२ तिमोथी 2 - ह्योल्मोयेशू मास्यीकाकी तेहन्दामकी माक्मी 1 ओ़ह सोङबे ख्ये, ए ङाहगी पुह, मास्यीका येशू थो़ला येहकेन्गी काटीनला सान्दी पेहती तेह। 2 पाङबु तेर्के माहङबुराङ मिहया़की दिनला ङाहगी ख्येला लोप्क्योकी तामया़ लेहमेन लोप ख़ूएँ दाङ यिह-छ्य़ेबु मिहया़ला चि क्याहप तेर। 3 मास्यीका येशूकी या़हबु माक्मीगी ल़ेहमुराङ पेहती ख्येगीॱआङ तुहक्पु खुर्तोङ। 4 माक्मीला बार्ती काहल्ग्योगी माक्मी लेहमेन तामया़ला याहङदी मेहतेहकें, च्यिबेमाना खोला बार्ती पेह तेर्केन मिहला क़ेहनाङ लाहङ च्य़ूज्ये खोगी सेम्बा ओहङगे। 5 चेमु चेएँ ग्या़ला ठिमला ते़बेकी चेमु मे़हचेसीमाना का़हन्दीॱआङ चेमु चेएँ मिहगी च्याहगा ज्योर मी़हखुएँ। 6 कादुप च्येती स्यिहङ ल़ेह पेहकेन मिहगी कामे क्याहप्क्योगी तोहङस्यो बो ज्योरॱटाङ कोहएँ। 7 ङाहगी च्यि माएँ ओ़ह या़हबु नोम्साङ ताङदोङ, च्यिबेमाना ताम ऱेह-ऱेहला ख्येला चो़वोगी ङोह स्य़े ख़ूएँगी रिहक्स्यी नाङज्ये येह। 8 टोहङग्योया़लेगी सोम्बो ज़्याङ नाङग्योकी क्याहल्बु दाऊदकी क्यी़ह येशू मास्यीकाला टेहम्बा साल्दोङ, ङाहगी प्रा साल्ग्योगी या़हबु लेहङगु दिराङ यिहम्बा। 9 ओ़ह या़हबु लेहङगु मिहया़ला स्य़ेक्यो सोङबे ङाहगी तुहक्पु खुर कोहक्यो यिहम्बा। ओहजे च्यी़राङ मिहम्बा, मिह नाहग-च्येनला ल़ेहमुराङ पेहती च्याल्दागी ताहम्दी चोन-खाङला तेह के़हदी येहबा। यिहॱनाङ किन्ज्योगी लुहङनी च्याल्दागी ताहम्दी ज़्या़ मी़हखुएँ 10 ओ़ह सोङबे किन्ज्योगी दाम नाङग्योकी मिहया़गी तेहन्दाला ङाह च्यि स़ेह माना ना़गे, ओ़हगी पेहती खुङया़गीॱआङ था़ म़ेहबा ज़िज्यिद ङ्याम्बु मास्यीका येशू थो़ला येहकेन्गी थार्पा ज्योर ख़ूज्यु। 11 दि स्याहल तेहम्बा-तेहन्सुम यिहम्बा, “का़हलेॱआङ ओहराङ मिहरो ङ्याम्बु स्यिक्यो येहसीमाना, ओहराङॱआङ मिहरो ङ्याम्बुराङ सोम्बो लो़हज्ये येह, 12 ओहराङगी ना़सीन माना, ओहराङगीॱआङ मिहरो ङ्याम्बु ओङ छ्य़ेज्ये येह, ओहराङगी मिहरोला मा-लोक पेहसीनमाना, मिहरोगीॱआङ ओहराङला मा-लोक जे नाङज्ये येह, 13 ओहराङ यिह-छ्य़ेबु मे़हॱनाङ मिहरोनी यिह-छ्य़ेबु ज़्य़ू नाङदी येह, च्यिबेमाना मिहरोगी राहङला मा-लोक जे नाङ मी़हखुएँ।” ना ङ्यी़गी लोबेनया़ 14 दि ताम खुङया़ला टेहम्बा साल च्य़ू तेर, ओहले चो़वोकी दिनला का तेर, च्यिबेमाना खुङया़गी ताम-छिकाया़की तेहन्दाला स्येपा माहतुहर्च्यु, ओ़हगी च्यिॱआङ फेन्दोप मेहयोहङगे, यिहॱनाङ ओ़हगीनी ङ्यिहन्गे मिहया़ला ऩे च्यी़राङ क्याल्गे। 15 तेहन्दामकी लुहङला या़हबु पेहती चा़लतिएँकी ल़ेहमीया़ ल़ेहमुराङ किन्ज्योला थु ङ्य़ेबु पेहती मिहरोगी दिनला मिहरोगी स्याहल माज्येला नाहम-माना ठाबे पेहती तेहतोङ। दि ल़ेहमु पेहती ख्ये ङोहजाला छ्यि-माहकोहज्यु। 