२ कोरिन्थी 2 - ह्योल्मो1 ख्याया़ला च्यिबे तुहक्पु तेर्च्ये म़ेदी ङाह येहपाराङॱआङ ख्यासाला मेहयोहङ म़ेदी नोम्साङ ताङसीन। 2 च्यिबेमाना ङाहगी ख्याया़ला सेम नाह च्यू़सीन माना ङाहला लेहमेन सुगी क़ेहनाङ लाहङ च्य़ू ख़ूएँ ले? च्यिबेमाना ङाहला क़ेहनाङ लाहङ च्य़ूगेया़नी ख्याया़राङ यिहन यिहॱनाङ ङाहगी ख्याला सेम सू़ह क्याहप च्य़ूसीन। 3 ओ़ह सोङबे ङाह ओहङगेमु ङाहला क़ेहनाङ लाहङ च्य़ूगे मिहया़ लाहमलेॱराङ ङाहती सेम नाह माहकोहज्यु म़ेदी ङाहगी ओ़ह यिहगी प्रुहक्यो यिहम्बा। च्यिबेमाना ङाहती सेम काहसो डोएँमु ख्यातीॱआङ सेम काहसो डोएँ माएँ ताम ङाहला या़हबु पेहती क्यी़ह येह। 4 च्यिबेमाना ख्याया़ला सेम नाह च्य़ूज्येला मिहम्बा, यिहॱनाङ ख्याया़गी तेहन्दाला येहकेन्गी ङाहती निङज्यी ख्याया़गी या़हबु पेहती ङोह स्य़े ख़ूज्यु म़ेदी ज्यिबुराङ सेम ने़हदी मिज्यु ताङगेराङ ङाहगी ओ़ह यिहगी ख्याया़ला प्रुहक्यो येहकें। तिहक्च्येम्बाकी कोहङदा 5 ओ़ह मिहगी ओ़ह ल़ेहमु ल़ेह पेहती ङाहला म़ेदीॱआङ माहङबु ख्या थाम्ज्यीला तुहक्पु तेर्ती येह। दि ताम ङाहगी पा़हदी माक्यो मिहम्बा। 6 ख्याया़ मिह माहङबु डी़दी काल्ग्योगी ङ्य़ेहबाॱराङ खोगी तेहन्दाला दाङस्यी काहल्सीन। 7 यिहॱनाङ ख्याया़गी खोला कोहङदा तेर कोहएँ ओहले सेम लो तेहमु ओहङ च्य़ू कोहएँ, मिहन्सीमानानी खो ज्यिबुराङ तुहङाल पेहती तेहटो। 8 ओ़ह सोङबे खोला ख्याया़गी तेहम्बाराङ चेवा पेहती तेन्दोङ म़ेदी ङाह ख्याया़ला ओहर-छ्य़े स्युहउ येहबा। 9 ङाहगी माक्योगी तामया़ ख्याया़गी ङ्यिहङगु दुनी मिहङ्यीहन्गु दु म़ेदी ङ्याहम च्येच्येलाॱराङ ङाहगी ख्याया़ला ओ़ह यिहगी प्रुहक्यो येहकें। 10 ख्याया़गी कोहङदा तेरक्यो मिहला ङाहॱआङ कोहङदा तेर्के। ङाहगी कोहङदा तेर कोहएँ यिहन्सीमाना ङाहगी कोहङदा तेर्केमु ङाह मास्यीका येशूकी दिनला ख्यागी तेहन्दालाराङ कोहङदा तेर्के। 11 च्यिबेमाना ती़ह गो-छ्येवागी ल़ेहगी तेहन्दाला ओहराङला क्यी़ह येहबा ओहले खोगी ओहराङला चिहन क्याहप मा़हखुज्यु। ठिम साम्बागी स्याहप्तो स्युहएँगी मिहया़ 12 मास्यीकाकी लेहङगु या़हबु स्येच्येला त्रोआस क्याहसाला ओहङगेमु चो़वोगीॱराङ ङाहला मिहरोगी छ्या़ले पेहकेन्गी लोहङ नाङसीन। 13 यिहॱनाङ ङाहती नो़ह तीतसला ओ़हला मी़हथुगेमु ङाहती सेम ज्यिबुराङ छाबा-छुबे काहल्सीन। ओहले ङाह खुङ ङ्याम्बु कोहङबा स्यी़हदी माकेडोनिया लुहङबाला काहल्सीन। 14 यिहॱनाङ ङाह किन्ज्योला थुज्यी-छ्ये़ फुल्गे, मिहरोगी ङ्यिहया़ला मास्यीका ङ्याम्बुराङ क्याहल्गेन्गी लाहमला ॱठि नाङगे, ओहले टिहमा स्यिहम्बु खाएँगी मास्यीकागी येहन्देन छ्यो़ ज़्यिलाराङ फेल्ज्येला मिहरोगी ङ्यिहया़ला कुल नाङगे। 15 च्यिबेमाना थार्पा ज्योरक्योया़ दाङ तोङ तेहक्योया़गी पाहरक्यीलाॱआङ ङ्यिह किन्ज्योगी तेहन्दाला मास्यीकाकी टिहमा स्यिहम्बु खाएँगी से़हया़ यिहम्बा। 16 थार्केया़गी तेहन्दाला मिहजी यिहम्बा ओहले तोङदी डोएँया़गी तेहन्दालाती स्यिवा यिहम्बा। दि ल़ेहमु चा़ छ्यिम्बुगी ल़ेह पेहच्येला सु सी़हज्ये येहबा ले? 17 च्यिबेमाना ङ्यिह लेहमेन मिहया़गी ल़ेहमु किन्ज्योगी लुहङदेनला छोङ मेहक्याहप्कें, यिहॱनाङ ङ्यिहलानी किन्ज्योगीॱराङ ताङ नाङग्यो यिहम्बा दि ताम ङ्यिहगी किन्ज्योगी दिनला मास्यीका लाहमले च्यिॱआङ चिहन माहक्याहप्पा पेहती माएँ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.