२ कोरिन्थी 6 - ह्योल्मो1 ङ्यिह किन्ज्यो ङ्याम्बुराङ ल़ेह पेहकें सोङबे ङ्यिह ख्याया़ला ओहर-छ्य़े स्युहउ येह, किन्ज्योगी ख्याया़ला काटीन जे नाङग्योदी ता़ह ओ़ह स्यिती काम्बुलाराङ थोरो डो मा़हच्यु। 2 च्यिबेमाना किन्ज्योगी सुङ नाङगे, “ठाबे ती़हजीला ङाहगी ख्येती क़ेला थ़ेसीन, ओहले थार्पाकी ङ्यिहमाला ङाहगी ख्येला रो़हराम पेहसीन।” त़ेदोङ, ठाबे ती़हजीनी नाहरे यिहम्बा, थार्पागी ङ्यिहमाॱआङ नाहरेराङ यिहम्बा। 3 ङ्यिहगी पेहक्योगी ल़ेहला मिहया़गी च्यिॱआङ क्येन माहता़ज्यु म़ेदी ङ्यिह सुॱलाङ रिहल च्य़ूगेन्गी ल़ेहया़ मेहबेकें। 4 यिहॱनाङ ङ्यिह च्यि ल़ेह पेहॱनाङ राहङला किन्ज्योगी स्याहप्तो स्युहएँगी मिहया़ यिहम्बा म़ेदी तेन्गे– तुहक्पु, खेन्दा-का़हबु दाङ ज्यिबुराङ तुहङाल बाप्केमुॱआङ ङ्यिह ना़स्यीङ छ्यिम्बु पेहती तेहकें, 5 ङ्यिहगी तुहङदा साहसीन, चोन-खाङला छ्यिसीन, ओहले मिहया़गी ङ्यिहला टाह पेहती ठ़ूस्यी पेहच्येला मिह-माहङ क्याहप्ती ओहङसीन। ङ्यिहगी ज्यिबुराङ कादुप च्येती ल़ेह पेह कोहक्यो येहबा। ङ्यिह साह माहङ्युहङबा, ङ्यि लो़ह माहङ्युहङबा पेहती तेह कोहक्यो येहबा। 6 ङ्यिह राहङगी मिहजी नाहम माॱनाङ चाङमा ज़्या़गे, रिहक्स्यीला, ना़स्यीङ छ्यिम्बु पेहच्येला, निङज्यी पेहच्येला, नाम्पार-ताहक्पा थुला, तेहन्दामकी चेवाला, 7 ओहले तेहन्दामकी लेहङगु दाङ किन्ज्योगी ओङला, योबा दाङ योमा ङो़ले टाहङदेनकी छेन्ज्याया़ थो़गे, 8 ङ्यिहला मिहया़गी चा़ पेहॱनाङ मेहबेॱनाङ, ङ्यिहती मिहन चोक्पा डोॱनाङ मिहन थोपॱनाङ ङ्यिहला मिहया़गी क्येन ता़ मी़हखुएँ छ्याप्स्यी पेहती ङ्यिह किन्ज्योगी छ्या़लेया़ पेहको येह। मिहया़गी तालुला ङ्यिह ठाग तिएँगी मिहया़ ल़ेहमु काहल्सीन, यिहॱनाङ ङ्यिहगी सुज्यीॱलाङ ठाग ती़दे म़ेह। 9 किन्ज्यो दाङ छेन्छोकया़गी ङ्यिहला ङोह स्य़ेक्यो येहकें यिहॱनाङ मास्यीकाला यिह मा़हछ्येबा मिहया़गी तेहन्दाला ङ्यिह मिह साम्बा ल़ेहमु काहल्सीन। ङ्यिह स्यिक्यो ल़ेहमुराङ काहल्सीन यिहॱनाङ थार्तेराङ येहबा। ङ्यिहगी तुहङदा या़हबु साहॱनाङ स्यिज्येनी मा़हस्यी येह। 10 ङ्यिह माहङबुराङ तुहक्पु ङ्युहङग्यो येहबा यिहॱनाङ ङ्यिह सेम काहसो पेहकें। ङ्यिह प्राङबु येहबा यिहॱनाङ मिह माहङबुला छ्युक्पु ज़ोएँ। ङ्यिह ङ्याम्बु च्यिॱआङ म़ेह यिहॱनाङ ना थाम्ज्यीराङ येह। 11 ए कोरिन्थीला येहकेन्गी रो़हया़, ङ्यिहगी सेम खा फ़ेदी नाहङगी तामया़ थाम्ज्यी ख्याया़ला छ्यिसाल-नाहङसाल पेहती स्येक्यो येहबा। 12 ख्याया़गी तेहन्दाला ङ्यिहती च्याहम्बा ङ्ये़हमु काहल्दी म़ेह, यिहॱनाङ ख्याया़गी च्याहम्बा गा ङ्यिहगी तेहन्दाला ङ्युहङा पेहती काहल्सीन। 13 ता़ह दिगी तेहन्दाला ङाह ख्याया़ला राहङदीराङ पेहजाया़ला ल़ेहमु पेहती माएँ, ङ्यिहगी ल़ेहमुराङ ख्याया़गीॱआङ राहङगी सेम च्ये़मु मिहम्बा सेम छ्यिम्बु थो़दोङ। मास्यीकाला यिह-छ्य़े पेहकेन दाङ मेहबेकेन मिह 14 मास्यीकाला यिह मे़हछ्येगे मिहया़ला राहङ ङ्याम्बु ङ्यास्यीङ च्यी़ला काल्ज्ये माहछोल। च्यिबेमाना छ्य़े पेहकें मिह दाङ मिह ङ्येहम्बा ङ्याम्बुराङ डी़दी तेह मी़हखुएँ, ओ़हठीॱराङ पेहती ना़-जुबे दाङ क्या-साङेॱआङ ङ्याम्बु तेह मी़हखुएँ। 15 मास्यीका दाङ ती़ह गो-छ्येवा काह-ठि पेहती डी़ ख़ूज्ये ले? ओ़हठीॱराङ पेहती मास्यीकाला यिह-छ्य़े पेहक्यो दाङ मास्यीकाला यिह-छ्य़े माहबेबा मिह डी़ मी़हखुएँ। 16 किन्ज्योगी छ्योखाङ ङ्याम्बु कुया़दी च्यि च्योल्दो ले? च्यिबेमाना ओहराङ सोम्बो ज़्य़ू नाङगेन किन्ज्योगी छ्योखाङ यिहम्बा। किन्ज्योगी दि ल़ेहमु सुङ नाङदी येहबा, “ङाह खुङया़ ङ्याम्बु तेहच्ये येह, ओहले खुङया़गी पाहरक्यीले फार छुर डोज्ये येह, ओहले ङाह खुङया़गी किन्ज्यो ओहङज्ये येह, ओहले खुङ ङाहती मिहया़ ओहङज्ये येह।” 17 “ओ़ह सोङबे खुङया़गी पाहरक्यीले थेन्दी स्यो, ओहले खुङ यिहन्ज्यु खा फ़ेदी तेह, मेहचाङा से़हया़ च्यिॱआङ मा़हन्दे, ओ़हठी यिहन्सीमाना च्यी़राङ ङाह ख्याया़ला लोक पेहच्ये येह।” 18 “ङाह ख्यागी आबा ओहङज्ये येह, ओहले ख्या ङाहती पुह पोहमोया़ डोज्ये येह म़ेदी वाङज्या छ्यिम्बु नोम्गेन चो़वो छ्येवागी सुङ नाङगु दु।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.