१ तिमोथी 5 - ह्योल्मोयिह-छ्य़ेबाया़गी पेहॱराङ कोहकेन्गी ठाल 1 केहपु मिहया़ ङ्याम्बु ठो़ तेन्दी ताम माहमा यिहॱनाङ खुङया़ला राहङगी आबाला ल़ेहमु पेहती लोप्ताम क्याहप्तोङ। ओहले राहङ म़ेदी फेमाया़ला राहङगी नो़हला ल़ेहमुराङ पेहती लोप्तोङ। 2 ओहले ओ़ह ल़ेहमुराङ पेहती क़ेहमु मिहया़ला राहङगी आमाला ल़ेहमुराङ ओहले राहङ म़ेदी फेमा पी़हमी पेहजाया़लाती राहङगी नुहमुला ल़ेहमु पेहती च्याहङज्यु सेम्बा थो़दी लोप्ताम क्याहप्तोङ। 3 चारा पेहकेन मिह सुॱआङ म़ेहबाकी ह्युग्मोया़ला ची़नाङ पेहतोङ। 4 का़हन्दीॱआङ ह्युग्मोती पुह-पोहमो दाङ छो़ छामुया़ येहसीमाना, खुङया़गी थाम्ज्यी म़ेदी तोहङले राहङ खाङबा मे़हमेया़ ङो़ले राहङगी पेहॱराङ कोहकेन्गी टाहङबु ठिमया़ ची़ज्ये लोप्च्यु, ओहले राहङ आबा-आमाकी सोक्यो टिहलेन च्याल ख़ूज्यु, च्यिबेमाना दि किन्ज्योकी ज़ी़नाङला लोक जेच्ये सी़हगे। 5 ओहले राहङदी सुॱआङ म़ेहबाकी ह्युग्मोगी राहङगी रेहवा किन्ज्यो थो़ला च्यी़राङ ज़्या़क्यो ओहङगे। ओहले मोहगी ङ्यिहन-नुहपराङ स्यिहवा पेहती किन्ज्यो ङ्याम्बु सोल्वाङ ताप्ती तेहकें। 6 यिहॱनाङ का़हलेॱआङ ह्युग्मोगी राहङगी मिहजी ङ्याहमसाङ-खाम्साङ च्यी़राङ पेहती ताङसीमाना मोह सोम्बो यिहॱनाङ स्यिक्यो ल़ेहमुराङ यिहम्बा। 7 खुङया़ च्यिॱआङ क्येन म़ेहबा पेहती तेह ख़ूज्यु म़ेदी खुङया़ला दि का तेर्तोङ। 8 का़हलेॱआङ सुज्यीगी राहङगी ङ्येहवाया़ दाङ माज्येराङ माना राहङदीराङ खाङबा मे़हमेया़ला मेह तासीमानानी खोगी तेहपाला मा-लोक पेहकें ओहले यिह मे़हछ्येगे मिहया़ म़ेदीॱआङ खो जेन चोक्पा ओहङगे। 9 लोह खाल सुम म़ेदी थो़ला लेप्क्योकी ह्युग्मोया़ला च्यी़राङ ह्युग्मोया़गी कार्छ्याला ज़्या़दोङ। ओ़हॱलाङ मोहगी ख्योवा च्यी़ ङ्याम्बु च्यी़राङ पा़हमा पेहक्यो ओहङ कोहकें। 10 ओहले मोहगी या़हबु ल़ेहया़ पेहक्यो ओहङ कोहकें, पुह पोहमोया़ला या़हबु पेहती चारा पेहक्यो ओहङ कोहकें, टोहम्बोया़ला ता़हनाङ-ताहम्जी पेहक्यो ओहङ कोहकें, किन्ज्योला यिह छ्य़ेक्यो नाम्पार-ताहक्पा मिहया़ती काङबा ठी़ तेरक्यो ओहङ कोहकें, तुहक्पुला छ्यिक्यो मिहया़ला रो़हराम पेहक्यो ओहङ कोहकें ओहले दि ल़ेहमुराङ ल़ेह या़हबुया़ माहङबुॱराङ पेहक्यो ओहङ कोहकें। 11 ओहले ल्हो ट़ूहप्च्यु म़ेदी माहर-तपकी ह्युग्मोलाती ह्युग्मोगी कार्छ्याला माहप्रुह, च्यिबेमाना खुङगी लोहङ ज्योर लुहङ म़ेहबा मास्यीकागी छ्या़लेया़ पेहच्ये क्युर्ती येहपाराङ पा़हमा पेहच्ये येह। 12 दि ल़ेहमु पेहती खुङया़गी ज़्या़क्योगी तोहङस्यो ताहम्ज्या टेहम्बा च्येहक्यो सोङबे खुङया़ ङ्य़ेहबाला छ्यिकें। 13 येहपाराङ खुङया़ लेहमेन मिहया़गी खाङबा-खाङबाला कोर्केन्गी बा़नी काहल्दी खुङ फेनराङ मे़हथोएँ काहल्ग्यो ओहङगे। ओहजे च्यी़राङ मिहम्बा खुङगी मिहया़गी ताम च्येहकेन, लेहमेन मिहया़की ल़ेहला लाहक्पा च्य़ूगेन दाङ माज्ये मेहयोहङगे तामया़ॱआङ म़ेदी डोएँ ओहङगे। 