२ कोरिन्थी 9 - ह्योल्मोडेल्बा ती़हदी ठाबे पेहक्यो 1 मास्यीकाला यिह-छ्य़े पेहक्यो पुह पोहमोया़गी तेहन्दाला तेरक्यो डेल्बाकी तेहन्दाला ङाहगी ख्याया़ला लेहमेन ताम प्रुह मेहकोहएँ। 2 च्यिबेमाना स्याहप्तो स्य़ूहज्येला ख्याया़ती ज्यिबुराङ छ्यिम्बु सेम्बा येहबा म़ेदी ङाहला क्यी़ह येह। ख्याया़गी तेहन्दाला ङाहगी माकेडोनियाकी मिहया़लाॱआङ छ्य़ेन्दो तेन्दी मासीन। नाहनीङ यिहन्ज्युराङ अखैयाला येहकेन्गी ख्याया़ दि तेर्केन्गी ल़ेहला ठाबे काहल्दी येहकें म़ेदी ङाहगी खुङया़ला स्य़ेसीन। ख्याती स्युक थोङदी खुङया़ नाहङॱलाङ माहङ-छ्येवाला स्युक क्येदी येहबा। 3 यिहॱनाङ ख्याया़गी तेहन्दाला ङ्यिहगी छ्य़ेन्दो तेन्ग्योदी स्यिती काम्बुला थोरो माहन्डोज्यु, ओहले ङाहगी माक्यो ल़ेहमुराङ ख्याया़ ठाबे पेहती तेह म़ेदी ङाह नो़हया़ला ताङ चाहङगेॱराङ येहबा। 4 का़हलेॱआङ लाहला माकेडोनियाकी मिहया़ ङाह ङ्याम्बु ओहङगेमु ख्याया़गी डेल्बा तेर मी़हखुसीमाना ङ्यिह ङोहजाला छ्यिच्ये येह (ओहले ख्याया़ॱआङ ङोहजाला छ्यिच्ये येह।) च्यिबेमाना ङ्यिहगी ख्या थो़ला माहङबुराङ यिह छ्य़ेक्यो येहकें। 5 ओ़ह सोङबे ख्याया़गी तेर्के म़ेदी माक्योगी डेल्बाया़ ङाह ओहङगे म़ेदी तोहङलेराङ ठाबे पेहच्येला नो़हया़ ख्यासाला ताङ चाहङगेन्दीॱराङ या़हबु ओहङडो म़ेदी ङाहला नोम्साङ क्येसीन। यिहॱनाङ दि डेल्बाती उर्चु पेहती मिहम्बा, यिहॱनाङ ख्या राहङ क़ेहनाङगीॱराङ तेरक्यो ओहङज्यु। सेम ज़ाङबु पेहती तेर कोहएँ 6 यिहॱनाङ ताम छ्येस्योदी दिराङ यिहम्बा, ङ्ये़हमु ताप्केन्दीगी ङ्ये़हमुराङ तुहएँ, ओहले माहङबु पेहती ताप्केन्दीगी माहङबुराङ तुहएँ। 7 मिह थाम्ज्यीगी राहङ-राहङगी सेमला कोहङबा पेहक्यो जेबा तेर्च्यु, तेर्च्ये सेम्बा म़ेहबा पेहती मिहम्बा ओहले सुज्यीगी उर्चु पेहक्यो सोङबेॱआङ मिहम्बा। च्यिबेमाना सेम काहसो पेहती तेर्केन्दीला किन्ज्योगी चेवा जे नाङगे। 8 किन्ज्योगी ख्या थाम्ज्यीला काटीन बोल्बु जेती नाङ थुप्कें। ख्याया़ला च्यि से़हदीॱआङ कोहपु डोज्ये म़ेह ओहले ख्यागी या़हबु ल़ेहया़ माहङबुराङ पेह ख़ूज्ये येह। 9 सुङरापॱलाङ दि ल़ेहमु प्री़हदी येहबा, “खोगी माहङबुराङ ताप्के, ओहले प्राङबुया़ला तेर्के, खोगी पेहक्यो ल़ेह टाहङबु नाहम्स्यी किन्दुॱराङ लिहच्ये येह।” 10 ताप्केया़ला सेन ओहले साहज्येला तोप्च्या नाङगे किन्ज्योगी ख्याया़ला सेन नाङज्ये येह, ओहले ओ़हला माहङबु माहङबु जेती नाङज्ये येह, ओहले ख्याया़गी सेम ज़ाङबु पेहती ताप्क्यो सोङबे ओ़ह लाहमले याहगेन्गी सेदोया़ला किन्ज्योगी मेलाम माहङबुराङ नाङज्ये येह। 11 ख्याया़गी सेम ज़ाङबु पेहती तेरक्यो सोङबे ना थाम्ज्यी ल़ेहया़ला किन्ज्योगी ख्याया़ला छ्युक्पु ज़ो नाङज्ये येह, ख्यागी फुल्ग्योगी डेल्बाया़ ङ्यिहगी लेहमेन कोहपु काहल्ग्योगी छेन्छोकया़ला तेर्केमु खुङया़गी किन्ज्योला थुज्यी-छ्ये़ फुल्ज्ये येह। 12 ख्यागी फुल्ग्योगी डेल्बागी मास्यीकाकी पुह पोहमोया़दी कोम्बोया़ छाङबु डोएँ च्यी़राङ मिहम्बा, यिहॱनाङ दि लाहमले खुङया़गी किन्ज्योला थुज्यी-छ्ये़ फुल्ज्ये येह। 13 ख्याया़गी रो़हराम पेहकेमु मिहया़गी किन्ज्योला त़ेरा तेच्या फुल्गे। ख्याया़गी सेम ज़ाङबु पेहती खुङ दाङ लेहमेन थाम्ज्यीला रो़हराम पेहकेमु ख्याया़गी यिह छ्य़ेक्यो मास्यीकाकी या़हबु लेहङगुला ची़उ दुबा माएँ तामकी दास्यी तेर्के। 14 किन्ज्योती था़ म़ेहबा काटीन ख्या थो़ला येहकें सोङबे खुङगी ख्याया़गी तेहन्दाला ज्यिबुराङ चा़ पेहती सोल्वाङ ताप्के। 15 मिहगी सेमगी ख्येपॱराङ मी़हखुएँगी किन्ज्योगी काबापगी तेहन्दाला किन्ज्योला थुज्यी-छ्ये़! |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.