागी लुस्त्रा दाङ डर्बी क्याहसागी लाहमले पेहती प्रे़हसीन, 7 ओहले ओ़ह लुहङबा ङ्यी़ दाङ ओ़हगी सहर-सुहरया़ला येहकेन्गी ग्या़या़ॱलाङ खुङगी चो़वो छ्येवागी नाङग्योकी या़हबु लेहङगु स्येसीन। लुस्त्रा दाङ डर्बी क्याहसाला 8 लुस्त्रा क्याहसाला काङबा कुच्या मिह च्यी़ तेहको येहकें। ओहले खो क्येएँ यिहन्ज्युराङ काङबा कुच्या येहकें सोङगोराङ खो नाहमॱआङ लाहङदी डो मी़हखुएँ येहकें। 9 पावलगी ताम माएँमु खोगी या़हबु पेहती ङ्यिहन्दी तेहक्यो येहकें। पावलगी खोला या़हबु पेहती तासीन, ओहले चो़वो छ्येवा येशूगी टा़ह च्य़ू थुप्कें म़ेदी खोगी तेहपा पेहक्यो पावलगी क्यी़ह ज्योर्ते 10 क़े छ्यिम्बु तेन्दी मासीन, “ख्ये काङबा च़ूदी थेका पेहती लाहङदोङ।” ओ़हजेलाराङ खो ह्ओप लाहङदी फार छुर डोज्ये छ़ूसीन। 11 पावलगी पेहक्योकी दि ल़ेह थोङदी ओ़ह ग्या़गी मिहया़गी राहङगी लुकोनिया तामले क़े तेन्दी दि ल़ेहमु मासीन, “ता़ह ल्हाया़ गा मिहगी चुहम्रुल थो़दी ओहराङ साला ओहङसीन दुबा।” 12 ओहले खुङया़गी बारनाबासलाती जिउस ल्हा म़ेदी मासीन ओहले पावललादी हर्मेस ल्हा म़ेदी मासीन च्यिबेमाना खोगी या़हबु लेहङगु स्येकेन्गी ल़ेह पेहक्यो येहकें। 13 ओ़ह क्याहसागी फिला जिउस ल्हागी छ्योखाङ येहकें। ओहले ओ़ह छ्योखाङगी पूजाहारीगी मेहन्दोगी स्या़हबा दाङ लाङगोया़ ख्योङदी क्याहसाकी कोहला ओहङसीन। ओहले खुङया़गी बारनाबास दाङ पावलगी दिनला लाङगोया़ ख्योङदी मार्च्ये फुल्ज्येला ठाबे पेहसीन। 14 ओहले ल़ेह-पेनया़, बारनाबास दाङ पावलगी दि ताम थे़-लुहङ मे़हबाराङ खुङया़ राहङ-राहङगी काप्च्याया़ राल्दे मिहया़गी पाहरक्यीले छ्योङदे काहल्दी क़े तेन्दी दि ल़ेहमु मासीन, 15 “मिहम्बा, राहङ फे़बेया़गी च्यिबे दि ल़ेहमु जे नाङगे? ङ्यिहॱआङ राहङ फ़ेबेॱया ल़ेहमुराङ क्यिपु-तुहक्पु खुर्के मिहया़ च्यी़राङ यिहन। ङ्यिह राहङ फे़बेया़ला किन्ज्योगी नाङग्यो या़हबु लेहङगु स्येच्येला ओहङग्यो यिहम्बा। दि ल़ेहमु कोह मेह-छ्य़ेगेन्गी ल़ेहया़ क्युर ज़्या़दी स्यिहङगाम दाङ जाम्बुलीङ ओहले ओ़हला येहकेन्गी थाम्ज्यीराङ से़हया़ ज़ो नाङगेन्गी सोम्बो किन्ज्योला ख्याया़गी चा़ पेह कोहएँ। 16 ताहङबोगी मिहया़लानी किन्ज्योगी खुङया़ला राहङगी सेमला ने़जेबा पेह च्य़ूदी येहकें। 17 यिहॱनाङ किन्ज्योगी नाहमॱआङ या़हबु छ्या़लेया़ जेच्ये क्युर नाङदी म़ेह। ओहले किन्ज्योगी नाम क्याहप च्य़ू नाङदी कामेया़ या़ह च्य़ू नाङदेराङ येह। ओहले माहङबुराङ साहज्ये से़हया़ नाङदी मिहया़गी सेमला काहसोगी काङ नाङदी येह। दि ल़ेहमु पेहती किन्ज्योगी छ्या़लेया़गीराङ मिहरोदी पाङबु तेर्के।” 