२ कोरिन्थी 3 - ह्योल्मो1 च्यि येहपाराङ ङ्यिह राहङगी राहङलाराङ क्या़ज्ये छोल्ग्यो यिहम्बा ले? च्यि लाहलाला कोहक्यो ल़ेहमुराङ ङ्यिहगी ख्याया़ला ओहले ख्याया़ लाहमले लेहमेनया़ला रो़हदी पेहकेन यिहगी तेन कोहएँ यिहम्बा ले? 2 ख्याया़राङ ङ्यिहगी रो़हदी पेहकेन यिहगी यिहम्बा ओ़हदी, मिह थाम्ज्यीगी ङोह स्य़े ख़ूएँ ओहले टा़ह ख़ूएँ पेहती ख्याया़गी सेमला प्री़हदी येहबा। 3 तेहम्बाराङ ख्याया़नी मास्यीकागी प्रुह नाङदी ङ्यिहगी स्याहप्तो स्युहक्यो लाहमले ओहङग्यो मास्यीकाकी यिहगी यिहम्बा। ओ़ह यिहगी ना़जागी मिहम्बा, यिहॱनाङ सोम्बो ज़्य़ू नाङगेन किन्ज्योगी थु लाहमले प्रुहक्यो यिहम्बा। तोहकी यामाला मिहम्बा, यिहॱनाङ स्यागी सेमकी यामाला। 4 मास्यीका लाहमले ङ्यिह किन्ज्योला दि ल़ेहमु म़ेहबा पेहको येहबा। 5 च्यि स़ेह माॱनाङ ङ्यिह लाहमलेॱराङ ओहङग्यो यिहन म़ेदी ठे-टिहती माज्येला ङ्यिह राहङॱआङ सी़हज्ये म़ेह, यिहॱनाङ ङ्यिहगी पेह ख़ूएँगी से़हया़नी किन्ज्यो लाहमलेॱराङ ओहङगे यिहम्बा। 6 साम्बा ताहम्ज्याला स्याहप्तो स्युहएँगी मिहया़ डोज्येला मिहरोगी ङ्यिहला सी़हएँगी मिहया़ ज़ो नाङसीन, प्रुहक्योगी यिहगीला मिहम्बा, यिहॱनाङ थुला। च्यिबेमाना प्रुहक्योगी यिहगीगीनी सेकें, यिहॱनाङ थुगीनी मिहली नाङगे। साम्बा ताहम्ज्यागी ज़िज्यिद 7 तोह-याम्बाला छ्य़े-ठिम प्री़हदी तेरक्यो ती़हजीला किन्ज्योकी येहसेर छ्यिम्बुच्यी ओ़हला थोङसीन। ओ़ह येहसेरॱराङ मोशाकी तोहङबाला लेप्क्यो येहकें। तिङले ओ़ह येहसेर छ्यिम्बु लोप्से-लोप्से पेहती तोर्ती डोएँमुॱआङ इस्राएल क्याहल-खापकी मिहया़गी खोला थेका सिरे ता मा़हखु मासीमाना थुगी नोम फेप्केन्गी छ्या़लेनी तोहरोङ काहजे माहङबु येहसेर छ्यिम्बु ओहङडो! 8 थुगी छ्या़लेनी तोहरोङ माहङबुराङ ज़िज्यिद छ्यिम्बु ओहङ मी़हखुडो ले? 9 च्यिबेमाना मिहला क्येन ताएँगी छ्य़े-ठिम ज़िज्यिद छ्यिम्बु येहकें मासीमाना, मिहला टाहङबु सी़ह च्य़ूगेन्गी ताहम्ज्यानी तोहरोङ ज़िज्यिद छ्यिम्बु ओहङगे। 10 च्यिबेमाना ओ़हदी लेहमा च्यी़ ज़िज्यिद छ्यिम्बु येहकें, ताहन्दा ओ़हदीला गोम्दी ज़िज्यिदगी पेहती ता़ह ओ़ह ज़िज्यिद छ्यिम्बु माहकाहल। 11 च्यिबेमाना का़हन्दी टाहल्दे काहल्बा ओ़ह ज़िज्यिद छ्यिम्बु पेहती ओहङग्यो येहकें, नाहम्स्यी किन्दु लिहकेन्दीती तोहरोङ माहङबु ज़िज्यिद छ्यिम्बु ओहङ कोहकें। 12 ओ़ह सोङबे ङ्यिहती दि ल़ेहमु रेहवा येहकें सोङबे ङ्यिह तेहन्दामकी तामया़ स्येच्येला मी़हज्यी़एँ। 13 ङ्यिह मोशा ल़ेहमु मिहम्बा, खोगी राहङदी तोर्ती डोएँॱराङ पेहक्योगी येहसेर तोर्ती डोएँदी इस्राएलीया़गी माहथोङज्यु म़ेदी राहङगी तोहङबाला योल्सेनगी उप्क्यो येहकें। 14 यिहॱनाङ खुङगी सेम ज्यिबुराङ सान्दी काहल्दी येहकें, च्यिबेमाना ताहन्दा ङ्यिहमा थु निङबा छ्य़े टा़हगेमु ओ़ह योल्सेनगी खुङया़गी नावा का ज़्या़दी येहबा, ओहले मास्यीकाला यिह-छ्य़े पेहती च्यी़राङ ओ़ह योल्सेन खा फे़ ख़ूएँ। 15 यिहम्बा, ताहन्दा थु मोशाकी छ्य़े टा़हगेमु खुङया़गी सेमला योल्सेनगी उप्क्यो ओहङगे, 16 यिहॱनाङ मिह चो़वो ङो़ले लो़हगे ती़हजीलादी, ओ़ह योल्सेन खा फ़ेगे। 17 च्यिबेमाना चो़वोनी थु यिहम्बा। ओ़ह सोङबे का़हला चो़वोकी थु येहबा, ओ़हला राहङवाङ ओहङगे। 18 ओहराङ थाम्ज्यी योल्सेन खा फे़क्यो तोहङबागी चो़वोकी ज़िज्यिद मेहलोङगी ठि पेहती तेन्गे, चो़वो थु यिहम्बा ओहले मिहरो लाहमले ओहङगेन्गी ओ़ह ज़िज्यिदगीॱराङ ओहराङला मिहरो ल़ेहमुराङ जे़दी छ्यिम्बु ज़िज्यिद-च्येन ङो़ले नोम फेप नाङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.