१ तिमोथी 6 - ह्योल्मो1 लाबुगी ङ्यास्यीङ चो़ला येहकें थाम्ज्यीगी राहङ-राहङगी ताहक्पुला निङ थाक्पा यिहन्ज्युराङ ची़नाङ पेह कोहकें म़ेदी टेहम्बा साल्दोङ। ओ़ह ल़ेहमु यिहन्सीमाना च्यी़राङ सुगीॱआङ किन्ज्योगी छेन दाङ ओहराङगी तेरक्योगी लुहङला फातुर च़ू ख़ूज्ये म़ेह। 2 यिह छ्य़ेबा ताहक्पुया़ला खुङ योक्पुया़गी, यिह-छ्य़ेला आदा-नो़हया़ॱराङ यिहन म़ेदी ङ्युहङसे़ चा़ माहबे। बरु खुङया़गी ताहक्पुया़ला जेन माहङबु स्याहप्तो स्युहज्यु, च्यिबेमाना खुङया़गी स्याहप्तो स्युहक्यो लाहमले खेप्साङ ज्योर्केया़ यिह छ्य़ेबा दाङ ज्यिबुराङ च्याहम्बु रो़हया़ यिहम्बा। दि थाम्ज्यी पेहॱराङ कोहएँगी ल़ेहया़ ची़ज्येला लोप्तोङ ओहले ओहर-छ्य़े स्यी़हदोङ। चिहन क्याहप्ती लोप्केन्गी लुहङ दाङ तेहन्दामकी क्युह 3 का़हलेॱआङ सुज्यीगी चिहन क्याहप्ती लोप्कु दु मासीमाना ओ़ह ल़ेहमु लुहङया़ ओहराङगी चो़वो येशू मास्यीकागी तेहन्दामकी लुहङ ङ्याम्बु मी़हन्डीएँ ओहले खुङगी ओहराङला किन्ज्योला क्याप कोहएँकी लुहङया़ मेहलोप्कें 4 खो छ्य़ेन्दो तेन्गे, ओहले खोगी च्यिॱआङ स्य़ेक्यो मेहयोहङगे। खोगी स्यिती काम्बुगी तामया़ला स्येपा तुहर्के, ओहले ओ़ह ताम ऱेह-ऱेह थो़दी मिह ङ्याम्बु जिङज्येला डोएँ। दि तामया़गीनी ठादो, ठ़ूस्यी सिहङदा, स्ये़हन्डील दाङ चोक्पा सेम ङ्येहम्बाया़ च्यी़राङ क्ये च्य़ूएँ। 5 ओ़ह ल़ेहमु मिहया़गी नावा नोहङग्योया़ दाङ तेहन्दामकी लाहमलेगी लो़हक्यो मिहया़की पाहरक्यीला ठ़ूस्यी सिहङदा च्यी़राङ ख्योङगे, ओहले किन्ज्योला म़ेहबा पेहक्योदी छ्युक्पु डोज्येगी तेहन्दाला यिहम्बा म़ेदी नोम्साङ ताङगे। 6 राहङ ङ्याम्बु च्यि येहबा ओ़हदीलाॱराङ क़ेहनाङ पेहती किन्ज्योला क्याप्केन्दीॱराङ थाम्ज्यी म़ेदी छ्यिम्बु फेन्दोप यिहम्बा। 7 च्यिबेमाना ओहराङगी दि जाम्बुलीङला ओहङगेमु च्यिॱआङ ख्योङदी माहयोहङ ओहले दि जाम्बुलीङ क्युर ज़्या़दी डोएँमुॱआङ च्यिॱआङ ख्येर्ती डो ख़ूज्ये म़ेह। 8 यिहॱनाङ ओहराङला साहज्ये दाङ केहन्ज्ये थु येहसीमानानी ओहराङ ओ़हदीलाॱराङ सेम काहसो पेहच्ये येह। 9 यिहॱनाङ छ्युक्पु डोज्ये छोल्गे मिहया़ ङ्याहम्छेला छ्यिकें, मिताला छ्यिकें ओहले माहङबुराङ तेहन्दा म़ेहबा दाङ राहङला ने़-क्याल्गेन्गी सेम्बाया़ला नोम्साङ ताङगे, ओ़ह ल़ेहमु केच्याया़गी मिहया़ला नोङगेन ओहले तोङ च्य़ूगे। 