१ तिमोथी 3 - ह्योल्मोछेन्छोककी लोबेनया़ 1 दि ताम खार्पे तेहन्दाम यिहम्बा, का़हलेॱआङ सुज्यीगी छेन्छोकला लोबेन पेहकेन्की सेम पेहसीमाना खोगी नोम्साङ ताङग्यो या़हबु यिहम्बा। 2 ओ़ह सोङबे छेन्छोककी लोबेनला च्यिॱआङ ङ्य़ेहबा फो़क्यो ओहङज्ये मेहयोहङगे। ओहले खोदी पी़हमी च्यी़मे च्यी़राङ ओहङ कोहएँ। खो राहङगी राहङला थिला ज़्या़ ख़ूएँदी ओहङ कोहएँ, ना़स्यीङ छ्यिम्बु पेह ख़ूएँदी ओहङ कोहएँ, ओहले खोगी डोलु-तेहलु या़हबु ओहङ कोहएँ, खोगी टोहम्बोया़ला ता़हनाङ-ताहम्जी पेह स्य़े कोहएँ ओहले या़हबु पेहती लुहङ तेर ख़ूएँदी ओहङ कोहएँ 3 छ्याङसीवा दाङ स्यिहताङ छान्दी पेहकेन्दी ओहङज्ये मेहयोहङगे। यिहॱनाङ खो ङ्येम्ज्युङ ओहङ कोहएँ, ठ़ूस्यी सिहङदा मेहबेकेन्दी ओहङ कोहएँ, टाङगादी ह्अम्बा मेहबेकेन्दी ओहङ कोहएँ। 4 खोगी राहङगी खाङबा या़हबु पेहती ता ख़ूएँदी ओहङ कोहएँ ओहले राहङ पुह पोहमोया़गी राहङला चा़ पेहती राहङगी माक्योगी तामया़ ङ्यिहन्गेन्दी राहङगी पुह पोहमोया़ला ज़ो ख़ू कोहएँ। 5 च्यिबेमाना राहङगी खाङबाला या़हबु पेहती ता मी़हखुएँ मिहगी काह-ठि पेहती छेन्छोकला ता ख़ूज्ये ले? 6 खो थेरेरे किन्ज्योला यिह-छ्य़े पेहक्यो मिह ओहङज्ये मेहयोहङगे, मिहन्सीमाना खो छ्य़ेन्दो तेन्दी ती़ह गो-छ्येवागी ङ्य़ेहबाला छ्यिच्ये येह 7 येहपाराङ, फि मिहया़गी तन्दोलाॱआङ खो या़हबु सी़ह कोहएँ, मिहन्सीमाना खोती आब्रु स्योर्ज्ये येह ओहले खो ती़ह गो-छ्येवागी मिताला छ्यिच्ये येह। डिकनया़ 8 ओ़ह ल़ेहमुराङ पेहती डिकनया़ॱआङ च्याह-ठाक्पा ओहङ कोहकें, खुङ तेहन्दामकी तामया़ माएँदी ओहङ कोहकें, छ्याङसीवा ओहङज्ये मेहयोहङगे ओहले क्युहला लोपॱआङ पेहच्ये मेहयोहङगे। 9 खुङ राहङगीराङ ज़्योरक्योगी तेहपाकी तिहङ-रिहङबुगी तेहन्दामला नावा चाङमागी सी़दी ज़्या़ कोहकें। 10 थाम्ज्यी म़ेदी तोहङले डिकनला ङ्याहम च्ये कोहकें, ओहले खुङला च्यिॱआङ क्येन मे़हना च्यी़राङ खुङगी डिकनकी ल़ेहला स्याहप्तो स्युहज्यु। 11 डिकनकी पी़हमीॱया़ङ ओ़ह ल़ेहमुराङ पेहती टाह छ्याक्पा ओहङ कोहकें, मिह ताम मे़हच्येहकेन्दी ओहङ कोहकें, यिहॱनाङ ताम रेबेलाॱराङ राहङ सेम थिक-चिला ज़्या़गेन दाङ यिह-छ्य़ेबु ओहङ कोहकें। 12 छेन्छोककी डिनकया़ती पी़हमी च्यी़मे च्यी़राङ ओहङ कोहकें। ओहले खो राहङगी पेहजाया़ दाङ खाङबा मे़हमेया़ला या़हबु पेहती ता ख़ूएँदी ओहङ कोहकें। 13 च्यिबेमाना डिकनगी स्युह कोहएँगी स्याहप्तो सुगी या़हबु पेहती स्युहएँ खुङगी येशू मास्यीकाला येहकेन्गी तेहपागी तेहन्दाला लेहमेनया़लाॱआङ स्युक छ्यिम्बु पेहती मा ख़ूज्ये येह। तिहङ-रिहङबुगी ताम 14 ख्येसाला ङाह ग्यो़बाराङ ओहङगे रेहवा पेहती येह, यिहॱनाङ ङाह ख्येला दि यिहगी प्रुहएँॱराङ येह, 15 का़हलेॱआङ ङाह ओहङज्येला यिहन थो़सीमाना किन्ज्योगी क्याहल्सीला ओहराङगी डोलु-तेहलु काह-ठि ओहङ कोहकें माएँ ताम दि यिहगी लाहमले ङोह स्ये़दोङ। किन्ज्योगी क्याहल्सीदी सोम्बो ज़्य़ू नाङगेन किन्ज्योकी छेन्छोक यिहम्बा। दि किन्ज्योकी क्याहल-खाङ, तेहन्दामकी काप्स्यी दाङ ब्राम यिहम्बा। 16 तेहम्बाराङ किन्ज्योला क्याप्केन्गी तेहन्दा ङोहॱराङ स्ये मी़हखुएँगी नाहङ-ताम काहजे छ्यिम्बु येहबा? मास्यीका मिहगी पी़नाङ नोम्दी फेप नाङसीन, नाम्पार-ताहक्पा थुगी मिहरोला टाहङबु यिहम्बा म़ेदी तेन नाङसीन ओहले मिहरोला स्यिहङगामकी स्याहप्च्यीया़गीॱआङ थोङसीन। ओहले मिहरोकी तेहन्दाला लुहङबा लुहङबागी मिहया़गी थ़ेसीन, जाम्बुलीङला मिहरोला मिहया़गी यिह-छ्य़े पेहसीन ओहले किन्ज्योगी मिहरोला येहपाराङ स्यिहङगामला ज्यिबुराङ चा़ जेती नोम फेप्सीन! |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.