२ पत्रुस 1 - ह्योल्मो1 येशू मास्यीकाकी योक्पु दाङ ल़ेह-पेन सिमोन-पत्रुस लाहमले, ओहले ओहराङगी किन्ज्यो दाङ थार्पा नाङगेन येशू मास्यीकाकी टाहङदेन लाहमले ङ्यिहती ल़ेहमुराङ चा़ छ्यिम्बु तेहपा ज्योर्केनया़ला: 2 किन्ज्यो दाङ येशू ओहराङ चो़वोकी येहन्देनला काटीन दाङ स्य़िहदे ख्याया़गी मिहलीला बोल्बु ओहङ ख़ूज्यु। किन्ज्योगी क़े क्याहप नाङग्यो दाङ दाम नाङग्योकी मिहया़ 3 नाम्पार-ताहक्पा पेहती मिहजी ताङज्येला कोहकेन्गी ना थाम्ज्यीराङ से़हया़ किन्ज्योगी ओङ लाहमलेॱराङ ज़्योरक्यो यिहम्बा च्यिबेमाना राहङदी ज़िज्यिद दाङ वाङज्या छ्यिम्बु लाहमले क़े क्याहप नाङगे किन्ज्योला ओहराङगी ङोह स्य़ेदी येह। 4 दि लाहमलेॱराङ मिहरोगी छे-मे़हबा रिहन माहङबु डोएँ दाङ चा़ छ्यिम्बु ताहम्ज्याया़ ओहराङ ङ्याम्बु ज़्या़ नाङदी येह च्यिबेमाना दि जाम्बुलीङला येहकेन्गी ओहराङला तोङ च्य़ूगेन्गी चोक्पा सेम्बाया़ लाहमले क्यो़दी ख्यागी किन्ज्योकी थु ङ्ये़बाकी मिहजी ताङ ख़ूज्यु म़ेदी यिहम्बा। 5 ओ़ह सोङबेॱराङ ला़ खाजेबा ख्याया़गी तेहपाला या़हबु तामया़ पा़हज्ये छोल्दोङ। या़हबु तामया़ला येहन्देन पा़हदोङ, 6 येहन्देनला सेम टिहला ज़्या़गेन्दी पा़हदोङ, सेम टिहला ज़्या़गेन्दीला ना़स्यीङ छ्यिम्बु पेहकेन्दी पा़हदोङ, ना़स्यीङ छ्यिम्बु पेहकेन्दीला छ्य़ेसेम पा़हदोङ 7 छ्य़ेसेमला आदा-नो़ह दाङ आज्यी-नुहमुया़की निङज्यी पा़हदोङ, ओहले आदा-नो़ह दाङ आज्यी-नुहमुया़की निङज्यीला च्यिॱआङ क्येन म़ेहबाकी चेवा पा़हदोङ। 8 च्यिबेमाना ख्याया़ला कोहकेन्गी से़हया़ दिया़राङ यिहम्बा ओ़ह सोङबे दि से़हया़ला ख्या बोल्बु पेहती डो ख़ूसीमाना ओहराङ चो़वो येशू मास्यीकाकी येहन्देनला ख्यागी माहङबुराङ ल़ेहया़ पेहच्ये येह ओहले माहङबुराङ सेदोया़ या़ह च्य़ूज्ये येह। 9 ओहले का़हन्दी मिहया़ ङ्याम्बु दि गीनया़ म़ेहबा खुङगी था़-रिहङबुगी से़हया़ थोङज्ये म़ेह ओ़ह सोङबे खुङ मी़ मेहथोङगेन्गी मिहया़ ल़ेहमुराङ यिहम्बा। खुङगी राहङगी तिहक्पा ता़हक्योगी तामया़ॱआङ टेहम्बा च्येह सिहन्ग्यो ओहङगे। 10 ओ़ह सोङबे आदा-नो़ह दाङ आज्यी-नुहमुया़, किन्ज्योगी ख्याया़ला क़े क्याहप नाङग्यो दाङ दाम नाङग्यो केच्याला थिउ-निउ पेहच्ये छोल्दोङ। ख्याया़गी दि ल़ेहमु पेहसीनमाना ख्या नाहमॱआङ रिहल्ज्ये म़ेह। 11 दि ल़ेहमु पेहती ओहराङकी चो़वो दाङ थार्पा नाङगेन येशू मास्यीकाकी नाहम्स्यी किन्दु लिहकेन्गी क्याहल-खाप नाहङला ख्याया़ला ज्यिबुराङ चा़ छ्यिम्बु जेती फेप स्युह नाङज्ये येह। 