२ तिमोथी 1 - ह्योल्मो1 किन्ज्योगी थुगी जेती मास्यीका येशू ङ्याम्बु येहकेन्गी मिहलीगी ताहम्ज्यागी तेहन्दाला स्येच्येला ङाह पावल मास्यीका येशूकी ल़ेह-पेन काहल्ग्यो यिहम्बा। 2 ङाहगी च्याहम्बु पुह तिमोथीला दि यिहगी प्रुहएँॱराङ येहबा। किन्ज्यो याहप दाङ ओहराङगी चो़वो येशू मास्यीकागी ख्येला काटीन, थुज्यी दाङ स्य़िहदे नाङज्यु। यिह-छ्य़ेबु ओहङदीराङ तेहच्येगी तेहन्दाला स्युक क्ये-च्युक्यो 3 दार-च्यी़राङ ङाह राहङगी सोल्वाङया़ला ख्येला टेहम्बा साल्दी किन्ज्योला थुज्यी-छ्ये़ फुल्गो येह। ओहले ओ़ह किन्ज्योलाॱराङ ङाहगी आख्ये मे़हमेया़गी काह-ठि पेहती स्याहप्तो स्युह नाङबा ओ़हठीॱराङ पेहती ङाहॱआङ नावा चाङमा थो़दी स्याहप्तो स्युहउ येह। 4 ख्येती मिज्युला टेहङगेमु ङ्यिहन-नुहप ख्येला थू़ज्ये सेम क्येदी ओहङगे। ख्येला थ़ू ङ्युहङसीमाना ङाह काहजे क़ेहनाङ लाहङज्ये येहकें। 5 ख्येती तेहन्दामकी तेहपा ङाहला क्यी़ह येह। ओ़ह तेहपा तोहङले ख्येती यिबी लोइस दाङ आमा युनियस ङ्याम्बुॱआङ येहकें, ओहले ओ़ह ल़ेहमु तेहपा तोहरोङॱआङ ख्ये ङ्याम्बु येहबा म़ेदी ङाहला तेहम्बा-तेहन्सुमॱराङ क्यी़ह येहबा। 6 ओ़ह सोङबे ङाह ख्येला तोहङमागी तामया़ टेहम्बा साल च्य़ूगेनॱराङ माउ येह, ङाहगी ख्ये थो़ला लाहक्पा ज़्या़गेमु किन्ज्योगी नाङग्योकी काबापला ख्येगी मेह ल़ेहमुराङ पेहती ती़हदी तेह च्य़ूदोङ। 7 च्यिबेमाना किन्ज्योगी ओहराङला ज्यी़सुगी सेम मिहम्बा यिहॱनाङ ओङ, चेवा दाङ राहङला थिला ज़्या़गेन्गी सेम नाङदी येहबा। 8 ओ़ह सोङबे ओहराङगी चो़वोकी पाङबु तेहच्ये दाङ ङाह चोन-खाङला छ्यिक्योगी तेहन्दाला ख्ये ङोहजा माहबे! बरु ख्येगीॱआङ किन्ज्योकी ओङकी पेहती या़हबु लेहङगु स्येच्येला तुहक्पु खुर्तोङ। 9 किन्ज्योगी ओहराङला थार च्य़ू नाङसीन, ओहले नाम्पार-ताहक्पा मिहलीगी तेहन्दाला क़े क्याहप नाङसीन। ओहराङगी पेहक्योगी ल़ेहला ज़ी़दी मिहम्बा यिहॱनाङ किन्ज्यो राहङगी थु दाङ काटीन लाहमले जे नाङग्यो यिहम्बा। जाम्बुलीङ छ्या़गे म़ेदी तोहङलेराङ ओहराङला मास्यीका येशूगी दि काटीन नाङग्यो यिहम्बा। 10 ओ़ह काटीन ता़ह ओहराङला थार्पा नाङगेन मास्यीका येशू फेप्तीलेॱआङ तेन नाङ सिहन्दी येह। मिहरोगी स्यिएँगी ओङला तोङ च्य़ू नाङदी मिहली दाङ नाहमॱआङ मे़ह-तोङगेन्दीला या़हबु लेहङगु लाहमले तेन नाङसीन। 11 ओ़ह या़हबु लेहङगु स्येच्येलाॱराङ किन्ज्योगी ङाहला या़हबु लेहङगु स्येकेन्गी मिह, ल़ेह-पेन दाङ लोबेन ज़ो नाङसीन। 12 ओ़ह सोङबे ङाह दि से़हया़ला तुहक्पु खुर्केॱराङ येहबा। यिहॱनाङ ङाहला दिगी तेहन्दाला च्यिॱआङ ङोहजा मेहयोहङगे च्यिबेमाना ङाहगी सु थो़ला म़ेहबा पेहक्यो येहबा ओ़ह ङाहला या़हबु पेहती क्यी़ह येहबा। किन्ज्योगी ङाहला चि क्याहप नाङग्योकी से़हया़ मिहरोगीॱराङ ओ़ह ङ्यिहमा थु सी़दे ज़्या़ नाङज्ये येह। दि तामला ङाह म़ेहबा पेहकें। 13 मास्यीका येशू थो़ला येहकेन्गी तेहपा दाङ चेवा ख्येगी ङाह ङो़ले थे़क्योगी तेहन्दामकी तामया़गी पे त़ेदी लोप्तोङ। 14 ख्येला चि क्याहप्क्योगी तेहन्दामकी तामया़ ओहराङ नाहङला ज़्य़ू नाङगेन नाम्पार-ताहक्पा थु लाहमले सी़दे ज़्या़दोङ। 15 एशियाले ओहङग्योकी किन्ज्योला यिह छ्य़ेक्यो मिह थाम्ज्यीगी ङाहला गो़ कोर्ती क्युर ज़्या़दी काहल्सीन। ओ़ह केच्याया़नी ख्येला क्यी़हराङ येह। खुङया़ नाहङला फुगेलस दाङ हर्मोगेनस यिहन 16 चो़वोगी ओनेसिफरसकी खाङबा मे़हमेया़ला थुज्यी ज़ी़-नाङज्यु, च्यिबेमाना खोगी ङाहला ज्यिबुराङ स्युक क्ये-च्युउ येहकें, ओहले ङाह चोन-खाङला छ्यिकेमुॱआङ खोगी ङोहजा माहबे। 17 खो रोम क्याहल-खापला ओहङ फान्ज्यो खोगी ङाहला छोल-छोल्बा काहङला च्य़ेह सिहन्सीन। 18 चो़वोकी ओ़ह ङ्यिहमाला खोला थुज्यी ज़ी़-नाङज्यु। ख्येला या़हबु पेहती क्यी़हराङ येह, एफिससला खोगी राहङगी निङ थाक्पा यिहन्ज्युराङ ङाहला स्याहप्तो स्युहक्यो येहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.