10 च्यिबेमाना ल़ेह चोक्पा ना थाम्ज्यीगी चार्ङ्यीदी क्युह-नोहरकी निङज्यी यिहम्बा। काहजे मिहया़गीनी क्युह-नोहरकी ह्अम्बाला छ्यिती तेहपा पेहच्ये क्युर्ती चोक्पा लाहम ङो़ले स्य़ूहदी येहबा। ओहले तुहक्पुगी खुङया़की सेम ज्यिबुराङ सुह क्याहप्ती येह। पावलगी तिमोथीला लोप्ताम क्याहप्क्यो 11 यिहॱनाङ ख्ये किन्ज्योकी मिह यिहन्गे सोङबे दि थाम्ज्यी चोक्पा तामया़ ङो़ले था़-रिहङबुराङ तेह, ओहले ख्येगी राहङगी टाहङदेनला किन्ज्योला क्याप्च्येला, यिह-छ्य़ेला, चेवाला, थिक-चि पेहती तेहच्येला ओहले राहङला ङ्येम्बु ज़ोएँगी से़हया़ थो़ला राहङगी सेम ताङदोङ। 12 यिह-छ्य़ेकी या़हस्यो मा़ क्याहप्तोङ। था़ म़ेहबाकी मिहली ज़ुङदी ज़्या़दोङ। दिगी तेहन्दालाराङ ख्येला क़े क्याहप नाङग्यो येहकें, ख्येगी माहङबुराङ पाङबु तेर्के मिहया़गी दिनला राहङगी यिह-छ्य़ेकी तेहन्दाला तेहन्दामकी पाङबु तेरक्यो येहकें। 13 थाम्ज्यीराङ से़हया़ला मिहली नाङगेन किन्ज्यो दाङ पन्तियस पिलातसकी दिनला पाङबु नाङगेन्गी मास्यीका येशूगी दिनला, 14 ङाह ख्येला दि का तेर्को येह, ख्येगी ओहराङगी चो़वो येशू मास्यीका माहफेप थु ख्येगी दि काया़ या़हबु पेहती ची़दोङ ओहले सुगीॱआङ ख्येला फातुर च़ू माहङ्युहङज्यु। 15 मिह-रो़हराङ मेलामकी किन्ज्यो दाङ थाम्ज्यी म़ेदी ओङज्या छ्यिम्बु, क्याहल्बुया़दीॱआङ क्याहल्बु, चो़वोया़गीॱआङ चो़वोगी ठाबे ती़हजीला मास्यीकाला ताङ नाङज्ये येह। 16 नाहमॱआङ टोहङ मेहनाङगेन्दीनी किन्ज्यो च्यी़राङ यिहम्बा ओहले मिहरो सुॱआङ लेप मी़हखुएँगी क्या-साङेला ज़्य़ू नाङगे। मिहरोला सुज्यीगीॱआङ नाहरे थु थोङदी म़ेह ओहले थोङॱआङ मी़हखुएँ। नाहम माॱनाङ ज़्य़ू नाङगेन्गी ओङ दाङ चा़ मिहरो ङ्याम्बुराङ ज़्य़ू नाङज्यु। आमेन। 17 दि जाम्बुलीङकी छ्युक्पु मिहया़ला छ्य़ेन्दो माहतेन म़ेदी म़ेदोङ, ओहले ले खाल मी़हखुएँकी क्युह-नोहर थो़ला मिहम्बा यिहॱनाङ ओहराङला थाम्ज्यी से़हया़ माहङबु म़ेदी माहङबु जेती नाङगेन किन्ज्यो थो़ला रेहवा पेहतोङ म़ेदी खुङया़ला का तेर। 18 खुङया़गी या़हबु ल़ेहया़ पेहच्यु, ल़ेह या़हबुया़ला छ्युक्पु डो ख़ूज्यु, ओहले सेम ज़ाङबु ओहङ ख़ूज्यु ओहले लेहमेन मिहया़ला तेर ख़ूज्यु। 19 दि ल़ेहमु पेहती राहङगी तिङमा ओहङगेन्गी मिहलीकी तेहन्दाला या़हबु ब्राम तिङदी क्युह-नोहर सी़दे ज़्या़ ख़ूज्यु। ओहले खुङया़गी तेहन्दामकी मिहली ज़ुङदी ज़्या़ ख़ूज्ये येह। 20 तिमोथी, ख्येला चि क्याहप्क्योगी तामया़ या़हबु पेहती ज़्यो़। उल्दुम्बा तामया़ दाङ फेन मे़हथोएँगी तामया़ला ताहक्स्यार पेहकेन्गी तामया़ ओ़ह माहताहक्पाकी येहन्देनया़ यिहम्बा ओ़ह ङो़ले ख्ये था़-रिहङबुराङ तेह। 21 च्यिबेमाना काहजे मिहया़गी दि ल़ेहमु से़हया़की तिङ ङ्या़गेमु यिह-छ्य़े ङो़ले लो़हक्यो येह। किन्ज्योगी काटीन ख्या थाम्ज्यी ङ्याम्बु ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.