12 ओ़ह सोङबे ख्याया़ला ङाह दि तामया़ नाहम-माना टेहम्बा साल च्य़ूगे। यिहन्ज्येनी ख्यागी दि ताम थाम्ज्यी ङोह स्य़ेदी येहबा ओहले ख्यागी ज़्योरक्योगी तेहन्दामकी स्याहलला ख्या सान्दी पेहती तेहतीॱआङ येहबा। 13 यिहॱनाङ, ङाह मा़हस्यी थु ङाहगी ख्याला दि तामया़ टेहम्बा साल च्य़ूदीॱराङ तेहना ख्याला या़हबु ओहङगे माएँदी ङाहगी सेमला ने़दी येहबा। 14 ङाहला दि तामॱआङ क्यी़ह येह, ता़ह ङाहगी दि ङ्यिहमा ङ्यी़की ज़ुबु ग्यो़बाराङ क्युर ज़्या़दी डो कोहएँगी ती़हजी पोहला लेप सिहन्दी येह माएँ ताम ओहराङ चो़वो येशू मास्यीकागी ङाहला छ्यिसाल-नाहङसाल जेती तेन नाङ सिहन्दी येह। 15 ओहले ङाह स्यिदी तिङलेॱआङ ख्यागी दि तामया़ टेहम्बा साल ख़ूज्यु म़ेदी ला़ खाएँ थु ङाहगी ख्याया़ला लोप तेर्च्ये येह। मास्यीकाकी ज़िज्यिदकी पाङबु 16 च्यिबेमाना ङ्यिहगी ख्याया़ला ओहराङ चो़वो येशू मास्यीकाकी ओङज्या छ्यिम्बु दाङ चो़वो फेप नाङगेन्गी तेहन्दाला लेहङगु या़हबु स्येकेमु मिहया़गी आहन्डाराङ ज़ोक्योकी पेतामया़ला ङ्यिहगी पे त़ेदी मा़हची, यिहॱनाङ ङ्यिहगी राहङ मी़गीराङ मिहरोगी ज़िज्यिद छ्यिम्बु थोङग्यो यिहम्बा। दिगी पाङबु ङ्यिहया़ॱराङ यिहम्बा। 17 मिहरोगी किन्ज्यो याहप लाहमले चा़ दाङ ज़िज्यिद नोम नाङगे ती़हजीला ओ़ह खाम छ्यिम्बु ज़िज्यिद लाहमले दि ल़ेहमु सुङ-क़े च्यी़ थ़ेसीन, “दि ङाहगी च्याहम्बु पेहक्योगी स़ेबु यिहन, खो ङ्याम्बु ङाह ज्यिबुराङ काहसो येह।” 18 ओ़ह नाम्पार-ताहक्पा काहङदोला ङ्यिह चो़वो ङ्याम्बुराङ येहकेंमु स्यिहङगामले माहर ओहङग्योकी ओ़ह सुङ-क़े ङ्यिह राहङगीराङ थे़क्यो येहकें। 19 ङ्यिह ङ्याम्बु येहकेन्गी लुहङतेम्बाया़गी सुङ जेन थिउ-निउ काहल्दी येह। क्या र्हाबा-र्हिबे माहकाहल थु ओहले ख्याया़गी सेमला ङाटुकी कार्मा माहस्यार थु ना़-जुबेला ती़हदी तेहक्योकी लोला ल़ेहमु ख्याया़गी ओ़ह सुङया़ला सेम ताङसीन माना ख्यागी या़हबु पेहच्ये येह। 20 यिहॱनाङ ख्यागी दि ताम ङोह स्ये़दोङ, सुङरापला लुहङतेम्बागी सुङ नाङग्योकी स्याहलया़ राहङदीराङ सेम नाहङले आहन्डाराङ जे़दी प्रुहक्योकी तामया़ मिहम्बा। 21 च्यिबेमाना लुहङतेम्बागी सुङ नाङग्योकी स्याहल मिहकी सेम लाहमले मेहयोहङगे, यिहॱनाङ नाम्पार-ताहक्पा थु लाहमले रिहक्स्यी ज्योर्ती मिहया़गी किन्ज्यो लाहमले सुङ नाङग्यो यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.