18 दि तामया़ म़ेदी बारनाबास दाङ पावलगी खुङ ङ्यी़ला फुल्ज्येला ठाबे पेहक्योगी मार्च्येला ज्यिबुराङ खेन्दा-का़हबु पेहती का़सीन। 19 ओहले एन्टिओखिया दाङ आइकोनियन क्याहसाले यहूदी बा़ल च्यी़ ओहङदी मिह मिह-माहङया़ला ख्येर क्याहप्ती पावलला तोहगी क्याहप च्य़ूसीन, ओहले ता़ह पावल स्यि येहटो म़ेदी खुङगी पावलला टिहते ख्येर्ती क्याहसाकी फिला क्युर चाहङसीन। 20 ओहजेला चो़वो छ्येवागी स्याहप्च्यीया़ ओहङदी पावलगी ति-खिरे जोम्गेमु याहङमे-याहङलाराङ पावल लाहङदी क्याहसा ङो़ले काहल्सीन। ओहले नाहङबार च्युङ खो बारनाबास ङ्याम्बुराङ डर्बी क्याहसाला काहल्सीन। सिरिया क्याहल-खापकी एन्टिओखियाला लो़ह ओहङग्यो 21 पावल दाङ बारनाबासगी डर्बी क्याहसाॱलाङ लेहङगु या़हबुया़ स्येती मिह माहङबुलाराङ चो़वो छ्येवा येशूगी स्याहप्च्यी ज़ोसीन। ओहले खुङ ङ्यी़ लुस्त्रा, आइकोनियन दाङ एन्टिओखियाला लो़ह काहल्सीन 22 ओहले खुङ ङ्यी़गी ओ़ह ग्या़ला येहकेन्गी चो़वो छ्येवागी स्याहप्च्यीया़ला यिह-छ्य़ेला सान्दी ज़ोएँॱराङ किन्ज्योला यिह छ्य़ेदी तेहच्येला स्युक क्ये च्य़ूसीन। सेमले खाल्दी थिक-चि पेहती तेहच्येला आ़र क्ये च्य़ूसीन। किन्ज्योगी क्याहल्सीला लेप्कें म़ेदी तोहङले ओहराङगी माहङबुराङ तुहक्पु खुर कोहज्ये येह म़ेदी लोप्ताम क्याहप्सीन। 23 ओहले खुङ ङ्यी़गी छेन्छोक टाहङमाराङ एल्डरया़ला दाम्सीन, ओहले खुङ ङ्यी़गी सोल्वाङ ताप्ती, ङ्युङने तेहती खुङया़ला चो़वो छ्येवागी कुम्देनला छेन्छोकला चि क्याहप्सीन। 24 ओ़ह तिङले खुङया़ पिसिदिया साने़लेगी पेहती पाम्फिलिया माएँ ग्या़ला ओहङसीन। 25 ओहले पर्गा माएँ ग्या़ला चो़वो येशू मास्यीकाकी तेहन्दाला स्येती खुङया़ अटालिया क्याहसाला काहल्सीन। 26 ओहले ओ़ह ग्या़ले खुङया़ छ्यु-टुहला जा़दे एन्टिओखिया क्याहसाला लो़ह काहल्सीन। ओ़ह एन्टिओखिया क्याहसाला किन्ज्योला यिह-छ्य़े पेहक्यो आदा-नो़हया़गी पावल दाङ बारनाबासला किन्ज्योगी काटीनला च्योल्दी या़हबु लेहङगु स्येच्येला ताङ चाहङग्यो येहकें ओहले खुङ ङ्यी़गी ओ़ह ल़ेहया़ सिहन्दा च्येती खुङ ङ्यि ओ़ह ग्या़लाराङ लो़ह काहल्सीन। 27 एन्टिओखिया क्याहसाला लो़ह ओहङ फान्ज्यो पावल दाङ बारनाबासगी छेन्छोककी मिह थाम्ज्यीला क़े क्याहप्सीन। ओहले किन्ज्योगी खुङ लाहमले काहन्डुमु काहन्डुमु छ्या़लेया़ जे नाङबा ओ़ह तामया़ थाम्ज्यीराङ स्येसीन। ओहले किन्ज्योगी लेहमेन क्यिहपागी मिहया़लाॱआङ किन्ज्योला तेहपा पेहकें लाहम तेन नाङसीन माएँ तामया़ स्येसीन। 28 ओ़ह तिङले खुङ ङ्यी़ ङ्यिहमा माहङबुराङ थु एन्टिओखिया छेन्छोककी आदा-नो़हया़ ङ्याम्बुराङ तेहसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.