२ कोरिन्थी 11 - ह्योल्मोपावल दाङ चिहन क्याहप्केन्गी ल़ेह-पेनया़ 1 ङाह ख्याया़ला ओहर-छ्य़े स्युहउ येह, ङाह सिपाज्यी उल्दुम्बा येहॱनाङ ङाहला ख्याया़गी ना़ तेर। 2 किन्ज्योगी ख्याया़ला ठादो जे नाङग्यो ल़ेहमु ङाहॱआङ ख्याया़ला ठादो पेहकें। च्यिमे च्यी़राङ माहक्पा साम्बा मास्यीका ङ्याम्बु ङाहगी ख्याया़ला लाङज्याङ पेह तेर्सीन, ता़ह ङाह ख्याया़ला च्यिॱआङ क्येन म़ेहबा नाम्पार-ताहक्पा नामा साम्बाला ल़ेहमु पेहती माहक्पा साम्बागी लाहक्पाला च्योल्ज्ये सेम्बा येहबा। 3 यिहॱनाङ काह-ठि पेहती प्रुहलगी राहङ टिहम्बुगी हव्वाला गो़ कोर च्य़ूबा, ओ़हठीॱराङ पेहती मास्यीका ङो़ले ख्याया़गी सेम ज़ाङबु दाङ चाङमा सेम थो़दी क्याप्केंमु ख्याया़गी नोम्साङला गो़ कोर च्य़ूगेनी म़ेदी ङाह ज्यी़दी येहबा। 4 च्यिबेमाना का़हलेॱआङ लाहला मिहया़ ओहङदी ङ्यिहगी स्येक्योगी येशू म़ेदी लेहमेनॱराङ येशूगी तेहन्दाला स्य़ेसीन माना, कि-माना ख्यागी ज़्योरक्योगी नाम्पार-ताहक्पा थु म़ेदी लेहमेनॱराङ नाम्पार-ताहक्पा थु लेहन्सीनमाना, कि-माना ख्याया़गी ज़्योरक्यो या़हबु लेहङगु म़ेदी लेहमेनॱराङ या़हबु लेहङगु लोक पेहसीनमाना ख्या दि थाम्ज्यीगी दिनला ग्यो़बाराङ ज्युल्गु दु। 5 ङाह च्यि से़हॱलाङ ओ़ह राहङगी राहङला छ्यिम्बु ने़गे ल़ेह-पेनया़ म़ेदी मा-फाम्बु म़ेह। 6 ङाह ताम माज्येला ओहजे ख़ेबा मे़हॱनाङ, ङाहला येहन्देनदी च्यिॱआङ कोम्बु म़ेह। दि ताम ङ्यिहगी ख्याया़ला ना थाम्ज्यीले ङोह स्य़े च्य़ूदी येहबा। 7 राहङगी राहङला फेमा जे़दी ख्याया़लाती क्या़ज्ये म़ेदी किन्ज्योगी या़हबु लेहङगुया़ ङाहगी ख्या ङ्याम्बु च्यिॱआङ माहलेहम्बा पेहती आहन्डाराङ स्येकेमु च्यि ङाहगी तिहक्पा पेहक्यो यिहम्बा ले? 8 ख्याया़ला स्याहप्तो स्य़ूहज्येला लेहमेन छेन्छोकया़ यिहन्ज्यु टाङगा ती़हदे ङाहगी ओ़ह छेन्छोकया़लाती लुट ती़सीन। 9 ख्या ङ्याम्बु येहकेंमु ङाहला माहङबुराङ से़हया़दी कोम्बु काहल्दी येहकें यिहॱनाङ ङाहगी सुज्यीॱलाङ तुहक्पु माहतेर, च्यिबेमाना माकेडोनिया लुहङबाले ओहङग्यो नो़हया़गी ङाहला कोहकेन्गी से़हया़ थाम्ज्यीराङ छाङबु पेह तेर्सीन। दि तामला ङाहगी ख्याया़ला तोहङलेॱआङ तुहक्पु तेर्ती म़ेह ओहले तिङलेॱआङ तेर्च्ये म़ेह। 10 मास्यीकागी तेहन्दाम ङाह ङ्याम्बु येह, ओहले अखैया काहङग्याराङ ङाहगी छ्य़ेन्दो तेन्दी माक्यो तामला सुज्यीगीॱआङ का़ ख़ूज्ये म़ेह। 