14 ओ़ह सोङबे ख्योवा स्यिक्यो स्यार्मा पी़हमी-पेहजाया़गी पा़हमा पेहच्यु म़ेदी ङाह लोप्ताम क्याहप्को येह। ओहले खुङया़गी पुह पोहमोया़ क्येदी राहङगी टोहङबा ज़ुङदी तेहच्यु। ओ़हठी यिहन्सीमाना च्यी़राङ ओहराङगी टाहया़गी खुङला क्येन ताएँगी लोहङ ज्योर्च्ये म़ेह। 15 च्यिबेमाना लाहला ह्युग्मो पेहजाया़नी तोहङलेराङ ती़ह गो-छ्येवा ङो़ले ग्युर सिहन्दी येह। 16 का़हलेॱआङ किन्ज्योला यिह छ्य़ेक्यो पी़हमीदी राहङगी ङ्येहवाया़ नाहङला ह्युग्मोया़ येहसीमाना मोहगी खुङया़ला रो़हराम पेहच्यु। दि ल़ेहमु पेहसीमाना छेन्छोककी खुङया़गी ठाल खुर कोहच्ये म़ेह। ओ़ह सोङबे राहङदी ङ्येहवाया़ सुॱआङ म़ेहबाकी ह्युग्मोया़ला च्यी़राङ छेन्छोककी रो़हराम पेहच्यु। 17 ज्यिबुराङ तुहक्पु पेहती छेन्छोकला ताएँ एल्डरया़ला ची़नाङ पेहती खुङगी ज्योर कोहकेन्गी ले़गा म़ेदीनी माहङबुराङ ज्योर कोहएँ, खास पेहतीती किन्ज्योगी लुहङदेन प्रा साल्गे दाङ लोप्च्येला कादुप च्येकें एल्डरया़गीनी दि ज्योरॱटाङ कोहकें। 18 च्यिबेमाना सुङरापगी दि ल़ेहमु सुङ नाङगे, “दाइँ (सोवा प्रुप्केन्गी ल़ेहला च्य़ूएँ) पेहकेन लाङगोकी खाला खास्यो माहक्याहप ओहले ल़ेह पेहकेन ल़ेहमीगी राहङगी ले़गा ज्योरॱटाङ कोहएँ।” 19 मेहन्दा ङ्यी़ सुम पाङबु माहतेह थु छेन्छोककी एल्डरला च़ूक्यो फातुर ङ्यिहनॱराङ माहङ्यीहन। 20 तिहक्पा पेहतीराङ तेहकेनया़ला मिह थाम्ज्यीगी दिनला बार्ता लाङदोङ, ओ़ह ल़ेहमु पेहसीमाना च्यी़राङ छेन्छोककी लेहमेन मिहया़ॱआङ ज्यी़ज्ये येहबा। 21 ङाह ख्येला किन्ज्यो, मास्यीका येशू दाङ दाम्ग्योकी स्यिहङगामकी स्याहप्च्यीया़गी दिनला दि लुहङ ची़दोङ म़ेदी का तेर्को येह। ओहले ख्येगी सुॱलाङ ङ्येम्बा-ङ्य़ेहरी माहबेबा पेहती दि ठिमया़ ची़दोङ। 22 ह्अदा-ह्ओदे पेहती सु मिहज्यी थो़ला लाहक्पा ज़्या़दी खुङला छेन्छोककी एल्डर माहज़ो़। ओहले लेहमेन मिहया़गी पेहकेन्गी तिहक्पागी ल़ेहला लाहक्पा माहक्याहप। राहङला नाहम्माॱनाङ नाम्पार-ताहक्पा ज़्या़दोङ। 23 तोहङमा ल़ेहमु छ्यु च्यी़राङ थुङगे माहबे, यिहॱनाङ ख्येगी फोवाकी तेहन्दाला ओहले येहपा-येहपाराङ ला़ मेहखा काहल्ग्यो सोङबे सिपी रे़ह-रे़ह कुहन्डुमकी-निङगु थुङगे पेहतोङ। 24 लाहला मिहया़दीनी तिहक्पा छ्यिसाल-नाहङसालाॱराङ पेहती थोङगेन्दी ओहङगे ओहले खुङया़ला तोहङलेराङ ङ्य़ेहबा फोएँ। यिहॱनाङ काहजे मिहया़गी तिहक्पादी तिङ-तिङले च्यी़राङ थोङगेन्दी ओहङगे। 25 ओ़ह ल़ेहमुराङ पेहती काहजे या़हबु ल़ेहया़दी तोहङलेराङ छ्यिसाल-नाहङसाल पेहती थोङगे। ओहले छ्यिसाल-नाहङसाल पेहती माहथोङबाकी ल़ेहया़ हिप्तीॱआङ तेह मी़हखुएँ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.