ल़ेह-पेन 1 - ह्योल्मोस्याहप्च्यीया़गी जे नाङग्योकी छ्या़लेगी तेहन्दाला 1 थियोफिलस लाह, येशूगी जे नाङग्यो दाङ लोप्च्ये छ़ूज्ये जेक्योगी थाम्ज्यीराङ तामया़गी तेहन्दाला ङाहगी राहङला ताङग्योगी तोहङमागी छ्य़ेला प्रुह सिहन्दी येह। 2 येशू राहङगीराङ दाम नाङग्योकी ल़ेह-पेनया़ला नाम्पार-ताहक्पा थु लाहमले का नाङ सिहन फान्ज्यो येशू स्यिहङगामला फेप नाङग्यो थु थाम्ज्यीराङ तामया़ तोहङमा छ्य़ेला प्री़हदी येह। 3 ओहप-क्याल नोम्दी क्याहङस्यीङला टोहङ फान्ज्यो येशू ङ्यिहमा ज़्यिप-च्यु थु लेहमा माहङबुराङ खुङया़ ङ्याम्बु थु नाङदी राहङ सोम्बो येह म़ेदी दास्यी तेन नाङसीन। ओहले स्याहप्च्यीया़गी येशूला थोङसीन ओहले येशूगी खुङया़ ङ्याम्बु किन्ज्योगी क्याहल्सीगी तेहन्दाला स्याहल सुङ नाङसीन। 4 येशू स्याहप्च्यीया़ ङ्याम्बु सोल छ्येच्येला ज़्य़ू नाङगेमु येशूगी खुङया़ला दि का नाङसीन, “ख्याया़ यरूशलेम क्याहसा क्युर ज़्या़दी का़हॱलाङ माहन्डो, ओहले किन्ज्यो याहपगी ज़्या़ नाङग्योकी ताहम्ज्याला कू़हदी तेहतोङ। दिगी तेहन्दाला ङाहगी ख्याया़ला तोहङलेराङ मा सिहन्दी येह। 5 च्यिबेमाना यूहन्नागीनी छ्युगी बप्तिस्मा तेर्को येहकें, ता़हनी ङ्यिहमा तोबा तिङले ख्यागी नाम्पार-ताहक्पा थुगी बप्तिस्मा ज्योर्च्ये येह।” येशू स्यिहङगामला फेप नाङग्यो 6 ओहले खुङ फ़ेबेॱया जोम्दी ज़्य़ूगेमु ल़ेह-पेनया़गी येशूला स्युहसीन, “चो़वो छ्येवा ला़ह, च्यि राहङगी दि ती़हजीलाॱराङ ओहराङ इस्राएल क्याहल-खापला खा फे़ नाङगे?” 7 ओहले येशूगी सुङ नाङसीन, “ओ़ह ङ्यिहमा दाङ ओ़ह ती़हजीदी किन्ज्योगी तोहङलेराङ राहङगी थुला ठुङ सिहन्दे येह। ओ़हगी तेहन्दाला ख्यागी ङोह स्य़े मेहकोहएँ च्यिबेमाना ओ़ह ख्यागी ल़ेह मिहम्बा। 8 यिहॱनाङ नाम्पार-ताहक्पा थु ख्याया़ थो़ला फेप नाङ फान्ज्यो ख्यागी ओङ ज्योर्च्ये येह। ओ़ह तिङले ख्याया़ यरूशलेम क्याहसाला, थाम्ज्यी यहूदीयाला, सामरिया साने़या़ला, ओहले जाम्बुलीङ छ्यो़ ज़्यिगालाॱराङ ख्या ङाहगी पाङबु ओ़हङज्ये येह।” 9 ओहजे सुङ सिहन फान्ज्यो स्याहप्च्यीया़गी ताताबा काहङला येशू नामला फुर्ती फेप नाङसीन। ओहले मुक्पागी येशूला का़सीन ओ़ह तिङले खुङया़गी येशूला माहथोङ। 10 स्याहप्च्यीया़गी येशू फेप्केराङ जेक्योदी नामला त़ेदी तेहक्यो येहकें, याहङमे-याहङलाराङ नाहम्सा कार्पु नोम्ग्यो क्येप-ख्योवा ङ्यी़ खुङ पोहला फोक थेन फेप्सीन। 11 ओहले खुङया़गी मासीन “ए गालील साने़की मिहया़, ख्या च्यिबे लाहङदी नामला त़ेदी तेहकें? येशूलानी किन्ज्योगी स्यिहङगामला नोम फेप्सीन। ख्यागी येशूला काहन्डुमु पेहती फेप्केन थोङबा, ओ़ह ल़ेहमुराङ पेहती येशू ङ्यिहमा च्यी़ दि जाम्बुलीङला लो़ह फेप्च्ये येह।” यहूदा इस्करियोतकी छापला मतियासला दाम्ग्यो 12 ओहले स्याहप्च्यीया़ जैतून काहङलेगी यरूशलेम क्याहसाला लो़ह काहल्सीन। ओहलेगी यरूशलेम थु लेप्च्येला नेसा च्यी़चे ल़ेहमु था़-रिहङबु येहकें। 