11 च्यिबे? च्यि ङाहगी ख्याया़ला चेवा मेहबेकें म़ेदी यिहम्बा ले? ङाहगी ख्याया़ला चेवा पेहकें माएँनी किन्ज्योलाॱराङ थुयी़ येहबा। 12 ओ़ह मिहया़गी ज्यिबुराङ स्येर्क्या तेन्दी पेहक्योगी ल़ेहया़ला ङ्यिह ङ्याम्बा येहबा म़ेदी माएँ। ओ़ह मिहया़गी “दि ल़ेह ङ्यिहगीराङ पेहक्यो यिहम्बा” म़ेदी माक्योगी तामला ङाहगी च्ये ख़ूज्यु। ओ़ह सोङबे ङाहगी पेहक्यो ल़ेह ङाह पेहतीराङ तेहकें। 13 च्यिबेमाना ओ़ह ल़ेहमु मिहया़नी चिहन क्याहप्केन्गी ल़ेह-पेनया़ दाङ गो़ कोर च्य़ूदी ल़ेह पेहकेनया़ यिहम्बा, ओहले मास्यीकाकी ल़ेह-पेनगी चुहम्रुल ची़हदे खुङ फार छुर युहगे। 14 यिहॱनाङ, दि याहम्जेम्बागी ताम मिहम्बा, च्यिबेमाना ती़ह गो-छ्येवागीॱआङ स्यिहङगामकी स्याहप्च्यीकी चुहम्रुल ची़हदे येहसेर क्याहप्ती येहपा छ्या़गे। 15 ओ़ह सोङबे ती़ह गो-छ्येवागी स्याहप्च्यीया़गीॱआङ टाहङदेनगी स्याहप्च्यीया़ ल़ेहमुराङ चुहम्रुल ची़हगे सोङबे दि याहम्जेम्बागी ताम मिहम्बा। ज्युक्स्योलला खुङगी राहङगी पेहक्योगी ल़ेहला ते़बे ङ्य़ेहबा खुर कोहज्ये येह। पावलगी तुहक्पुया़ 16 ङाह येहपाराङ माएँ, ङाहला सुगीॱआङ उल्दुम्बा मा़हनेज्यु। का़हलेॱआङ ओ़ह ल़ेहमु ऩेॱराङ ने़सीमाना ङाहला उल्दुम्बाला ल़ेहमु पेहती लोक पेहतोङ। ओ़हठी यिहन्सीमाना ङाहगीॱआङ सिपाज्यी छ्य़ेन्दो तेन ख़ूज्ये येह। 17 तेहम्बाराङ छ्य़ेन्दो तेन्गेन्गी तामया़ म़ेदी ङाह उल्दुम्बाकी तामया़ॱराङ म़े तेहती येहबा। दि ङाहला चो़वोगी मा च्य़ूक्यो मिहम्बा। 18 राहङगी ज़्योरक्यो जाम्बुलीङकी से़हया़ला मिह माहङबुगीराङ छ्य़ेन्दो तेन्गे। ओ़ह सोङबे ङाहॱआङ छ्य़ेन्दो तेन्गे। 19 ख्याया़नी ज्यिबुराङ ख्येम्बा-ताहक्पु काहल्ग्यो सोङबे उल्दुम्बाया़ला क़ेहनाङ पेहती ना़गु दुबा। 20 च्यिबेमाना सु मिह च्यी़गी ख्याया़ला योक्पु ज़ोॱनाङ, ख्या ङ्याम्बु येहकेन्गी थाम्ज्यीराङ से़हया़ फ्रो़नाङ, ख्या लाहमले खेप्साङ लेहनॱनाङ, ख्या थो़ला ओङ छ्ये़नाॱआङ, ख्याती डाम्बाला थाल्ज्या क्याहपॱनाङ ख्याया़नी थाम्ज्यीराङ ना़गु दु। 21 यिहॱनाङ ङ्यिह मा-फाम्बु येहकें सोङबे ओ़ह ल़ेहमु पेह मा़हखु, ओहले ङाह ङोह छा कोहसीन। यिहॱनाङ सुज्यीगी च्यिरा तामला छ्य़ेन्दो तेन्सीमाना, ङाहॱआङ ओ़ह तामला छ्य़ेन्दो तेन्गे। यिहम्बा, ङाह उल्दुम्बा ल़ेहमुराङ ताम माएँ। 