16 जाम्बुलीङकी तेहन्दा म़ेहबा दाङ कोह मे़हछ्येएँगी तामया़लेगी था़-रिहङबुराङ तेह, च्यिबेमाना दिगीनी मिहया़ला किन्ज्यो यिहन्ज्यु जेन माहङबु था़-रिहङबु ख्येर्के। 17 ओ़ह ल़ेहमु केच्याया़नी साइनगी स्योवा फेल्दी डोएँ ल़ेहमुराङ ओहङगे। खुङया़ नाहङला हुमेनियस दाङ फिलेतस यिहम्बा। 18 स्यिदीले सोम्बो लो़हगेन्गी ताम तोहङलेराङ काहल सिहन्सीन म़ेदी खुङया़गी तेहन्दामकी लाहमला क्युर्ती येह। काहजे मिहया़गी तेहपाला खुङया़गी गो़ कोर च्य़ूगेनॱराङ येह। 19 यिहॱनाङ, किन्ज्यो राहङगी तिङ नाङग्योकी मिहरोकी ब्राम नाहम-माना सान्दीॱराङ ओहङज्ये येह। ओ़ह ब्रामला दि ल़ेहमु सुङदी पार क्याहप नाङदी येह, “चो़वोगी राहङगी क्यिपाया़ला ङोह ख्येन नाङगे,” ओहले “चो़वोकी छेन लेहन्गेया़गी ना थाम्ज्यीगी ल़ेह चोक्पाया़ ङो़ले था़-रिहङबुराङ तेहच्यु।” 20 खाङबा छ्यिम्बुला सेर दाङ ङुलकी नेक्यीया़ च्यी़राङ मेहयोहङगे, यिहॱनाङ स्यिङ दाङ सासाकी ज़ोक्योगी निक्यीया़ॱआङ ओहङगे। ओहले लाहला नेक्यीया़ चा़ छ्यिम्बु ल़ेहया़गी तेहन्दाला चा़लतिएँमाना लाहला नेक्यीया़दी फेमा-फेमा ल़ेहया़गी तेहन्दाला चा़ल्ती़एँ। 21 पे-मी़हसिहएँगी तामया़ ङो़ले मिहगी राहङगी राहङला चाङमा ज़ोसीन माना खो या़हबु ल़ेहया़की तेहन्दाला पे-सी़हएँगी मिह च्यी़ डो ख़ूज्ये येह, ओहले खाङबा ताहक्पुकी तेहन्दाला चाङमा, फेन्दोप दाङ या़हबु ल़ेहया़ च्यिला-माना ठाबे टी़हज्ये येह। 22 ओ़ह सोङबे स्योहम्बो येहकें काहङला ओहराङ सेमला ओहङगेन्गी चोक्पा-चोक्पा सेम्बाया़ला क्युर्तोङ, ओहले सेम चाङमागी चो़वोगी छेन लेहन्गेया़ ङ्याम्बु-ङ्याम्बुराङ टाहङदेन, यिह-छ्य़े, चेवा दाङ स्य़िहदेकी लाहमला डोएँगी सेम्बाया़ थो़दोङ। 23 यिहॱनाङ उल्दुम्बा दाङ गो़ रिङ म़ेहबाकी तामया़ला मा-लोक पेहतोङ– ख्येला क्यी़हराङ येह दिगी ठू़स्यीया़ च्यी़राङ ख्योङगे। 24 चो़वोला स्याहप्तो स्युहएँ मिहनी जिङज्ये मेहयोहङगे, खो मिह थाम्ज्यीला निङज्यी पेहकेन, लोप ख़ूएँ ओहले ना थाम्ज्यीला ना़स्यीङ छ्यिम्बु पेह ख़ूएँदी ओहङ कोहकें। 25 ओहले टाह पेहकेनया़ला खोगी स्यिहवा पेहती या़हबु लाहमला ॱठि ख़ूएँदी ओहङ कोहकें। ओ़हठी यिहन्सीमाना च्यी़राङ किन्ज्योगी खुङया़ला स्या़बा पेहकेन दाङ तेहन्दामकी स्याहल ङोह स्य़े ख़ूएँगी सेम नाङज्ये येह, 26 ओहले खुङगी नावा खा फे़ फान्ज्यो दियाबलसकी मिताले स्योर्च्ये येह, च्यिबेमाना खुङया़ला ती़ह गो-छ्येवागी राहङगी सेमला ने़जेबा पेहच्येला ज़ुङदी ज़्या़क्यो येहबा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.