२ कोरिन्थी 7 - ह्योल्मोपावलकी काहसो 1 ओ़ह सोङबे ए ङाहगी च्याहम्बु रो़हया़, ओहराङ ङ्याम्बु दि ल़ेहमु ताहम्ज्याया़ येहकें सोङबे ज़ुबु दाङ यिहला मेहचाङा ज़ोएँगी यिहन्जे मिहन्जे से़हया़ ङो़ले ओहराङ था़-रिहङबुराङ तेहती राहङगी राहङला चाङमा ज़ो कोहएँ, ओहले किन्ज्योगी ज्यिक्पा खुर्ती ओहराङ नाम्पार-ताहक्पाकी लाहमला स्युह कोहएँ। 2 ख्यागी सेम नाहङला तेहच्येला ङ्यिहला ग्या़ लाङ। ङ्यिहगी सुज्यीॱलाङ चोक्पा पेहक्यो म़ेह। ङ्यिहगी सुज्यीॱलाङ नोङग्यो म़ेह। ङ्यिहगी सुज्यी लाहमलेॱआङ ख्येप्साङ लेहन्दी म़ेह 3 ख्याया़ला क्येन ता़ज्येला ङाहगी दि माक्यो मिहम्बा। ख्याया़गी तेहन्दाला ङ्यिहगी सेमला माहङबुराङ निङज्यी येहबा। ङ्यिह ख्याया़ ङ्याम्बुराङ स्यिज्ये दाङ सोज्येॱलाङ ठाबे येहबा। 4 ङाहती ख्याया़ थो़ला ज्यिबुराङ छ्यिम्बु रेहवा येहबा। ख्यागी तेहन्दाला ङाह छ्य़ेन्दो तेन्गे। ख्याया़गी पेहती ङाहती सेम ज्यिबुराङ याहङदी काहल्दी येहबा। ङ्यिहती थाम्ज्यी तुहक्पुया़ला ङाहती सेम ज्यिबुराङ काहसो काहल्दी येहबा। 5 च्यिबेमाना ङ्यिह माकेडोनियाला ओहङ फान्ज्यो ङ्यिहती ज़ुबुगी थाङ सो माहङ्युहङ, का़हला डोॱनाङ ङ्यिहला खेन्दा-का़हबुया़ ओहङग्यो येहकें। ङ्यिहती ज़ुबुगी ज्यिबुराङ तुहक्पुया़ खुर कोहसीन ओहले सेमला ज्यिबुराङ ज्यिक्पा येहकें। 6 यिहॱनाङ सेम मा-फाम्बु पेहकेनया़ला सेम लो तेहमु नाङगेन किन्ज्योगी तीतसला ताङ नाङदी ङ्यिहला सेम लो तेहमु नाङसीन। 7 खो ओहङग्यो सोङबे च्यी़राङ मिहम्बा, यिहॱनाङ तीतसगी ख्याया़ लाहमले ज़्योरक्योगी सेम लो तेहमुगी पेहती ङ्यिहगी सेम लो तेहमु काहल्सीन। ङाह ङ्याम्बु थू़ज्ये म़ेदी ख्याया़ ज्यिबुराङ सेम्बा पेहकु दु माएँ ताम ङ्यिहगी तीतस लाहमले क्यी़ह ज्योर्सीन। ङाहगी तेहन्दाला ख्याया़ ज्यिबुराङ ङ्याहङेन पेहकु दु लो ओहले तुहङालॱआङ पेहकु दु लो माएँ ताम थे़गेमु ङाह ज्यिबुराङ सेम काहसो काहल्सीन। 8 ङाहगी राहङगी यिहगी लाहमले ख्याया़ला सेम सू़ह क्याहप च्य़ूक्यो येहॱनाङ ङाह ओ़ह तामला ग्येपा मेहक्येएँ, यिहन्ज्ये नि ङाहला सेम ग्येपा क्येक्यो येहकें। ओ़ह यिहगीगी ख्याया़ला याहम्बीज्यीगी तेहन्दाला यिहॱनाङ सेम सू़ह क्याहप च्य़ूक्यो येहकें माएँ ताम ङाहगी तिङले क्यी़ह ज्योर्सीन। 