22 च्यि खुङया़ हिब्रू यिहम्बा? ङाहॱआङ यिहम्बा। च्यि खुङ इस्राएली यिहम्बा? ङाहॱआङ यिहम्बा। च्यि खुङ अब्राहामकी छार्क्यीनया़ यिहम्बा? ङाहॱआङ यिहम्बा। 23 च्यि खुङ मास्यीकाला स्याहप्तो स्युहएँगी स्याहप्च्यीया़ यिहम्बा? ङाह तोहरोङ खुङ म़ेदी या़हबु स्याहप्तो स्युहएँगी मिह यिहम्बा– ङ्योम्बाठीॱराङ ङाह ताम माएँराङ येहबा। ङाहगी ज्यिबुराङ कादुप च्येसीन। चोन-खाङला ङाह लेहमा माहङबुराङ छ्यिसीन। टाहङजीराङ म़ेहबा थु ङाहगी ताक्स्यु साहसीन। स्यिवाकी खाला ङाह लेहमा माहङबुराङ छ्यिसीन। 24 लेहमा ङा ङाहगी यहूदीया़गी लाहक्पाले ज़्यिप-च्युला च्यी़ छ्याक्पा ताक्स्यु साहसीन। 25 लेहमा सुम ङाहला प्रेहकागी तुहङसीन। लेहमा च्यी़ तोहगी क्याहप्सीन। लेहमा सुम ङाह जा़क्योगी छ्यु-टुह छ्या़मे-स्यी़हमे काहल्सीन। लेहमा च्यी़ ङाह ङ्यिहन-नुहप छो-क्याहम्जोलाॱराङ तेह कोहसीन। 26 ङाह कोर्याङला डोएँमु लेहमा माहङबुराङ चाङबुगी ज्यिक्पा, च्याहक्पाया़गी ज्यिक्पा, राहङदीराङ क्यिहपागी मिहया़गी ज्यिक्पा, लेहमेन क्यिहपागी मिहया़गी ज्यिक्पा, क्याहसाकी ज्यिक्पा, रिह काम्बुगी ज्यिक्पा, छो-क्याहम्जोकी ज्यिक्पा, चिहन क्याहप्के नो़हया़ लाहमले ओहङगेन्गी ज्यिक्पाला छ्यिसीन। 27 ङाहगी तुहक्पुगी ती़हजीॱलाङ ज्यिबुराङ कादुप च्याहङदी नुहप काहङ माहङ्याहल्बा पेहती लेहमा माहङबुराङ तेह कोहसीन। ङाह लेहमा माहङबुराङ टेहपा तो़बा दाङ खा कोम्दी च्यिॱआङ साह माहङ्युहङबा पेहती काप्च्या म़ेहबा ख्या़बुला कोहङदी तेह कोहसीन। 28 देजे च्यी़राङ तुहक्पु मिहम्बा थाम्ज्यीराङ छेन्छोकया़गी तुहङाल ङाहगी गो़ थो़ला येहबा। 29 सुज्यी मा-फाम्बु काहल्सीन माना ङाहॱआङ मा-फाम्बु डोएँ। सुज्यी तिहक्पाला छ्यिसीमाना ङाहला स्यिहताङ लाहङगो येहकें। 30 ङाहगी छ्य़ेन्दो तेनॱराङ कोहसीमाना ङाह राहङला मा-फाम्बु तेन्गेन्गी तामया़ला छ्य़ेन्दो तेन्गे। 31 चो़वो येशूकी किन्ज्यो दाङ याहप, मिहरो नाहम्स्यी किन्दुॱराङ सोनाम-साक्पु ज़्य़ू नाङदी येह, ङाहगी स्योप मेहक्याहप्कें म़ेदी मिहरोला थुयी़ येह। 32 दमस्कसला अरितस क्याहल्बुकी स्युहङ-पेनगी ङाहला ज़ुङज्ये म़ेदी दमस्कस क्याहसा कोर-क्यिहलेॱराङ सुङगेन मिहया़ ज़्या़दी येहकें। 33 यिहॱनाङ चिक्पागी कार्कुङ च्यी़ले डालोला लू़दी ङाहला माहर पाप तेरक्यो सोङबे ङाह खोती लाहक्पाले थार्सीन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.