३ यूहन्ना 1 - ह्योल्मो1 ङाह छेन्छोककी एल्डर लाहमले, ङाहगी चेवा पेहक्योकी रो़ह गायस ख्येला दि यिहगी प्रुहएँॱराङ येहबा, ङाहगी ख्येला तेहम्बाराङ चेवा पेहती येह। 2 ए ङाहगी च्याहम्बु रो़ह, ख्ये थाम्ज्यीराङ से़हला या़हबु ओहङ ख़ूज्यु, ओहले ख्येगी नाम्स्यी ल़ेहमुराङ ज़ुबुॱआङ थाङबु ओहङ ख़ूज्यु म़ेदी ङाह किन्ज्यो ङ्याम्बु सोल्वाङ ताप्को येह। 3 ख्ये तेहन्दामगी लाहमला स्य़ूहदी नाहम-माना राहङगी डोलु-तेहलुया़ या़हबु पेहकु दु माएँ ताम किन्ज्योला यिह-छ्य़े पेहक्यो काहजे मिहया़ ङाहसाला ओहङदी स्य़ेसीन। दि केच्या थ़े ङ्युहङगेमु ङाह ज्यिबुराङ क़ेहनाङ लाहङसीन। 4 राहङदी पुह पोहमोया़ तेहन्दामकी लाहमला स्य़ूहदीॱराङ दु माएँ ताम थ़े ङ्युहङगे ल़ेहमु काहसो लेहमेन ताम च्यि ओहङ ख़ूएँ ले? 5 ए ङाहगी च्याहम्बु नो़ह, ख्येगी ल़ेहया़ कादुप च्येती पेहक्यो सोङबे, ख्येगी ङोहॱराङ मा़हस्येबाकी किन्ज्योला यिह-छ्य़े पेहक्यो नो़हया़ला ज्यिबुराङ फेन थो़सीन। 6 खुङया़गी छेन्छोककी दिनला ख्येगी चेवाकी तेहन्दाला स्येती येहबा। खुङया़ लाहमला डोएँमु कोहकेन्गी च्याहम्दाया़ ठाबे पेह तेर्सीमाना ओ़ह किन्ज्योगी ज़ी़लुला थु ङ्ये़एँगी ल़ेह ओहङज्ये येह ओहले ख्येगी ल़ेह या़हबु पेहक्यो ओहङज्ये येह। 7 च्यिबेमाना खुङया़ मास्यीकाकी छेनला या़हबु लेहङगु स्येच्येलाॱराङ कोराला थेन्ग्यो यिहम्बा ओहले चो़वोला यिह मे़हछ्येएँ मिहया़ ङ्याम्बु खुङगी च्यिॱआङ लेहन्दी म़ेह। 8 ओ़ह सोङबे ओहराङ किन्ज्योला यिह-छ्य़े पेहक्यो मिहया़गी ओ़ह ल़ेहमु मिहया़ला रो़हराम पेह कोहएँ। दि ल़ेहमु पेहती खुङगी पेहक्यो किन्ज्योगी छ्या़लेला ओहराङॱआङ तेहम्बा-तेहन्सुमला ङ्याम्बुराङ टी़ह ख़ूएँ। 9 ङाहगी छेन्छोकला दिगी तेहन्दाला प्रुहक्यो येहकें। यिहॱनाङ खुङया़गी पाहरक्यीला राहङगी राहङला छ्यिम्बु ने़गे डियोत्रिफसगी ङाहगी माक्यो तामला नाङदाराङ मेहताङ दु! 10 ङाह ओ़हला ओहङगेमु ख्या थाम्ज्यीला खोगी ओहराङला टाह पेहती च्यि पेहपा, काह-ठि चोक्पा तामया़ मे़बा, ओ़ह ख्याया़ला स्येकें। ओहजे च्यी़राङ मिहम्बा, खोगी फि क्याहल-खापकी नो़हया़ला टाह पेहकें, ओहले खुङया़ला ओहङॱराङ मी़हच्युएँ ओहले खुङया़ला फेप स्य़ूहज्ये छोल्गेया़ला छेन्छोकले तेन्गे। 11 ए ङाहगी च्याहम्बु नो़ह, चोक्पा तामया़ला पे ताॱराङ माहता, यिहॱनाङ या़हबु तामया़ला पे त़ेदोङ। का़हन्दीगी या़हबु पेहकें, ओ़ह किन्ज्योदी यिहम्बा, ओहले का़हन्दीगी चोक्पा पेहकें, खोगी किन्ज्योला ङोह स्य़ेक्यो मेहयोहङगे। 12 डेमेत्रियसलाती मिह थाम्ज्यीगी या़हबु माएँ ओहले तेहन्दाम राहङगीॱआङ खोगी तेहन्दाला पाङबु नाङगे। ङ्यिहॱआङ खोगी पाङबु येह। ङ्यिहगी पाङबु तेहन्दाम यिहन म़ेदीनी ख्याया़लाॱआङ क्यी़हराङ येह। 13 ङाहगी ख्येला मा कोहच्ये तामनी माहङबुराङ येहकें यिहॱनाङ स्युगु दाङ फुल-डिन लाहमले च्यी़राङ मिहम्बा, 14 ता़ह ङाह ख्ये ङ्याम्बु ग्यो़बाराङ थू़दी ताम थाम्ज्यी माएँ म़ेदी रेहवा पेहको येहबा। 15 ख्येला स्य़िहदे ओहङज्यु! देला येहकेन रो़ह थाम्ज्यीगी ख्येला टास्यी-देले माउ दु। ओहले ओ़हला येहकेन्की रो़हया़ला टास्यी-देले मे तेर। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.