२ कोरिन्थी 13 - ह्योल्मोज्युक्स्योलगी लोप्तामया़ 1 लेहमा सुमगी पा़लोला ङाह ख्यासाला ओहङज्ये येह। काहन्डुमु फतुरया़ येहॱनाङ मेहन्दा ङ्यी़ सुमगी माक्योगी पाङबु डी़ना मिहम्बा ओ़हदीला ङ्य़ेहबा काल्ज्ये मेहयोहङगे। 2 लेहमा ङ्यी़गी पा़लोला ङाह ख्याया़गी पाहरक्यीला येहकेंमु तिहक्पा पेहकेनया़ दाङ लेहमेन थाम्ज्यीलाराङ ङाहगी लोप्ताम क्याहप्क्यो येहकें। ताहन्दा ङाह देला तेहतीॱआङ ङाह ख्याया़ला ओ़ह तामॱराङ लोप्ताम क्याहप्को येह। ङाह येहपाराङ ओहङगेमु तोहङ तोहङले तिहक्पा पेहकेनया़ दाङ लेहमेन सुज्यीलाॱआङ ङाहगी ल़े ताङज्ये म़ेह। 3 ओ़ह ती़हजीला मास्यीका ङाह लाहमले जेती स्याहल सुङ नाङगु दुनी मेहनाङ दु म़ेदी ख्याया़गी छोल्ग्योगी दास्यी च्य़ेह सिहन्ज्ये येह। ख्याया़गी पाहरक्यीला छ्या़ले जे नाङगेमु मिहरो मा-फाम्बु मिहम्बा यिहॱनाङ स्युक छ्यिम्बु ओहङज्ये येह। 4 च्यिबेमाना मास्यीका मा-फाम्बु जेती क्याहङस्यीङला टोहङ नाङसीन, यिहॱनाङ किन्ज्योगी ओङला मिहरो सोम्बो ज़्याङ नाङसीन। दि ल़ेहमु पेहती ङ्यिह मिहरो ङ्याम्बु मा-फाम्बु काहल्दी येह, यिहॱनाङ ख्याया़गी पाहरक्यीला ल़ेह पेहकेमु किन्ज्योगी ओङ लाहमले ङ्यिह मिहरो ङ्याम्बुराङ थार्कें। 5 ख्याया़ती यिह-छ्य़े येहबानी म़ेहबा तोहङले ओ़ह राहङगी राहङला या़हबु पेहती ङ्याहम च्येती त़ेदोङ। राहङला ङ्याहम च्येतोङ। का़हलेॱआङ येशू मास्यीका ख्ये ङ्याम्बु ज़्य़ू नाङदी येहसीमाना ख्ये ठाबे सी़हज्ये येह ओहले ख्ये फेन थो़ज्ये येह। मिहन्सीमाना ख्ये फेन थो़ज्ये म़ेह। 6 ङाह रेहवा पेहको येह, ङ्यिह ठाबे सी़ह ख़ूसीन माएँ ताम ख्यागी क्यी़ह ज्योर्च्ये येह। 7 ख्याया़गी च्यिॱआङ चोक्पा ल़ेहया़ पेह माहकोहज्यु म़ेदी ङ्यिह किन्ज्यो ङ्याम्बु सोल्वाङ ताप्को येह। ङ्यिह या़हबु थोङज्यु म़ेदी मिहम्बा, ङ्यिह फेनराङ मे़हथोएँगी मिहया़ डोॱनाङ ख्यागीदी च्यि या़हबु येहबा ओ़ह पेह ख़ूज्यु। 8 च्यिबेमाना ङ्यिह तेहन्दामकी ताम ङो़ले च्यी़राङ ल़ेह पेहकें, यिहॱनाङ तेहन्दामला टाह पेहती ङ्यिह च्यिॱआङ पेह मी़हखुएँ। 9 च्यिबेमाना ङ्यिह मा-फाम्बु डोएँमु ओहले ख्याया़दी स्युक छ्यिम्बु डोएँमु ङ्यिह सेम काहसो पेहकें। ख्याया़ याहरक्यी डोज्यु म़ेदीराङ ङ्यिह सोल्वाङ ताप्कें। 10 ख्यालेगी ङाह था़-रिहङबु येहकेंमु ङाहगी दि यिहगी प्रुहएँॱराङ येहबा, ख्यासाला ओहङगेमु चो़वोगी ङाहला नाङग्योकी ओङ ङाहगी ज्यिबुराङ ठो़ पेहती चा़लती माहकोहज्यु। ओ़हनी मिहरोगी ख्याया़ला याहरक्यी ख्येर्च्येगी तेहन्दाला नाङग्यो यिहम्बा, नोहङ च्य़ूज्येगी तेहन्दाला मिहम्बा। 11 ज्युक्स्योलला आदा-नो़ह दाङ आज्यी-नुहमुया़, ता़ह ङाहला कोहङबा नाङदोङ। टाहङबु मिहजी ताङदोङ। क़ेहनाङ पेहतोङ! ङाह ख्याला ओहर-छ्य़े स्युहउ येह, च्यी़गी च्यी़ला आ़र क्ये च्य़ूदोङ। च्यी़गी च्यी़ला माक्यो तामया़ ङ्यिहन्दोङ ओहले सेम लो तेहमु पेहती तेहतोङ। ओहले स्य़िहदे दाङ चेवा जे नाङगे किन्ज्यो ख्या ङ्याम्बु ज़्य़ू नाङज्ये येह। 12 नाम्पार-ताहक्पा सेम थो़दी च्यी़गी च्यी़ला च्युक पेहती टास्यी-देले म़ेदोङ। 13-14 मास्यीकाकी पुह-पोहमो थाम्ज्यीगी ख्याया़ला टास्यी-देले ताङदे येहबा। चो़वो येशू मास्यीकाकी काटीन, किन्ज्योकी चेवा दाङ नाम्पार-ताहक्पा थुकी छोक्पा ख्या थाम्ज्यी ङ्याम्बु ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.