१ तिमोथी 1 - ह्योल्मोपावलगी तिमोथीला प्रुक्योकी तोहङस्यो यिहगी 1 ओहराङला थार्पा नाङगेन किन्ज्यो दाङ रेहवा नाङगेन मास्यीका येशूकी का लाहमले मास्यीका येशूकी ल़ेह-पेन काहल्ग्यो ङाह पावलगी दि यिहगी 2 यिह-छ्य़ेला ङाहगी तेहन्दामकी पुह तिमोथीला प्रुहएँॱराङ येहबा। किन्ज्यो याहप दाङ ओहराङगी चो़वो मास्यीका येशूगी ख्याया़ला काटीन, थुज्यी दाङ स्य़िहदे नाङज्यु। चिहन क्याहप्कें लोबेनया़ ङो़ले जेम्बु पेह 3 ङाह माकेडोनियाला डोएँमु ख्येला ओहर-छ्य़े स्युहक्यो ल़ेहमुराङ ख्ये एफिससलाॱराङ तेहतोङ, ओहले चिहन क्याहप्ती लोप्च्युङ लोप्कें मिहया़ला ओ़ह ल़ेहमु माहबे म़ेदी का़दोङ। 4 ख्येगी खुङया़ला ओ़ह ताहङबो-ताहङबोगी जे़मा पेतामया़ दाङ नाहमॱआङ सिहन्ज्ये म़ेहबागी आख्ये मे़हमेया़गी क्यिहया़ला ठिल्दी तेह मा़हच्यु। च्यिबेमाना ओ़हदीगीनी मिहया़ला स्येपा तुहर च्य़ूएँ ओहले यिह-छ्य़े लाहमले ङोह स्य़ेगे किन्ज्योकी राहङगी ज़ोक्योकी च्याहम्दाया़ला थेचुम च्यी़राङ क्ये च्य़ूगे। 5 ङ्यिहगी तेरक्यो लुहङगी तेहन्दादी चेवा यिहम्बा, का़हन्दी च्याहङज्यु सेम्बा, नावा या़हबु दाङ तेहन्दामकी तेहपा ङो़ले ओहङगे यिहम्बा। 6 लाहला मिहया़ दि थाम्ज्यी तामला टेहम्बा च्येहती स्यिती काम्बुगी तामया़ला याहङ तेहती येहबा। 7 खुङ छ्य़े-ठिम लोप्केन्गी लोबेन डोज्ये छोल्गे, यिहॱनाङ खुङ राहङगी दिराङ तेहन्दाम यिहम्बा म़ेदी माक्योगी ताम खुङ राहङगीराङ ह्अ मेहकोहएँ। 8 ओहराङला क्यी़ह येहबा, या़हबु पेहती ची़सीमाना छ्य़े-ठिम ज्यिबुराङ या़हबु ताम यिहम्बा। 9 ओहराङला दि तामॱआङ क्यी़ह ओहङ कोहएँ, ठिम या़हबु मिहगी तेहन्दाला ज़ोक्यो मिहम्बा। ठिमनी ठिमला गोम्गेन दाङ माक्योगी ताम मी़हङ्यिहन्गेनया़गी तेहन्दाला, किन्ज्योला मी़हचीगे दाङ तिहक्च्येम्बाया़गी तेहन्दाला, नाम्पार-ताहक्पा म़ेहबा दाङ छ्य़े मी़हची़गेनया़गी तेहन्दाला, राहङ आबा-आमाला सेकेंया़ दाङ मिह सेकेंया़गी तेहन्दाला, 10 छ्येउ-छ्येंमु पेहकेनया़गी तेहन्दाला, क्येप-ख्योवा नाहङदुङ देक्षा पेहकेनया़गी तेहन्दाला, मिह-छोङ पेहकेनया़गी तेहन्दाला, स्योप क्याहप्केनया़गी तेहन्दाला, स्योप क्याहप्ती पाङबु तेर्केनया़गी तेहन्दाला, ओहले तेहन्दामकी लुहङला टाह पेहती ल़ेह पेहकेनया़गी तेहन्दाला ज़ोक्यो यिहम्बा। 