२ कोरिन्थी 1 - ह्योल्मो1 किन्ज्योगी थु लाहमले मास्यीका येशूगी ल़ेह-पेन पावल दाङ ओहराङगी नो़ह तिमोथी लाहमले, कोरिन्थला येहकेन्गी किन्ज्योगी छेन्छोकला, ओहले अखैयाला येहकेन्गी थाम्ज्यी मास्यीकाकी पुह पोहमोया़ला दि यिहगी प्रुहएँॱराङ येहबा। 2 किन्ज्यो ओहराङगी याहप दाङ चो़वो येशू मास्यीका लाहमले ख्याया़ला काटीन दाङ स्य़िहदे ओहङज्यु। ओहराङला आ़र क्ये च्य़ू नाङगेन्गी किन्ज्यो 3 ओहराङ चो़वो येशू मास्यीकाकी किन्ज्यो दाङ याहप, चेवा जे नाङगेन्गी याहप दाङ थाम्ज्यीला स्य़िहदे नाङगेन्गी किन्ज्योला क्याहल्स्यो-क्याहल्स्यो ओहङज्यु। 4 किन्ज्योगी ओहराङगी थाम्ज्यीराङ तुहक्पुया़ला स्य़िहदे नाङगे, च्यिबेमाना ओहराङगीॱआङ किन्ज्यो लाहमले ज़्योरक्योगी ओ़ह स्य़िहदे लाहमलेॱराङ लेहमेन तुहक्पुला छ्यिक्योगी मिहया़ला स्य़िहदे तेर ख़ूज्यु म़ेदी यिहम्बा। 5 च्यिबेमाना मास्यीकागी तुहक्पु खुर नाङग्यो ल़ेहमुराङ ङ्यिहगीॱआङ मास्यीकागी तेहन्दाला माहङबु म़ेदी माहङबु तुहक्पु खुर्ती येहबा। ओ़हठीॱराङ पेहती किन्ज्योगी मास्यीका लाहमले ङ्यिहला माहङबु म़ेदी माहङबु स्य़िहदे नाङदी येहबा। 6 ङ्यिहगी तुहक्पु ङ्युहङग्योदी ओ़ह ख्याया़गी स्य़िहदे दाङ थार्पागी तेहन्दाला यिहम्बा। ओहले किन्ज्योगी ङ्यिहला स्य़िहदे नाङग्योदीॱआङ ओ़ह ख्याया़गी स्य़िहदेगी तेहन्दाला यिहम्बा। ङ्यिहगी खुरक्योकी ओ़ह तुहक्पुया़राङ ख्याया़गी ना़स्यीङ छ्यिम्बु पेहती ना़ ख़ूज्ये येह। 7 ख्याया़गी तेहन्दाला ङ्यिहगी रेहवा नाहमॱआङ याहर-माहर डोज्ये म़ेह। च्यिबेमाना ङ्यिहगी तुहक्पुला ख्याया़गीॱआङ काह-ठि पेहती तुहक्पु खुर्पा ओ़हठीॱराङ पेहती किन्ज्योगी ङ्यिहला स्य़िहदे नाङगेमु ख्याया़ॱलाङ स्य़िहदे नाङज्ये येह ओ़ह ङ्यिहया़ला या़हबु पेहती क्यी़ह येहबा। 8 आदा-नो़ह दाङ आज्यी-नुहमुया़, ङ्यिहगी एशियाला खुरक्योकी तुहक्पुगी तेहन्दाला ङाह ख्याया़ला माएँ। च्यिबेमाना ङ्यिहगी ना़ॱराङ मी़हखुएँगी तुहक्पुया़ ङ्यिह थो़ला बाप्सीन, ओ़ह लाहमले थार्टो माएँदीनी रेहवाराङ म़ेहबा येहकें। 9 ङ्यिहनी “लो, ता़ह स्यिएँगी ती़हजी लेप्सीन दु” माएँ सेम क्येक्यो येहकें। ङ्यिह राहङ थो़ला मिहम्बा यिहॱनाङ स्यिक्योया़ला सोम्बो लो़ह च्य़ू नाङगे किन्ज्यो थो़ला म़ेहबा पेह ख़ूज्यु म़ेदीराङ दि ल़ेहमु काहल्ग्यो यिहम्बा। 10 मिहरोगी ङ्यिहया़ला ओ़ह ल़ेहमु ङ्याहम्छेया़ लाहमले थार च्य़ू नाङसीन, ओहले थार च्य़ू नाङज्ये येह। ओहले मिहरोगी ङ्यिहया़ला येहपाराङॱआङ थार च्य़ू नाङज्ये येह म़ेदी ङ्यिहगी मिहरो थो़लाराङ रेहवा पेहती येहबा। 11 ख्याया़गीॱआङ सोल्वाङ लाहमले ङ्यिहया़ला रो़हराम पेहकेनॱराङ येहबा। दि ल़ेहमु पेहती मिह माहङबुगी ङ्यिहया़गी तेहन्दाला किन्ज्यो ङ्याम्बु सोल्वाङ ताप्केमु मिहरोगी ङ्यिहला मेलाम नाङज्ये येह ओहले मिह माहङबुगी ङ्यिहगी मेलामगी तेहन्दाला किन्ज्योला थुज्यी-छ्ये़ फुल्ज्ये येह। पावल कोरिन्थला माहकाहल्बा 12 ङ्यिह दि जाम्बुलीङला च्यी़राङ मिहम्बा यिहॱनाङ ख्याया़गी दिनॱलाङ ङ्यिहगी राहङगी डोलु-तेहलुया़ टाहङबु पेहती किन्ज्योगी थु-ङ्य़ेबुगी मिहजी ताङदी येहबा दि तामला ङ्यिह ख्याया़ला छ्य़ेन्दो तेन्दी मा ख़ूएँ ओहले ङ्यिहगी राहङगी नावागीॱआङ दिराङ पाङबु तेर्के, दि जाम्बुलीङगी रिहक्स्यी लाहमले मिहम्बा, यिहॱनाङ दि किन्ज्योगी काटीन लाहमले यिहम्बा। 