२ कोरिन्थी 5 - ह्योल्मोसाम्बा ज़ुबु 1 ओहराङला क्यी़हराङ येहबा, ताहन्दा ओहराङगी दि स्या दाङ रेहकोगी ज़ुबु तोङदी डोनाॱआङ स्यिहङगामला नाहम्स्यी किन्दुॱराङ लिहकेन्गी किन्ज्योगी ज़ो नाङग्योकी खाङबा येहबा, ओ़ह लाहक्पागी ज़ोक्यो खाङबा मिहन। 2 देला ताहन्दा ओहराङ ज्यिबुराङ छाबा-छुबे पेहकें, ओहले स्यिहङगामला येहकेन्गी ज़ुबुला ओहराङगी काप्च्या ल़ेहमुराङ पेहती केहन्ज्येला ओहराङ सेम्बा पेहकें। 3 च्यिबेमाना ओ़ह स्यिहङगामकी ज़ुबु ओहराङगी केहन फान्ज्यो ओहराङ च्येहन्डामु ओहङज्ये म़ेह। 4 च्यिबेमाना ओहराङ दि ज़ुबुला येहकेंमु तुहङालगी खुम्बु ताङगे। दि ज़ुबु क्युर्कें छ्याप्स्यीगी ह्अदा-ह्ओदे पेहक्यो मिहम्बा, यिहॱनाङ नाहमॱराङ स्यिहङगामकी ज़ुबु केहन ङ्युहङवा म़ेदी यिहम्बा। ओ़हठी पेहती स्यिदी डोएँगी ज़ुबु नाहमॱआङ मिहस्यीएँगी ज़ुबुला ग्युर्च्ये येह। 5 ता़ह ओहराङला दि केच्यागी तेहन्दाला ठाबे जे नाङगेन्दी किन्ज्योॱराङ यिहम्बा, मिहरोगी ओहराङला बे़ना क्याहप्ती नाम्पार-ताहक्पा थु नाङदी येहबा। 6 ओ़ह सोङबे ङ्यिह का मे़हक्याहल्गे। ओहराङला क्यी़हराङ येह, ओहराङ ज़ुबुला येहकें थु ओहराङ चो़वो ङो़ले खा फ़ेक्योॱराङ ओहङगे। 7 च्यिबेमाना ङ्यिहगी थोङग्यो सोङबे मिहम्बा, यिहॱनाङ ङ्यिह यिह-छ्य़े पेहती राहङगी मिहजी ताङगे। 8 ङ्यिह का मे़हक्याहल्गे, तोहरोङ ज़ुबु लाहमले खा फ़ेदी चो़वो ङ्याम्बु तेहच्ये सेम्बा येहबा। 9 ओ़ह सोङबे ङ्यिह स्या दाङ रेहकोगी ज़ुबुला येहॱनाङ, यिहक्तेन ज़ुबुला येहॱनाङ मिहरोला थु ङ्य़ेबु ज़ोएँदीॱराङ ङ्यिहगी चा़ छ्यिम्बु ल़ेह यिहम्बा। 10 च्यिबेमाना ङ्यिहमा च्यी़ ओहराङ थाम्ज्यीला मास्यीकागी ठिम ताङ नाङज्ये येह ओ़ह ती़हजीला ओहराङ थाम्ज्यी मास्यीकागी दिनला लाहङ कोहच्ये येह। ओहराङगी दि मिहजीला ल़ेह या़हबु, चोक्पा च्यि च्यि पेहक्यो येहबा ओ़हला ते़बे सेदो ज्योर्च्ये येह। मास्यीका लाहमले किन्ज्यो ङ्याम्बु थिन ख़ूएँ 11 ओ़ह सोङबे ङ्यिहगी चो़वोगी ज्यिक्पा ङोह स्य़ेक्यो सोङबे ङ्यिह मिहया़ला ला़ खाएँ थु चो़वो ङो़ला लो़ज्येला स्युक पेहकें। यिहॱनाङ ङ्यिह काह-ठि येहबा ओ़ह किन्ज्योगी ङोह ख्येन्गे। ओहले ख्याया़गीॱआङ ङ्यिहगी तेहन्दाला या़हबु पेहती ङोह स्य़ेदीॱराङ येहटो म़ेदी ङाह रेहवा पेहको येहबा। 