11 दि ङ्यिहगी लुहङ ओहराङला मेलाम नाङगेन किन्ज्योगी यिह-छ्य़े जे-नाङदी ङाहला नाङग्योकी ज़िज्यिद-च्येन लेहङगु या़हबुकी छ्य़े नाहङला ज्योर्के यिहम्बा। पावलला किन्ज्योकी काटीन 12 ङाहगी ल़ेहला ङाहला स्युक नाङगेन ओहराङगी चो़वो येशू मास्यीकाला ङाह थुज्यी-छ्ये़ फुल्गे। मिहरोगी ङाहला यिह-छ्य़ेबु ज़ी़ नाङदे राहङगी छ्या़लेला च्य़ू नाङसीन। 13 यिहन्ज्येनी ङाहगी तोहङले चो़वो येशूला ङ्याप्च्यु पेहसीन, तुहक्पु तेर्सीन ओहले स्ये़हन्डील पेहसीन। ओ़ह ती़हजीला ङाहगी चो़वो येशूला यिह मा़हछ्येबा येहकें ओहले दि थाम्ज्यी तामया़ ङाहगी ङोह मा़हस्येबा पेहती पेहक्यो सोङबे किन्ज्योगी ङाहला थुज्यी ज़ी़ नाङसीन। 14 किन्ज्योगी ङाहला ओहराङ चो़वोकी काटीन माहङबुराङ नाङग्यो सोङबे मास्यीका येशू लाहमले ङाहला तेहपा दाङ चेवा जे नाङसीन। 15 येशू मास्यीका तिहक्च्येम्बाया़लाॱराङ थार च्य़ू नाङज्येला दि जाम्बुलीङला फेप नाङग्यो यिहम्बा, दि सुङ मिह थाम्ज्यीगी ची़ कोहकेन्गी तेहन्दामकी ताम यिहम्बा। ओहले तिहक्च्येम्बाया़ नाहङला ङाह थाम्ज्यी म़ेदी छ्येस्यो यिहम्बा। 16 दि तेहन्दागीॱराङ मिहरोगी ङाहला थुज्यी ज़ी़ नाङसीन। ओहले ङाह तिहक्च्येम्बाया़ नाहङला थाम्ज्यी म़ेदी छ्येस्यो यिहन्दीॱआङ ङाह लाहमले येशू मास्यीकाकी राहङगी था़ म़ेहबाकी ना़स्यीङ छ्यिम्बु तेन नाङज्येला ङाहला पे ज़्या़ नाङसीन। दि पे, तिङले येशूला यिह छ्य़ेदी था़ म़ेहबा मिहली ज़ाङबु ज्योर्केया़गी तेहन्दाला यिहम्बा। 17 ता़ह नाहम्स्यी किन्दुगी क्याहल्बु, नाहम-माना ज़्य़ू नाङगे ओहले थोङ मी़हखुएँगी च्यी़मे च्यी़राङ किन्ज्योला नाहम-माना ची़नाङ ओहङज्यु, नाहम-माना ज़िज्यिद ओहङज्यु। आमेन। 18 त़ेदोङ, ङाहगी पुह तिमोथी, माहङबुराङ तोहङले ख्येगी तेहन्दाला किन्ज्यो ङो़ले सुङ नाङग्योकी स्याहलला ल़ेहमु पेहती ख्येला दि ल़ेहया़ चि क्याहप्केराङ येहबा। ख्येगी मा़ या़हबु क्याहप्तोङ। 19 ख्येगी राहङगी तेहपा दाङ नावा या़हबुला माहपाङ। लाहला मिहगी राहङगी नावागी माक्यो तामला मी़हची़एँमु राहङगी तेहपाकी छ्यु-टुहला नुप च्य़ूदी येह। 20 खुङया़ नाहङला हुमेनियस दाङ अलेक्जेन्डर यिहम्बा। किन्ज्योला ङ्याप्च्यु पेहकेन क्युर्च्यु म़ेदी ङाहगी खुङया़ला ती़ह गो-छ्येवागी लाहक्पाला चि क्याहप्ती येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.