२ कोरिन्थी 12 - ह्योल्मोपावलकी ज्याल्गा दाङ छेर्मा 1 ङाहगी छ्य़ेन्दो तेनॱराङ कोहएँ। दि लाहमले ङाहला च्यिॱआङ खेप्साङ मे़हॱनाङ चो़वो लाहमले ज़्योरक्यो ज्याल्गाया़ दाङ ङोह स्य़े च्य़ू नाङग्योकी तामया़ ङाह ख्याया़ला माएँराङ येहबा। 2 लोह च्युप्स्यी तोहङले काहल्ग्योगी ताम यिहम्बा। मास्यीकाला यिह छ्य़ेक्यो मेहन्दा च्यी़ला किन्ज्योगी ज़ुङदी स्यिहङगाम सुम्बा थु नोम फेप्सीन। खोला किन्ज्योगी ज़ुबु छ्याप्क्याङराङ नोम फेप-नाङबानी यिहला च्यी़राङ नोम फेप नाङबा ओ़हनी ङाहला क्यी़ह म़ेह, ओ़हदी किन्ज्यो च्यी़ला थुयी़ येहबा। 3 ङाह ओ़ह मिहला ङोह स्य़ेएँ, ज़ुबुला यिहम्बानी मिहम्बा, ओ़हनी ङाहला क्यी़ह म़ेह, यिहॱनाङ ओ़ह मिहला किन्ज्योगी स्यिहङगामला नोम फेप्सीन, दि ताम किन्ज्यो च्यी़ला थुयी़ येहबा। 4 ओहले ओ़हला स्येच्येॱराङ मे़हयोहङगेन्गी तामया़ खोगी थ़ेसीन, ओ़ह तामया़दी मिहगी माज्येॱआङ मेहयोहङगे। 5 ओ़ह मिहगी तेहन्दाला ङाह छ्य़ेन्दो तेन्गे, यिहॱनाङ ङाह राहङगी तेहन्दाला ङाहती मा फाम्बुया़ म़ेदी लेहमेन तामला छ्य़ेन्दो तेन्ज्ये म़ेह। 6 का़हलेॱआङ ङाहगी छ्य़ेन्दो तेन्ज्ये सेम्बा पेहॱराङ पेहसीमाना ङाह उल्दुम्बा डोज्ये म़ेह, च्यिबेमाना ङाहगी तेहन्दामकी तामया़ म़े तेहक्यो ओहङज्ये येह। यिहॱनाङ मिहया़गी ङाहगी मिहजीला थोङग्यो दाङ ङाह लाहमले थे़क्यो म़ेदी ल्हाक्पु सुज्यीगी ङाहला मा़हनेज्यु म़ेदी ङाह छ्य़ेन्दो तेन्गे यिहन्ज्यु राहङगी राहङला का़गे। 7 किन्ज्योगी ङाहला तिहङ-रिहङबुकी केच्याया़ माहङबुराङ तेन नाङसीन दि लाहमले ङाह माहङबु स्येर्क्या माहतेन्ज्यु म़ेदी का़ज्येला ङाहती ज़ुबुला सुह क्याहप च्य़ूगेन्गी छेर्मा च्यी़ नाङसीन पे येहना ओ़ह ती़ह गो-छ्येवागी स्याहप्च्यी च्यी़ यिहम्बा खोगी ताहन्दा ङाहला तुहक्पु तेर्केॱराङ येहबा। 8 दिला टा़ह च्य़ू नाङदोङ म़ेदी ङाहगी लेहमा सुम थु चो़वो ङ्याम्बु ओहर-छ्य़े स्युहसीन। 9 यिहॱनाङ चो़वोगी ङाहला दि ल़ेहमु सुङ नाङसीन, “ङाहती काटीन ख्येला दाङस्यी येह, च्यिबेमाना ङाहती ओङ, च्यिॱआङ स्युक म़ेहबाकी से़हया़ला छाङबु डोएँ।” ओ़ह सोङबे मास्यीकाकी ओङ ङाह ङ्याम्बु ज़्य़ू नाङज्यु म़ेदी ङाह मा-फाम्बु येहकेन्गी से़हया़ला ज्यिबुराङ सेम काहसो पेहती छ्य़ेन्दो तेन्गे। 10 ओ़ह सोङबे मास्यीकागी तेहन्दाला ङाह मा-फाम्बु डोॱनाङ, मिहया़गी ङाहला स्ये़हन्डील पेहॱनाङ, तुहक्पु तेरॱनाङ, खेन्दा-का़हबु डोॱनाङ, फसात पार तीॱनाङ ङाह सेम काहसो पेहकें च्यिबेमाना ङाह मा-फाम्बु येहना च्यी़राङ, ङाह स्युक छ्यिम्बु डो ख़ूएँ। कोरिन्थीया़गी तेहन्दाला पावलगी तुहङाल 11 ङाह उल्दुम्बा काहल्दी येह। ख्याया़गी ङाहला दि ल़ेहमु पेहच्येला उर्चु पेह च्य़ूसीन, च्यिबेमाना ख्याया़गी ङाहला ची़नाङ पेह कोहच्ये येहकें। च्यिबेमाना ङाह च्यिॱआङ मिहनॱनाङ, थाम्ज्यी म़ेदी छ्यिम्बु ल़ेह-पेनया़ म़ेदी फेमानी म़ेह। 