13-14 च्यिबेमाना ख्याया़गी टा़हॱराङ मी़हखुएँ दाङ ह्अॱराङ मेहकोहएँगी तामया़ ङ्यिह दि यिहगीला मी़हप्रुहएँ, ओहले ङाह रेहवा पेहको येह, ख्याया़गी दि थाम्ज्यी या़हबु पेहती ह्अ कोहच्ये येह, काह-ठि पेहती ख्याया़गी ङ्यिहया़ला सिपाज्यी च्यी़राङ ङोह स्य़ेक्यो येहबा, ओ़हठीॱराङ पेहती चो़वो येशू फेप नाङगेन ती़हजीला ख्याया़गी ङ्यिहया़ला रेबेॱराङ ङोह स्ये़ज्ये येह, ओहले ङ्यिहगी ख्याया़गी तेहन्दाला छ्य़ेन्दो तेन्ग्यो ल़ेहमु ख्याया़गीॱआङ ङ्यिहगी तेहन्दाला छ्य़ेन्दो तेन ख़ूज्ये येह। 15 ओहराङगी च्यी़गी च्यी़ला या़हबु पेहती ङोह स्य़ेक्यो सोङबे ङाहला थिउ-निहउ क्यी़ह येहकें सोङबेॱराङ ख्याया़ला लेहमा ङ्यी़ फेन्दोप ओहङज्यु म़ेदी तोहङस्यो ख्यासाला थु ओहङज्ये म़ेदी सेम्बा पेहसीन। 16 माकेडोनियाला डोएँमुॱआङ ख्याया़ला थू़दी डोएँ ओहले लो़ह ओहङगेमुॱआङ ख्याया़ला थ़ूगे ओहले ओहलेगी यहूदीयाला डोएँमुदी ख्याया़गी ङाहला रो़हराम पेह तेर्च्ये येह म़ेदी ने़क्यो येहबा। 17 दि ल़ेहमु पेहच्ये छोल्गेमु च्यि ङाहगी सेम थिक-चिला म़ेहबागी मिहगी ल़ेहमु पेहताङ तेम्बा ले? च्यि ङाहगी राहङगी ल़ेहया़गी तेहन्दाला च्याहम्दा ज़ोएँमु जाम्बुलीङगी मिहया़गी ल़ेहमु खा च्यी़गी नाहम “यिहम्बा” नाहम “मिहम्बा” म़ेदी मे़बा ले? 18 किन्ज्यो यिह-छ्य़ेबु येहकें ल़ेहमुराङ ङ्यिहगी या़हबु लेहङगुॱआङ “यिहम्बा” दाङ “मिहम्बा” काहल्दी म़ेह। 19 च्यिबेमाना किन्ज्योगी स़ेबु येशू मास्यीका लाहमले पे यिहॱना़: सिलास, तिमोथी दाङ ङाहगी ख्याया़गी पाहर्कीला स्येक्योगी लेहङगुला “यिहम्बा” दाङ “मिहम्बा” ङ्यिकाराङ म़ेहबा येहकें। यिहॱनाङ मिहरोला नाहम्माॱनाङ “यिहम्बा” च्यी़राङ येहबा। 20 च्यिबेमाना किन्ज्योगी थाम्ज्यीराङ ताहम्ज्याया़ येशू मास्यीकाला “यिहम्बा” ओहङगे। ओ़ह सोङबेॱराङ मास्यीका लाहमले किन्ज्योगी ज़िज्यिदगी तेहन्दाला ङ्यिह “आमेन” म़ेदी माएँ। 21 यिहॱनाङ ङ्यिहला ख्या ङ्याम्बु मास्यीकाला सान्दी ज़ो नाङगे दाङ ङ्यिहला खा फे़ नाङगेन्दी किन्ज्योॱराङ यिहम्बा। 22 मिहरोगी ओहराङ थो़ला राहङगी पार क्याहप नाङदी येहबा, ओहले ओहराङगी सेमला बे़ना क्याहप्ती नाम्पार-ताहक्पा थु नाङदी येहबा। 23 किन्ज्योॱराङ ङाहगी पाङबु ज़्य़ू नाङदी येहबा, ख्याया़ला च्यिॱआङ का़हबु दाङ ज्यिक्पा माहयोहङज्यु म़ेदीराङ ङाह कोरिन्थला माहयोहङबा यिहम्बा। 24 ख्याया़गी तेहपा थो़ला ङ्यिह ओङ मे़हछ्येएँ, यिहॱनाङ ख्याया़गी काहसोगी तेहन्दाला ख्याया़ ङ्याम्बु डी़दी ल़ेह पेहकें। च्यिबेमाना राहङगी तेहपाला ख्याया़ सान्दी पेहती तेहती येहबा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.