२ तिमोथी 4 - ह्योल्मोपावलगी तिमोथीला या़हबु लेहङगु स्येच्येला चि क्याहप्क्यो 1 स्यिक्यो दाङ सोम्बो मिह थाम्ज्यीला ठिम ताङ नाङगेन मास्यीका येशू दाङ किन्ज्योगी दिनला ङाह ख्येला स्युक पेहती माएँ। मास्यीका येशू फेप नाङदी ओङ छ्य़े नाङगे सोङबे 2 ङाह ख्येला किन्ज्योगी या़हबु लेहङगु स्येच्येला का तेर्केॱराङ येहबा। ती़हजी या़हबु येहॱनाङ मे़हॱनाङ या़हबु लेहङगु स्येच्ये माहक्युर। खुङया़ला लोप्ताम क्याहप्तोङ, बार्ता लाङदोङ, आ़र क्ये च्य़ूदोङ ओहले ना़स्यीङ छ्यिम्बु दाङ लुहङ तेर्केन्गी तामया़ला ख्ये मा-फाम्बु माहबे। 3 च्यिबेमाना ता़ह मिहया़गी तेहन्दामकी लोप्च्युङ ङ्यिहन्ज्ये सेम म़ेह ऩेगेन्गी ती़हजी च्यी़ॱआङ ओहङगेॱराङ येहबा। ओ़ह ती़हजीला खुङ राहङला या़हबु ऩेगेन्गी से़हया़ च्यी़राङ ङ्यिहन्ज्ये सेम पेहच्ये येह ओहले राहङला या़हबु ऩेगेन्गी तामया़ स्येकेन्गी लोबेनया़लाॱराङ क़े क्याहप्च्ये येह। 4 ओहले खुङया़गी तेहन्दामकी तामया़ ङ्यिहन्ज्ये म़ेह, ओहले जे़मा पेतामया़ ङ्यिहन्ज्ये सेम पेहच्ये येह। 5 यिहॱनाङ ख्येदी सान्दी पेहती तेह। तुहक्पु खुर्तोङ, या़हबु लेहङगु स्येकेन्गी ल़ेहया़ पेहतोङ, ओहले ख्येगी किन्ज्योगी छ्या़लेया़ छाङबु पेहती पेहतोङ। 6 च्यिबेमाना ता़ह ङाह स्यिएँगी ती़हजी पोहलाराङ लेप सिहन्दी येह। ता़हनी ङाह दि जाम्बुलीङ क्युर ज़्या़दी डोएँगी ती़हजी लेप सिहन्सीन। 7 ङाहगी मा़ या़हबु क्याहप सिहन्दी येह। ङाहगी छ्योङ कोहएँकी ल़ेह सिहन्दा च्ये सिहन्दी येह ओहले ङाहगी यिह-छ्य़ेला सी़दे ज़्या़दी येह। 8 ता़ह ङाहगी तेहन्दाला टाहङदेनकी पेस्यो ज़्या़ नाङदी येह, ओ़हदी टाहङबु-ठिम ताङ नाङगेन चो़वोगी ओ़ह ङ्यिहमाला ङाहला नाङज्ये येह, ओहले ङाहला च्यी़राङ मिहम्बा, यिहॱनाङ मिहरो फेप नाङगेन्गी लाहम ज्यिबुराङ सेम काहसो पेहती कू़हदे तेहकें थाम्ज्यीलाराङ नाङज्ये येह। 9 ला़ खाजे ङाहला ग्यो़बाराङ थ़ू ओहङज्येला स्युक पेहतोङ। 10 च्यिबेमाना डेमासकी दि ताहन्दाकी जाम्बुलीङला चेवा पेहती ङाहला क्युर्ती खो थेसलोनिकेला काहल्दी येह। क्रेसेन्स गलातीयाला काहल्दी येहबा, ओहले तीतसती दलमातियाला काहल्दी येहबा। 11 ङाह ङ्याम्बुनी नाहरे लूका च्यी़राङ येहबा। मर्कूसला ख्ये ङ्याम्बुराङ ख्योङदी स्यो, च्यिबेमाना खोगी ङाहगी ल़ेहला माहङबुराङ रो़हराम पेह ख़ूज्ये येह। 12 यिहॱनाङ तुखिकसला ङाहगी एफिससला ताङदी येह। 13 त्रोआस लुहङबाकी कार्पस साला क्युर ज़्या़क्योगी ङाहगी चुङगा दाङ छ्या़बेया़ ओहले खास पेहतीती को़बाला प्रुहक्योकी छ्य़ेया़ ख्ये ओहङगेमु ङ्याम्बुराङ ख्योङदी स्यो। 14 च्या़गी ल़ेह पेहकेन अलेक्जेन्डरगी ङाहला माहङबुराङ चोक्पा पेहसीन। खोगी पेहक्योगी ल़ेहला ते़बे चो़वोगी खोला ठिम ताङ-नाङज्यु। 15 खो यिहन्ज्यु ख्येॱआङ जेम्दी तेह, च्यिबेमाना खोगी ओहराङगी स्येक्योगी या़हबु लेहङगुला ज्यिबुराङ टाह पेहसीन। 16 तोहङस्यो पा़लो ङाहती खाम्ज्यु चा़ल्ती़एँमु सुज्यीगीॱआङ ङाह ङो़ले छ्यो़ रुहप्ती ताम मे़-माहतेर। थाम्ज्यीगी ङाहला क्युर्सीन। ओ़हगी ङ्य़ेहबा खुङया़ला माह फो़ज्यु! 17 यिहॱनाङ लेहमेहन क्यिहपागी मिह थाम्ज्यीगी ङ्यिहन ख़ूज्यु म़ेदी चो़वो ङाह ङ्याम्बु ज़्य़ू नाङसीन, ओहले निङ थाक्पा यिहन्ज्युराङ किन्ज्योकी सुङ प्रा-साल्ज्येला ङाहला ओङ नाङसीन। ओहले चो़वोगी ङाहला सिङग्यी-ता़गी खाले थार च्य़ू नाङसीन। 18 चो़वोगी ङाहला ना थाम्ज्यीराङ चोक्पा तामया़ ङो़ले थार च्य़ू नाङज्ये येह, ओहले मिहरोगी ङाहला थार च्य़ू नाङदी राहङगी स्यिहङगामकी क्याहल्सीला नोम फेप नाङज्ये येह। मिहरोला नाहम-माना ज़िज्यिद ओहङज्यु। आमेन। 19 प्रिस्किला दाङ अकिलास, ओहले ओनेसिफरसकी खाङबा मे़हमेया़ला टास्यी-देले म़ेदी म़े तेर। 20 इरास्तसती कोरिन्थी क्याहसालाराङ तेहसीन, त्रोफिमसती नेहपा काहल्ग्यो सोङबे ङाहगी खोला मिलेटसलाॱराङ क्युर ज़्या़सीन। 21 ख्ये ला़ खाजे सेर ताहङगे म़ेदी तोहङलेराङ देला लेप्कें पेहती स्यो। युबुलस, पुडेस, लिनस, क्लौडिया दाङ थाम्ज्यी आदा-नो़हया़ दाङ आज्यी-नुहमुया़गी ख्येला टास्यी-देले म़ेदी ताङग्यो येहबा। 22 चो़वो ख्येगी नाम्स्यी ङ्याम्बुराङ ज़्य़ू नाङज्यु। ख्या ङ्याम्बु किन्ज्योकी काटीन ज्यू़-नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.