9 ख्याया़ला सेम सू़ह क्याहप च्य़ूसीन म़ेदी मिहम्बा, यिहॱनाङ ओ़हगी ख्याया़ला स्या़बा पेह च्य़ूसीन म़ेदी गा ङाह क़ेहनाङ लाहङग्यो यिहम्बा। च्यिबेमाना ख्याया़गी किन्ज्योगी थु-सेम जे नाङग्यो ल़ेहमु स्या़बा डुप्सीन। ओ़हठी यिहन्गे सोङबे ङ्यिह लाहमले ख्याया़ला च्यिॱआङ ऩे माहक्याल। 10 च्यिबेमाना किन्ज्योगी थु-सेम जे नाङग्यो ल़ेहमु ङ्याहङेन पेहसीनमाना ओ़हगी ओहराङला थार्पागी तेहन्दाला स्या़बा डुप च्य़ूगे, ओहले ओ़हला ग्येपा मेहयोहङगे, यिहॱनाङ जाम्बुलीङदी ङ्याहङेन पेहसीनमाना ओ़हगी ओहराङला स्यिवा ङो़ले ठिके। 11 ख्या थो़ला बाप्क्यो तुहक्पु लाहमले किन्ज्योगी च्यि जे नाङबा, टेहम्बा साल्दोङ, दि तुहक्पुगी ख्याया़ला तेहम्बा-तेहन्सुम ज़ोसीन, च्यिॱआङ क्येन म़ेह म़ेदी तेन्ज्येला सेमला मेह ती़ह च्य़ूसीन, ख्याया़ला काहन्डुमु स्यिहताङ लाहङ च्य़ूबा, ख्याला काह-ठि तुहङाल लाहङ च्य़ूबा, ख्याला काह-ठि नोम्साङ ताङ च्य़ूबा ओहले किन्ज्योला क्याप्च्येला काहन्डुमु सेम्बा क्ये च्य़ूबा। ख्याया़ नाहङला तिहक्पा पेहकेनया़ला ङ्य़ेहबा काल्गेन्गी सेमॱआङ क्येसीन। दि थाम्ज्यी लाहमले ख्याया़ला च्यिॱआङ क्येन मेह माएँ ताम क्यी़ह ज्योर्के। 12 ङाहगी दि यिहगी ल़ेह नोहरक्यो स्यी़हक्यो पेहकेन मिहगी तेहन्दागी पेहती प्रुहक्यो मिहम्बा, ओहले आन्याला छ्यिक्यो मिहगी तेहन्दागी पेहतीॱआङ ङाहगी दि यिहगी प्रुहक्यो मिहम्बा। यिहॱनाङ किन्ज्योगी ज़ी़लुला ङ्यिह छ्यो़ले ख्याया़दी काह-ठि चेवा दुबा म़ेदी ख्या राहङगीराङ ङोह स्य़े ख़ूज्यु म़ेदी ङाहगी दि यिहगी प्रुहक्यो यिहम्बा। 13 ओ़ह सोङबेॱराङ ङ्यिहला सेम लो तेहमु काहल्दी येहबा। ओ़ह म़ेदीॱआङ तेहम्बाराङ तीतसला ख्या थाम्ज्यीगी आ़र क्ये च्य़ूदी खोला क़ेहनाङ लाहङ च्य़ूक्यो सोङबे ङ्यिह ओ़ह केच्याला ज्यिबुराङ सेम काहसो काहल्दी येहबा। 14 ङाहगी तीतस ङ्याम्बु ख्याया़गी तेहन्दाला छ्य़ेन्दो तेन्सीन ओहले ख्याया़गी ङाहला ङोहजाला छ्यि मा़हच्यु। ङ्यिहगी ख्या ङ्याम्बु नाहम्माॱनाङ तेहम्बा-तेहन्सुम ताम मासीन। ओ़हठीॱराङ पेहती ङ्यिहगी तीतस ङ्याम्बु पेहक्यो छ्य़ेन्दोॱआङ तेहम्बा सी़हसीन। 15 ख्यागी ताम थाम्ज्यी ङ्यिहन्दी, ज्यिबुराङ ज्यिक्पा खुर्ती ओहले दार्ती तीतसला फेप स्युहक्योगी ताम टेहम्बा साल्गेमु खोगी सेम नाहङगी च्याहम्बा ख्याया़गी तेहन्दाला जेन माहङरो माहङरो काहल्दी येह। 16 ङाहगी ख्याया़ला सेम तिहङ यिहन्ज्युराङ लोक पेह खू़क्यो सोङबे ङाहला ज्यिबुराङ सेम काहसो काहल्दी येहबा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.