२ कोरिन्थी 10 - ह्योल्मोचो़वो लाहमले पावलकी ओङ 1 ङाह पावल, ख्याया़गी दिनलाती स्यिहवा पेहकु दु लो, ओहले था़-रिहङबु येहकेमुती ख्याया़ ङ्याम्बु सोहम्ग्याङ तेन्गु दु म़ेदी ख्या नाहङला ताम च्येहकु दु लो। यिहॱनाङ मास्यीकाकी स्यिहवा दाङ थुज्यी लाहमले ङाह ख्याया़ला ओहर-छ्य़े स्युहउ येह। 2 ङ्यिहगी जाम्बुलीङकी मिहया़गी ल़ेहमु छ्याप्स्यी पेहती ल़ेह पेहकु दु म़ेदी माएँया़ला ङाह ख्याया़साला ओहङगेमु ख्यागी दिनला खा चोक्पा तेन माहकोहज्यु। 3 च्यिबेमाना ङ्यिह जाम्बुलीङदी यिहम्बा, यिहॱनाङ ङ्यिह किन्ज्योला ङोह मा़हस्येबाकी मिहया़ ल़ेहमु ठ़ूस्यी मेहबेकें। 4 च्यिबेमाना ङ्यिहती मा़ क्याहप्केन्गी छेन्ज्याया़ दि जाम्बुलीङदी मिहम्बा, यिहॱनाङ किन्ज्योगी नाङग्यो छेन्ज्याया़ लाहमले ती़हया़गी ओङला तोङ च्य़ूज्ये येह ओहले मे़हकोहएँकी ताम लोहङडीया़लाॱआङ फाम च्य़ूज्ये येह। ओहले दि छेन्ज्याया़गी टाहया़ तेहकेन्गी थाम्ज्यीराङ ग्या़या़ रोम्ज्ये येह। 5 किन्ज्योगी येहन्देनला टाह पेहती लोहङडी पेहकेनया़ दाङ ठादोगी स्यिहताङ ङाहर्क्याल पेहती तुहक्पु तेर्केया़ला ङ्यिह तोङ च्य़ूगे, ओहले ना थाम्ज्यीगी साम्लुया़ला ताहमला ज़्या़दी मास्यीकाकी काया़ ङ्यिहन्गेन्दी ज़ोएँ। 6 ख्याया़गी थाम्ज्यीराङ काया़ ची़ सिहन फान्ज्यो लेहमेन का मी़हची़गेनया़ला ङ्य़ेहबा काल्ज्येला ङ्यिह ठाबे पेहती तेहच्ये येह। 7 ख्याया़नी फिला थोङगेन्गी छ्यालुया़ला च्यी़राङ गा ताउ दु। का़हन्दी मिहगी “ङाह मास्यीकाती यिहम्बा” म़ेदी राहङगी सेम तिहङ यिहन्ज्युराङ यिह छ्य़ेक्यो येहबा। ओ़ह ल़ेहमु मिहगी खो मास्यीकाती यिहन्गे ल़ेहमुराङ ङ्यिहॱआङ मास्यीकातीॱराङ यिहम्बा म़ेदी ङोह स्य़े कोहएँ। 8 ख्याला नोङज्येगी तेहन्दाला मिहम्बा, यिहॱनाङ ख्याला याहरक्यी ख्येर्च्येला चो़वोगी ङ्यिहला ओङ नाङदी येह। दि ओङगी तेहन्दाला ङाहगी कोहकें म़ेदी माहङबु छ्य़ेन्दो तेनॱनाङ ङाह ङोह मेहछाएँ। 9 ङाहगी ख्याया़ला प्रुहक्योगी यिहगीया़ ख्याया़ला ज्यी़-ङोर तेन्ज्येगी तेहन्दाला प्रुहक्यो यिहम्बा म़ेदी मा़हने। 10 लाहलागी दि ल़ेहमु माउ दु, “पावलगी यिहगीया़ ज्यिबुराङ च्यान्दी दाङ ठो़ ओहङगे, यिहॱनाङ मिहगी दिनला जोम्गेमुदी खो ज्यिबुराङ मा-फाम्बु दु ओहले खोगी माएँ तामला च्यिॱआङ तेहन्दा मिहन्दु!” 11 ओ़ह ल़ेहमु मिहया़गी टेहम्बा ज्य़ा़ज्यु, ङ्यिहगी था़-रिहङबुलेगी प्रुहक्योगी ताम दाङ ख्यागी दिनला येहकेंमु पेहकेन्गी ल़ेहला च्यिॱआङ ख्येपार मेहयोहङगे। 12 राहङगी राहङला छ्यिम्बु ने़गे मिहया़ ङ्याम्बु ङ्यिहगी राहङला तुहर मी़हखुएँ ओहले खुङ ङ्याम्बु टाहल च्यी़ला तेहच्येला ङ्यिह आ़रॱआङ मेहबेकें! यिहॱनाङ खुङ उल्दुम्बा काहल्दी राहङगी राहङला च्यी़गी च्यी़ला छे क्याहप्कें ओहले तुहर्कें। 13 ङ्यिह राहङदी सा-छ्याम गोम्दी छ्य़ेन्दो मेहतेन। किन्ज्योगी छे क्याहप नाङग्योकी सा-छ्याम ङ्यिह मे़हगोम। ख्याया़ॱआङ दि सा-छ्याम नाहङलाराङ छ्यिकें। 14 तेहम्बाराङ, मास्यीकाकी लेहङगु या़हबुया़ ख्यासाला क्याल्गेन तोहङस्यो मिह ङ्यिहया़ॱराङ यिहम्बा, ओ़ह सोङबे ङ्यिहगी छ्य़ेन्दो तेन्ग्योदी ल्हाक्पु माहकाहल, ङ्यिहगी राहङगी पेहक्योगी ल़ेहला ते़बे च्यी़राङ छ्य़ेन्दो तेन्ग्यो यिहम्बा। 15 ङ्यिह राहङगी सा-छ्याम गोम्दी लेहमेनगी कादुप च्येती पेहक्योगी ल़ेहला छ्य़ेन्दो मेहतेन, यिहॱनाङ ङ्यिहती रेहवा दि यिहम्बा, ख्याया़ तेहपाला याहरक्यी पेहती डोएँमु ख्याया़गी पाहरक्यीला ङ्यिहती सा-छ्याम तोहरोङ छ्यिम्बु पेहती डोज्ये येह। 16 दि ल़ेहमु पेहती ङ्यिहगी मास्यीकाकी लेहङगु या़हबुया़ खुर्ती कोरिन्थी क्याहसा म़ेदीॱआङ था़-रिहङबु येहकेन्गी ग्या़या़ला डो ख़ूज्ये येह, ओहले लेहमेन मिहगी ल़ेह पेहक्योगी ग्या़ला, “दि ङ्यिहगी पेहक्यो यिहन” म़ेदी टा़हन्दी तेन कोहज्ये म़ेह। 17 “छ्य़ेन्दो तेन्गेन्दीगी चो़वो छ्येवागी तेहन्दाला च्यी़राङ छ्य़ेन्दो तेन्ज्यु।” 18 च्यिबेमाना सुज्यीगी “ङाह मिह या़हबु यिहन म़ेदीमाॱराङ खो मिह या़हबु डोएँ मिहम्बा।” यिहॱनाङ चो़वोगी या़हबु सी़हक्यो मिह च्यी़राङ या़हबु यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.