२ यूहन्ना 1 - ह्योल्मो1 ङाह छेन्छोककी एल्डर, किन्ज्योगी दाम नाङग्यो पी़हमी-पेहजा दाङ मोहगी पुह पोहमोया़ला दि यिहगी प्रुहएँॱराङ येहबा। ङाह खुङया़ला तेहम्बाराङ चेवा पेहकें, ओ़ह ङाहगी च्यी़राङ मिहम्बा, यिहॱनाङ तेहन्दामला ङोह स्य़ेगे थाम्ज्यीगीराङ चेवा पेहकें। 2 च्यिबेमाना तेहन्दाम ङ्यिह ङ्याम्बुराङ ज़्य़ू नाङदी येह ओहले मिहरो नाहम्स्यी किन्दुॱराङ ओहराङ ङ्याम्बु ज़्य़ू नाङज्ये येह। 3 किन्ज्यो याहप दाङ मिहरोगी स़ेबु येशू मास्यीका लाहमले काटीन, थुज्यी दाङ स्य़िहदे ओहराङ ङ्याम्बु तेहन्दाम दाङ चेवाला ज़्य़ू नाङज्ये येह। तेहन्दाम दाङ चेवा 4 ख्येगी पुह पोहमोया़ नाहङला लाहलाला किन्ज्योगी ङ्यिहला नाङग्यो काया़ ल़ेहमुराङ तेहन्दामगी लाहमला डोलु-तेहलु पेहक्यो थोङगेमु ङाहगी सेम ज्यिबुराङ काहसो काहल्दी येह। 5 ए ङाहगी च्याहम्बु आज्यी, ङाहगी ख्येला च्यिॱआङ साम्बा का प्री़हदी म़ेह। ओहराङ ङ्याम्बु छ़ूगे यिहन्ज्युराङ येहकेन्की कागी तेहन्दालाराङ ङाहगी प्रुहक्यो यिहम्बा। ता़ह ओहराङगी च्यी़गी च्यी़ला चेवा पेह कोहएँ म़ेदी ङाह ख्येला ओहर-छ्य़े! स्युहउ येह। 6 किन्ज्योगी नाङग्यो काया़ ची़दी डोएँदीॱराङ चेवा यिहम्बा। ख्येगी छ़ूगे यिहन्ज्युराङ थे़क्यो का दिराङ यिहम्बा, ओ़ह सोङबे ख्याया़गी चेवागी पे ता कोहएँ। 7 “येशू मास्यीका मिहगी कुसो नोम्दे फेप माहनाङ” म़ेदी गो़ कोर्के मिहया़ माहङबुराङ जाम्बुलीङला ओहङ सिहन्दी येह। दि ल़ेहमु मिहया़राङ चिहन क्याहप्के दाङ मास्यीकाला टाह पेहकेनया़ यिहम्बा। 8 ओ़ह सोङबे ख्या जेम्बु पेहती तेहतोङ। ख्यागी कादुप च्येती पेहक्यो ल़ेहगी च्याहगा तोर मा़हच्यु यिहॱनाङ ख्या थाम्ज्यी च्याहगा ज्योर्केन्की मिहया़ ओहङ कोहएँ। 9 मास्यीकाकी लुहङ म़ेदी फिगी लेहमेन ताम ङ्यिहन्दी डोएँ मिहया़ ङ्याम्बु किन्ज्यो ज़्य़ू मेहनाङगे। यिहॱनाङ मास्यीकाकी लुहङ ङ्यिहन्गे मिह ङ्याम्बुदी याहप दाङ स़ेबु ङ्यिकाराङ ज़्य़ू नाङगे। 10 ओ़ह सोङबे दि लुहङ म़ेदी फिगी लेहमेनॱराङ तामया़ ख्योङदी ओहङगे मिहया़ला ख्यागी खाङबाला स्य़ूहॱराङ मा़हच्यु। खुङला टास्यी-देले म़ेदीॱआङ माहमा। 11 च्यिबेमाना ओ़ह ल़ेहमु मिहया़ला टास्यी-देले माक्योदी खोगी पेहकेन्गी ल़ेह चोक्पाया़ला ख्याया़गी रो़ह पेहक्यो यिहम्बा। 12 ङाहगी ख्याया़ला प्रुह कोहकेन्गी तामया़नी माहङबुराङ येह, यिहॱनाङ ता़ह ङाह ख्याया़ला स्युगु दाङ फुल-डिन लाहमले च्यी़राङ मिहम्बा ता़ह थ़ूदेराङ ङाह ख्याला थाम्ज्यीराङ तामया़ माएँ म़ेदी रेहवा पेहको येहबा। ओहजेला ङाह ज्यिबुराङ सेम काहसो ओहङज्ये येह। 13 किन्ज्योगी दाम नाङग्यो ख्येती नोहमोगी पुह पोहमोया़गीॱआङ ख्येला टास्यी-देले ताङदी येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.