२ थेसलोनिकी 3 - ह्योल्मोसोल्वाङगी तेहन्दाला ओहर-छ्य़े स्युहक्यो 1 ज्युक्स्योलला आदा-नो़ह दाङ आज्यी-नुहमुया़, ङ्यिहगी तेहन्दाला सोल्वाङ ताप तेर, दि ल़ेहमु पेहसीनमाना ख्या फे़बे मे़हमेया़गी पाहरक्यीला काहल्ग्यो ल़ेहमुराङ चो़वोकी सुङ ग्यो़बाराङ फेल्दी दिला माहङबुराङ चा़ छ्यिम्बु ओहङज्ये येह। 2 ओहले मिह थाम्ज्यीगी यिह-छ्य़े मेहबेएँ सोङबे चोक्पा मिहया़ दाङ मिह ङ्येहन्दाया़ ङो़ले किन्ज्योगी ओहराङला थार च्य़ू नाङज्ये येह। 3 च्यिबेमाना चो़वो यिह-छ्य़ेबु यिहन्गे सोङबेॱराङ ख्या फ़ेबे-म़ेहमेया़ला मिहरोगी सान्दी ज़ो नाङज्ये येह ओहले ती़ह गो-छ्येवा लाहमले थार च्य़ू नाङज्ये येह। 4 ङ्यिहगी च्यि माएँ ओ़ह राहङ फ़ेबे-म़ेहमेया़गी जे नाङगेराङ येह ओहले जे नाङज्येॱआङ येह म़ेदी ङ्यिहगी ख्या फे़बे मे़हमेया़गी तेहन्दाला चो़वो थो़ला तेहपा पेहती येहबा। 5 चो़वोगी ख्या फ़ेबे-म़ेहमेया़गी सेमला किन्ज्योगी चेवा दाङ मास्यीकाकी ना ख़ूएँगी ओङ ङो़ले ठि-नाङज्यु। मिह थाम्ज्यीगी ल़ेह पेहॱराङ कोहएँ 6 आदा-नो़ह दाङ आज्यी-नुहमुया़, चो़वो येशू मास्यीकागी छेनला ङ्यिह ख्या फ़ेबे-म़ेहमेया़ला का तेर्के। ङ्यिहगी तेरक्योगी लुहङला मी़हचीएँ दाङ ल़ेहमी-लाहमया़ ङो़ले ख्या फ़ेबे-म़ेहमेॱया था़-रिहङबुराङ ज़्य़ू नाङदोङ। 7 च्यिबेमाना ख्या फे़बे मे़हमेया़गी काह-ठि पेहती ङ्यिहगी पे ता कोहएँ म़ेदी नि राहङ फ़ेबे-म़ेहमेया़ला थुयी़राङ येह। ङ्यिह ख्या फ़ेबे-म़ेहमेॱया ङ्याम्बु तेहकेमु ङ्यिहगी ल़ेहमी-लाहम माहबे। 8 ङ्यिहगी सुज्यीदीॱआङ आहन्डाराङ खुरा मा़हसेह। यिहॱनाङ ख्या फ़ेबे-म़ेहमेया़ला तुहक्पु माहयोङज्यु म़ेदी ङ्यिहगी ङ्यिहन-नुहपराङ कादुप च्येती ल़ेह पेहसीन। 9 रो़हराम ज्योर्च्येला ङ्यिहती ओङ म़ेहबा सोङबे मिहम्बा, यिहॱनाङ ङ्यिहगी डोलु-तेहलु ख्याया़गी तेहन्दाला पे च्यी़ ओहङ ख़ूज्यु म़ेदी ङ्यिहगी ओ़ह ल़ेहमु पेहसीन। 10 ख्या फ़ेबे-म़ेहमेॱया ङ्याम्बु तेहकेमु ङ्यिहगी दि का तेरक्यो येहकें “ल़ेह मेहबेकेंया़गी तोॱआङ माहसाहज्यु।” 11 च्यिबेमाना ख्या फ़ेबे-म़ेहमेॱया नाहङॱलाङ लाहला ल़ेहमी-लाहम पेहती तेहकेया़ॱआङ येहबा लो। ओहले राहङदी च्यिॱआङ ल़ेहया़ मेहबेकें यिहॱनाङ लेहमेनकी ल़ेहला मानादी स्यिती काम्बुला लाहक्पा क्याहप्ती डोएँ मिहया़ॱआङ येहबा लो म़ेदी ङ्यिहगी थ़ेसीन। 12 ता़ह ओ़ह ल़ेहमु मिहया़ला चो़वो येशू मास्यीकाकी छेनला ङ्यिह लोप्ताम क्याहप्ती दि ल़ेहमु का तेर्को येह खुङया़गी राहङ-राहङगी ल़ेहया़ खाजुम पेहती पेहच्यु ओहले राहङदीराङ लाहक्पागी कामे साहज्यु। 13 आदा-नो़ह दाङ आज्यी-नुहमुया़, ख्या या़हबु ल़ेह पेहच्येला नाहम-आङ थाङ मा़हछ्ये। 14 दि यिहगीला ङ्यिहगी माक्योकी तामया़ का़हलेॱआङ सुज्यीगीॱआङ मिहङ्यीहन्सीमाना ओ़ह ल़ेहमु मिहया़ला या़हबु पेहती ङोहस्यी ताङ ज़्यो़ ओहले ओ़ह ल़ेहमु मिहया़ ङ्याम्बु च्यामॱराङ माहच्याम। ओ़हठी पेहसीमाना खो राहङराङ ङोह छाज्ये येह। 15 यिहॱनाङ ओ़ह ल़ेहमुया़ला टाहला ल़ेहमु माहबे खुङला राहङदीराङ नो़हला ल़ेहमु पेहती ज्यी़-ङोर तेर। थेसलोनिकीया़ला यिहगी लाहमले कोहङबा नाङग्यो 16 स्य़िहदेगी चो़वो राहङगीराङ नाहम माॱनाङ ना थाम्ज्यीले ख्या फ़ेबे-म़ेहमेया़ला स्य़िहदे नाङज्यु। चो़वो ख्या थाम्ज्यी ङ्याम्बु ज्यू़-नाङज्यु। 17 ङाह पावल, राहङ लाहक्पागीॱराङ दि टास्यी-देले प्रुहएँॱराङ येहबा। ङाहती थाम्ज्यीराङ यिहगीया़की ताक्छेन दिराङ यिहम्बा। ओ़ह ल़ेहमुराङ पेहती ङाह प्रुहएँॱराङ येहबा। 18 ओहराङ चो़वो येशू मास्यीकाकी काटीन ख्या फे़बे-मे़हमे थाम्ज्यी ङ्याम्बु ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.