२ पत्रुस 2 - ह्योल्मोचिहन क्याहप्केन्गी लोबेनया़ 1 ताहङबो इस्राएली मिहया़की पाहरक्यीला चिहन क्याहप्केन्गी लुहङतेम्बाया़ येहकें ल़ेहमुराङ, ताहन्दा ख्याया़गी पाहरक्यीलाॱआङ चिहन क्याहप्ती लुहङ तेर्केन्गी लोबेनया़ थेन्दी ओहङज्ये येह। खुङया़गी नाहङदा नाहङ क्यी़हराङ माहन्ज्योर्पा पेहती तोङदी डो च्य़ूगेन्गी ची़हमा लुहङया़ ख्योङज्ये येह, ओहले खुङया़गी थार्पा नाङगेन्गी चो़वोलाॱआङ मा-लोक पेहच्ये येह। दि ल़ेहमु पेहती खुङ याहङमे-याहङ तोङदी डोज्ये येह। 2 मिह माहङबुराङ खुङया़गी पे मी़हसीहएँगी लाहमया़ला स्य़ूहज्ये येह ओहले खुङगी पेहती तेहन्दामकी लाहमती आब्रु डोज्ये येह। 3 ह्अम्बाला छ्यिती खुङया़गी माहताक्पाकी तामया़ जे़दी ख्या लाहमले खेप्साङ लेहन्ज्ये येह। खुङया़ला ङ्य़ेहबा काल्गेन्गी ताम तोहङलेराङ आप्ता च्ये सिहन्दी येह, ओ़ह सोङबे खुङया़ला ङ्य़ेहबा नाङगेन्गी किन्ज्यो ज़िम माहनाङबा जेती ज़्याङदीॱराङ ज़्य़ू नाङदी येह। 4 स्यिहङगामकी स्याहप्च्यीया़गी तिहक्पा पेहकेमु किन्ज्योगी खुङया़ला ल़े ताङ माहनाङ, यिहॱनाङ खुङया़ला ङ्याल्वाला क्युर चाहङ नाङसीन, ओहले ठिम ताङ नाङगे ङ्यिहमा थु साप्स्यी तिहङकी ना़-जुबेला ताहम्दी ज़्या़ नाङदी येहबा। 5 नोआगी ती़हजीला जाम्बुलीङला तेहकेन्गी मिह तिहक्च्येम्बाया़ॱलाङ किन्ज्योगी ल़े ताङ माहनाङ। नाम छ्याटागी स्योलो ताङदी किन्ज्योगी खुङला सिहन्दा च्ये नाङसीन यिहॱनाङ मिहया़ला टाहङदेनकी मिहजी ताङ कोहएँ म़ेदी लोप्ताम क्याहप्केन्गी नोआ दाङ खोगी खाङबा मे़हमेया़ मेहन्दा तिहनला च्यी़राङ थार च्य़ू नाङसीन। 6 किन्ज्योगी सदोम दाङ गमोरा क्याहसाला मेह ताङदे तोङ च्य़ू नाङसीन ओहले ओ़ह ग्या़गी स्यी़हॱराङ तोङ च्य़ू नाङसीन, दि ल़ेहमु जेती किन्ज्योला मे़हक्याप्के मिहया़गी गादी काहन्डुमु ओहङगु दुबा म़ेदी खुङया़ला पे च्यी़ तेन नाङसीन। 7 डोलु-तेहलु टाहङबु पेहकेन्गी लोतला किन्ज्योगी थार च्य़ू नाङसीन। ओ़ह ती़हजीला मिह ङ्येहम्बाया़गी पेहक्योगी नाम्दो लाहङज्ये ल़ेहमु ल़ेहया़ थोङदी खो ज्यिबुराङ सेम नाहक्यो येहकें। 8 (ओहले खो ओ़ह ल़ेहमु मिहया़गी पाहरक्यीला तेहकेमु, ओहले ङ्यिहमा-टाहङमाराङ खुङया़गी पेहक्योगी ल़ेह चोक्पाया़ थोङगेमु ओहले थे़गेमु, खो राहङगी टाहङबु सेम ज्यिबुराङ छाबा-छुबे काहल्सीन।) 9 दि ल़ेहमु जेती टाहङबु मिहला ङ्याहम्छेलेगी थार च्य़ूज्ये दाङ तिहक्च्येम्बा मिहया़ला ठिम ताङ नाङगे ङ्यिहमा थु सी़दे ज़्या़ नाङज्येला चो़वोगी ङोह ख्येन्गे। 10 खास पेहती किन्ज्योकी ओङला ङ्येन्ज्येन पेहकेन दाङ पे मी़हसीहएँगी ल़ेहया़ पेहती राहङग्याल स्योर्ती डोएँया़ला ठिम ताङ नाङगे ङ्यिहमा थु सी़दे ज़्या़ नाङज्ये येह। दि ल़ेहमु ची़हमा लुहङ तेर्के मिहया़ ङ्यिहनॱराङ मिहङ्यीहन्गे दाङ छ्य़ेन्दो तेन्गेया़ ओहङगे ओहले खुङया़गी स्यिहङगामला येहकेया़लाॱआङ स्याहम्डेन केन्ज्येला मी़हन्ज्यीएँ। 11 स्यिहङगामकी स्याहप्च्यीया़ माहङबुराङ स्युक छ्यिम्बु दाङ ओङज्या छ्यिम्बु येहबा, यिहन्दी सुङनाङ खुङया़गी चो़वोकी दिनला ओ़ह स्यिहङगामला येहकेनया़ला फेमा जे़दी क्येन मे़हता़गे। 