२ कोरिन्थी 4 - ह्योल्मोसासागी निक्यीला क्युह 1 ओ़ह सोङबे किन्ज्योगी काटीन लाहमले ङ्यिहगी दि छ्या़ले ज़्योरक्यो सोङबे ङ्यिह सेम मा-फाम्बु मेहबेकें। 2 ङ्यिहगी ङोह छाएँगी ल़ेहया़ दाङ यिहप्ती-यिहप्ती पेहकेन्गी ल़ेह चोक्पाया़ पाङदी येहबा। ङ्यिह गो़ कोर च्य़ूदी ल़ेह मेहबेकें ओहले किन्ज्योगी सुङला याहर-माहर मेहबेकें। यिहॱनाङ तेहन्दामला ङ्यिह छ्यिसाल-नाहङसाल पेहती प्रा साल्गे ओहले किन्ज्योगी ज़ी़लुला ङ्यिह तेहन्दाम दाङ टाहङबु पेहती मिह थाम्ज्यीगी थोङगे पेहती मिहजी ताङगेराङ येह। 3 ङ्यिहती या़हबु लेहङगु योल्सेनगी उप्क्यो यिहॱनाङ दि तोङदी डोएँया़गी तेहन्दाला च्यी़राङ योल्सेनगी उप्क्यो येहबा। 4 खुङया़गी तेहन्दाला माज्ये माना, दि जाम्बुलीङकी ल्हागी खुङगी ङोह स्य़े ख़ूएँगी ओङला स्याहर्ना जे तेर्ती येह। किन्ज्योगी ङ्य़ेहरीला मास्यीका ज़्य़ू नाङदी येह, मिहरोगी ज़िज्यिदगी या़हबु लेहङगु खुङया़गी माहथोङज्यु म़ेदी दि जाम्बुलीङगी ती़ह गो-छ्येवागी खुङया़गी मी़ का तेरक्यो येहबा। 5 ङ्यिह राहङगी तेहन्दाला मिहया़ला स्येकें मिहम्बा यिहॱनाङ येशूगी तेहन्दाला ङ्यिह ख्याया़गी लाबु काहल्दी येशू मास्यीकाॱराङ चो़वो यिहम्बा म़ेदी मिहया़ला प्रा साल्गे। 6 “ना़-जुबेला क्या-साङेगी येहपा छ्याज्यु” म़ेदी सुङ नाङगेन्गी किन्ज्योॱराङ, ताहन्दा ओहराङगी सेम नाहङला येहपा छ्या़दे येहबा, ओ़ह लाहमले पेहती किन्ज्योगी ज़िज्यिदकी येहन्देनगी क्या-साङे मास्यीकागी स्याहल्दोङला येहपा छ्या़ ख़ूज्यु। 7 थाम्ज्यी म़ेदी छ्यिम्बु ओङ ङ्यिहती मिहम्बा यिहॱनाङ किन्ज्योदी यिहम्बा म़ेदी ङोह स्य़े च्य़ूज्येला दि क्युह ङ्यिह ङ्याम्बु सासागी निक्यीया़ला येहबा। 8 ङ्यिह छ्यो़ ज़्यिलेराङ ज्यिबुराङ तुहक्पु ङ्युहङदी येहबा, यिहॱनाङ ङ्यिहला ओ़ह तुहक्पुया़गी नेम्दी लाहङराॱआङ मी़हखुएँनी काहल्दी म़ेह। ङ्यिह गो़ थोम्दी येहबा यिहॱनाङ का क्याहल्दी म़ेह। 9 मिहया़गी ङ्यिहला तुहक्पु माहङबुराङ तेर्सीन यिहॱनाङ किन्ज्योगीनी ङ्यिहला क्युर ज़्या़ माहनाङ येह। ङ्यिह तुहङदा माहङबुराङ से़हदी रिहल्सीन यिहॱनाङ स्यिज्येनी मा़हस्यी येह। 10 येशूगी मिहजी ङ्यिह राहङगी ज़ुबुला थोङ ख़ूज्यु म़ेदी ङ्यिह मिहरोगी स्यिवा नाहम्माॱनाङ राहङगी ज़ुबुला खुर्ती डोउ येह। 11 येशूगी मिहजी दि ओहराङदी स्यिदी डोएँगी ज़ुबुला थोङ ख़ूज्यु म़ेदीराङ ङ्यिह ताहन्दा सोम्बो येहकेमुॱआङ येशूगी तेहन्दाला नाहम्माॱनाङ स्यिवाकी खाला छ्यितीॱराङ तेहकें। 12 दि ल़ेहमु पेहती स्यिवागी ङ्यिहगी पाहरक्यीला ल़ेह पेहक्यो येहबा, ओ़हठीॱराङ पेहती मिहलीगीदी ख्याया़गी पाहरक्यीला ल़ेह पेहकेनॱराङ येहबा। 13 “ङाहगी यिह-छ्य़े पेहसीन, ओ़ह सोङबे ङाहगी ताम मासीन” म़ेदी छ्य़ेला प्रुहएँ मिहला यिह-छ्य़े पेहकेन्गी यिह येहकें ल़ेहमुराङ ङ्यिहलाॱआङ यिह-छ्य़े पेहकेन्गी यिह येहबा। ओ़ह सोङबे ङ्यिह यिह-छ्य़े पेहकें ओहले ताम माएँ। 14 चो़वो येशूला सोम्बो ज़्याङ च्य़ू नाङगे किन्ज्योगी ङ्यिहलाॱआङ येशू ङ्याम्बु सोम्बो ज़ो नाङज्ये येह, ओहले मिहरोगीॱराङ ङ्यिहला ख्याया़ ङ्याम्बु मिहरोगी दिनला नोम फेप नाङज्ये येह म़ेदी ङ्यिहला क्यी़ह येहबा। 15 दि थाम्ज्यी ख्याया़गी तेहन्दालाराङ काहल्ग्यो यिहन च्यिबेमाना काह-ठि पेहती काटीन माहङबु म़ेदी माहङबु मिहया़गी पाहरक्यीला फेल्दी डोएँ, ओ़हठीॱराङ पेहती किन्ज्योगी ज़िज्यिदगी तेहन्दाला थुज्यी-छ्ये़ फुल्गेन्गी छ्या़लेया़ॱआङ फेल्दी डोएँ। यिह-छ्य़ेगी मिहजी 16 ओ़ह सोङबे ङ्यिह नाहमॱआङ का मे़हक्याहल्गे। ङ्यिहगी मिहजी ज़ुबुला तोङदी डोॱनाङ ङ्यिहती यिहगी मिहजीती ङ्यिहमा-टाहङमाराङ साम्बा पेहती डोएँॱराङ येह। 17 ङ्यिहगी ताहन्दा खुरक्यो तुहक्पु तिङले ज्योर्केन्की च्यि स़ेह ङ्याम्बुॱआङ दुर मी़हखुएँ ज़िज्यिद टेहम्बा साल्गेमुनी तेहम्बाराङ दि तुहक्पुनी च्यिॱआङ मिहन। 18 ङ्यिह थोङगेन्गी से़हला मिहम्बा, यिहॱनाङ मेहथोङगेन से़हया़ला ताएँ, च्यिबेमाना थोङगेन्गी स़ेह याहम्बीज्यीॱराङ ओहङगे, यिहॱनाङ मेहथोङगे से़हया़ती नाहम्स्यी किन्दुॱराङ लिहकें। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.