12 ङाहगी ना़स्यीङ छ्यिम्बु पेहती ताक्छेनया़ ओहले याहम्जेम्बा दाङ ओङ छ्यिम्बुगी ल़ेहया़ पेहती ख्याया़गी पाहरक्यीला ङाह ल़ेह-पेन काहल्ग्यो दास्यी तेर सिहन्दी येह। 13 लेहमेन थाम्ज्यी छेन्छोकया़ म़ेदी ङाहगी ख्याया़ला का़हन्दी तामला मा-फाम्बु ज़्या़दी येहबा ले? देजे च्यी़राङ यिहम्बा– ङाहगी ख्या ङ्याम्बु टाङगा माहलाङ! दि तुहक्पु ख्याया़लाॱआङ तेर कोहच्ये येहकें यिहॱनाङ ङाहगी दि तुहक्पु ख्याला माहतेर्पा पेहती ङाहगी जोल्दी पेहसीन, ङाहला कोहङदा नाङदोङ। 14 येहपाराङ ङाह ख्यासाला ओहङज्ये पेहको येह। दि थेबे ङाह लेहमा सुम डोएँ। यिहॱनाङ ख्याया़ला का़हन्दीॱआङ डोसोङगी तेहन्दाला तुहक्पु मेहतेर, च्यिबेमाना ङाहला ख्या ङ्याम्बु येहकेन्गी क्युह-नोहर मिहम्बा यिहॱनाङ ङाहला ख्याया़राङ कोहकें। च्यिबेमाना आबा-आमागी तेहन्दाला पुह पोहमोगी मिहम्बा, यिहॱनाङ पुह पोहमोगी तेहन्दाला गा आबा-आमागी सी़ कोहकें। 15 ख्याया़गी तेहन्दाला ङाह ना थाम्ज्यीराङ से़हया़ क़ेहनाङ पेहती तेर्के, ओहले राहङगी ज़ुबुराङ तेर कोहएँ माॱनाङ तेर्कें। का़हलेॱआङ ङाहगी ख्याया़ला चेवा माहङबु पेहसीमाना च्यि ख्यागी ङाहलादी चेवा ङ्ये़हमु पेहकें ले? 16 ङाहगी ख्याया़ला ठाल माहकाल म़ेदीनी ख्यागी माउ दु यिहॱनाङ काहजेगी ङाहगी टिहम्बु पेहती ख्याया़ला फसाएँ तीसीन म़ेदी मा-ओहङ। 17 च्यि ङाहगी ताङग्यो मिहया़ लाहमले ख्या ङ्याम्बु च्यिरा खेप्साङ लेहम्बा ले? 18 ङाहगी तीतसला फेप्तोङ म़ेदी ओहर-छ्य़े स्युहसीन, ओहले ओ़ह नो़हला खो ङ्याम्बुराङ ताङसीन। च्यि तीतसगी ख्या लाहमले च्यिरा खेप्साङ लेहम्बा ले? च्यि ङ्यिहगी सेम च्यी़ डी़दी छ्याप्स्यी ना च्यी़ थो़दी ल़ेह माहबे ले? 19 देजे माहङबु तामया़ ङ्यिहगी राहङगी राहङला थार च्य़ूज्येगी तेहन्दाला माक्यो यिहन्डो म़ेदी ख्यागी सेमला ऩे येहटो। ए ङाहगी च्याहम्बु रो़हया़, ङ्यिह किन्ज्योगी दिनला मास्यीका लाहमले ताम माएँराङ येहबा, दि थाम्ज्यी ख्याया़ला याहरक्यी ख्येर्च्येगी तेहन्दाला यिहम्बा। 20 च्यिबेमाना ङाह ख्याला थु ओहङगेमु ङाहगी ने़क्यो ल़ेहमु ख्या मेहयोहङडो ओहले ख्यागी ने़क्यो ल़ेहमु ङाह मेहयोहङडो म़ेदी ङाहला ज्यी़सु येहकें। ख्याया़गी पाहरक्यीला ठ़ूस्यी, ठादो, स्यिहताङ, राहङदी च्यी़राङ ख्येप्साङ ताएँ, ख्येर क्याहप्कें, मिहदाम च्येहके, छ्य़ेन्दो तेन्गे दाङ मिहला गो़ थोम च्य़ूगेन्गी तामया़ॱआङ ओहङडो। 21 ङाह येहपाराङ ओहङगेमु ङाहती किन्ज्योगी ङाहला ख्याया़गी दिनला फेमा ज़ो नाङज्ये येह म़ेदी ङाहला ज्यी़सु येहबा, ओहले खुङया़गी तोहङले तिहक्पा पेहक्यो येहकें, ओहले राहङगी पेहक्योकी मेहचाङा ल़ेहया़, छ्येउ-छ्येंमु दाङ छारा ल़ेहया़ लाहमले तोहरोङॱआङ खुङया़गी स्या़बा माहन्डुपा सोङबे ङाहगी खुङगी तेहन्दाला ङ्याहङेन पेह कोहच्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.