12 यिहॱनाङ दि मिहया़ पेहताङ चोक्पागी ल़ेहया़ पेहकें। खुङया़नी ज़ुङदी से कोहकेन्की रिहदाया़ ल़ेहमुराङ ओहङगे। खुङया़गी ङोहॱराङ मा़हस्येबाकी तामया़ला स्याहम्डेन तेन्गे। ओ़ह सोङबे खुङॱआङ रिहदाया़ ल़ेहमुराङ पेहती तोङज्ये येह। 13 खुङया़गी लेहमेन मिहया़ला तुहक्पु तेरक्यो सोङबे खुङ राहङगीॱआङ तुहक्पु खुर कोहच्ये येह। ओहले ङ्यिहमालाराङ राहङ सेमला ने़जेबा खाम्साङ-ङ्याहम्साङ पेहती डोएँदीॱराङ क़ेहनाङगी स़ेह यिहम्बा म़ेदी खुङगी नोम्साङ ताङगे। खुङ ङ्याम्बु छो़दी साहएँ थुङगेन्दीॱराङ ख्याया़गी तेहन्दाला ङोह छाएँ दाङ स्याहम्डेन तेन्गेन्गी ताम यिहम्बा। खुङ नाहम्माॱनाङ मिहया़ला चिहन क्याहप्ती से़हदी, थुङदी, खाम्साङ-ङ्याहम्साङ च्यी़राङ पेहच्ये सेम्बा पेहकें। 14 खुङया़गी मी़ छ्येउ-छ्येंमुकी काहङग्यो ओहङगे, ओहले काहजे लाहयो-तिहक्पाया़ पेहॱनाङ खुङया़ला मेहन्दाङगे। सेम थिला म़ेहबाकी मिहया़ला खुङया़गी छ्यि च्य़ूगें। खुङया़की सेमगी ह्अम्बा पेहच्येलाॱराङ बा़नी काहल्सीहन्ग्यो ओहङगे। खुङया़ॱराङ किन्ज्योकी मे़मु सू़हक्यो मिहया़ यिहम्बा। 15 खुङ थेक्का लाहमया़ क्युर्ती लाहम चोक्पाया़ला स्य़ूहदी येह। खुङ बओरकी पुह बालामकी लाहमला स्य़ूहदी येह। बालामगीदी टाहङदेन म़ेहबा ल़ेहगी ल़ेगाला च्याहम्बा पेहको येहकें। 16 दि तिहक्पाकी पेहती खोगी बार्ता साह कोहसीन। ताम मा मी़हखुएँ पुहङगुगी मिहगी ल़ेहमुराङ ताम म़ेदी ओ़ह उल्दुम्बाकी ल़ेहला क़ूहसीन। 17 ओ़ह ल़ेहमु मिहया़नी काम्ग्योकी छ्यु क्येज्युया़ ल़ेहमु यिहम्बा। खुङ ल्हा़बा लुङजीया़गी क्या़दी ख्येर्केन्गी नाम मेहक्याहप्केन्गी मुक्पाया़ ल़ेहमुराङ यिहम्बा। खुङया़गी तेहन्दाला साप्स्यी तिहङकी ना़-जुबे सी़दे ज़्या़दी येहबा। 18 खुङ छ्य़ेन्दो छ्यिम्बु तेन्दी फेन मे़हथोएँगी तामया़ माएँ, ओहले थेरेरे चोक्पा लाहमले स्योर्ती ओहङग्यो मिहया़ला ज़ुबुकी खाम्साङबुकी तेहन्दाला पे मी़हसीहएँगी ल़ेहया़ तेन्दी छ्यि च्य़ूगे। 19 खुङया़गी ख्याया़ला ना थाम्ज्यीगी पे-ठिमया़लेगी खा फे़ तेर्के म़ेदी ताहम्ज्या ज़्या़गे, यिहॱनाङ खुङ राहङ मानादी तोङदी डोएँगी योक्पु काहल सिहन्ग्यो ओहङगे, च्यिबेमाना का़हन्दी से़हगी मिहला क्याहल ख़ूएँ ओ़ह से़हगीॱराङ खोला योक्पु ज़ोएँ यिहम्बा। 20 यिहॱनाङ का़हलेॱआङ खुङया़गी ओहराङगी चो़वो दाङ थार्पा नाङगेन येशू मास्यीकाला ङोह स्य़ेदीॱआङ जाम्बुलीङकी चोक्पा लाहमला छ्यि च्य़ूगे ल़ेहया़लेगी स्योर सिहन्दी तिङले येहपाराङ तिहक्पाला छ्यिती ओ़हगी ओङला छ्यिसीमाना, खुङया़गी गादी तोहङमादी म़ेदीॱआङ जेन माहङबु चोक्पा ओहङज्ये येह। 21 च्यिबेमाना किन्ज्योगी दिनला ठाबे सी़हगेन्गी लाहम ङोह स्य़ेदीलेॱआङ राहङगी ज्योरक्योकी नाम्पार-ताहक्पा का मी़हचीसीमानानी बरु खोगी दि लाहम नाहमॱआङ ङोह मा़हस्येबा यिहनानी काहजे या़हबु ओहङज्ये येहकें। 22 दि तेहन्दामकी पेताम लाहमलेॱराङ खुङया़ला दि ल़ेहमु सुङ नाङदी येह, “क्यिबु राहङगी क्यू़क्यो ग्या़लाराङ लो़ह ओहङगे,” “ओहले ठी़ क्याहप तेरक्योदी फा़ येहपाराङ दाक्पालाॱराङ फार छुर बोल्गे।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.