२ पत्रुस 3 - ह्योल्मोचो़वोकी ङ्यिहमा 1 ए ङाहगी च्याहम्बु रो़हया़, ख्याया़ला प्रुहक्योगी दि ङाहगी यिहगी ङ्यिपु यिहम्बा, ओहले दि यिहगी ङ्यिकालाराङ काहजे तामया़ टेहम्बा साल च्य़ूदी ख्याया़की सेम चाङमाला स्युक क़े च्य़ूज्ये छोल्दी येहबा। 2 काहल्ग्यो ती़हजीला नाम्पार-ताहक्पा लुहङतेम्बाया़गी नाङग्योकी लुहङ दाङ ख्या फे़बेया़की ल़ेह-पेनया़गी सुङ नाङग्योकी ओहराङ चो़वो दाङ थार्पा नाङगे मास्यीकाकी काया़ ख्याया़गी टेहम्बा साल कोहएँ। 3 थाम्ज्यी म़ेदी तोहङले ख्याया़गी दि तामया़ ङोह स्य़े कोहएँ, तिङमागी ङ्यिहमाया़ला राहङगी सेमला ने़जेबाकी चोक्पा लाहमया़ला स्य़ूहदी डोएँकी मिहया़ थेन्दी ओहङज्ये येह, ओहले खुङया़गी ख्याया़ला स्ये़हन्डील पेहकेनॱराङ दि ल़ेहमु माज्ये येह, 4 “च्यि मास्यीकागी ओहङगे म़ेदी ताहम्ज्या ज़्या़क्यो मिहम्बा ले! ओहराङगी चावाया़ स्यिदी काहल्सीन, यिहॱनाङ जाम्बुलीङ छ्या़ले यिहन्ज्यु ओहङग्योगी ठिमया़नी आहन्डाराङ दु!” 5 खुङया़गी ङोह स्य़ेदीॱआङ दि तामया़ ङोहॱराङ मा़हस्येबा ल़ेहमु पेहकें। किन्ज्योगी राहङकी सुङ लाहमलेॱराङ स्यिहङगाम दाङ जाम्बुलीङ छ्या़ नाङसीन। जाम्बुलीङ छ्यु लाहमले ओहले छ्यु लाहमलेॱराङ छ्या़सीन। 6 ओहले ओ़ह छ्यु लाहमलेॱराङ ओ़ह ती़हजीकी जाम्बुलीङ किन्ज्योगी नाम छ्याटा स्योलो ताङ नाङदी नुप्ती तोङ च्य़ू नाङग्यो येहकें। 7 यिहॱनाङ ओ़ह सुङगीॱराङ किन्ज्योला मे़हक्याप्के मिहया़ला ठिम ताङ नाङज्येला तोङ च्य़ू नाङगेन्गी ङ्यिहमा थु ताहन्दाकी नाम दाङ जाम्बुलीङगी मेहकी तेहन्दाला सी़दे ज़्या़ नाङदी येह। 8 यिहॱनाङ च्याहम्बु रो़हया़, दि ताम टेहम्बा माहच्येह। चो़वोकी दिनला लोह तोङरा च्यी़ माक्योदी ङ्यिहमा च्यी़ ल़ेहमुराङ यिहम्बा ओहले ङ्यिहमा च्यी़ माक्योदी लोह तोङरा च्यी़ ल़ेहमुराङ यिहम्बा। 9 राहङ ताहम्ज्याकी तेहन्दाला चो़वोगी फिमु जे नाङगे म़ेदी लाहला मिहया़गी माॱनाङ मिहरोगी फिमु जे नाङग्यो म़ेह। यिहॱनाङ ख्या नाहङला सुज्यीॱआङ माहतोङज्यु, यिहॱनाङ ख्या थाम्ज्यीगी सेमकी स्या़बा पेहच्यु सुङदी चो़वो ख्याया़गी तेहन्दाला कू़हदे ज़्य़ू नाङदी येहबा। 