१ तिमोथी 4 - ह्योल्मोचिहन क्याहप्ती लोप्च्युङ तेर्के लोबेनया़ला ज्यी़-ङोर 1 नाम्पार-ताहक्पा थुगी छ्यिसाल-नाहङसाल जेती सुङ नाङगे, तिङ-तिङले काहजे मिहया़ गो़ कोर च्य़ूएँगी नाम्स्यी दाङ ल्हान्डा-ल्हेन्डीया़की लुहङया़ थो़ला सेम ताङदी तेहपा लो़हज्ये येह। 2 दि ल़ेहमु लुहङया़ स्योप क्याहप्ती यिहन्दो तेन्गे मिहया़ लाहमले ओहङगे यिहम्बा, खुङया़गी नावा च्या़ टोहमोगी टाहक्यो ल़ेहमु ओहङगे। 3 ओहले खुङया़गी पा़हमा पेहच्ये मेहयोहङगे ओहले काहजे से़हया़ साहज्येॱआङ मेहयोहङगे म़ेदी लोप्कें। यिहॱनाङ यिह-छ्य़े दाङ तेहन्दामकी स्याहलला ङोह स्य़ेगेया़गी थुज्यी-छ्ये़ फुल्दी दि साहज्ये से़हया़ साहज्ये ओहङगे च्यिबेमाना किन्ज्योगीॱराङ दि थाम्ज्यी ज़ो नाङग्यो यिहम्बा। 4 किन्ज्योगी ज़ो नाङग्योकी थाम्ज्यीराङ से़हया़ या़हबु येहबा। किन्ज्योला थुज्यी-छ्ये़ फुल्दी साहसीन माना च्यि से़हॱआङ मा-लोक पेह मेहकोहएँ। 5 च्यिबेमाना किन्ज्योगी सुङ दाङ सोल्वाङगीॱराङ ओ़ह से़हया़ला चाङमा ज़ो नाङगे। 6 का़हलेॱआङ ख्येगी आदा-नो़ह दाङ आज्यी-नुहमुया़ला दि लुहङ लोप तेर्सीमाना ख्येगी ची़दे ओङग्योकी तेहन्दामकी लुहङ दाङ तेहपाकी सुङला छार्ती ख्ये मास्यीका येशूती ज्यिबुराङ या़हबु स्याहप्तो स्युहएँगी मिह डोज्ये येह। 7 किन्ज्योला मे़हक्याप्के दाङ तेहन्दा म़ेहबागी तोहङमा तोहङमागी पेतामया़ ङो़ले था़-रिहङबुराङ तेह। बरु किन्ज्योला क्याप्ती राहङगी मिहजी या़हबु ताङज्येला च्याहङदार पेहतोङ। 8 च्यिबेमाना ज़ुबुगी तेहन्दाला च्याहङदार पेहक्योदीॱआङ या़हबु यिहम्बा यिहॱनाङ किन्ज्योला क्याहप्च्येला च्याहङदार पेहक्योदीनी च्यी़ला माना खेप्साङ ओहङगे यिहम्बा च्यिबेमाना दिगी ताहन्दा दाङ तिङमागी मिहली ङ्यिकाराङकी तेहन्दाला ताहम्ज्या ज़्या़क्यो ओहङगे। 9 दि ताम खार्पे तेहम्बा-तेहन्सुम दाङ सेम तिहङ यिहन्ज्युराङ ची़ ख़ूएँ सी़हदाङदी येह। 10 ओ़ह सोङबे ङ्यिह ला़ खाॱनाङ मे़हखाॱनाङ कादुप च्येती ल़ेह पेहकें च्यिबेमाना ङ्यिहगी रेहवा सोम्बो ज़्य़ू नाङगेन किन्ज्यो थो़ला ज़्या़दी येह। ओहले मिह-रो़हराङ मिह थाम्ज्यीला थार्पा नाङगेन्गी किन्ज्यो यिहम्बा खास पेहतीती मिहरो थो़ला म़ेहबा पेहकेनया़ला थार्पा नाङगेन्गी किन्ज्यो यिहम्बा। 11 दि केच्याया़गी तेहन्दालाराङ का तेर्ती लोप्तोङ। 12 ज़्योम्बु येहबा म़ेदी सुज्यीगीॱआङ ख्येला ङ्येन्ज्येन पेह माहङ्युहङज्यु। यिहॱनाङ किन्ज्योला यिह छ्य़ेक्यो मिहया़की दिनला ख्ये राहङगी ताम मालु, डोलु-तेहलु, चेवा, तेहपाला ओहले राहङगी मिहजी चाङमा ज़्या़दी मिनाम तेन ख़ूज्यु। 13 ङाह माहयोहङ थु ख्येगी मिहया़ला छ्य़े टा़हदी ङ्यिहन च्य़ूदोङ, खुङया़ला आ़र क्ये च्य़ूदोङ ओहले लुहङया़ लोप्तोङ। 14 ख्येगी ज्योरक्योकी काबापला याहङसे मा़हने। ओ़ह काबाप लुहङतेम्बागी स्याहल सुङगेमु ओहले छेन्छोककी एल्डरया़गी ख्ये थो़ला लाहक्पा ज़्या़गेमु ख्येला ज्योरक्योकी काबाप यिहम्बा। 15 दि से़हया़ला ख्येगी सेम तिहङ यिहन्ज्युराङ या़हबु पेहती ची़दोङ ओहले दि से़हला थिर पेहती तेहतोङ। दि ल़ेहमु पेहसीमाना ख्ये याहरक्यी काहल्ग्यो मिह थाम्ज्यीगी थोङज्ये येह। 16 राहङगी तेहन्दाला ओहले राहङगी लुहङगी तेहन्दाला जेम्बु पेहती तेह। दि तामया़ला तिङ ङ्या़दीॱराङ तेह। दि ल़ेहमु पेहसीमाना ख्ये दाङ ख्येगी ताम ङ्यिहन्गे ख्या ङ्यिकागीराङ थार्पा ज्योर्च्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.