२ तिमोथी 3 - ह्योल्मोतिङस्यो ङ्यिहमाया़ 1 यिहॱनाङ दि ङोह स्य़ेदी ज़्या़दोङ, तिङस्यो ङ्यिहमाया़ला ज्यी़ज्ये ल़ेहमु ती़हजीया़ ओहङज्ये येह। 2 च्यिबेमाना मिहया़ राहङला च्यी़राङ निङज्यी पेहकें, क्युह-नोहरला ह्अम्बा पेहकें, छ्य़ेन्दो तेन्गे, राहङ च्यी़राङ छ्यिम्बु यिहम्बा म़ेदी माएँ, किन्ज्योला स्याहम्डेन तेन्गे, आबा-आमाला ची़नाङ मेहबेकें, गिन म़ेहबा दाङ नाम्पार-ताहक्पा म़ेहबा 3 सुलाॱआङ निङज्यी मेहबेकें, लेहमेन मिहया़ ङ्याम्बु थिन मी़हखुएँ, ताम खेर क्याहप्कें, राहङग्याल स्योरक्यो, ज्यी़ज्ये ल़ेहमु, या़हबु तामया़ला नाम्दो पेहकेन, 4 लेहमेन मिहया़ला गो़ कोर च्य़ूगे, याम-थेर्पु, छ्य़ेन्दो तेन्दी ङाहराङ यिहन माएँ, किन्ज्योकी छापला ङ्याहमसाङ-खाम्साङ पेहच्ये सेम्बा पेहकें, 5 खुङया़गी छ्य़ेसेम पेहचेनज्यी तेन्गे यिहॱनाङ ओ़हगी ओङया़लादी मा-लोक पेहकें। ओ़ह ल़ेहमु मिहया़ ङो़ले था़-रिहङबुराङ तेहतोङ। 6 च्यिबेमाना खुङया़ नाहङला लाहला खाङबा-खाङबाला स्य़ूहदी तिहक्पाला छ्यिक्यो दाङ तिहक्पागी ल़ेह पेहच्येला सेम्बा पेहकेन्गी मा-फाम्बु पी़हमी-पेहजाया़ला राहङगी ओङ चो़ला ज़्या़ज्ये येह। 7 ओ़ह पी़हमी-पेहजाया़गी लोप्च्येनी नाहम माॱनाङ लोप्तीॱराङ तेहकें यिहॱनाङ तेहन्दामकी येहन्देनला नाहम-आङ ओहङ मी़हखुएँ। 8 यान्नेस दाङ याम्ब्रेसगी मोशाला टाह पेहक्यो ल़ेहमुराङ, दि मिहया़गीॱआङ तेहन्दामकी स्याहलला टाह पेहकें। दि मिहया़गी नावा नोहङग्यो दाङ यिह-छ्य़े ची़हमा ओहङगे। 9 यिहॱनाङ खुङया़गी नाहम माॱनाङ दि ल़ेहमु पेहती तेह मी़हखुएँ च्यिबेमाना यान्नेस ताङ याम्ब्रेसदी ल़ेहमुराङ खुङगी उल्दुम्बा, मिह थाम्ज्यीगी क्यी़ह ज्योर्च्ये येह। पावलगी तिमोथीला का तेरक्यो 10 ता़हनी ख्येगी ङाहगी लुहङ, ङाहगी डोलु-तेहलु, ङाहगी मिहलीकी सेम्बाया़, ङाहगी यिह-छ्य़े, ङाहगी ना़स्यीङ छ्यिम्बु, ङाहगी चेवा, ङाह सेम थिर पेहती तेहक्यो थोङदी येह। 11 एन्टिओखिया, आइकोनियन दाङ लुस्त्रा लुहङबाला मिहया़गी ङाहला तुहक्पु तेरक्यो दाङ सताई-तिक्योगी तामया़ ख्येगी या़हबु ङोह स्य़ेदीॱराङ येहबा। यिहॱनाङ चो़वोगीॱराङ ङाहला ओ़ह थाम्ज्यी तुहक्पुया़ ङो़ले थार च्य़ू नाङसीन। 12 मास्यीका येशूला सेम तिहङ यिहन्ज्यु क्याप्ती राहङगी मिहजी या़हबु ताङज्ये छोल्गेनया़ तुहक्पुला छ्यिॱराङ छ्यिच्ये येह। 13 यिहॱनाङ मिह ङ्येहम्बाया़ दाङ ठाग तिएँया़गी लेहमेन मिहया़ला गो़ कोर च्य़ूज्ये येह ओहले खुङ राहङॱआङ गो़ ली़ज्ये येह ओहले खुङ जेन-जेन नोहङदी डोज्ये येह। 14 यिहॱनाङ ख्येगी लोप्क्यो दाङ निङ थाक्पा यिहन्ज्युराङ म़ेहबा पेहक्योकी दि तामया़ला क्याप्तीॱराङ तेहतोङ। 15 ख्येगी फेमा यिहन्ज्युराङ नाम्पार-ताहक्पा छ्य़ेगी स्याहलया़ ङोह स्य़ेदीॱराङ येहबा। दि स्याहलया़गी मास्यीका येशूला तेहपा पेहकेमु ज्योर्केन्गी थार्पाकी तेहन्दाला ङोह स्य़े ख़ूएँगी येहन्देन तेर्के। 16 दि थाम्ज्यी नाम्पार-ताहक्पा सुङराप किन्ज्योगी थु लाहमले नाङग्यो यिहम्बा, ओहले दि सुङराप मिहया़ला लोप्च्येला, लोप्ताम क्याहप्च्येला, च्ये़ज्येला, टाहङदेनकी लाहमला च्याहङदार पेह च्य़ूज्येला, ज्यिबुराङ फेन थोएँ यिहम्बा। 17 किन्ज्योकी मिहया़गी थाम्ज्यीराङ या़हबु ल़ेहया़ या़हबु पेहती ठीक-ठीक ङ्या़ह-ङ्या़ह पेहती पेह ख़ूज्यु म़ेदीराङ छ्य़े नाङग्यो यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.