13 ओहले यरूशलेम क्याहसाला लेप्ती खुङ राहङ तेहकेन्गी खाङबागी थो़मे तेङला काहल्सीन। खुङ फ़ेबेॱया मेहन्दा च्यू़ज्यी येहके– पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ, मत्ती, अल्फयसकी पुह याकूब, देशभक्त माएँगी सिमोन दाङ याकूबकी पुह यहूदा येहकें। 14 ओहले खुङ फ़ेबेॱया लेहमेन आज्यी-नुहमुया़ ओहले येशूगी आमा मरियम दाङ, येशूगी नो़हया़ ङ्याम्बु जोम्दी सेम च्यी़ डी़दी नाहम्माॱनाङ किन्ज्योला सोल्वाङ ताप्ती तेहको येहकें। 15 ओहले ओ़ह ती़हजीला चो़वो छ्येवा येशूला यिह-छ्य़े पेहकेन मिहया़ खाल टू़हचे जोम्दी येहकें। ओहजेला पत्रुसगी खुङगी पाहरक्यीला लाहङदी मासीन, 16 “आदा-नो़हया़ सेन नाङदोङ, ओहराङगी सुङरापगी स्याहल तेहन्दा डुपॱराङ कोहच्ये येहकें, ओ़ह छ्य़ेगी स्याहल येशूला जु़ङज्येला लाहम तेन्गे यहूदागी तेहन्दाला दाऊद क्याहल्बुगी स्याहल लाहमले तोहङलेराङ नाम्पार-ताहक्पा थुगी सुङनाङ सिहन्ग्यो येहकें।” 17 च्यिबेमाना खोगी टाहङजी ओहराङ ङ्याम्बुराङ काहल्ग्यो येहकें ओहले ओहराङ ङ्याम्बुराङ चो़वो छ्येवागी छ्या़ले पेहच्येला खोॱआङ दाम्ग्यो येहकें। 18 ओहले खोगी माहताहक्पा ल़ेह पेहती लेहन्ग्यो टाङगालेगी स्यिहङ च्यी़ ङ्योहसीन। ओहले खो गो़ थुर्चु पेहती ताहप्सीन, ओहले खोगी फोवा फोङसीम्बाराङ क्युहमाया़ थेन्सीन। 19 ओ़ह ताम यरूशलेमगी मिह थाम्ज्यीगी क्यी़ह ज्योर्सीन ओहले खुङया़गी ओ़ह स्यिहङगी मिहन राहङगी ताम ङो़ले “आखेल्दामा” म़ेदी ज़्या़सीन। आखेल्दामा माक्योदी ठा़गी स्यिहङ माक्यो यिहम्बा। 20 ओहले येहपाॱआङ पत्रुसगी मासीन, “ता़ह छ्य़े-लुगी छ्य़ेला यहूदागी तेहन्दाला दि रोहवा प्री़हदी येहबा– ‘खोगी खाङबा तोङबा क्येरे डोज्यु, ओ़हला सुॱआङ माहतेहच्यु। ओहले खोला चि क्याहप्क्योगी ल़ेह लेहमेन मिहगीराङ लेहन्ज्यु!’” 21-22 ओ़ह सोङगोराङ, येशू येहपाराङ सोम्बो ज़्याङ नाङग्यो तामगी पाङबु तेर्च्येला ता़ह ओहराङ नाहङलेगी मेहन्दा च्यी़ला दाम कोहकें। ओहले ओ़ह मिहदी यूहन्नागी बप्तिस्मा तेरक्यो ङ्यिहमा यिहन्ज्यु चो़वो छ्येवा येशूला स्यिहङगामला नोम फेप नाङग्यो ङ्यिहमा थु, येशू ओहराङ ङ्याम्बुराङ ज़्य़ूदी फि-नाहङ जे नाङगेमु खोॱआङ ओहराङ ङ्याम्बुराङ तेहक्यो ओहङ कोहकें। 23 दि ताम थ़े फान्ज्यो ओ़हला जोम्ग्यो मिहया़गी टे़ह क्याहप्ती मेहन्दा ङ्यी़ला दाम्सीन। मेहन्दा च्यी़गी मिहन योसेफ-बारसाबास माउ येहकें खोला युस्तसॱआङ माउ येहकें, लेहमेनदीगी मिहन मतियास माउ येहकें। 24 ओहले खुङया़गी दि ल़ेहमु म़ेदी सोल्वाङ ताप्सीन, “मिह थाम्ज्यीगी सेमला येहकेन्गी ताम ङोह ख्येन नाङगे चो़वो छ्येवा, दि मेहन्दा ङ्यी़ नाहङला राहङगी का़हन्दीला दाम नाङग्यो येहबा ओ़ह ङ्यिहला तेन नाङदोङ, 25 का़हन्दीगी ल़ेह-पेनगी ल़ेहला स्य़ूहदी स्याहप्तो स्युहखुएँ, ओ़हदीलाॱराङ दाम नाङदोङ च्यिबेमाना ओ़ह छ्या़ले यहूदागी क्युर ज़्या़दी खो का़ह ग्या़दी यिहन्गे ओ़ह ग्या़लाराङ लो़ह काहल्सीन।” 26 ओहले खुङया़गी खुङ ङ्यी़गी पाहरक्यीला क्येहन क्याहप्सीन, ओहले क्येहन क्याहप्केमु मतियासगी मिहनला थोप्सीन, ओहले खो ल़ेह-पेन च्यू़ज्यी ङ्याम्बु खेन पा़हसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.