१ तिमोथी 2 - ह्योल्मोमिह थाम्ज्यीगी तेहन्दाला सोल्वाङ ताप्तोङ 1 ता़ह थाम्ज्यी म़ेदी तोहङले ङाह माएँ, मिह थाम्ज्यीगी तेहन्दाला किन्ज्योला ङ्येम्बु पेहती पी़मु च़ूदी स्यी़हदोङ, सोल्वाङ ताप्तोङ, निङ थाक्पा यिहन्ज्युराङ ओहर-छ्य़े स्यी़हदोङ ओहले दि थाम्ज्यीगी तेहन्दाला थुज्यी-छ्ये़ फुल्दोङ। 2 क्याहल्बुया़ दाङ थाम्ज्यी पोम्बोया़गी तेहन्दालाॱआङ सोल्वाङ ताप्तोङ। ओ़ह ल़ेहमु पेहसीमाना ओहराङ क्यिपु दाङ स्य़िहदे पेहती किन्ज्योला क्याप्ती किन्ज्योगी थु ङ्ये़बाकी मिहजी ताङ ख़ूज्ये येह। 3 ओहराङला थार्पा नाङगेन किन्ज्योगी ज़ी़दाङला दि या़हबु यिहम्बा ओहले मिहरोगी दि ल़ेहमुराङ थु-सेम जे नाङगे। 4 मिह थाम्ज्यीगी थार्पा ज्योर ख़ूज्यु ओहले खुङया़गी तेहन्दामकी स्याहलला या़हबु पेहती ङोह स्य़े ख़ूज्यु म़ेदी किन्ज्योगी थु-सेम जे नाङगे। 5 ओहराङ किन्ज्योॱआङ च्यिमे च्यी़राङ येह ओहले मिहया़ला किन्ज्यो ङ्याम्बु थ़ू च्य़ू थुप्केन्दीॱआङ च्यिमे च्यी़राङ येह, ओ़ह थ़ू च्य़ू नाङगेन मिहदी मास्यीका येशू यिहम्बा। 6 ओहले मिहरोगीॱराङ मिह थाम्ज्यीला थार्पा नाङज्येला राहङगी कुसोॱराङ च्यिहम्बा ताङ नाङसीन, ओ़हदी ठाबे ती़हजीला नाङग्योकी पाङबु यिहम्बा। 7 ओ़ह सोङबे ङाहगी लेहमेन क्यिहपागी मिहया़ला तेहपा दाङ तेहन्दामला लुहङ प्रा-साल्ज्येला चो़वोगी ङाहला ल़ेह-पेन दाङ लोबेन ज़ो नाङसीन। ङाहगी तेहम्बाराङ माक्यो यिहम्बा, स्योप क्याहप्ती म़ेह। 8 ओ़ह सोङबे ग्या़ थाम्ज्यीला क्येप-ख्योवाया़गी टाहङबु लाहक्पा क्या़दी स्यिहताङ माहबेबा पेहती, सेमङेन माहच्याङबा पेहती सोल्वाङ ताप्च्यु माएँ ङाहगी सेमला येहबा। 9 ओ़ह ल़ेहमुराङ पेहती पी़हमी पेहजाया़गीॱआङ राहङला ज्यार्पु थोङगेन्गी काप्च्याया़ या़हबु पेहती केहन्ज्यु। ओहले गो़गी टा माहङबु ज़ाप्ती, सेर, मोती दाङ ओहले रिहन माहङबु डोएँगी काप्च्याया़ माहकेहन्ज्यु। 10 यिहॱनाङ या़हबु-या़हबु ल़ेहया़ पेहती राहङला ज़ाप्च्यू, ओ़हदी किन्ज्योला क्याप्केन पी़हमी-पेहजाया़ला ज्यार्पु थोङगे। 11 पी़हमी-पेहजागी राहङगी छेन्छोककी गोबाया़गी ओङ चो़ला तेहती खाजुम्बा पेहती लोप्च्यु। 12 पी़हमी-पेहजागी क्येप-ख्योवाला लोप्कें दाङ ओङ छ्य़ेज्येला ङाह खुङला ओङ मेहतेर। पी़हमी-पेहजा खाजुम्बाला तेह कोहकें। 13 च्यिबेमाना किन्ज्योगी तोहङस्यो आदमला ज़ो नाङसीन, ओ़ह तिङले च्यी़राङ हव्वाला ज़ो नाङसीन। 14 आदम चिहनला छ्यिक्यो मिहम्बा, यिहॱनाङ हव्वा गा जोल्दी तिहक्पाला छ्यिक्यो यिहम्बा। 15 यिहॱनाङ पी़हमी-पेहजा स्यिहवा पेहती तेहपा, चेवा दाङ नाम्पार-ताहक्पा पेहती तेहसीमाना पेहजा क्येएँ ती़हजीला मोहला थार च्य़ू नाङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.