12 येहपाराङ ङ्यिह ख्याया़गी दिनला ङ्यिह राहङगी राहङला मेहक्या़गे, यिहॱनाङ ङ्यिहगी तेहन्दाला ख्याया़गी छ्य़ेन्दो तेन ख़ूज्यु म़ेदी लोहङ तेरक्यो यिहम्बा। ओ़ह सोङबे ख्यागी मिहगी सेम नाहङगी तामला मिहम्बा, यिहॱनाङ फिगी तामया़ला छ्य़ेन्दो तेन्गेया़ला ल़ेहन क्याहप ख़ूज्ये येह। 13 का़हलेॱआङ ङ्यिहती नावा यिहला मे़हसीमाना दि किन्ज्योगी तेहन्दाला यिहम्बा, ओहले का़हलेॱआङ ङ्यिहती नावा यिहला येहसीमानाती दि ख्याया़गी तेहन्दाला यिहम्बा। 14 ङ्यिहनी मास्यीकागी चेवागी ओङ चो़ला येहबा। च्यिबेमाना मास्यीका मिह थाम्ज्यीगी तेहन्दाला टोहङ नाङसीन ओ़ह सोङबे ङ्यिह थाम्ज्यी स्यिसीन दि केच्या ङ्यिहला क्यी़ह येहबा। 15 मिहरो थाम्ज्यीगी तेहन्दाला टोहङ नाङसीन, च्यिबेमाना ताहन्दा थार्केया़ ता़ह राहङगी तेहन्दाला थार्के मिहम्बा, यिहॱनाङ मिहरोगी तेहन्दाला थार ख़ूज्यु म़ेदी मिहरो खुङया़गी तेहन्दाला टोहङ नाङसीन, ओहले येहपाराङ सोम्बो ज़्याङ नाङसीन। 16 ता़ह यिहन्ज्यु ङ्यिह सुॱलाङ मिहगी फि ङो़ले च्यी़राङ मेहताएँ। ती़हजी च्यी़ला ङ्यिहगी मास्यीकाला मिहला ल़ेहमु पेहती ताक्यो येहकें, यिहॱनाङ ता़ह यिहन्ज्यु मिहरोला ओ़हठी पेहती ताज्ये म़ेह। 17 ओ़ह सोङबे का़हन्दीगी मास्यीकाला यिह-छ्य़े पेहकेन खो ता़ह मिह साम्बा काहल्सीन। ता़ह निङबा से़हया़ टाहल्दे काहल्सीन, त़ेदोङ ता़ह थाम्ज्यीराङ से़हया़ साम्बा काहल्दी येहबा। 18 दि थाम्ज्यी किन्ज्यो लाहमले काहल्ग्यो यिहम्बा, मिहरोगी ओहराङला मास्यीका लाहमले राहङ ङ्याम्बु थिन च्य़ू नाङसीन ओहले लेहमेनया़लाॱआङ किन्ज्यो ङ्याम्बु येहपाराङ थिन च्य़ूएँगी छ्या़ले ङ्यिहला नाङसीन। 19 येशू मास्यीका लाहमले किन्ज्योगी मिह थाम्ज्यीला येहपाराङ थिन च्य़ू नाङगेराङ येह। किन्ज्योगी खुङया़गी तिहक्पाया़ च्यिॱआङ टाहङजी ज़्या़ माहनाङ, यिहॱनाङ खुङया़ला किन्ज्यो ङ्याम्बु थिन च्य़ूएँ ठालगी लेहङगु मिहरोगी ङ्यिहला चि क्याहप नाङसीन। 20 ओ़ह सोङबे ङ्यिह मास्यीकागी राजदूतया़ यिहम्बा, ओहले किन्ज्योगी ङ्यिह लाहमले ओहर-छ्य़े स्य़ूह नाङगेराङ येह। मास्यीकागी छ्यो़ले ङ्यिह ख्याया़ला ओहर-छ्य़े स्युहएँ, ख्याया़ किन्ज्यो ङ्याम्बु थिनदोङ। 21 मास्यीकाला तिहक्पाराङ म़ेहबा येहकें, यिहॱनाङ किन्ज्योगी मास्यीका लाहमले ओहराङला मिहरो दिनला ठाबे सी़ह ख़ूज्यु म़ेदी मास्यीका थो़ला ओहराङगी तिहक्पाया़ ज़्या़ नाङसीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.