10 यिहॱनाङ चो़वोगी ठिम ताङ नाङगे ङ्यिहमानी याहङमे-याहङ कुमेन ल़ेहमुराङ पेहती ओहङज्ये येह। ओहजे काहङला नाम दिङडा तेन्दी चो़हज्ये येह। ङ्यिहमा, दायुम दाङ कार्माया़ थाम्ज्यीराङ मेह-टे़हगी स्य़ूहज्ये येह। जाम्बुलीङ दाङ जाम्बुलीङला येहकेन्गी ना थाम्ज्यी से़हया़ छी़दी तोङज्ये येह। 11 दि थाम्ज्यी किन्ज्योगी तोङ च्य़ू नाङगे सुङबे नाम्पार-ताहक्पा दाङ टाहङदेनकी मिहजी ताङ कोहएँ। 12 किन्ज्योगी ठिम ताङ नाङगे ङ्यिहमाकी लाहम ख्याया़गी क़ूह तेहती येह, ओहले ख्यागी ओ़ह ङ्यिहमाला पोहला ख्योङज्ये छोल्दी येह, ओ़ह ती़हजीला नामया़ छी़दे तोङदी डोज्ये येह ओहले नामला येहकेन्गी थाम्ज्यीराङ से़हया़ मेह-टे़हगी स्य़ूहज्ये येह। 13 यिहॱनाङ ओहराङ किन्ज्योगी ज़्या़ नाङग्योकी ताहम्ज्या साम्बा जाम्बुलीङ दाङ साम्बा स्यिहङगामकी लाहम कू़हदे तेहकें। ओ़ह ग्या़ला मिह टाहङबुया़ च्यी़राङ ओहङज्ये येह। 14 ओ़ह सोङबे ए च्याहम्बु रो़हया़, ख्या दि तामया़ला कू़हदी तेहकेन्गी मिहया़ यिहन्गे सोङबे, किन्ज्योगी ज़ी़लुला राहङ चाङमा पेहती, च्यिॱआङ क्येन म़ेहबा पेहती ओहले स्य़िहदे पेहती तेहच्येला ला़ खाजे स्युक पेहतोङ। 15 चो़वोगी ख्येला तिहक्पालेगी थार्केन्गी लोहङ नाङगेमु मिहरोगी काहजे ना़स्यीङ छ्यिम्बु जे नाङबा ओ़ह टेहम्बा सोल। ओहराङगी ज्यिबुराङ च्याहम्बु नो़ह पावलगीॱआङ किन्ज्यो लाहमले ज्योरक्योकी रिहक्स्यी लाहमलेॱराङ दि थाम्ज्यी ख्याया़ला प्रुहक्यो येहकें। 16 दिगी तेहन्दाला खोगी दि ल़ेहमुराङ तामया़ राहङगी यिहगीया़ला प्री़हदी येहकें। खोगी प्रुहक्योगी लाहला तामया़ ङोह स्य़ेज्येला याहम्बीज्यी खेन्दा-का़हबु येहबा, ओहले मे़हस्येगे मिहया़ दाङ राहङगी सेम टिहला मे़हज्याएँ मिहया़गी दि तामया़ला लेहमेन छ्य़ेया़ला ल़ेहमु फार्च्या-फिर्च्या ज़ोएँ। दि ल़ेहमु पेहती खुङ राहङगी राहङला ङ्य़ेहबा फो़ च्य़ूगे। 17 ओ़ह सोङबे ए च्याहम्बु रो़हया़, तोहङलेराङ दि तामया़ ङोह स्य़ेदी जेम्बु पेहती तेह, ओ़ह ल़ेहमु पेहती तेहसीन माना मिह ङ्येहम्बाया़गी गो़ ली ख़ूज्ये म़ेह ओहले ख्या सान्दी पेहती दोम्बा पा़क्योगी ग्या़ले रिहल्ज्ये म़ेह। 18 यिहॱनाङ ओहराङ चो़वो दाङ थार्पा नाङगेन येशू मास्यीकाकी काटीन दाङ येहन्देनला याहरक्यी पेहती सोङ। मिह-रो़हलाॱराङ ताहन्दा दाङ नाहम-माना ज़िज्यिद ओहङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.